18ಕ್ಕೆ ಕಾಲಿಟ್ಟ ಐಪಿಎಲ್‌ ಈಗ ಮೇಜರ್‌! ಟೂರ್ನಿ ಮಾದರಿ ಹೇಗೆ?

17 ವರ್ಷಗಳಿಂದ ಕ್ರಿಕೆಟ್ ಪ್ರಿಯರನ್ನು ರಂಜಿಸುತ್ತಿರುವ ಐಪಿಎಲ್ ಮಾರ್ಚ್ 22 ರಿಂದ ಮೇ 25 ರವರೆಗೆ ನಡೆಯಲಿದೆ. ಭಾರತದ 13 ಕ್ರೀಡಾಂಗಣಗಳು ಆತಿಥ್ಯ ವಹಿಸಲಿವೆ. 10 ತಂಡಗಳನ್ನು ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಪ್ರತಿ ತಂಡವು 14 ಪಂದ್ಯಗಳನ್ನು ಆಡುತ್ತದೆ. ಲೀಗ್ ಹಂತದಲ್ಲಿ ಅಗ್ರ ಎರಡು ತಂಡಗಳು ಕ್ವಾಲಿಫೈಯರ್-1 ಪ್ರವೇಶಿಸುತ್ತವೆ. ಚಾಂಪಿಯನ್ ತಂಡಕ್ಕೆ ₹20 ಕೋಟಿ ಬಹುಮಾನ ಸಿಗಲಿದೆ. ಒಟ್ಟು 74 ಪಂದ್ಯಗಳು ನಡೆಯಲಿವೆ.

ಕೋಲ್ಕತಾ: ಕಳೆದ 17 ವರ್ಷಗಳಿಂದಲೂ ಕ್ರಿಕೆಟ್‌ ಅಭಿಮಾನಿಗಳಿಗೆ ಭರಪೂರ ಮನರಂಜನೆ ಒದಗಿಸುತ್ತಿರುವ, ಜಾಗತಿಕ ಮಟ್ಟದ ಅತ್ಯಂತ ಶ್ರೇಷ್ಠ ಕ್ರಿಕೆಟ್‌ ಲೀಗ್‌ ಎನಿಸಿಕೊಂಡಿರುವ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌) ಪ್ರೌಢಾವಸ್ಥೆ ತಲುಪಿದೆ. ಬಹುನಿರೀಕ್ಷಿತ ಟೂರ್ನಿ ಕೆಲ ದಿನಗಳಲ್ಲೇ 18ನೇ ವರ್ಷಕ್ಕೆ ಕಾಲಿಡಲಿದೆ. ಟೂರ್ನಿ ಶನಿವಾರದಿಂದ ಆರಂಭಗೊಳ್ಳಲಿದ್ದು, 2 ತಿಂಗಳ ಕಾಲ ಕ್ರೀಡಾ ಹಬ್ಬ ರಂಗೇರಲಿದೆ.

ಈ ಬಾರಿ ಟೂರ್ನಿ ಮಾ.22ರಿಂದ ಮೇ 25ರ ವರೆಗೂ ನಡೆಯಲಿದೆ. ಬೆಂಗಳೂರು ಸೇರಿದಂತೆ ಭಾರತದ ಒಟ್ಟು 13 ಕ್ರೀಡಾಂಗಣಗಳು ಆತಿಥ್ಯ ವಹಿಸಲಿವೆ. ‘ಈ ಸಲ ಕಪ್‌ ನಮ್ದೇ’ ಎಂಬ ಹುಮ್ಮಸ್ಸಿನಲ್ಲಿ ಈ ಬಾರಿಯೂ ಟೂರ್ನಿಗೆ ಕಾಲಿಡಲಿರುವ ಆರ್‌ಸಿಬಿ ತಂಡ ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಕೆಕೆಆರ್‌ ವಿರುದ್ಧ ಕೋಲ್ಕತಾದ ಈಡನ್‌ ಗಾರ್ಡನ್‌ನಲ್ಲಿ ಸೆಣಸಾಡಲಿವೆ. ಬಹುತೇಕ ದಿನ ಒಂದೇ ಪಂದ್ಯ ನಡೆಯಲಿದ್ದು, ಕೆಲ ವಾರಾಂತ್ಯದಲ್ಲಿ ದಿನವೊಂದಕ್ಕೆ 2 ಪಂದ್ಯಗಳು ಆಯೋಜನೆಗೊಳ್ಳಲಿದೆ. ಮಧ್ಯಾಹ್ನದ ಪಂದ್ಯ 3.30ಕ್ಕೆ, ಮತ್ತೊಂದು ಪಂದ್ಯ ಸಂಜೆ 7.30ಕ್ಕೆ ಆರಂಭಗೊಳ್ಳಲಿವೆ.

ಇದನ್ನೂ ಓದಿ: ಐಪಿಎಲ್‌ನಲ್ಲಿ ಒಮ್ಮೆಯೂ ಕ್ಯಾಪ್ಟನ್ ಆಗದ ಟಾಪ್ 3 ದಿಗ್ಗಜ ಕ್ರಿಕೆಟಿಗರಿವರು!

ಟೂರ್ನಿ ಮಾದರಿ ಹೇಗೆ?: 

ಟೂರ್ನಿಯಲ್ಲಿ ಒಟ್ಟು 10 ತಂಡಗಳಿದ್ದು, ತಲಾ 5 ತಂಡಗಳ 2 ಗುಂಪುಗಳನ್ನಾಗಿ ವಿಂಗಡಿಸಲಾಗಿದೆ. ತಂಡಗಳ ಈ ವರೆಗಿನ ಸಾಧನೆ ಆಧಾರದಲ್ಲಿ 2 ಗುಂಪುಗಳನ್ನು ರಚಿಸಲಾಗಿದೆ. ಆದರೆ ಈ ಗುಂಪು ವರ್ಚುವಲ್‌ ರೀತಿ ಇದ್ದು, ಅಂಕಪಟ್ಟಿಯಲ್ಲಿ ಗಣನೆಗೆ ಬರುವುದಿಲ್ಲ. ಚೆನ್ನೈ, ಕೋಲ್ಕತಾ, ರಾಜಸ್ಥಾನ, ಆರ್‌ಸಿಬಿ ಹಾಗೂ ಪಂಜಾಬ್‌ ಕಿಂಗ್ಸ್‌ ‘ಎ’ ಗುಂಪಿನಲ್ಲಿವೆ. ಮುಂಬೈ, ಹೈದರಾಬಾದ್‌, ಗುಜರಾತ್‌, ಡೆಲ್ಲಿ ಹಾಗೂ ಲಖನೌ ‘ಬಿ’ ಗುಂಪಿನಲ್ಲಿವೆ. ಪ್ರತಿ ತಂಡ ತನ್ನ ಗುಂಪಿನಲ್ಲಿರುವ ಇತರ 4 ತಂಡಗಳ ವಿರುದ್ಧ ತಲಾ 2, ಹಾಗೂ ತನ್ನ ಸಮಾನಾಂತರವಾಗಿ ಮತ್ತೊಂದು ಗುಂಪಿನಲ್ಲಿರುವ ಒಂದು ತಂಡದ ವಿರುದ್ಧ 2 ಪಂದ್ಯ ಆಡಲಿದೆ. ಇನ್ನೊಂದು ಗುಂಪಿನ ಉಳಿದ 4 ತಂಡಗಳ ವಿರುದ್ಧ ತಲಾ 1 ಪಂದ್ಯ ಆಡಲಿದೆ. ಅಂದರೆ ಪ್ರತಿ ತಂಡಕ್ಕೆ ಒಟ್ಟು 14 ಪಂದ್ಯ.

ಲೀಗ್‌ ಹಂತದಲ್ಲಿ ಅಗ್ರ-2 ಸ್ಥಾನ ಪಡೆದ ತಂಡಗಳು ಕ್ವಾಲಿಫೈರ್‌-1 ಪ್ರವೇಶಿಸಲಿದ್ದು, ಅದರಲ್ಲಿ ಗೆದ್ದ ತಂಡ ನೇರವಾಗಿ ಫೈನಲ್‌ಗೇರಲಿದೆ. 3 ಮತ್ತು 4ನೇ ಸ್ಥಾನ ಪಡೆದ ತಂಡಗಳು ಎಲಿಮಿನೇಟರ್‌ನಲ್ಲಿ ಮುಖಾಮುಖಿಯಾಗಲಿವೆ. ಅದರಲ್ಲಿ ಗೆದ್ದ ತಂಡ ಕ್ವಾಲಿಫೈರ್‌-1ರಲ್ಲಿ ಸೋತ ತಂಡದ ವಿರುದ್ಧ ಆಡಬೇಕು. ಗೆದ್ದ ತಂಡ ಫೈನಲ್‌ಗೇರಲಿದೆ.

ಇದನ್ನೂ ಓದಿ: ಆರ್‌ಸಿಬಿ ತವರಿನ ಪಂದ್ಯಗಳ ಟಿಕೆಟ್‌ ಈ ಸಲವೂ ದುಬಾರಿ! ಒಂದು ಟಿಕೆಟ್ ಬೆಲೆ ಕೇವಲ ₹42,000

ಆತಿಥ್ಯ ಕ್ರೀಡಾಂಗಣಗಳು

ಕ್ರೀಡಾಂಗಣ ಪಂದ್ಯ - ಆಸನ ಸಾಮರ್ಥ್ಯ

ಬೆಂಗಳೂರು 07 - 35000

ಅಹ್ಮದಾಬಾದ್‌ 07 - 132000

ಚೆನ್ನೈ 07 - 39000

ಡೆಲ್ಲಿ 05 - 35200

ಲಖನೌ 07 - 50000

ಧರ್ಮಶಾಲಾ 03 - 21200

ಗುವಾಹಟಿ 02 - 46000

ಹೈದ್ರಾಬಾದ್‌ 09 - 55000

ಜೈಪುರ 05 - 25000

ಕೋಲ್ಕತಾ 09 - 68000

ಚಂಡೀಗಢ 04 - 38000

ಮುಂಬೈ 07 - 38100

ವಿಶಾಖಪಟ್ಟಣಂ 02 - 27500

ಟೂರ್ನಿ ಅಂಕಿ-ಅಂಶ

74 ಪಂದ್ಯ: ಈ ಬಾರಿ ಟೂರ್ನಿಯಲ್ಲಿ ಒಟ್ಟು 74 ಪಂದ್ಯಗಳು ನಡೆಯಲಿವೆ.

65 ದಿನ: 18ನೇ ಆವೃತ್ತಿ ಟೂರ್ನಿ ನಡೆಯಲಿರುವ ದಿನಗಳು 65.

12 ದಿನ: ಒಟ್ಟು 12 ದಿನ ಡಬಲ್‌ ಹೆಡರ್‌(ದಿನಕ್ಕೆ 2 ಪಂದ್ಯ) ನಡೆಯಲಿವೆ.

ನಗದು ಬಹುಮಾನ:

₹20 ಕೋಟಿ: ಚಾಂಪಿಯನ್‌ ತಂಡಕ್ಕೆ ₹20 ಕೋಟಿ ನಗದು ಬಹುಮಾನ ಸಿಗಲಿದೆ.

₹13 ಕೋಟಿ: ರನ್ನರ್‌-ಅಪ್‌ ತಂಡಕ್ಕೆ ಸಿಗುವ ಬಹುಮಾನ ಮೊತ್ತ ₹13 ಕೋಟಿ.