IPL 2022 PBKS vs RCB ಕನ್ನಡಿಗ ಮಾಯಾಂಕ್ ನೇತೃತ್ವದ ಪಂಜಾಬ್ ಎದುರು ಆರ್ ಸಿಬಿಗೆ ಸೋಲು!

205 ರನ್ ಬಾರಿಸಿಯೂ ಸೋಲು ಕಂಡ ಆರ್ ಸಿಬಿ ಪಂಜಾಬ್ ಕಿಂಗ್ಸ್ ತಂಡದಿಂದ ಭರ್ಜರಿ ಬ್ಯಾಟಿಂಗ್ ನೀರಸ ಬೌಲಿಂಗ್ ದಾಳಿ ನಡೆಸಿದ ಫಾಫ್ ಡು ಪ್ಲೆಸಿಸ್ ಟೀಮ್

ಮುಂಬೈ (ಮಾ. 27): ಪ್ರತಿ ಆವೃತ್ತಿಯಲ್ಲೂ ತನ್ನ ದುರ್ಬಲ ಬೌಲಿಂಗ್ ಕಾರಣಕ್ಕಾಗಿ ಅಭಿಮಾನಿಗಳಿಂದ ಟೀಕೆಗೆ ತುತ್ತಾಗುವ ಆರ್ ಸಿಬಿ (RCB), ಈ ಬಾರಿಯೂ ಬೌಲಿಂಗ್ ವಿಭಾಗದ ಕೆಟ್ಟ ನಿರ್ವಹಣೆ ಮೂಲಕ ಎದುರಾದ ಸೋಲಿನೊಂದಿಗೆ 15ನೇ ಆವೃತ್ತಿಯ ಐಪಿಎಲ್ (IPL 2022) ಅಭಿಯಾನ ಆರಂಭಿಸಿದೆ. 205 ರನ್ ಗಳ ಬೃಹತ್ ಮೊತ್ತ ಪೇರಿಸಿದ ಹೊರತಾಗಿಯೂ ಆರ್ ಸಿಬಿ (Royal Challengers Bangalore) ತಂಡ ಪಂಜಾಬ್ ಕಿಂಗ್ಸ್  (Punjab Kings) ವಿರುದ್ಧ 5 ವಿಕೆಟ್ ಗಳ ಸೋಲಿಗೆ ಶರಣಾಯಿತು.

ಭಾನವಾರ ಮುಂಬೈನ ಡಿವೈ ಪಾಟೀಲ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಆರ್ ಸಿಬಿ, ಫಾಫ್ ಡು ಪ್ಲಸಿಸ್ (88), ವಿರಾಟ್ ಕೊಹ್ಲಿ (41) ಹಾಗೂ ದಿನೇಶ್ ಕಾರ್ತಿಕ್ (32) ಬ್ಯಾಟಿಂಗ್ ಸಾಹಸದಿಂದ 2 ವಿಕೆಟ್ ಗೆ 205 ರನ್ ಗಳ ಬೃಹತ್ ಮೊತ್ತ ಪೇರಿಸಿತು. ಪ್ರತಿಯಾಗಿ ಪಂಜಾಬ್ ಕಿಂಗ್ಸ್ ತಂಡ 19 ಓವರ್ ಗಳಲ್ಲಿ 5 ವಿಕೆಟ್ ಗೆ 208 ರನ್ ಬಾರಿಸಿ ಜಯದ ಗಡಿ ಮುಟ್ಟಿತು. 5 ವಿಕೆಟ್ ಗೆ 156 ರನ್ ಪೇರಿಸಿದ್ದ ವೇಳೆ ಜೊತೆಯಾದ ಶಾರುಖ್ ಖಾನ್ (24*ರನ್, 20 ಎಸೆತ, 1 ಬೌಂಡರಿ, 2 ಸಿಕ್ಸರ್) ಹಾಗೂ ಒಡೆನ್ ಸ್ಮಿತ್ (25*ರನ್, 8 ಎಸೆತ, 1 ಬೌಂಡರಿ, 3 ಸಿಕ್ಸರ್) 52ರನ್ ಜೊತೆಯಾಟವಾಡಿ ತಂಡದ ಅದ್ಭುತ ಗೆಲುವಿಗೆ ಕಾರಣರಾದರು.

ಬೃಹತ್ ಮೊತ್ತವನ್ನು ಬೆನ್ನಟ್ಟುವ ನಿಟ್ಟಿನಲ್ಲಿ ಬೇಕಿದ್ದ ಉತ್ತಮ ಆರಂಭವನ್ನು ಪಂಜಾಬ್ ಕಿಂಗ್ಸ್ ತಂಡ ಪಡೆದುಕೊಂಡಿತು. ನಾಯಕ ಮಯಾಂಕ್ ಅಗರ್ವಾಲ್ (32ರನ್, 24 ಎಸೆತ, 2 ಬೌಂಡರಿ, 2 ಸಿಕ್ಸರ್) ಹಾಗೂ ಶಿಖರ್ ಧವನ್ (43ರನ್, 29 ಎಸೆತ, 5 ಬೌಂಡರಿ, 1 ಸಿಕ್ಸರ್) ಮೊದಲ ವಿಕೆಟ್ ಗೆ ಪ್ರತಿ ಓವರ್ ಗಳಿಗೆ 10ರ ಸರಾಸರಿಯಂತೆ ಬ್ಯಾಟಿಂಗ್ ಮಾಡಿದರು. ಮೊತ್ತವನ್ನು ಬೆನ್ನಟ್ಟಲು ಬೇಕಿದ್ದ ಅಗತ್ಯ ರನ್ ರೇಟ್ ಅನ್ನು ಕಾಪಾಡುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದ ಪಂಜಾಬ್ ಕಿಂಗ್ಸ್, ಆರ್ ಸಿಬಿ ಬೌಲಿಂಗ್ ವಿಭಾಗದ ಬೆವರಿಳಿಸಿತು. ಮೊದಲ ವಿಕೆಟ್ ಗೆ 5 ಓವರ್ ಗಳ ಒಳಗಾಗಿ 50 ರನ್ ಜೊತೆಯಾಟವಾಡಿದ್ದ ಈ ಜೋಡಿ, 8ನೇ ಓವರ್ ನಲ್ಲಿ ಬೇರ್ಪಟ್ಟಿತು. 

ಈ ವರ್ಷದ ಐಪಿಎಲ್ ಹರಾಜಿನಲ್ಲಿ ಆರ್ ಸಿಬಿಯ ದುಬಾರಿ ಖರೀದಿಗಳ ಪೈಕಿ ಒಬ್ಬರಾಗಿದ್ದ ಶ್ರೀಲಂಕಾದ ವಾನಿಂದು ಹಸರಂಗ ಹಾಲಿ ಐಪಿಎಲ್ ನಲ್ಲಿ ತಾವು ಎಸೆದ ಮೊದಲ ಎಸೆತದಲ್ಲಿಯೇ ಮಯಾಂಕ್ ಅಗರ್ವಾಲ್ ವಿಕೆಟ್ ಉರುಳಿಸಿ ಆರ್ ಸಿಬಿಗೆ ಹರ್ಷ ತಂದಿದ್ದರು. ಈ ವೇಳೆ ಪಂಜಾಬ್ ತಂಡ 71 ರನ್ ಬಾರಿಸಿತ್ತು.

ನಂತರ ಶಿಖರ್ ಧವನ್ ಗೆ ಜೊತೆಯಾದ ಶ್ರೀಲಂಕಾದ ವಿಕೆಟ್ ಕೀಪರ್ ಬ್ಯಾಟ್ಸ್ ಮನ್ ಭಾನುಕಾ ರಾಜಪಕ್ಷ (43ರನ್, 22 ಎಸೆತ, 2 ಬೌಂಡರಿ) 2ನೇ ವಿಕೆಟ್ ಗೆ ಬಿರುಸಿನ 47 ರನ್ ಜೊತೆಯಾಟವಾಡಿದರು. ಕೇವಲ 25 ಎಸೆತಗಳಲ್ಲಿ ಈ ಜೊತೆಯಾಟ ಮೂಡಿ ಬಂತು. ಭಾನುಕ ರಾಜಪಕ್ಷ ಆರ್ ಸಿಬಿಯ ಬಹುತೇಕ ಎಲ್ಲಾ ಬೌಲರ್ ಗಳ ಎಸೆತವನ್ನು ಸರಾಗವಾಗಿ ಸ್ಟೇಡಿಯಂನ ಆಚೆ ಹಾಕುತ್ತಿದ್ದರು. ಅಪಾಯಕಾರಿಯಾಗುತ್ತಿದ್ದ ಈ ಜೊತೆಯಾಟವನ್ನು12ನೇ ಓವರ್ ನಲ್ಲಿ ಹರ್ಷಲ್ ಪಟೇಲ್ ಬೇರ್ಪಡಿಸಿದರು. ಬಿರುಸಿನ ಆಟವಾಡುತ್ತಿದ್ದ ಶಿಖರ್ ಧವನ್, ಅನುಜ್ ರಾವತ್ ಗೆ ಕ್ಯಾಚ್‌ ನೀಡಿ ಹೊರನಡೆದರು.

ಭಾನುಕ ರಾಜಪಕ್ಷ ಹಾಗೂ ಲಿಯಾಮ್ ಲಿವಿಂಗ್ ಸ್ಟೋನ್ ಇದ್ದಷ್ಟು ಹೊತ್ತು ಆರ್ ಸಿಬಿ ಬೌಲರ್ ಗಳನ್ನು ಬೆಂಡೆತ್ತಿದ್ದರಿಂದ ಪಂಜಾಬ್ ತಂಡ ಸುಲಭ ಗೆಲುವು ಸಾಧಿಸಲಿದೆ ಎಂದು ನಿರೀಕ್ಷೆ ಮಾಡಲಾಗಿತ್ತು.14ನೇ ಓವರ್ ನ ಸತತ 2 ಎಸೆತಗಳಲ್ಲಿ ಭಾನುಕ ರಾಜಪಕ್ಷ ಹಾಗೂ ಐಪಿಎಲ್ ನಲ್ಲಿ ಪಾದಾರ್ಪಣೆ ಪಂದ್ಯವಾಡಿದ ರಾಜ್ ಬಾವಾ ವಿಕೆಟ್ ಉರುಳಿಸಿದ ಸಿರಾಜ್ ಆರ್ ಸಿಬಿ ಹಿಡಿತ ಸಾಧಿಸಲು ನೆರವಾದರು. 10 ಎಸೆತಗಳಲ್ಲಿ 2 ಸಿಕ್ಸರ್ ಗಳೊಂದಿಗೆ 19 ರನ್ ಸಿಡಿಸಿದ ಲಿಯಾಮ್ ಲಿವಿಂಗ್ ಸ್ಟೋನ್ ತಂಡದ ಮೊತ್ತ 150ರ ಗಡಿ ದಾಟುತ್ತಿದ್ದಂತೆ ಆಕಾಶ್ ದೀಪ್ ಗೆ ವಿಕೆಟ್ ನೀಡಿ ಹೊರನಡೆದಾಗ ಪಂಜಾಬ್ ಆತಂಕಕ್ಕೆ ಸಿಲುಕಿತ್ತು.

ಐಪಿಎಲ್ ಇತಿಹಾಸದಲ್ಲೇ ಗರಿಷ್ಠ ಇತರ ರನ್ ದಾಖಲಾದ ಪಂದ್ಯ
ಪಂಜಾಬ್ ಕಿಂಗ್ಸ್ ಹಾಗೂ ಆರ್ ಸಿಬಿ ನಡುವಿನ ಮುಖಾಮುಖಿ ಐಪಿಎಲ್ ಇತಿಹಾಸದಲ್ಲಿಯೇ ಗರಿಷ್ಠ ಇತರ ರನ್ ದಾಖಲಾದ ಪಂದ್ಯ ಎನಿಸಿಕೊಂಡಿದೆ. ಭಾನುವಾರ ನಡೆದ ಪಂದ್ಯದಲ್ಲಿ ಒಟ್ಟು 44 ಇತರ ರನ್ ದಾಖಲಾದವು. ಪಂಜಾಬ್ ಕಿಂಗ್ಸ್ ತಂಡ 23 ರನ್ ಗಳನ್ನು ಇತರ ರೂಪದಲ್ಲಿ ನೀಡಿದರೆ, ಆರ್ ಸಿಬಿ ತಂಡ 21 ರನ್ ಗಳನ್ನು ಇತರ ರೂಪದಲ್ಲಿ ನೀಡಿತು. ಒಟ್ಟಾರೆ 44 ರನ್ ಗಳು ಇತರ ರೂಪದಲ್ಲಿ ದಾಖಲಾದವು. ಇದಕ್ಕೂ ಮುನ್ನ 2008 ರಲ್ಲಿ ಡೆಕ್ಕನ್ ಚಾರ್ಜರ್ಸ್ ಹಾಗೂ ಕೆಕೆಆರ್ ನಡುವಿನ ಮುಖಾಮುಖಿ, 2010ರಲ್ಲಿ ಪಂಜಾಬ್ ಕಿಂಗ್ಸ್ ಹಾಗೂ ಮುಂಬೈ ಇಂಡಿಯನ್ಸ್ ಮುಖಾಮುಖಿಯಲ್ಲಿ ತಲಾ 38 ರನ್ ಗಳು ಇತರ ರೂಪದಲ್ಲಿ ದಾಖಲಾಗಿದ್ದವು.