ಶಾರುಖ್‌, ಸಲ್ಮಾನ್‌, ಅಮೀರ್‌ ಇವರಾರೂ ಅಲ್ಲ ಗೋವಾದ ವಿಜಯ್‌ ಮಲ್ಯರ ಕಿಂಗ್‌ಫಿಶರ್‌ ವಿಲ್ಲಾ ಮಾಲೀಕ ಈ ಬಾಲಿವುಡ್‌ ನಟ!

Vijay Mallya Kingfisher Villa: ವಿಜಯ್ ಮಲ್ಯ ಅವರ ಕಿಂಗ್‌ಫಿಷರ್ ವಿಲ್ಲಾ ಗೋವಾದ ರಾಜಧಾನಿ ಪಣಜಿಯಿಂದ ಸುಮಾರು 20 ಕಿ.ಮೀ ದೂರದಲ್ಲಿರುವ ಕ್ಯಾಂಡೋಲಿಮ್ ಬೀಚ್‌ನಲ್ಲಿದ್ದು, ಈ ವಿಲ್ಲಾ ಸುಮಾರು ಮೂರು ಎಕರೆಗಳಷ್ಟು ವಿಸ್ತೀರ್ಣದಲ್ಲಿದೆ. 

Vijay Mallya Kingfisher Villa New Owner: ವಿಜಯ್ ಮಲ್ಯ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಇತ್ತೀಚೆಗೆ, ಅವರು ಯೂಟ್ಯೂಬರ್‌ ರಾಜ್‌ ಶಮಾನಿ ಅವರ ಪಾಡ್‌ಕಾಸ್ಟ್‌ನಲ್ಲಿ ಭಾಗವಹಿಸಿದ ಬಳಿಕ ಮತ್ತೊಮ್ಮೆ ಭಾರೀ ಪ್ರಮಾಣದಲ್ಲಿ ಜನಪ್ರಿಯತೆ ಸಂಪಾದಿಸಿದ್ದಾರೆ. ದೇಶದಲ್ಲಿ ಅವರ ಪರವಾಗಿ ಒಲವು ಬರುತ್ತಿದ್ದು, ವಿಜಯ್‌ ಮಲ್ಯ ಮಾಡಿರುವ ತಪ್ಪಿಗೆ ಈಗಾಗಲೇ ದೊಡ್ಡ ಪ್ರಮಾಣದ ಶಿಕ್ಷೆ ಎದುರಿಸಿದ್ದಾರೆ ಎನ್ನುವ ಮಾತುಗಳು ಕೇಳಿ ಬಂದಿದೆ.

ಭಾರತದಲ್ಲಿ ಬ್ಯಾಂಕ್ ಸಾಲಗಳನ್ನು ಮರುಪಾವತಿಸದ ಆರೋಪ ಹೊತ್ತಿರುವ ಮತ್ತು ಪ್ರಸ್ತುತ ಬ್ರಿಟನ್‌ನಲ್ಲಿ ವಾಸಿಸುತ್ತಿರುವ ವಿಜಯ್ ಮಲ್ಯ, ಒಮ್ಮೆ ಗೋವಾದಲ್ಲಿ 'ಕಿಂಗ್‌ಫಿಷರ್ ವಿಲ್ಲಾ' ಎಂಬ ಐಷಾರಾಮಿ ಅರಮನೆಯನ್ನು ಹೊಂದಿದ್ದರು. ಒಂದು ಕಾಲದಲ್ಲಿ ಕಿಂಗ್‌ ಆಫ್‌ ಗುಡ್‌ ಟೈಮ್ಸ್‌ ಎಂದು ಕರೆಸಿಕೊಳ್ಳುತ್ತಿದ್ದ ವಿಜಯ್‌ ಮಲ್ಯ, ಗೋವಾದ ಇದೇ ಅರಮನೆಯಲ್ಲಿ ಜಗತ್ತೇ ಕಂಡು ಕೇಳರಿಯದ ಪಾರ್ಟಿಗಳನ್ನು ಮಾಡಿ ಸುದ್ದಿಯಾಗಿದ್ದರು.

ಮಲ್ಯ ಅವರ ಕಿಂಗ್‌ಫಿಷರ್ ವಿಲ್ಲಾ ಗೋವಾದ ರಾಜಧಾನಿ ಪಣಜಿಯಿಂದ ಸುಮಾರು 20 ಕಿ.ಮೀ ದೂರದಲ್ಲಿರುವ ಕ್ಯಾಂಡೋಲಿಮ್ ಬೀಚ್ ಗ್ರಾಮದಲ್ಲಿದೆ. ಈ ವಿಲ್ಲಾ ಸುಮಾರು ಮೂರು ಎಕರೆಗಳಷ್ಟು ವಿಸ್ತೀರ್ಣದಲ್ಲಿದೆ. ಈ ವಿಲ್ಲಾ ಕಿಂಗ್‌ಫಿಷರ್ ಏರ್‌ಲೈನ್ಸ್‌ನ ಮೂಲ ಕಂಪನಿಯಾದ ಯುನೈಟೆಡ್ ಬ್ರೂವರೀಸ್ ಹೋಲ್ಡಿಂಗ್ಸ್ ಹೆಸರಿನಲ್ಲಿತ್ತು.

ಗೋವಾ ವಿಲ್ಲಾವನ್ನು ಖರೀದಿಸಿದವರು ಯಾರು?

ಸಾಲ ಮರುಪಾವತಿ ಮಾಡಲು ಸಾಧ್ಯವಾಗದೇ 2016ರಲ್ಲಿ ವಿಜಯ್‌ ಮಲ್ಯ ದೇಶ ಬಿಟ್ಟು ಓಡಿಹೋದಾಗ ಮರುವರ್ಷವೇ ಈ ವಿಲ್ಲಾವನ್ನು ಹರಾಜಿನಲ್ಲಿ ಮಾರಾಟ ಮಾಡಲಾಯಿತು. ಹಾಗಂತ ಬಾಲಿವುಡ್‌ನ ಸ್ಟಾರ್‌ ನಟರಾದ ಶಾರುಖ್‌, ಸಲ್ಮಾನ್‌ ಅಥವಾ ಅಮೀರ್‌ ಖಾನ್‌ ಇದನ್ನು ಖರೀದಿ ಮಾಡಿರಲಿಲ್ಲ. ನಟ-ನಿರ್ಮಾಪಕ ಸಚಿನ್ ಜೋಶಿ ಮತ್ತು ಅವರ ಪತ್ನಿ ನಟಿ ಊರ್ವಶಿ ಶರ್ಮಾ ('ನಖಾಬ್' ಚಿತ್ರಕ್ಕೆ ಹೆಸರುವಾಸಿಯಾದವರು ) 73 ಕೋಟಿ ರೂ.ಗೆ ವಿಲ್ಲಾವನ್ನು ಖರೀದಿಸಿದ್ದರು.

ಸನ್ನಿ ಲಿಯೋನ್ ಜೊತೆ 'ಮುಂಬೈ ಮಿರರ್' ಮತ್ತು 'ಜಾಕ್‌ಪಾಟ್' ನಂತಹ ಚಿತ್ರಗಳಲ್ಲಿ ಕೆಲಸ ಮಾಡಿದ್ದ ಸಚಿನ್ ಜೋಶಿ, 'ವೈಕಿಂಗ್ ವೆಂಚರ್ಸ್' ಎಂಬ ಕಂಪನಿಯನ್ನು ನಡೆಸುತ್ತಿದ್ದಾರೆ. ಅವರ ವೆಬ್‌ಸೈಟ್ ಪ್ರಕಾರ, ಅವರ ಕಂಪನಿಯು ಮದ್ಯ ಮತ್ತು ಇತರ ಪಾನೀಯಗಳಿಂದ ಹಿಡಿದು ಹೋಟೆಲ್‌ಗಳು, ಮನರಂಜನೆ, ಆಸ್ತಿ, ಕಾಗದದ ಉತ್ಪನ್ನಗಳು ಮತ್ತು ಸಾಮಾಜಿಕ ಕಾರ್ಯಗಳವರೆಗೆ ಹಲವು ಕ್ಷೇತ್ರಗಳಲ್ಲಿ ಕೆಲಸ ಮಾಡುತ್ತದೆ.

2017 ರಲ್ಲಿ, ಮಲ್ಯ ಸಾಲ ಪಡೆದ ಬ್ಯಾಂಕ್‌ಗಳ ಈ ವಿಲ್ಲಾವನ್ನು ಹರಾಜು ಮಾಡಲು ನಿರ್ಧರಿಸಿದಾಗ, ಸಚಿನ್ ಜೋಶಿ ಈ ವಿಲ್ಲಾವನ್ನು ಖರೀದಿಸಿದರು. ಆರಂಭದಲ್ಲಿ ಈ ವಿಲ್ಲಾದ ಬೆಲೆಯನ್ನು 90 ಕೋಟಿ ರೂ.ಗಳಿಗೆ ನಿಗದಿಪಡಿಸಲಾಗಿತ್ತು.

ಇದು ಕ್ಯಾಂಡೋಲಿಮ್‌ನಲ್ಲಿರುವ 12,350 ಚದರ ಅಡಿ ವಿಸ್ತೀರ್ಣದ ಸಮುದ್ರಕ್ಕೆ ಎದುರಾಗಿರುವ ಎಸ್ಟೇಟ್ ಆಗಿದ್ದು, ಮೂರು ಎಕರೆಗಳಷ್ಟು ಸಮೃದ್ಧವಾದ ಜಮೀನಿನಲ್ಲಿ ಹರಡಿಕೊಂಡಿದೆ. ಈ ಆಸ್ತಿಯು ಉದ್ಯಾನಗಳು, ಓಪನ್‌ ಟೆರಸ್‌ ಡ್ಯಾನ್ಸ್‌ ಫ್ಲೋರ್‌ , ಕೃತಕ ಕೊಳಗಳು ಮತ್ತು ಖಾಸಗಿ ಈಜುಕೊಳಗಳನ್ನು ಹೊಂದಿದೆ.

ಕಿಂಗ್ಸ್‌ ಮಾನ್ಶನ್‌ ಎಂದು ಹೆಸರು ಬದಲು

ನಂತರ, ಜೋಶಿ ಈ ವಿಲ್ಲಾದ ಹೆಸರನ್ನು 'ಕಿಂಗ್ಸ್ ಮ್ಯಾನ್ಷನ್' ಎಂದು ಬದಲಾಯಿಸಿದರು. "ಇಂದು ನಾನು ಈ ವಿಲ್ಲಾದ ಬಾಗಿಲುಗಳನ್ನು ಜಗತ್ತಿಗೆ ತೆರೆದಿದ್ದೇನೆ. ಇದನ್ನು ಈಗ 'ಕಿಂಗ್ಸ್ ಮ್ಯಾನ್ಷನ್' ಎಂದು ಕರೆಯಲಾಗುವುದು ಮತ್ತು ಭವಿಷ್ಯದ ಯೋಜನೆಗಳು ಸಿದ್ಧವಾಗಿವೆ. ನಾವು ಹೆಸರಿನ ಬಗ್ಗೆ ಸಾಕಷ್ಟು ಯೋಚಿಸಿದ್ದೇವೆ, ಆದರೆ 'ಕಿಂಗ್ಸ್ ಬಿಯರ್' ಬ್ರ್ಯಾಂಡ್ ಮತ್ತು ಈ ಸ್ಥಳದ ಭವ್ಯತೆಯನ್ನು ಪರಿಗಣಿಸಿ, ಈ ಹೆಸರು ಅತ್ಯಂತ ಸೂಕ್ತವೆನಿಸಿತು." ಎಂದು ಹೇಳಿದ್ದರು.

2015 ರಲ್ಲಿ, ಸಚಿನ್ ಜೋಶಿ ಗೋವಾದ 'ಕಿಂಗ್ಸ್ ಬಿಯರ್' ಕಂಪನಿಯನ್ನು ಇಂಪಾಲಾ ಡಿಸ್ಟಿಲರಿ ಮತ್ತು ಬ್ರೂವರಿಯಿಂದ 90 ಕೋಟಿ ರೂ.ಗೆ ಖರೀದಿಸಿದರು ಎಂಬುದು ಗಮನಿಸಬೇಕಾದ ಸಂಗತಿ.