RBI ಬಿಗ್‌ ಅಪ್‌ಡೇಟ್‌: ಮಕ್ಕಳ ಬ್ಯಾಂಕ್‌ ಅಕೌಂಟ್‌ ವಿಚಾರದಲ್ಲಿ ಮಹತ್ವದ ಬದಲಾವಣೆ ಘೋಷಣೆ!

ಹತ್ತು ವರ್ಷ ಮೇಲ್ಪಟ್ಟ ಮಕ್ಕಳು ಈಗ ಸ್ವತಂತ್ರವಾಗಿ ಬ್ಯಾಂಕ್ ಖಾತೆ ತೆರೆಯಬಹುದು. ಆರ್‌ಬಿಐ ಹೊಸ ನಿಯಮಗಳ ಪ್ರಕಾರ, ಎಲ್ಲಾ ಬ್ಯಾಂಕುಗಳು ಈ ಸೌಲಭ್ಯ ಒದಗಿಸಬೇಕು. ಕಡಿಮೆ ವಯಸ್ಸಿನವರು ಪೋಷಕರ ಮೂಲಕ ಖಾತೆ ತೆರೆಯಬಹುದು. ಬ್ಯಾಂಕುಗಳು ತಮ್ಮದೇ ಆದ ನಿಯಮಗಳನ್ನು ರೂಪಿಸಬಹುದು. ಓವರ್‌ಡ್ರಾಫ್ಟ್‌ಗೆ ಅವಕಾಶವಿಲ್ಲ. ಜುಲೈ ೧, ೨೦೨೫ರೊಳಗೆ ಬ್ಯಾಂಕುಗಳು ಹೊಸ ನಿಯಮಗಳಿಗೆ ಹೊಂದಿಕೊಳ್ಳಬೇಕು.

ನವದೆಹಲಿ (ಮೇ.9):  ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಹೊಸ ನಿಯಮಗಳನ್ನು ಪ್ರಕಟಿಸಿದ್ದು, 10 ವರ್ಷಕ್ಕಿಂತ ಮೇಲ್ಪಟ್ಟ ಮಕ್ಕಳು ತಮ್ಮದೇ ಆದ ಉಳಿತಾಯ ಅಥವಾ ಟರ್ಮ್‌ ಡೆಪಾಸಿಟ್‌ ಬ್ಯಾಂಕ್ ಖಾತೆಗಳನ್ನು ಸ್ವತಂತ್ರವಾಗಿ ತೆರೆಯಲು ಮತ್ತು ನಿರ್ವಹಿಸಲು ಅವಕಾಶ ನೀಡಿದೆ. ಈ ನಿಯಮವು ಪ್ರಾಥಮಿಕ (ನಗರ) ಸಹಕಾರಿ ಬ್ಯಾಂಕುಗಳು, ರಾಜ್ಯ ಸಹಕಾರಿ ಬ್ಯಾಂಕುಗಳು ಮತ್ತು ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕುಗಳು ಸೇರಿದಂತೆ ಎಲ್ಲಾ ವಾಣಿಜ್ಯ ಬ್ಯಾಂಕುಗಳು ಮತ್ತು ಸಹಕಾರಿ ಬ್ಯಾಂಕುಗಳಿಗೆ ಅನ್ವಯಿಸುತ್ತದೆ.

ಅಪ್‌ಡೇಟ್‌ ಆಗಿರುವ ನಿಯಮಗಳನ್ನು ವಿವರಿಸುವ ಸುತ್ತೋಲೆಯನ್ನು ಕೇಂದ್ರ ಬ್ಯಾಂಕ್ ಸೋಮವಾರ ಬಿಡುಗಡೆ ಮಾಡಿದೆ. ಹಲವು ವರ್ಷಗಳ ಹಿಂದೆ ಮೊದಲು ಹೊರಡಿಸಲಾದ ಹಳೆಯ ಮಾರ್ಗಸೂಚಿಗಳ ಪರಿಶೀಲನೆಯ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ. ಆರ್‌ಬಿಐ ಈಗ ಅಪ್ರಾಪ್ತ ವಯಸ್ಕರಿಗೆ ಠೇವಣಿ ಖಾತೆಗಳನ್ನು ತೆರೆಯುವ ಮತ್ತು ನಡೆಸುವ ನಿಯಮಗಳನ್ನು ಸರಳೀಕರಿಸಿದೆ.

"ಯಾವುದೇ ವಯಸ್ಸಿನ ಅಪ್ರಾಪ್ತ ವಯಸ್ಕರು ತಮ್ಮ ಕಾನೂನುಬದ್ಧ ಪೋಷಕರ ಮೂಲಕ ಉಳಿತಾಯ ಮತ್ತು ಟರ್ಮ್‌ ಡೆಪಾಸಿಟ್‌ ಖಾತೆಗಳನ್ನು ತೆರೆಯಲು ಮತ್ತು ನಿರ್ವಹಿಸಲು ಅನುಮತಿ ನೀಡಲಾಗಿದೆ" ಎಂದು ಆರ್‌ಬಿಐ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ. ಹೊಸ ನಿಯಮದ ಪ್ರಕಾರ, ಯಾವುದೇ ಅಪ್ರಾಪ್ತ ವಯಸ್ಕರು, ವಯಸ್ಸಿನ ಹೊರತಾಗಿಯೂ,  ಕಾನೂನುಬದ್ಧ ಪೋಷಕರ ಮೂಲಕ ಉಳಿತಾಯ ಅಥವಾ ಟರ್ಮ್‌ ಡೆಪಾಸಿಟ್‌ ಖಾತೆಯನ್ನು ತೆರೆಯಬಹುದು. ಆದರೆ, ಕನಿಷ್ಠ 10 ವರ್ಷ ವಯಸ್ಸಿನ ಅಪ್ರಾಪ್ತ ವಯಸ್ಕರು ಈಗ ಈ ಖಾತೆಗಳನ್ನು ಸ್ವಂತವಾಗಿ ತೆರೆಯಬಹುದು ಮತ್ತು ನಿರ್ವಹಿಸಬಹುದು.

ಬ್ಯಾಂಕುಗಳಿಗೆ ತಮ್ಮದೇ ಆದ ಅಪಾಯ ನಿರ್ವಹಣಾ ನೀತಿಗಳ ಆಧಾರದ ಮೇಲೆ ಈ ಖಾತೆಗಳಿಗೆ ನಿಯಮಗಳನ್ನು ಹೊಂದಿಸಲು ಫ್ಲೆಕ್ಸಿಬಿಲಿಟಿ ನೀಡಲಾಗಿದೆ. ಇದರಲ್ಲಿ ಅಂತಹ ಖಾತೆಗಳಲ್ಲಿ ಇಡಬಹುದಾದ ಹಣದ ಮೊತ್ತದ ಮೇಲೆ ಮಿತಿಗಳನ್ನು ನಿಗದಿಪಡಿಸುವುದು ಮತ್ತು ನಿಯಮಗಳು ಮತ್ತು ಷರತ್ತುಗಳನ್ನು ನಿರ್ಧರಿಸುವುದು ಸೇರಿದೆ. ಈ ನಿಯಮಗಳನ್ನು ಯುವ ಖಾತೆದಾರರೊಂದಿಗೆ ಸ್ಪಷ್ಟವಾಗಿ ಹಂಚಿಕೊಳ್ಳಬೇಕು.

ಅಪ್ರಾಪ್ತ ವಯಸ್ಕನಿಗೆ 18 ವರ್ಷ ತುಂಬಿದಾಗ ಇರುವ ನಿಯಮಗಳು: ಒಬ್ಬ ಅಪ್ರಾಪ್ತ ವಯಸ್ಕ ವ್ಯಕ್ತಿ 18 ವರ್ಷ ತುಂಬಿ ವಯಸ್ಕನಾದಾಗ, ಬ್ಯಾಂಕ್ ಹೊಸ ಖಾತೆ ನಿರ್ವಹಣಾ ಸೂಚನೆಗಳನ್ನು ಮತ್ತು ಹೊಸ ಮಾದರಿ ಸಹಿಯನ್ನು ಸಂಗ್ರಹಿಸಬೇಕು. ಖಾತೆಯನ್ನು ಈ ಹಿಂದೆ ಪೋಷಕರು ನಿರ್ವಹಿಸಿದ್ದರೆ, ಬ್ಯಾಂಕ್ ಖಾತೆಯ ಬ್ಯಾಲೆನ್ಸ್ ಅನ್ನು ಸಹ ದೃಢೀಕರಿಸಬೇಕು. ಖಾತೆದಾರರಿಗೆ 18 ವರ್ಷ ತುಂಬಿದ ನಂತರ ಖಾತೆ ವಿವರಗಳನ್ನು ನವೀಕರಿಸುವಲ್ಲಿ ಯಾವುದೇ ವಿಳಂಬವಾಗದಂತೆ ಬ್ಯಾಂಕ್‌ಗಳು ಮುಂಚಿತವಾಗಿ ಕ್ರಮ ಕೈಗೊಳ್ಳಬೇಕು ಮತ್ತು ಖಾತೆದಾರರಿಗೆ ಮುಂಚಿತವಾಗಿ ತಿಳಿಸಬೇಕು.

ಬ್ಯಾಂಕುಗಳು ಅಪ್ರಾಪ್ತ ವಯಸ್ಕ ಖಾತೆದಾರರಿಗೆ ಹೆಚ್ಚಿನ ಬ್ಯಾಂಕಿಂಗ್ ಸೇವೆಗಳನ್ನು ನೀಡಲು ಮುಕ್ತವಾಗಿವೆ. ಇವುಗಳಲ್ಲಿ ಇಂಟರ್ನೆಟ್ ಬ್ಯಾಂಕಿಂಗ್, ಎಟಿಎಂ ಅಥವಾ ಡೆಬಿಟ್ ಕಾರ್ಡ್‌ಗಳು ಮತ್ತು ಚೆಕ್ ಪುಸ್ತಕಗಳು ಸೇರಿವೆ. ಆದರೆ, ಬ್ಯಾಂಕ್ ತನ್ನ ಅಪಾಯ ನಿರ್ವಹಣಾ ನಿಯಮಗಳನ್ನು ಪರಿಶೀಲಿಸಿದ ನಂತರ ಮತ್ತು ಉತ್ಪನ್ನಗಳು ಯುವ ಬಳಕೆದಾರರಿಗೆ ಸೂಕ್ತವೆಂದು ದೃಢಪಡಿಸಿದ ನಂತರವೇ ಈ ಸೇವೆಗಳನ್ನು ನೀಡಬಹುದು.

ಸ್ವತಂತ್ರವಾಗಿ ಅಥವಾ ಪೋಷಕರಿಂದ ನಿರ್ವಹಿಸಲ್ಪಡುವ ಅಪ್ರಾಪ್ತ ವಯಸ್ಕರ ಖಾತೆಗಳನ್ನು ಓವರ್‌ಡ್ರಾಫ್ಟ್‌ಗೆ ಹೋಗಲು ಅನುಮತಿಸಬಾರದು ಎಂದು ಆರ್‌ಬಿಐ ಸ್ಪಷ್ಟಪಡಿಸಿದೆ. ಇದರರ್ಥ ಖಾತೆಯ ಬಾಕಿ ಯಾವಾಗಲೂ ಸಕಾರಾತ್ಮಕವಾಗಿರಬೇಕು. ಅಂತಹ ಖಾತೆಗಳಲ್ಲಿ ಯಾವುದೇ ಸಾಲ ಅಥವಾ ಋಣಾತ್ಮಕ ಬಾಕಿ ಇಲ್ಲ ಎಂದು ಬ್ಯಾಂಕುಗಳು ಖಚಿತಪಡಿಸಿಕೊಳ್ಳಬೇಕು.

ಅಪ್ರಾಪ್ತ ವಯಸ್ಕರಿಗೆ ಖಾತೆಗಳನ್ನು ತೆರೆಯುವಾಗ ಬ್ಯಾಂಕುಗಳು ನೋ ಯುವರ್‌ ಕಸ್ಟಮರ್‌ (KYC) ನಿಯಮಗಳನ್ನು ಪಾಲಿಸಬೇಕಾಗುತ್ತದೆ. ಖಾತೆಯನ್ನು ತೆರೆಯುವಾಗ ಸರಿಯಾದ ಪರಿಶೀಲನೆಗಳನ್ನು ಮಾಡುವುದು ಮತ್ತು ಕಾಲಾನಂತರದಲ್ಲಿ ಖಾತೆಯನ್ನು ಪರಿಶೀಲಿಸುವುದನ್ನು ಮುಂದುವರಿಸುವುದು ಇದರಲ್ಲಿ ಸೇರಿದೆ. ಈ ನಿಯಮಗಳು ಫೆಬ್ರವರಿ 2016 ರಲ್ಲಿ RBI ಹೊರಡಿಸಿದ KYC ಕುರಿತ ಮಾಸ್ಟರ್ ನಿರ್ದೇಶನದ ಭಾಗವಾಗಿದ್ದು, ಇದನ್ನು ಕಾಲಕಾಲಕ್ಕೆ ನವೀಕರಿಸಲಾಗುತ್ತದೆ. ಎಲ್ಲಾ ಬ್ಯಾಂಕುಗಳು ಜುಲೈ 1, 2025 ರೊಳಗೆ ಹೊಸ RBI ಮಾರ್ಗಸೂಚಿಗಳಿಗೆ ಅನುಗುಣವಾಗಿ ತಮ್ಮ ಆಂತರಿಕ ನೀತಿಗಳನ್ನು ನವೀಕರಿಸಬೇಕು ಅಥವಾ ರಚಿಸಬೇಕು.