ಡಿ-ಮಾರ್ಟ್ ಒಡೆಯ ದಮಾನಿ ಸಂಪತ್ತು ಈಗಲೂ ಏರಿಕೆ!
ಸಾರಾಂಶ
ಡಿ-ಮಾರ್ಟ್ ಒಡೆಯನ ಸಂಪತ್ತು ಈಗಲೂ ಏರಿಕೆ| ಕೊರೋನಾ ದಾಳಿಗೂ ಬಗ್ಗದ ದಮಾನಿ
ನವದೆಹಲಿ(ಏ.09):: ಕೊರೋನಾ ದಾಳಿ ಬಳಿಕ ಭಾರತದ ಬಹುತೇಕ ಶ್ರೀಮಂತರ ಆಸ್ತಿ ಮಂಜಿನಂತೆ ಕರಗಿ ಹೋಗಿದ್ದರೆ ಡಿ ಮಾರ್ಟ್ ಮಾಲ್ಗಳ ಮಾಲೀಕ ರಾಧಾಕೃಷ್ಣ ದಮಾನಿ ಅವರ ಆಸ್ತಿ ಮಾತ್ರ ದಿನೇ ದಿನೇ ಏರಿಕೆ ಕಾಣುತ್ತಲೇ ಇದೆ. ಕೊರೋನಾ ಸುಂಟರಗಾಳಿಯನ್ನೂ ಮೆಟ್ಟಿನಿಂತ ಅವರ ಈ ಸಾಹಸ ಎಲ್ಲರಲ್ಲೂ ಅಚ್ಚರಿಗೆ ಕಾರಣವಾಗಿದೆ.
ಬ್ಲೂಂಬರ್ಗ್ ಶ್ರೀಮಂತ ಭಾರತೀಯರ ಪಟ್ಟಿಯಲ್ಲಿ ಟಾಪ್ 13ರ ಪೈಕಿ ರಾಧಾಕೃಷ್ಣ ದಮಾನಿ ಹೊರತುಪಡಿಸಿ ಉಳಿದೆಲ್ಲರ ಆಸ್ತಿಯಲ್ಲೂ ಭಾರೀ ಇಳಿಕೆಯಾಗಿದೆ. ಆದರೆ ಮತ್ತೊಂದೆಡೆ ಈ ವರ್ಷವೊಂದರಲ್ಲೇ ದಮಾನಿ ಅವರ ಆಸ್ತಿಯಲ್ಲಿ 7500 ಕೋಟಿ ರು. ನಷ್ಟುಏರಿಕೆಯಾಗಿ ಒಟ್ಟು ಆಸ್ತಿ 80000 ಕೋಟಿ ರು.ಗೆ ತಲುಪಿದೆ.
ಕಳೆದ 3 ತಿಂಗಳ ಅವಧಿಯಲ್ಲಿ ಸೆನ್ಸೆಕ್ಸ್ ಮತ್ತು ನಿಫ್ಟಿಶೇ.25ರಷ್ಟುಕುಸಿತ ಕಂಡಿದ್ದರೆ, ಇದೇ ಅವಧಿಯಲ್ಲಿ ಡಿ ಮಾರ್ಟ್ನ ಮಾತೃ ಸಂಸ್ಥೆಯಾದ ಅವೆನ್ಯೂ ಸೂಪರ್ಮಾರ್ಟ್ನ ಷೇರುಮೌಲ್ಯ ಶೇ.25ರಷ್ಟುಏರಿಕೆ ಕಂಡಿದೆ.
ಸಾಮಾನ್ಯ ದಿನಗಳಲ್ಲೇ ಡಿ- ಮಾರ್ಟ್ ಮುಂದೆ ಜನ ಸಾಲುಗಟ್ಟಿನಿಂತು ವಸ್ತುಗಳನ್ನು ಖರೀದಿಸುತ್ತಾರೆ. ಇನ್ನು ಲಾಕ್ಡೌನ್ ಅವಧಿಯಲ್ಲಂತೂ ಈ ಸರದಿ ಇನ್ನೂ ಉದ್ದವಿತ್ತು. ಹೀಗಾಗಿ ಈ ಭರ್ಜರಿ ವಹಿವಾಟು ಕಂಪನಿಯ ಷೇರು ಮೌಲ್ಯ ಏರುವಂತೆ ಮಾಡಿ, ಮಾಲೀಕರನ್ನು ಮತ್ತಷ್ಟು ಶ್ರೀಮಂತರನ್ನಾಗಿ ಮಾಡಿದೆ.
ವ್ಯವಹಾರ (business ideas in kannada) , ಬ್ಯಾಂಕಿಂಗ್ (Banking News), ಹಣಕಾಸು, ಭಾರತೀಯ ಆರ್ಥಿಕತೆ, ಜಾಗತಿಕ ಮಾರುಕಟ್ಟೆ, ಷೇರು ಮಾರುಕಟ್ಟೆ, ಹೂಡಿಕೆ ಸೇರಿದಂತೆ ಇನ್ನಿತರ ಮತ್ತು ಇತ್ತೀಚಿನ ಹಣಕಾಸಿನ ಸುದ್ದಿಗಳನ್ನು ಏಷ್ಯಾನೆಟ್ ಸುವರ್ಣ ನ್ಯೂಸ್ನಲ್ಲಿ ಓದಿರಿ.