5 ವರ್ಷ ದಾಟಿದ ಮಕ್ಕಳ Aadhaar Card ಅಪ್​ಡೇಟ್​ ಮಾಡಿಲ್ವಾ? ಫ್ರೀ ಆಗಬೇಕಿದ್ರೆ ಕೂಡ್ಲೇ ಮಾಡಿಸಿ: ಮಾಹಿತಿ ಇಲ್ಲಿದೆ

5 ವರ್ಷ ದಾಟಿದ ಮಕ್ಕಳಿಗೆ ಆಧಾರ್​ ಕಾರ್ಡ್​ ಅಪ್​ಡೇಟ್​ ಮಾಡುವುದು ಅತ್ಯಗತ್ಯವಾಗಿದೆ. ಬಯೋಮೆಟ್ರಿಕ್​ ವ್ಯವಸ್ಥೆ ಮೂಲಕ ಅಪ್​ಡೇಟ್​ ಮಾಡಲಾಗುತ್ತದೆ. ಉಚಿತವಾಗಿ ಬೇಕಿದ್ದರೆ ಕೂಡಲೇ ಮಾಡಿಸಬೇಕು. ಇದರ ವಿವರ ಇಲ್ಲಿದೆ... 

ಇದೀಗ ಸಾಮಾನ್ಯವಾಗಿ ಎಲ್ಲರ ಭಾರತೀಯರ ಬಳಿಯೂ ಆಧಾರ್​ ಕಾರ್ಡ್​ ಇದ್ದೇ ಇದೆ. ಆಧಾರ್​ ಕಾರ್ಡ್​ ಇಲ್ಲದಿದ್ದರೆ ಹಲವಾರು ಸೌಲಭ್ಯಗಳು ಸಿಗದೇ ಇರುವ ಹಿನ್ನೆಲೆಯಲ್ಲಿ ಇದನ್ನು ಮಾಡಿಸಿಕೊಳ್ಳುವುದು ಅನಿವಾರ್ಯವಾಗಿದೆ. 12 ಅಂಕೆಗಳ ವಿಶಿಷ್ಟ ಗುರುತಿನ ಚೀಟಿಯಾಗಿರುವ ಆಧಾರ್​ ಕಾರ್ಡ್​ ಇದ್ದರೆ ಈಗ ಹಲವಾರು ಕೆಲಸಗಳು ಸುಲಭ ಜೊತೆಗೆ ಸರ್ಕಾರಿ ಸೌಲಭ್ಯಗಳಿಗೆ ಇವು ಕಡ್ಡಾಯವಾಗಿ ಬೇಕು ಎನ್ನುವುದು ಎಲ್ಲರಿಗೂ ತಿಳಿದದ್ದೇ. ಅದೇ ರೀತಿ ಚಿಕ್ಕಮಕ್ಕಳಿಗೂ ಇದೀಗ ಆಧಾರ್​ ಕಾರ್ಡ್​ಗಳು ಇವೆ. ಆದರೆ, ಒಮ್ಮೆ ಆಧಾರ್​ ಕಾರ್ಡ್​ ಮಾಡಿಸಿ ಸುಮ್ಮನೇ ಇಟ್ಟುಬಿಟ್ಟಿದ್ದೀರಾ? ನಿಮ್ಮ ಮಕ್ಕಳಿಗೆ 5 ವರ್ಷ ದಾಟಿದ್ಯಾ? ಹಾಗಿದ್ರೆ ಈ ಸುದ್ದಿಯನ್ನೊಮ್ಮೆ ನೀವು ಓದಲೇ ಬೇಕು. ಏಕೆಂದರೆ, ಶಾಲಾ ದಾಖಲಾತಿ, ವಿದ್ಯಾರ್ಥಿವೇತನ, ನಗದು ವರ್ಗಾವಣೆ ಯೋಜನೆಗಳಂತಹ ಪ್ರಯೋಜನಗಳನ್ನು ಪಡೆಯಲು ಆಧಾರ್ ಬಯೋಮೆಟ್ರಿಕ್ ವಿವರಗಳು ಅಪ್‌ಡೇಟ್ ಆಗಿರುವುದು ಅವಶ್ಯಕವಾಗಿದೆ.

5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಆಧಾರ್‌ ಕಾರ್ಡ್​ ಮಾಡಿಸುವಾಗ ಅವರ ಬಯೋಮೆಟ್ರಿಕ್ ವಿವರಗಳನ್ನು ತೆಗೆದುಕೊಂಡಿರುವುದಿಲ್ಲ. ಏಕೆಂದರೆ ಅವರ ಕೈರೇಖೆಗಳು ಅಷ್ಟಾಗಿ ಸ್ಪಷ್ಟವಾಗಿರುವುದಿಲ್ಲ. ಆದ್ದರಿಂದ ಒಮ್ಮೆ ಮಗುವಿಗೆ 5 ವರ್ಷ ದಾಟಿದರೆ ಆಧಾರ್‌ ಕಾರ್ಡ್​ ಅಪ್​ಡೇಟ್​ ಮಾಡಬೇಕಾಗುತ್ತದೆ. ಇದರ ಅರ್ಥ ಅವರ ಕಣ್ಣಿನ ಗುರುತು ಮತ್ತು ಬೆರಳಚ್ಚುಗಳನ್ನು ನೀಡುವ ಬಯೋಮೆಟ್ರಿಕ್‌ ಮೂಲಕ ಅಪ್​ಡೇಟ್​ ಮಾಡಬೇಕು. ಬಳಿಕ 15 ವರ್ಷವಾದ ಮೇಲೆ ಇನ್ನೊಮ್ಮೆ ಅಪ್​ಡೇಟ್​ ಮಾಡಿಸಬೇಕು. ಇಲ್ಲದಿದ್ದರೆ ಮುಂದೆ ಕೆಲವೊಂದು ಕೆಲಸಗಳಿಗೆ ತೊಂದರೆ ಬರುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಮಗುವಿಗೆ 5 ರಿಂದ 7 ವರ್ಷವಾಗಿದ್ದರೆ ಉಚಿತವಾಗಿ ಕೂಡಲೇ ಇದನ್ನು ಸಮೀಪದ ಕೇಂದ್ರಗಳಿಗೆ ಹೋಗಿ ಅಪ್​ಡೇಟ್​ ಮಾಡಿಸಿಕೊಳ್ಳಬಹುದು. ಇದು ಬಯೋಮೆಟ್ರಿಕ್​ ಆಗಿರುವ ಕಾರಣ, ಮಗುವಿನ ಬೆರಳಚ್ಚು ಮತ್ತು ಕಣ್ಣಿನ ಸ್ಕ್ಯಾನ್​ ಮಾಡುವುದರಿಂದ ಆಧಾರ್​ ಕೇಂದ್ರಗಳಲ್ಲಿಯೇ ಹೋಗಿ ಮಾಡಿಸಬೇಕು.

ಒಂದು ವೇಳೆ ಮಗುವಿಗೆ ಏಳು ವರ್ಷ ದಾಟಿದರೆ, ಇದುವರೆಗೂ ನೀವು ಆಧಾರ್​ ಅಪ್​ಡೇಟ್​ ಮಾಡದೇ ಹೋದರೆ 100 ರೂಪಾಯಿ ಶುಲ್ಕ ವಿಧಿಸಲಾಗುತ್ತದೆ. 100 ರೂಪಾಯಿ ಹಣ ಕೊಟ್ಟು ನೀವು ಕೂಡಲೇ ಅಪ್​ಡೇಟ್​ ಮಾಡಿಸಬೇಕು. ಇದಾಗಲೇ 7 ವರ್ಷ ಕಳೆದರೂ ಆಧಾರ್ ಬಯೋಮೆಟ್ರಿಕ್ ಅಪ್‌ಡೇಟ್ ಮಾಡದ ಮಕ್ಕಳ ಆಧಾರ್ ಕಾರ್ಡ್‌ಗಳನ್ನು ಗುರುತಿಸಿ, ಅವರ ನೋಂದಾಯಿತ ಮೊಬೈಲ್ ಸಂಖ್ಯೆಗಳಿಗೆ ಯುಐಡಿಎಐ ಸಂದೇಶಗಳನ್ನು ಕಳುಹಿಸುತ್ತಿದೆ. ಒಂದು ವೇಳೆ ಮೆಸೇಜ್​ ಬರದೇ ಹೋದರೂ ನೀವು ಕೂಡಲೇ ಹೀಗೆ ಮಾಡಿಸುವುದು ಒಳಿತು.

ಇನ್ನು ಐದು ವರ್ಷ ಒಳಗಿನ ಮಕ್ಕಳಿಗೆ ಕೊಟ್ಟಿರುವುದು ಬಾಲ್​ ಅಥವಾ ನೀಲಿ ಆಧಾರ್​ ಕಾರ್ಡ್​. ಮಗುವಿಗೆ ಐದು ವರ್ಷ ಭರ್ತಿಯಾದ ಬಳಿಕ ಈ ಬಾಲ್​ ಅಥವಾ ನೀಲಿ ಆಧಾರ್ ಕಾರ್ಡ್ ಅಮಾನ್ಯವಾಗುತ್ತದೆ. ಆಗ ನೀವು ಅದನ್ನು ಅಪ್​ಡೇಟ್​ ಮಾಡಬೇಕಾಗುತ್ತದೆ. ಆಗ ಮಗುವಿನ ಬಯೋಮೆಟ್ರಿಕ್ಸ್ ತೆಗೆದುಕೊಳ್ಳಲಾಗುತ್ತದೆ. ಹೀಗಾಗಿ ಐದು ವರ್ಷದ ನಂತರ ಆಧಾರ್ ನವೀಕರಿಸಬೇಕಾಗುತ್ತದೆ. ಆಗ ಮಕ್ಕಳ ಹೆಬ್ಬೆಟ್ಟಿನ ಗುರುತು ಹಾಗೂ ಕಣ್ಣಿನ ರೆಪ್ಪೆ ಗುರುತನ್ನು ಪಡೆಯಲಾಗುತ್ತದೆ. ಆಗ ಸಮೀಪದ ಆಧಾರ್​ ಕೇಂದ್ರಕ್ಕೆ ಹೋಗಬಹುದು. ಸಾಮಾನ್ಯವಾಗಿ ಮಕ್ಕಳಿಗೆ 15 ವರ್ಷವಾಗ್ತಿದ್ದಂತೆ ಮತ್ತೆ ಆಧಾರ್ ಅಪ್​ಡೇಟ್​ಗೂ ಹೇಳಲಾಗುತ್ತದೆ.