ಕೊಹ್ಲಿ ಬಳಗಕ್ಕೆ ಒಪ್ಪೊ, ಆಫ್ಘನ್ ತಂಡಕ್ಕೆ ಅಮುಲ್: ಇದು ಲಾಭದ ಕಮಾಲ್!

ವಿಶ್ವಕಪ್ 2019ರ ತಂಡಗಳ ತರಹೇವಾರಿ ಜೆರ್ಸಿಗಳು| ಜೆರ್ಸಿ ಮೇಲೇಕೆ ಖಾಸಗಿ ಕಂಪನಿಗಳ ಹೆಸರು ಮುದ್ರಣ?| ಭಾರತ ತಂಡದ ಜೆರ್ಸಿ ಮೇಲೆ ಒಪ್ಪೊ ಹೆಸರು ಮುದ್ರಣ| ಒಪ್ಪೊ ಚೀನಾದ ಖಾಸಗಿ ಮೊಬೈಲ್ ಕಂಪನಿ| ಅಫ್ಘಾನಿಸ್ತಾನ್ ತಂಡದ ಜೆರ್ಸಿ ಮೇಲೆ ರಾರಾಜಿಸುತ್ತಿದೆ ಭಾರತದ ಅಮುಲ್| ಶ್ರೀಲಂಕಾ ತಂಡದ ಜೆರ್ಸಿ ಮೇಲೆ ಭಾರತದ ಕೆಂಟ್ RO ಕಂಪನಿಯ ಹೆಸರು| ಪ್ರಚಾರಕ್ಕಾಗಿ ಸಾವಿರಾರು ಕೋಟಿ ರೂ. ವ್ಯಯಿಸುವ ಖಾಸಗಿ ಕಂಪನಿಗಳು| ಕ್ರಿಕೆಟ್ ಬೆಳವಣಿಗೆಗೆ ಅನುಕೂಲ ಈ ಒಪ್ಪಂದ|  

ಬೆಂಗಳೂರು(ಜೂ.25): ವ್ಯವಹಾರವೇ ಹಾಗೆ. ಲಾಭ ನಷ್ಟದ ಲೆಕ್ಕಾಚಾರದಲ್ಲಿ ದೇಶ ಕೆಲವೊಮ್ಮೆ ಹಿನ್ನೆಲೆಗೆ ಸೇರುತ್ತದೆ. ಕ್ರಿಕೆಟ್ ಎಂಬ ವಾಣಿಜ್ಯ ಕ್ರೀಡೆ ಕೂಡ ಇದಕ್ಕೆ ಹೊರತಾಗಿಲ್ಲ.

ಕ್ರಿಕೆಟ್ ವಾಣಿಜ್ಯೀಕರಣವಾದ ಮೇಲೆ ಪ್ರತಿಯೊಂದೂ ತಂಡದ ಜೆರ್ಸಿ ಮೇಲೂ ವಿವಿಧ ಕಂಪನಿಗಳ ಲೋಗೋ, ಹೆಸರುಗಳನ್ನು ಮುದ್ರಿಸುವ ಪರಿಪಾಠ ಬೆಳೆದು ಬಂದಿದೆ. ದೇಶವನ್ನು ಪ್ರತಿನಿಧಿಸಬೇಕಾದ ಈ ಆಟಗಾರರು ತಮ್ಮ ಜೆರ್ಸಿ ಮೂಲಕ ಕಂಪನಿಯೊಂದರ ಪ್ರಚಾರ ಮಾಡುವ ಅನಿವಾರ್ಯತೆಗೆ  ಸಿಲುಕಿದ್ದಾರೆ.

ಅದರಂತೆ ಐಸಿಸಿ ವಿಶ್ವಕಪ್ 2019ರ ಪ್ರತಿಯೊಂದೂ ತಂಡವೂ ತಮ್ಮ ಜೆರ್ಸಿಯಲ್ಲಿ ವಿವಿಧ ಕಂಪನಿಗಳ ಹೆಸರುಗಳನ್ನು ಮುದ್ರಿಸುವ ಮೂಲಕ ಕಂಪನಿಯ ಪ್ರಚಾರ ನಡೆಸುತ್ತಿವೆ. ಭಾರತ ತಂಡದ ಜೆರ್ಸಿ ಮೇಲೆ ಒಪ್ಪೊ ಮೊಬೈಲ್ ಹೆಸರಿರುವುದು ಎಲ್ಲರ ಗಮನಕ್ಕೆ ಬಂದಿರುತ್ತದೆ.

ಚೀನಾ ವಸ್ತುಗಳನ್ನು ಕೊಳ್ಳಬೇಡಿ ಎಂದು ಜನಸಾಮಾನ್ಯರಿಗೆ ದೇಶಭಕ್ತಿಯ ಪಾಠ ಮಾಡುವವರು ಒಂದೆಡೆ. ಅದೇ ದೇಶವನ್ನು ಪ್ರತಿನಿಧಿಸುವ ಆಟಗಾರರ ಜೆರ್ಸಿ ಮೇಲೆ ಅದೇ ಚೀನಾ ಮೊಬೈಲ್ ಕಂಪನಿಯ ಹೆಸರು ಮತ್ತೊಂದೆಡೆ.

ಇರಲಿ, ಅದು ಬಿಸಿಸಿಐ ಮತ್ತು ಕಂಪನಿಗಳ ನಡುವೆ ನಡೆದ ವಾಣಿಜ್ಯ ಒಪ್ಪಂದದ ಮಾತಾಯಿತು. ಆದರೆ ಗಮನಸೆಳೆದಿರುವುದು ಅಫ್ಘಾನಿಸ್ತಾನ್ ತಂಡದ ಜೆರ್ಸಿ ಮೇಲೆ ಭಾರತದ ಹಾಲು ಮತ್ತು ಹಾಲಿನ ಉತ್ಪನ್ನಗಳ ಸಂಸ್ಥೆ ಅಮುಲ್ ಹೆಸರು ಮುದ್ರಿತವಾಗಿರುವುದು.

ಹೌದು, ಭಾರತ ತಂಡದ ಜೆರ್ಸಿ ಮೇಲೆ ಒಪ್ಪೊ ಕಂಪನಿಯ ಹೆಸರು ಮುದ್ರಿತವಾಗಿದ್ದರೆ, ಅಫ್ಘಾನಿಸ್ತಾನ್ ತಂಡದ ಜೆರ್ಸಿ ಮೇಲೆ ಅಮುಲ್ ಹೆಸರು ಮುದ್ರಿತವಾಗಿದೆ. ಅಂತೆಯೇ ಶ್ರೀಲಂಕಾ ತಂಡದ ಮೇಲೆ ಭಾರತದ್ದೇ ಕಂಪನಿಯಾದ ಕೆಂಟ್ RO ದ ಹೆಸರು ಮುದ್ರಿತವಾಗಿದೆ.

ಏಕೆ ಹೀಗೆ?:

ತಂಡದ ಜೆರ್ಸಿ ಸಿದ್ದಪಡಿಸುವಾಗ ಅದರ ಮೇಲೆ ತಮ್ಮ ಕಂಪನಿಯ ಹೆಸರು ಮುದ್ರಿಸಿ ಪ್ರಚಾರ ಮಾಡುವ ಅವಕಾಶ ವಿವಿಧ ಕಂಪನಿಗಳಿಗಿದೆ. ಬಿಡ್ಡಿಂಗ್ ಮೂಲಕ ಜೆರ್ಸಿ ಮೇಲೆ ಹೆಸರು ಬರೆಸಲು ಕಂಪನಿಗಳು ಮುಗಿ ಬೀಳುತ್ತವೆ. ಅದರಲ್ಲೂ ಭಾರತದಂತ ಪ್ರಸಿದ್ಧ ತಂಡದ ಜೆರ್ಸಿ ಮೇಲೆ ತಮ್ಮ ಕಂಪನಿಯ ಹೆಸರಿದ್ದರೆ ಪ್ರಚಾರಕ್ಕೆ ಅದಕ್ಕಿಂತ ಇನ್ನೇನು ಬೇಕು ಹೇಳಿ?.

ಅದರಂತೆ 2017ರಲ್ಲಿ ಭಾರತ ತಂಡದ ಜೆರ್ಸಿ ಮೇಲೆ ತನ್ನ ಹೆಸರು ಬರೆಸುವ ಅವಕಾಶ ಪಡೆದ ಒಪ್ಪೊ, ಮುಂದಿನ 5 ವರ್ಷಗಳ ಕಾಲ ಅಂದರೆ 2022ರವರೆಗೂ ಈ ಹಕ್ಕನ್ನು ಪಡೆದುಕೊಂಡಿದೆ. ಈ ಒಪ್ಪಂದಕ್ಕಾಗಿ ಒಪ್ಪೊ ಬರೋಬ್ಬರಿ 1079 ಕೋಟಿ ರೂ.ಗಳನ್ನು ಪಾವತಿಸಿದೆ.

ಅದರಂತೆ ಅಮುಲ್ ಅಫ್ಘಾನಿಸ್ತಾನ್ ತಂಡದ ಜೆರ್ಸಿ ಮೇಲೆ ಹೆಸರು ಮುದ್ರಿಸುವ ಅವಕಾಶ ಪಡೆದರೆ, ಶ್ರೀಲಂಕಾ ಜೆರ್ಸಿ ಮೇಲೆ ಕೆಂಟ್ RO ಹೆಸರು  ರಾರಾಜಿಸುತ್ತಿದೆ.

ಈ ಹಿಂದೆ ಅಮುಲ್ ನ್ಯೂಜಿಲ್ಯಾಂಡ್ ಮತ್ತು ಹಾಲೆಂಡ್ ತಂಡಗಳ ಜೆರ್ಸಿ ಮೇಲೂ ರಾರಾಜಿಸಿದ್ದನ್ನು ಕ್ರಿಕೆಟ್ ಅಭಿಮಾನಿಗಳು ಖಂಡಿತ ಗಮನಿಸಿರುತ್ತಾರೆ.

ಕೇವಲ ಜೆರ್ಸಿಯಲ್ಲಿ ಹೆಸರು ಮುದ್ರಿಸುವ ಮೂಲಕ ಬಿಸಿಸಿಐ ಸಾವಿರಾರು ಕೋಟಿ ರೂ.ಗಳನ್ನು ಪಡೆಯುತ್ತಿದೆ. ಇದರಿಂದ ಕ್ರಿಕೆಟ್ ಬೆಳವಣಿಗೆಗೂ ಅನುಕೂಲ ಎಂಬುದರಲ್ಲಿ ಎರಡು ಮಾತಿಲ್ಲ. 

ವಿದೇಶಿ ಕಂಪನಿಗಳು ನಮ್ಮ ಭಾರತ ತಂಡವನ್ನು ಬೆಂಬಲಿಸುವಂತೆ, ಸ್ವದೇಶಿ ಕಂಪನಿಗಳು ವಿದೇಶಿ ತಂಡಗಳನ್ನು ಬೆಂಬಲಿಸುವ ಮೂಲಕ ಪ್ರಚಾರ ಪಡೆಯುತ್ತಿವೆ.