ಗೃಹಸಾಲ ಮಾಡಿದೋರಿಗಷ್ಟೇ ಸಿಗುತ್ತೆ ಈ ಲೋನ್? ಹಾಗಾದ್ರೆ ಯಾವುದೀ ಸಾಲ?

ಮನೆ ಕಟ್ಟಲು ಬ್ಯಾಂಕ್‌ನಲ್ಲಿ ಸಾಲ ಮಾಡೋದು ಅನಿವಾರ್ಯ. ಆದ್ರೆ ಸ್ವಲ್ಪ ವರ್ಷಗಳ ಬಳಿಕ ಮತ್ತೆ ಮನೆ ದುರಸ್ತಿಗೆ ಹೊರಟ್ರೆ ಕೈಯಲ್ಲಿ ಕಾಸಿರಲ್ಲ.ಇಂಥ ಸಮಯದಲ್ಲಿ ನಿಮ್ಮ ಕೈಹಿಡಿಯಲಿದೆ ಟಾಪ್‌ಅಪ್‌ ಲೋನ್.

ಟಾಪ್‌ ಅಪ್‌ ಸಾಲಗಳ ಬಗ್ಗೆ ನೀವು ಕೇಳಿರಬಹುದು. ಈಗಾಗಲೇ ನೀವು ಬ್ಯಾಂಕ್‌ನಲ್ಲಿ ಗೃಹ ಸಾಲ ಹೊಂದಿದ್ರೆ ಹಾಗೂ ಸಮಯಕ್ಕೆ ಸರಿಯಾಗಿ ಇಎಂಐ ಪಾವತಿಸುತ್ತಿದ್ರೆ, ಪ್ರಸ್ತುತವಿರೋ ಸಾಲದ ಮೊತ್ತವನ್ನು ಹೆಚ್ಚಿಸಲು ಅವಕಾಶವಿದೆ. ಅಂದ್ರೆ ನೀವು ಸಾಲದ ಮೊತ್ತವನ್ನು ಹೆಚ್ಚಿಸಿ ಆ ಹೆಚ್ಚುವರಿ ಹಣವನ್ನು ಪಡೆಯಬಹುದು. ಇದನ್ನೇ ಟಾಪ್‌ ಅಪ್ ಲೋನ್‌ ಎಂದು ಕರೆಯಲಾಗುತ್ತದೆ. ಉದಾಹರಣೆಗೆ ನೀವು 10 ವರ್ಷಗಳ ಅವಧಿಗೆ 60 ಲಕ್ಷ ರೂ. ಗೃಹ ಸಾಲವನ್ನು ಬ್ಯಾಂಕ್‌ನಿಂದ ಪಡೆದಿರುತ್ತೀರಿ ಎಂದು ಭಾವಿಸೋಣ. 5 ವರ್ಷಗಳ ಬಳಿಕ ನಿಮ್ಮ ಸಾಲದ ಮೊತ್ತ 36 ಲಕ್ಷಕ್ಕೆ ಇಳಿಕೆಯಾಗಿರುತ್ತದೆ. ಈ ಸಮಯದಲ್ಲಿ ನಿಮ್ಮ ಮನೆ ನವೀಕರಣಕ್ಕೆ ಯೋಚಿಸುತ್ತೀರಿ. ಇಂಥ ಸಮಯದಲ್ಲಿ ನೀವು ಟಾಪ್‌ಅಪ್‌ ಸಾಲವನ್ನು ಪಡೆಯಬಹುದು. ವಿವಿಧ ರಾಷ್ಟ್ರೀಕೃತ ಹಾಗೂ ಖಾಸಗಿ ಬ್ಯಾಂಕ್‌ಗಳು ತನ್ನ ನಿಷ್ಠಾವಂತ ಗ್ರಾಹಕರಿಗೆ ಟಾಪ್‌ ಅಪ್‌ ಸಾಲ ನೀಡುತ್ತವೆ.

ವಿಶೇಷತೆಗಳೇನು?
-ವಿವಿಧ ಉದ್ದೇಶಗಳಿಗಾಗಿ ನೀವು ಟಾಪ್—ಅಪ್‌ ಸಾಲಕ್ಕೆ ಅರ್ಜಿ ಸಲ್ಲಿಸಬಹುದು. ಈ ಸಾಲವನ್ನು ವೈಯಕ್ತಿಕ ಸಾಲವೆಂದು ಪರಿಗಣಿಸಿ ಮನೆ ನವೀಕರಣ, ಅಲಂಕಾರ ಹಾಗೂ ಇತರ ತುರ್ತು ಅವಶ್ಯಕತೆಗಳಿಗೆ ಬಳಸಬಹುದು.
-ಈ ಸಾಲವನ್ನು 10 ವರ್ಷಗಳ ಅವಧಿಗೆ ಅಥವಾ ನಿಮ್ಮ ಗೃಹ ಸಾಲದ ಅವಧಿಯವರೆಗೆ ಪಡೆಯಬಹುದು. ಸಾಲದ ಅವಧಿ ನಿಮ್ಮ ವಯಸ್ಸು, ಆದಾಯ ಹಾಗೂ ಆಸ್ತಿಯ ಮೌಲ್ಯವನ್ನು ಆಧರಿಸಿರುತ್ತದೆ. ಅಲ್ಲದೆ, ಎಷ್ಟು ಅವಧಿಗೆ ಸಾಲ ನೀಡಬೇಕೆಂಬುದು ಆಯಾ ಬ್ಯಾಂಕ್‌ಗೆ ಸಂಬಂಧಿಸಿದ ವಿಷಯವಾಗಿದೆ. 
-ಸಾಲದ ಮೊತ್ತ ಕೂಡ ಬ್ಯಾಂಕ್ನಿಂದ ಬ್ಯಾಂಕ್ಗೆ ಬೇರೆಯಾಗಿರುತ್ತದೆ. ಗೃಹ ಸಾಲದ ಮೊತ್ತ ಹಾಗೂ ಹೊಸ ಟಾಪ್ಅಪ್ ಸಾಲ ಎರಡೂ ಸೇರಿಸಿದ್ರೆ ಆಸ್ತಿ ಮೌಲ್ಯದ  ಶೇ.70-80ರಷ್ಟರೊಳಗೆ ಇರಬೇಕು. ಈ ಮಿತಿಯನ್ನು ಯಾವುದೇ ಕಾರಣಕ್ಕೂ ಮೀರಬಾರದು.
-ಟಾಪ್ ಅಪ್ ಸಾಲಗಳ ಮೇಲೆ ವಿಧಿಸೋ ಬಡ್ಡಿದರ ಗೃಹ ಸಾಲದ ಬಡ್ಡಿದರದಷ್ಟೇ ಇರುತ್ತದೆ. ಆದ್ರೆ ಕೆಲವು ಬ್ಯಾಂಕ್ಗಳು ಮಾತ್ರ ಗೃಹಸಾಲದ ಬಡ್ಡಿದರಕ್ಕಿಂತ ಸ್ವಲ್ಪ ಹೆಚ್ಚಿನ ಬಡ್ಡಿ ವಿಧಿಸುತ್ತವೆ. 

ಪ್ರಯೋಜನಗಳೇನು?
-ಕ್ರೆಡಿಟ್ ಕಾರ್ಡ್ ಸಾಲ, ವೈಯಕ್ತಿಕ ಸಾಲ ಅಥವಾ ಕಾರ್ ಸಾಲಕ್ಕೆ ಹೋಲಿಸಿದ್ರೆ ಟಾಪ್ ಅಪ್ ಸಾಲಗಳ ಮೇಲಿನ ಬಡ್ಡಿದರ ಕಡಿಮೆ. ಇದೇ ಕಾರಣಕ್ಕೆ ಬಹುತೇಕರು ಟಾಪ್-ಅಪ್ ಸಾಲಗಳನ್ನು ಪಡೆಯಲು ಇಚ್ಛಿಸುತ್ತಾರೆ.
-ವೈಯಕ್ತಿಕ ಸಾಲ, ಚಿನ್ನದ ಮೇಲಿನ ಸಾಲ ಅಥವಾ ಕಾರ್ ಮೇಲಿನ ಸಾಲಕ್ಕೆ ಹೋಲಿಸಿದ್ರೆ ಟಾಪ್-ಅಪ್ ಸಾಲಗಳು ದೀರ್ಘಾವಧಿ ಹೊಂದಿರುತ್ತವೆ. ಹೀಗಾಗಿ ಯಾವುದೇ ಗಡಿಬಿಡಿಯಿಲ್ಲದೆ ನಿಧಾನಕ್ಕೆ ಈ ಸಾಲವನ್ನು ತೀರಿಸಬಹುದು.
-ನೀವು ಬ್ಯಾಂಕಿನ ಪ್ರಾಮಾಣಿಕ ಗ್ರಾಹಕರಾಗಿದ್ದು, ಕಳೆದ ಒಂದು ಅಥವಾ ಅದಕ್ಕಿಂತ ಹೆಚ್ಚು ವರ್ಷಗಳಿಂದ ಇಎಂಐಯನ್ನು ಸಮರ್ಪಕವಾಗಿ ಪಾವತಿಸುತ್ತಿದ್ರೆ ನಿಮ್ಮ ಟಾಪ್-ಅಪ್ ಸಾಲದ ಅರ್ಜಿಯನ್ನು ಬ್ಯಾಂಕ್ ಬೇಗ ಕ್ಲಿಯರ್ ಮಾಡುತ್ತದೆ. 
-ಟಾಪ್-ಅಪ್ ಸಾಲವನ್ನು ನೀವು ಮನೆ ದುರಸ್ತಿ, ಮರುನಿರ್ಮಾಣ ಅಥವಾ ಮಕ್ಕಳ ಶಿಕ್ಷಣಕ್ಕೆ ಬಳಸಿದ್ರೆ ತೆರಿಗೆ ವಿನಾಯ್ತಿ ಕೂಡ ಪಡೆಯಲು ಅವಕಾಶವಿದೆ.

ಅರ್ಹತೆಗಳೇನು?
-ನೀವು ಈಗಾಗಲೇ ಬ್ಯಾಂಕ್ನಲ್ಲಿ ಗೃಹ ಸಾಲ ಹೊಂದಿರಬೇಕು.
-ನೀವು ಕಳೆದ ಒಂದು ಅಥವಾ ಅದಕ್ಕಿಂತ ಹೆಚ್ಚು ವರ್ಷಗಳಿಂದ ಇಎಂಐ ಕಂತನ್ನು ಪ್ರತಿ ತಿಂಗಳು ತಪ್ಪದೇ ಪಾವತಿಸಿರಬೇಕು.
-ನಿಮ್ಮ ಕ್ರೆಡಿಟ್ ರಿಪೋರ್ಟ್ ಉತ್ತಮವಾಗಿರಬೇಕು.

ಯಾವೆಲ್ಲ ದಾಖಲೆಗಳು ಅಗತ್ಯ? 
-ಗುರುತು ದೃಢೀಕರಣಕ್ಕಾಗಿ ಆಧಾರ್ ಕಾರ್ಡ್, ಮತದಾರರ ಗುರುತು ಚೀಟಿ, ಪಾನ್ ಕಾರ್ಡ್ ಅಥವಾ ಚಾಲನಾ ಪರವಾನಗಿ ಹೊಂದಿರೋದು ಅಗತ್ಯ.
-ವೇತನ ಪಡೆಯುತ್ತಿರೋರು 3 ತಿಂಗಳ ಸ್ಯಾಲರಿ ಸ್ಲಿಪ್ ನೀಡಬೇಕು.
-ವಿಳಾಸ ದೃಢೀಕರಣಕ್ಕೆ ಪಾಸ್ಪೋರ್ಟ್, ವಿದ್ಯುತ್ ಬಿಲ್ ಇತ್ಯಾದಿ ನೀಡಬೇಕು.
-ಆದಾಯದ ಮಾಹಿತಿಗಾಗಿ ಮೂರು ತಿಂಗಳ ಬ್ಯಾಂಕ್ ಸ್ಟೇಟ್ಮೆಂಟ್.
-ಪಾಸ್ಪೋರ್ಟ್ ಅಳತೆಯ ಫೋಟೋಗಳು.

ಬಡ್ಡಿ ಎಷ್ಟು?
ನೀವು ಗೃಹ ಸಾಲಕ್ಕೆ ಪಾವತಿಸೋ ಬಡ್ಡಿಗಿಂತ ಟಾಪ್-ಅಪ್ ಸಾಲಗಳ ಮೇಲಿನ ಬಡ್ಡಿ ಸ್ವಲ್ಪ ಹೆಚ್ಚೇ ಇರುತ್ತದೆ. ಆದ್ರೆ ವೈಯಕ್ತಿಕ ಸಾಲದ ಬಡ್ಡಿದರಕ್ಕೆ ಹೋಲಿಸಿದ್ರೆ ಇದು ಕಡಿಮೆ. ಸಾಮಾನ್ಯವಾಗಿ ಟಾಪ್-ಅಪ್ ಸಾಲಗಳ ಮೇಲಿನ ಬಡ್ಡಿದರ ಶೇ.6.9-ಶೇ.11ರಷ್ಟಿದೆ. ಇದು ಬ್ಯಾಂಕ್ನಿಂದ ಬ್ಯಾಂಕ್ಗೆ ವ್ಯತ್ಯಾಸವಾಗುತ್ತದೆ.