ಡಿಎಲ್​, ಆಧಾರ್​, ಪ್ಯಾನ್, ಮಾರ್ಕ್ಸ್​ ​​ ಕಾರ್ಡ್​... ವಾಟ್ಸ್​ಆ್ಯಪ್​ನಿಂದ್ಲೇ ಡೌನ್​ಲೋಡ್​ ಮಾಡೋದು ಹೇಗೆ? ಇಲ್ಲಿದೆ ಡಿಟೇಲ್ಸ್​

ಡಿಜಿಲಾಕರ್ ಖಾತೆಯ ದಾಖಲೆಗಳನ್ನು ವಾಟ್ಸ್‌ಆ್ಯಪ್ ಮೂಲಕವೇ ಪಡೆಯಬಹುದು. +91-9013151515 ಸಂಖ್ಯೆಗೆ MyGov ಹೆಲ್ಪ್‌ಡೆಸ್ಕ್ ಎಂದು ಸೇವ್ ಮಾಡಿ, ವಾಟ್ಸ್‌ಆ್ಯಪ್‌ನಲ್ಲಿ ಹಾಯ್ ಎಂದು ಸಂದೇಶ ಕಳುಹಿಸಿ. ಡಿಜಿಲಾಕರ್ ಸೇವೆ ಆಯ್ಕೆ ಮಾಡಿ, ಆಧಾರ್ ಸಂಖ್ಯೆ ನಮೂದಿಸಿ OTP ಬಳಸಿ ದೃಢೀಕರಿಸಿ. ಬೇಕಾದ ದಾಖಲೆಗಳನ್ನು PDF ರೂಪದಲ್ಲಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು.

ಇದು ತಂತ್ರಜ್ಞಾನದ ಯುಗ. ಎಲ್ಲವೂ ಕುಳಿತದಲ್ಲಿಯೇ ಬೆರಳುಗಳ ತುದಿಯಲ್ಲಿಯೇ ಸಿಗುವಂಥ ಕಾಲವಾಗಿದೆ. ಕರೆಂಟ್​ ಬಿಲ್​, ವಾಟರ್​ ಬಿಲ್​ ಆ ಬಿಲ್ಲು, ಈ ಬಿಲ್ಲು ಎಂದು ಕ್ಯೂಗಟ್ಟಲೆ ನಿಲ್ಲುವ ಅಗತ್ಯವಿಲ್ಲ. ಯಾವುದಾದರೂ ಅಪ್ಲಿಕೇಷನ್​ ಬೇಕಾದ್ರೂ ಕ್ಷಣ ಮಾತ್ರದಲ್ಲಿ ಮೊಬೈಲ್​ನಲ್ಲಿ ಭರ್ತಿ ಮಾಡಬಹುದು. ಅದರಿಂದಲೇ ಡೌನ್​ಲೋಡ್​ ಮಾಡಿಕೊಳ್ಳಬಹುದು. ಅಂಥದ್ದರಲ್ಲೇ ಒಂದು ಡಿಎಲ್​, ಆಧಾರ್​ ಕಾರ್ಡ್​, ಪ್ಯಾನ್​ ಕಾರ್ಡ್​, ವಿಮಾ ಪಾಲಿಸಿ ಇತ್ಯಾದಿ ಇತ್ಯಾದಿ ದಾಖಲೆಗಳು. ಇವುಗಳನ್ನೆಲ್ಲ ವಾಟ್ಸ್​ಆ್ಯಪ್​ನಲ್ಲಿಯೇ ಸುಲಭದಲ್ಲಿ ಡೌನ್​ಲೋಡ್​ ಮಾಡಿಕೊಳ್ಳಬಹುದು ಎನ್ನುವುದು ನಿಮಗೆ ಗೊತ್ತಾ? ಕಳೆದೊಂದು ವರ್ಷದಿಂದ ಈ ಸೌಲಭ್ಯ ವಾಟ್ಸ್​ಆ್ಯಪ್​ನಲ್ಲಿ ಸಿಗುತ್ತಿದ್ದು, ಇದೀಗ ಮತ್ತಷ್ಟು ಅಪ್​ಡೇಟ್​ ಮಾಡಲಾಗಿದೆ. ನಿಮಗೆ ದಿನನಿತ್ಯವೂ ಉಪಯೋಗಕ್ಕೆ ಬರುವ ಹಲವು ದಾಖಲೆಗಳನ್ನು ವಾಟ್ಸ್ಆ್ಯಪ್​ ಮೂಲಕವೇ ಡೌನ್​ಲೋಡ್​ ಮಾಡಿಕೊಳ್ಳುವುದು ಸುಲಭವಾಗಿದೆ.

 ಎಲ್ಲಾ ದಾಖಲೆಗಳನ್ನು ಸಂಗ್ರಹ ಮಾಡಿ ಇಡುವ ಡಿಜಿಲಾಕರ್ ವ್ಯವಸ್ಥೆ ಬಂದು ಕೆಲ ವರ್ಷಗಳೇ ಕಳೆದಿವೆ. ಇದೀಗ  ಡಿಜಿಲಾಕರ್ ಖಾತೆಯನ್ನು ಸುಲಭವಾಗಿ ಪ್ರವೇಶಿಸಲು ಸರ್ಕಾರವು ವಾಟ್ಸ್​ಆ್ಯಪ್​ ಜೊತೆ ಸಹಯೋಗ ಹೊಂದಿದೆ. ಇದರಿಂದ ಪ್ಯಾನ್ ಕಾರ್ಡ್, ಆಧಾರ್​ ಕಾರ್ಡ್​ ಚಾಲನಾ ಪರವಾನಗಿ, 10 ಮತ್ತು 12 ನೇ ತರಗತಿಯ ಅಂಕಪಟ್ಟಿಗಳು ಮತ್ತು ವಾಹನ ಆರ್‌ಸಿಯಂತಹ ಪ್ರಮುಖ ದಾಖಲೆಗಳನ್ನು ವಾಟ್ಸ್​ಆ್ಯಪ್​ ಮೂಲಕ ಸುಲಭವಾಗಿ ಡೌನ್‌ಲೋಡ್ ಮಾಡಿಕೊಳ್ಳಬಹುದಾಗಿದೆ. 

ಅದಕ್ಕೆ ಏನು ಮಾಡಬೇಕು ಎನ್ನುವುದನ್ನು ಇಲ್ಲಿ ಹಂತಹಂತವಾಗಿ ವಿವರಿಸಲಾಗಿದೆ:
ಈ ಸೇವೆ ಪಡೆಯಲು ಮೊದಲಿಗೆ ನೀವು ಗೂಗಲ್​ ಪ್ಲೇಸ್ಟೋರ್​ಗೆ ಹೋಗಿ ಡಿಜಿಲಾಕರ್​ (Digilocker) ಆ್ಯಪ್​ ಡೌನ್​ಲೋಡ್​ ಮಾಡಿಟ್ಟುಕೊಳ್ಳಬೇಕು. ಅದರಲ್ಲಿ ನಿಮ್ಮ ಎಲ್ಲಾ ದಾಖಲೆಗಳನ್ನು ಮೊದಲೇ ಸೇರಿಸಿಕೊಂಡಿರಬೇಕು. ಬಳಿಕ ವಾಟ್ಸ್​ಆ್ಯಪ್​ನಲ್ಲಿ ಡೌನ್​ಲೋಡ್​​ ಮಾಡಿಕೊಳ್ಳಲು ಮಾಡಬೇಕಿರುವುದು ಇಷ್ಟು: 
- ಮೊದಲಿಗೆ +91-9013151515 ಈ ಸಂಖ್ಯೆಯನ್ನು MyGov HelpDesk ಎಂದು ಫೋನಿನ ಕಾಂಟ್ಯಾಕ್ಟ್​ನಲ್ಲಿ ಸೇವ್​ ಮಾಡಿಕೊಳ್ಳಿ.
- ನಂತರ ವಾಟ್ಸ್​ಆ್ಯಪ್​ ಓಪನ್​ ಮಾಡಿ ಅದರಲ್ಲಿ ಈ ನಂಬರ್​ ಅನ್ನು ಸರ್ಚ್​ ಮಾಡಿ. ಹೊಸದಾಗಿ ಸೇವ್​  ಮಾಡಿಕೊಂಡಿರುವ ಕಾಂಟ್ಯಾಕ್ಟ್​ ನಂಬರ್​ಗೆ ಹೇಗೆ ವಾಟ್ಸ್​ಆ್ಯಪ್​ನಲ್ಲಿ ಮೊದಲ ಬಾರಿಗೆ ಮೆಸೇಜ್​ ಕಳಿಸ್ತೀರೋ ಅದೇ ರೀತಿ ಇಲ್ಲಿಯೂ ನಮಸ್ತೆ, ಹಾಯ್​ (Hi) ಹೀಗೆ ಏನಾದ್ರೂ ಮೊದಲಿಗೆ ಮೆಸೇಜ್​ ಕಳಿಸಿ.  
- ಕೂಡಲೇ ನಿಮಗೆ ಅಲ್ಲಿ ಎರಡು ಆಪ್ಷನ್​ ಬರುತ್ತವೆ. ಅವು ಡಿಜಿಲಾಕರ್ ಅಥವಾ ಕೋವಿನ್ ಸೇವೆ ಎಂದು. ನೀವು ಆಯ್ಕೆ ಮಾಡಬೇಕಿರುವುದು ಡಿಜಿಲಾಕರ್ ಸೇವೆಯನ್ನು (Digilocker services)
-  ನೀವು ಡಿಜಿಲಾಕರ್ ಖಾತೆಯನ್ನು ಹೊಂದಿದ್ದೀರಾ ಎಂದು ಚಾಟ್‌ಬಾಟ್ ಕೇಳಿದಾಗ ಹೌದು (yes) ಎಂಬುದರ ಮೇಲೆ ಕ್ಲಿಕ್‌ ಮಾಡಿ.   
- ಬಳಿಕ  ಡಿಜಿಲಾಕರ್ ಖಾತೆಯನ್ನು ಲಿಂಕ್ ಮಾಡಲು ಮತ್ತು ದೃಢೀಕರಿಸಲು  ಆಧಾರ್ ನಂಬರ್​ ಹಾಕಿ ಕಳುಹಿಸಿ
- ಆಧಾರ್​ಗೆ  ನೋಂದಣಿಯಾಗಿರುವ ಮೊಬೈಲ್​ಗೆ OTP ಬರುತ್ತದೆ. ಅದನ್ನು ಚಾಟ್‌ಬಾಕ್ಸ್‌ನಲ್ಲಿ ಟೈಪ್​ ಮಾಡಿ.
- ಚಾಟ್‌ಬಾಕ್ಸ್‌ ಪಟ್ಟಿಗಳು ನಿಮ್ಮ ಡಿಜಿಲಾಕರ್ ಖಾತೆಯೊಂದಿಗೆ ಲಿಂಕ್ ಮಾಡಲಾದ ಎಲ್ಲಾ ದಾಖಲೆಗಳನ್ನು ನಿಮಗೆ ತೋರಿಸುತ್ತದೆ. 
- ಅದನ್ನು ಡೌನ್‌ಲೋಡ್ ಮಾಡಲು, ಕಳುಹಿಸಲಾದ ದಾಖಲೆ ಸಂಖ್ಯೆಯನ್ನು ಟೈಪ್ ಮಾಡಿ ಮತ್ತು ಕಳುಹಿಸಿ. 
- ನಿಮ್ಮ ಡಾಕ್ಯುಮೆಂಟ್ ಪಿಡಿಎಫ್‌ನಲ್ಲಿ ಚಾಟ್ ಬಾಕ್ಸ್‌ನಲ್ಲಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು.