ಹನಿಮೂನ್‌ನಲ್ಲಿದ್ದ ನವಜೋಡಿಗೆ ವರುಣನ ಶಾಕ್; ಬೀಚಲ್ಲಿ ಸಿಡಿಲು ಬಡಿದು ವರ ದುರ್ಮರಣ!

ಮದುವೆಯಾಗಿ ಹನಿಮೂನ್‌ಗೆ ತೆರಳಿದ್ದ 29 ವರ್ಷದ ಯುವಕ ಬೀಚ್‌ನಲ್ಲಿ ಸಿಡಿಲು ಬಡಿದು ಸಾವನ್ನಪ್ಪಿದ ಘಟನೆ ನಡೆದಿದೆ. ಈತನ ಹತ್ತಿರದಲ್ಲಿದ್ದ ಇಬ್ಬರಿಗೂ ಸಿಡಿಲು ಬಡಿದಿದ್ದು, ಅವರಿಗೆ ಗಾಯಗಳಾಗಿವೆ. ಸಿಡಿಲಿನ ಅಪಾಯದಿಂದ ತಪ್ಪಿಸಿಕೊಳ್ಳಲು ಸಲಹೆಗಳನ್ನು ನೀಡಲಾಗಿದೆ.

ಮದುವೆ ಎನ್ನುವುದು ಸ್ವರ್ಗದಲ್ಲಿ ನಿಶ್ಚಯವಾಗಿರುತ್ತದೆ ಎಂದು ನಂಬುತ್ತಾರೆ. ಆದರೆ, ಇಲ್ಲೊಬ್ಬ 29 ವರ್ಷದ ಯುವಕ ಮದುವೆ ಮಾಡಿಕೊಂಡು ಕರಾವಳಿ ತೀರದ ಪ್ರದೇಶಕ್ಕೆ ಹನಿಮೂನ್‌ಗೆ ಹೆಂಡತಿ ಕರೆದುಕೊಂಡು ಹೋಗಿದ್ದಾನೆ. ಹೆಂಡತಿಯೊಂದಿಗೆ ಬೀಚ್‌ನ ಬಳಿ ಹೋಗುವಾಗ ಯುವಕನಿಗೆ ಸಿಡಿಲು ಬಡಿದು ಸ್ಥಳದಲ್ಲಿಯೇ ದುರಂತವಾಗಿ ಸಾವಿಗೀಡಾಗಿದ್ದಾನೆ.

ಈ ಘಟನೆ ಅಮೆರಿಕದ ಫ್ಲೋರಿಡಾದ ಪ್ರಸಿದ್ಧ ಬೀಚ್‌ನಲ್ಲಿ ನಡೆದಿದೆ. ಕೊಲೊರಾಡೋ ಮೂಲದ ನವದಂಪತಿಗಳು ಹನಿಮೂನ್‌ಗಾಗಿ ಫ್ಲೋರಿಡಾಗೆ ಬಂದಿದ್ದರು. ಸಿಡಿಲು ಬಡಿದ ತಕ್ಷಣ ಸಿಪಿಆರ್ ಸೇರಿದಂತೆ ಚಿಕಿತ್ಸೆ ನೀಡಿ ಆಸ್ಪತ್ರೆಗೆ ಕರೆದೊಯ್ದರೂ ಪ್ರಾಣ ಉಳಿಸಲಾಗಲಿಲ್ಲ. ಫ್ಲೋರಿಡಾದ ನ್ಯೂ ಸ್ಮಿರ್ನಾ ಬೀಚ್‌ನಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಯುವಕನಿಗೆ ಮಾತ್ರವಲ್ಲದೆ, ಹತ್ತಿರದ ಗಾಲ್ಫ್ ಮೈದಾನದಲ್ಲಿದ್ದ ಇಬ್ಬರಿಗೂ ಸಿಡಿಲು ಬಡಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಇನ್ನು ಗಾಲ್ಫ್ ಕ್ರೀಡಾಂಗಣದಲ್ಲಿದ್ದವರಿಗೆ ಗಾಯಗಳಾಗಿದ್ದರೂ ಆರೋಗ್ಯದಲ್ಲಿ ಗಂಭೀರ ಸಮಸ್ಯೆ ಕಾಣಿಸಿಕೊಂಡಿಲ್ಲ. ಅವರ ಆರೋಗ್ಯದ ಬಗ್ಗೆ ಯಾವುದೇ ಆತಂಕವಿಲ್ಲ ಎಂದು ಪೊಲೀಸರು ಹೇಳಿದ್ದಾರೆ. ಹನಿಮೂನ್‌ಗೆ ಬಂದಿದ್ದ ಯುವಕ ಜೇಕ್ ರೋಸೆನ್‌ಕ್ರಾನ್ಸ್ ಮೃತ ವ್ಯಕ್ತಿ ಎಂಬುದು ತಿಳಿದುಬಂದಿದೆ. ಪ್ರಕೃತಿ ವಿಕೋಪ ಇದ್ದರೂ, ಆಕಾಶ ಸ್ಪಷ್ಟವಾಗಿದ್ದರಿಂದ ಬೀಚ್‌ನಲ್ಲಿ ಅನೇಕ ಜನರಿದ್ದರು. ಆದರೆ, ಏಕಾಏಕಿ ಈ ಘಟನೆ ನಡೆದಿದೆ.

ಸಿಡಿಲಿನ ಅಪಾಯದಿಂದ ತಪ್ಪಿಸಿಕೊಳ್ಳಲು ಸಲಹೆಗಳು

1. ಸಿಡಿಲಿನ ಮೊದಲ ಸೂಚನೆ ಕಂಡ ತಕ್ಷಣ ಸುರಕ್ಷಿತ ಕಟ್ಟಡದೊಳಗೆ ಹೋಗಿ.
2. ಮಳೆ ಬರುವಾಗ ಬಟ್ಟೆ ತೆಗೆಯಲು ಟೆರೇಸ್ ಅಥವಾ ಅಂಗಳಕ್ಕೆ ಹೋಗಬೇಡಿ.
3. ವಿದ್ಯುತ್ ಉಪಕರಣಗಳನ್ನು ಆಫ್ ಮಾಡಿ.
4. ಕಿಟಕಿ ಮತ್ತು ಬಾಗಿಲುಗಳನ್ನು ಮುಚ್ಚಿ.
5. ಲೋಹದ ವಸ್ತುಗಳನ್ನು ಮುಟ್ಟಬೇಡಿ ಅಥವಾ ಹತ್ತಿರ ಹೋಗಬೇಡಿ. ವಿದ್ಯುತ್ ಉಪಕರಣಗಳಿಂದ ದೂರವಿರಿ.
6. ದೂರವಾಣಿ ಬಳಸುವುದನ್ನು ತಪ್ಪಿಸಿ.
7. ಸಿಡಿಲಿನ ಸಮಯದಲ್ಲಿ ಸ್ನಾನ ಮಾಡಬೇಡಿ.
8. ಮನೆಯೊಳಗೆ ಗೋಡೆ ಅಥವಾ ನೆಲವನ್ನು ಮುಟ್ಟದೆ ಕುಳಿತುಕೊಳ್ಳಿ.
9. ಸಿಡಿಲಿನ ಸಮಯದಲ್ಲಿ ಟೆರೇಸ್ ಅಥವಾ ಎತ್ತರದ ಸ್ಥಳಗಳಲ್ಲಿ ಅಥವಾ ಮರದ ಕೊಂಬೆಗಳ ಮೇಲೆ ಕುಳಿತುಕೊಳ್ಳುವುದು ಅಪಾಯಕಾರಿ.
10. ಹೊರಗಿದ್ದರೆ ಮರಗಳ ಕೆಳಗೆ ನಿಲ್ಲಬೇಡಿ.
11. ವಾಹನದಲ್ಲಿದ್ದರೆ, ತೆರೆದ ಸ್ಥಳದಲ್ಲಿ ನಿಲ್ಲಿಸಿ ಲೋಹದ ಭಾಗಗಳನ್ನು ಮುಟ್ಟದೆ ಕುಳಿತುಕೊಳ್ಳಿ.
12. ಸಿಡಿಲಿನ ಸಮಯದಲ್ಲಿ ನೀರಿಗೆ ಇಳಿಯಬೇಡಿ.
13. ಗಾಳಿಪಟ ಹಾರಿಸಬೇಡಿ.
14. ತೆರೆದ ಸ್ಥಳದಲ್ಲಿದ್ದರೆ, ಪಾದಗಳನ್ನು ಒಟ್ಟಿಗೆ ಸೇರಿಸಿ, ತಲೆಯನ್ನು ಮೊಣಕಾಲುಗಳ ನಡುವೆ ಇಟ್ಟು ಚೆಂಡಿನಂತೆ ಸುತ್ತಿಕೊಳ್ಳಿ.
15. ಸಿಡಿಲಿನ ಸಮಯದಲ್ಲಿ ಹೊರಗೆ ಒಣಗಲು ಹಾಕಿದ್ದ ಬಟ್ಟೆಗಳನ್ನು ತೆಗೆಯಬೇಡಿ.
16. ಸಿಡಿಲಿನಿಂದ ರಕ್ಷಣೆ ಪಡೆಯಲು ಕಟ್ಟಡಗಳ ಮೇಲೆ ಮಿಂಚು ರಾಡ್ ಅಳವಡಿಸಬಹುದು. ವಿದ್ಯುತ್ ಉಪಕರಣಗಳ ಸುರಕ್ಷತೆಗಾಗಿ ಸರ್ಜ್ ಪ್ರೊಟೆಕ್ಟರ್ ಅಳವಡಿಸಬಹುದು.
17. ಸಿಡಿಲಿನ ಸಮಯದಲ್ಲಿ ಸಾಕುಪ್ರಾಣಿಗಳನ್ನು ತೆರೆದ ಸ್ಥಳದಲ್ಲಿ ಕಟ್ಟಬೇಡಿ.
18. ಮಳೆ ಮೋಡ ಕಾಣಿಸಿಕೊಂಡಾಗ ಅವುಗಳನ್ನು ಬಿಚ್ಚಲು ಅಥವಾ ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸಲು ತೆರೆದ ಸ್ಥಳಕ್ಕೆ ಹೋಗಬೇಡಿ.