ವಿಶ್ವಾಸಮತ ಗೆದ್ದ ಪಾಕ್ ಪ್ರಧಾನಿ ಇಮ್ರಾನ್ ಖಾನ್: ಕುರ್ಚಿ ಇನ್ನಷ್ಟು ಗಟ್ಟಿ!
ಸಾರಾಂಶ
ವಿಶ್ವಾಸಮತ ಗೆದ್ದ ಪಾಕ್ ಪ್ರಧಾನಿ ಇಮ್ರಾನ್ ಖಾನ್| ಕುರ್ಚಿ ಇನ್ನಷ್ಟು ಗಟ್ಟಿ| ಸರ್ಕಾರ ರಚಿಸಿದಾಗ ಹೊಂದಿದ್ದಕ್ಕಿಂತ 6 ಹೆಚ್ಚು ಮತ
ಇಸ್ಲಾಮಾಬಾದ್(ಮಾ.07): ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ಶನಿವಾರ ವಿಶ್ವಾಸಮತ ಗೆಲ್ಲುವ ಮೂಲಕ ತಮ್ಮ ಕುರ್ಚಿಯನ್ನು ಇನ್ನಷ್ಟುಭದ್ರಪಡಿಸಿಕೊಂಡಿದ್ದಾರೆ. ಪಾಕಿಸ್ತಾನ್ ತೆಹ್ರೀಕ್-ಎ-ಇನ್ಸಾಫ್ (ಪಿಟಿಐ) ನೇತೃತ್ವದ ಆಡಳಿತಾರೂಢ ಮೈತ್ರಿಕೂಟಕ್ಕೆ ಅಧಿಕಾರ ಉಳಿಸಿಕೊಳ್ಳಲು 172 ಮತಗಳ ಅಗತ್ಯವಿತ್ತು. ಆದರೆ, 178 ಮತಗಳು ಮೈತ್ರಿಕೂಟದ ಪರ ಚಲಾವಣೆಯಾಗಿ ಇಮ್ರಾನ್ ವಿಜಯಿಯಾದರು.
342 ಸದಸ್ಯಬಲದ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ಇಮ್ರಾನ್ ಖಾನ್ ಪಕ್ಷ 157 ಸದಸ್ಯರನ್ನು ಹೊಂದಿದೆ. ಎಂಕ್ಯುಎಂ, ಪಿಎಂಎಲ್-ಕ್ಯು, ಬಿಎಪಿ, ಜಿಡಿಎ, ಎಎಂಎಲ್ ಮುಂತಾದ ಪಕ್ಷಗಳ ಜೊತೆ ಮೈತ್ರಿ ಮಾಡಿಕೊಂಡು ಅವರು ಪ್ರಧಾನಿಯಾಗಿದ್ದಾರೆ. 2 ವರ್ಷದ ಹಿಂದೆ ಸರ್ಕಾರ ರಚಿಸಿದಾಗ ವಿಶ್ವಾಸಮತಯಾಚನೆಯಲ್ಲಿ ಅವರು 172 ಮತ ಪಡೆದಿದ್ದರು. ಈಗ 178 ಮತ ಪಡೆದಿದ್ದಾರೆ. ಈ ವೇಳೆ ವಿಪಕ್ಷಗಳು ಸಭಾತ್ಯಾಗ ಮಾಡಿ ಕಲಾಪ ಬಹಿಷ್ಕರಿಸಿದವು.
ಇತ್ತೀಚೆಗೆ ಸೆನೆಟ್ ಸದಸ್ಯತ್ವಕ್ಕೆ ನಡೆದ ಚುನಾವಣೆಯಲ್ಲಿ ಇಮ್ರಾನ್ ಸಂಪುಟದ ವಿತ್ತ ಮಂತ್ರಿ ಅಬ್ದುಲ್ ಹಫೀಜ್ ಸೋತಿದ್ದರು. ಮಾಜಿ ಪ್ರಧಾನಿ ಯೂಸುಫ್ ರಾಜಾ ಗಿಲಾನಿ ಗೆದ್ದಿದ್ದರು. ಹೀಗಾಗಿ ಇಮ್ರಾನ್ ರಾಜೀನಾಮೆ ನೀಡಬೇಕೆಂದು ವಿಪಕ್ಷಗಳ ಮೈತ್ರಿಕೂಟ ಪಟ್ಟು ಹಿಡಿದಿತ್ತು. ಈ ಹಿನ್ನೆಲೆಯಲ್ಲಿ ವಿಶ್ವಾಸಮತ ಯಾಚನೆಗೆ ಇಮ್ರಾನ್ ನಿರ್ಧರಿಸಿದ್ದರು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ