ಮತ್ತೊಬ್ಬರ ಉಸಾಬರಿ ಬೇಡ: ಇರಾನ್-ಯುಎಸ್ ಯುದ್ಧದಲ್ಲಿ ಭಾಗಿಯಾಗಲ್ಲ ಎಂದ ಇಮ್ರಾನ್!

ಇರಾನ್-ಯುಎಸ್ ಎರಡೂ ಬಣ ಸೇರಲ್ಲ ಎಂದ ಪಾಕ್ ಪ್ರಧಾನಿ| ಎರಡೂ ದೇಶಗಳ ನಡುವೆ ಮಧ್ಯಸ್ಥಿಕೆಯ ಮಾತನಾಡಿದ ಇಮ್ರಾನ್ ಖಾನ್| ಪಾಕ್ ಮತ್ತೊಬ್ಬರ ಯುದ್ಧದಲ್ಲಿ ಭಾಗಿಯಾಗುವುದಿಲ್ಲ ಎಂದ ಇಮ್ರಾನ್| ಮಧ್ಯಸ್ಥಿಕೆ ವಹಿಸುವಂತೆ ಈಗಾಗಲೇ ಭಾರತವನ್ನು ಕೇಳಿಕೊಂಡಿರುವ ಇರಾನ್|

ಇಸ್ಲಾಮಾಬಾದ್(ಜ.10): ಇರಾನ್-ಅಮೆರಿಕ ನಡುವಿನ ಯುದ್ಧೋನ್ಮಾದ ಇಡೀ ಜಗತ್ತನ್ನು ತಲ್ಲಣಗೊಳಿಸಿರುವುದು ದಿಟ. ಬಿಕ್ಕಟ್ಟು ಶಮನಕ್ಕೆ ಮಧ್ಯಸ್ಥಿಕೆವಹಿಸುವಂತೆ ಇರಾನ್ ಈಗಾಗಲೇ ಭಾರತವನ್ನು ಕೋರಿದೆ.

ಆದರೆ ಇರಾನ್-ಅಮೆರಿಕ ನಡುವೆ ತಾನು ಮಧ್ಯಸ್ಥಿಕೆ ವಹಿಸುವುದಾಗಿ ಪಾಕಿಸ್ತಾನ ಪ್ರಧಾನಿ ಇಮ್ರಾನ್ ಖಾನ್ ಹೇಳಿದ್ದು, ಯಾರೋಬ್ಬರ ಯುದ್ಧದಲ್ಲೂ ಭಾಗಿಯಾಗದೇ ಎರಡೂ ದೇಶಗಳ ನಡುವಿನ ಭಿನ್ನಾಭಿಪ್ರಾಯ ಬಗೆಹರಿಸಲು ಪ್ರಯತ್ನಿಸುವುದಾಗಿ ಸ್ಪಷ್ಟಪಡಿಸಿದ್ದಾರೆ.

ನಾವು ಎರಡೂ ದೇಶಗಳ ಪರವಹಿಸುವುದಿಲ್ಲ, ಬದಲಿಗೆ ಎರಡೂ ದೇಶಗಳ ನಡುವಿನ ಬಿಕ್ಕಟ್ಟು ಶಮನಕ್ಕಾಗಿ ಶ್ರಮಿಸುವುದಾಗಿ ಇಮ್ರಾನ್ ಖಾನ್ ಹೇಳಿದ್ದಾರೆ.

ನಾವು ಇರಾನ್ ಮತ್ತು ಅಮೆರಿಕ ನಡುವಿನ ಸ್ನೇಹ ಬಾಂಧವ್ಯ ಪುನರ್ ಸ್ಥಾಪಿಸಲು ಪ್ರಯತ್ನಿಸುತ್ತೇವೆ. ಅಮೆರಿಕ ಮತ್ತು ಇರಾನ್ ನಡುವಿನ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಯುವಂತಾಗಲು ಪಾಕಿಸ್ತಾನ ಮಧ್ಯಸ್ಥಿಕೆ ವಹಿಸಲು ಸಿದ್ಧವಾಗಿದೆ ಎಂದು ಪಾಕ್ ಪ್ರಧಾನಿ ನುಡಿದಿದ್ದಾರೆ.

ಪಾಕಿಸ್ತಾನ ಈ ಹಿಂದೆ ಮತ್ತೊಂದು ದೇಶದ ಯುದ್ಧದಲ್ಲಿ ಭಾಗಿಯಾಗಿ ತಪ್ಪು ಮಾಡಿರುವುದರಿಂದ,  ಮತ್ತೆ ಈ ತಪ್ಪು ಮಾಡಲು ತಯಾರಿಲ್ಲ ಎಂದು ಪರೋಕ್ಷವಾಗಿ ಇಮ್ರಾನ್ ಅಫ್ಘಾನಿಸ್ತಾನ ಯುದ್ಧವನ್ನು ಪ್ರಸ್ತಾಪಿಸಿದ್ದಾರೆ.