ಹಾರಾಟದಲ್ಲಿರುವಾಗ ಕಳಚಿಬಿದ್ದ ರೆಕ್ಕೆಗಳು: ಹೆಲಿಕಾಪ್ಟರ್‌ ದುರಂತದಲ್ಲಿ ಸೀಮನ್ಸ್‌ ಕಂಪನಿ ಸಿಇಒ ಇಡೀ ಕುಟುಂಬ ಸಾವು!

ಏಪ್ರಿಲ್ 11 ರಂದು ನ್ಯೂಯಾರ್ಕ್‌ನ ಹಡ್ಸನ್ ನದಿಯಲ್ಲಿ ಹೆಲಿಕಾಪ್ಟರ್ ಪತನಗೊಂಡು ಮೂವರು ಮಕ್ಕಳು ಸೇರಿದಂತೆ ಆರು ಜನರು ಮೃತಪಟ್ಟಿದ್ದಾರೆ. ಹಾರಾಟದ ವೇಳೆ ರೆಕ್ಕೆಗಳು ಕಳಚಿಬಿದ್ದಿದ್ದರಿಂದ ಈ ದುರ್ಘಟನೆ ಸಂಭವಿಸಿದೆ. ಮೃತಪಟ್ಟವರಲ್ಲಿ ಸ್ಪೇನ್ ಮೂಲದ ಕುಟುಂಬ ಮತ್ತು ಪೈಲಟ್ ಸೇರಿದ್ದಾರೆ. ಈ ಘಟನೆಯು ಹೃದಯವಿದ್ರಾವಕ ಮತ್ತು ದುರಂತ ಎಂದು ಮೇಯರ್ ಹೇಳಿದ್ದಾರೆ. ತನಿಖೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನ್ಯೂಯಾರ್ಕ್‌ (ಏ.11): ಹಾರಾಟದಲ್ಲಿರುವಾಗಲೇ ರೆಕ್ಕೆಗಳು ಕಳಚಿ ಬಿದ್ದಿದ್ದರಿಂದ ಗುರುವಾರ ನ್ಯೂಯಾರ್ಕ್ ನಗರದ ಹಡ್ಸನ್ ನದಿಯಲ್ಲಿ ಹೆಲಿಕಾಪ್ಟರ್‌ ಕುಸಿದು ಬಿದ್ದಿದೆ. ಈ ವೇಳೆ ಪ್ರವಾಸಿ ಹೆಲಿಕಾಪ್ಟರ್‌ನಲ್ಲಿದ್ದ ಮೂವರು ಮಕ್ಕಳು ಸೇರಿದಂತೆ ಆರು ಮಂದಿ ಸಾವು ಕಂಡಿದ್ದಾರೆ ಎಂದು ರಾಯಿಟರ್ಸ್‌ ವರ್ದಿ ಮಾಡಿದೆ.  ಮೃತರಲ್ಲಿ ಸ್ಪೇನ್ ಮೂಲದ ಕುಟುಂಬ ಮತ್ತು ಪೈಲಟ್ ಸೇರಿದ್ದಾರೆ ಎಂದು ಮೇಯರ್ ಎರಿಕ್ ಆಡಮ್ಸ್ ತಿಳಿಸಿದ್ದಾರೆ.

ಗಾಯಗೊಂಡವರಲ್ಲಿ ಇಬ್ಬರನ್ನು ಆರಂಭದಲ್ಲಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತು ಆದರೆ ನಂತರ ಅವರು ಸಾವನ್ನಪ್ಪಿದರು ಎಂದು ಸುದ್ದಿ ಸಂಸ್ಥೆ ಎಎಫ್‌ಪಿ ವರದಿ ಮಾಡಿದೆ. ಅಪಘಾತದಲ್ಲಿ ಸಾವನ್ನಪ್ಪಿದವರನ್ನು ಅಧಿಕಾರಿಗಳು ಇನ್ನೂ ಸಾರ್ವಜನಿಕವಾಗಿ ಗುರುತಿಸಿಲ್ಲವಾದರೂ, ವಿಮಾನದಲ್ಲಿದ್ದವರಲ್ಲಿ ಸ್ಪೇನ್‌ನ ಸೀಮೆನ್ಸ್‌ನ ಅಧ್ಯಕ್ಷ ಮತ್ತು ಸಿಇಒ ಅಗಸ್ಟಿನ್ ಎಸ್ಕೋಬಾರ್, ಅವರ ಪತ್ನಿ ಮತ್ತು ಅವರ ಮೂವರು ಮಕ್ಕಳು ಸೇರಿದ್ದಾರೆ ಎಂದು ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ.

'ಈ ಹಂತದಲ್ಲಿ ಎಲ್ಲಾ ಆರೂ ಮೃತದೇಹಗಳನ್ನು ನೀರಿನಿಂದ ಹೊರತೆಗೆಯಲಾಗಿದೆ. ಇನ್ನೂ ದುಃಖದ ವಿಚಾರವೆಂದರೆ ಇದರಲ್ಲಿ ಯಾರೂ ಕೂಡ ಜೀವಂತವಾಗಿಲ್ಲ ಎಂದು ಘೋಷಿಸಲಾಗಿದೆ' ಎಂದು ಮೇಯರ್ ಎರಿಕ್ ಆಡಮ್ಸ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.ಇದು "ಹೃದಯವಿದ್ರಾವಕ ಮತ್ತು ದುರಂತ ಅಪಘಾತ" ಎಂದು ಹೇಳಿದರು.

ಅಪಘಾತದ ಬಗ್ಗೆ ಪ್ರತಿಕ್ರಿಯಿಸಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, "ಹಡ್ಸನ್ ನದಿಯಲ್ಲಿ ಭೀಕರ ಹೆಲಿಕಾಪ್ಟರ್ ಅಪಘಾತ. ಆರು ಜನರು, ಪೈಲಟ್, ಇಬ್ಬರು ವಯಸ್ಕರು ಮತ್ತು ಮೂವರು ಮಕ್ಕಳು ಈಗ ನಮ್ಮೊಂದಿಗಿಲ್ಲ ಎಂದು ತೋರುತ್ತದೆ. ಅಪಘಾತದ ದೃಶ್ಯಗಳು ಭಯಾನಕವಾಗಿವೆ" ಎಂದು ಪೋಸ್ಟ್‌ ಮಾಡಿದ್ದಾರೆ.

"ಸಂತ್ರಸ್ತರ ಕುಟುಂಬಗಳು ಮತ್ತು ಸ್ನೇಹಿತರನ್ನು ದೇವರು ಆಶೀರ್ವದಿಸಲಿ. ಸಾರಿಗೆ ಕಾರ್ಯದರ್ಶಿ ಸೀನ್ ಡಫಿ ಮತ್ತು ಅವರ ಸಿಬ್ಬಂದಿ ರಕ್ಷಣಾ ಕಾರ್ಯದಲ್ಲಿ ಭಾಗಿಯಾಗಿದ್ದಾರೆ. ನಿಖರವಾಗಿ ಏನಾಯಿತು ಮತ್ತು ಹೇಗೆ ಎಂಬುದರ ಕುರಿತು ಶೀಘ್ರದಲ್ಲೇ ಪ್ರಕಟಣೆಗಳನ್ನು ನೀಡಲಾಗುವುದು!" ಎಂದು ಟ್ರಂಪ್ ತಮ್ಮ ಸಾಮಾಜಿಕ ಮಾಧ್ಯಮ ವೇದಿಕೆ ಟ್ರುತ್‌ನಲ್ಲಿ ಬರೆದಿದ್ದಾರೆ.

ನ್ಯೂಯಾರ್ಕ್ ಪೊಲೀಸ್ ಆಯುಕ್ತ ಜೆಸ್ಸಿಕಾ ಟಿಶ್ ಅವರ ಪ್ರಕಾರ, ನ್ಯೂಯಾರ್ಕ್ ಹೆಲಿಕಾಪ್ಟರ್ ಟೂರ್ಸ್ ನಿರ್ವಹಿಸುವ ಬೆಲ್ 206 ಹೆಲಿಕಾಪ್ಟರ್ ಮಧ್ಯಾಹ್ನ 3 ಗಂಟೆಗೆ ನಗರದ ಮಧ್ಯಭಾಗದ ಹೆಲಿಕಾಪ್ಟರ್ ಪ್ಯಾಡ್‌ನಿಂದ ಹೊರಟು ಹಡ್ಸನ್ ಮೇಲೆ ಉತ್ತರಕ್ಕೆ ಹಾರಿತ್ತು.ಅದು ಜಾರ್ಜ್ ವಾಷಿಂಗ್ಟನ್ ಸೇತುವೆಯನ್ನು ತಲುಪಿದಾಗ ದಕ್ಷಿಣಕ್ಕೆ ತಿರುಗಿ ನಿಮಿಷಗಳ ನಂತರ ನದಿಗೆ ಅಪ್ಪಳಿಸಿತು, ಮಧ್ಯಾಹ್ನ 3:15 ರ ಸುಮಾರಿಗೆ ಲೋವರ್ ಮ್ಯಾನ್‌ಹ್ಯಾಟನ್ ಬಳಿ ತಲೆಕೆಳಗಾಗಿ ನೀರಿಗೆ ಡಿಕ್ಕಿ ಹೊಡೆದು ಮುಳುಗಿತು ಎಂದು ಟಿಶ್ ಮಾಹಿತಿ ನೀಡಿದ್ದಾರೆ.

ದುರಂತದ ಬಗ್ಗೆ ಸೋಶಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡ ವೀಡಿಯೊಗಳು ನದಿಗೆ ಬೀಳುತ್ತಿರುವ ದೊಡ್ಡ ವಸ್ತುವನ್ನು ತೋರಿಸಿವೆ. ಅದರ ನಂತರ ಕೆಲವು ಸೆಕೆಂಡುಗಳ ನಂತರ ಹೆಲಿಕಾಪ್ಟರ್ ಬ್ಲೇಡ್‌ನಂತೆ ಕೆಳಗೆ ಉರುಳಿ ಬಿದ್ದಿದ್ದು ಕಂಡುಬಂದಿತು. ಶೀಘ್ರದಲ್ಲೇ, ತುರ್ತು ಮತ್ತು ಪೊಲೀಸ್ ದೋಣಿಗಳು ಆ ನದಿ ಪ್ರದೇಶದ ಸುತ್ತಲೂ ಸುತ್ತುವರೆದವು.

ಪ್ರತ್ಯಕ್ಷದರ್ಶಿ ಬ್ರೂಸ್ ವಾಲ್ ಅಸೋಸಿಯೇಟೆಡ್ ಪ್ರೆಸ್‌ಗೆ ತಿಳಿಸಿದ್ದು, ಹೆಲಿಕಾಪ್ಟರ್ ಗಾಳಿಯಲ್ಲಿ "ಬೇರ್ಪಟ್ಟು ಬೀಳುವುದನ್ನು" ನೋಡಿದೆ, ಹೆಲಿಕಾಪ್ಟರ್‌ನ ದೇಹ ಹಾಗೂ ರೆಕ್ಕೆಗಳು ಬೇರೆಬೇರೆಯಾಗಿದ್ದವು. ವಿಮಾನ ಬೀಳುವಾಗಲೂ ಪ್ರೊಪೆಲ್ಲರ್ ತಿರುಗುತ್ತಲೇ ಇತ್ತು ಎಂದು ಅವರು ಹೇಳಿದ್ದಾರೆ.

ಮ್ಯಾನ್‌ಹ್ಯಾಟನ್‌ನ  ಆಕಾಶವು ನಿಯಮಿತವಾಗಿ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳಿಂದ ತುಂಬಿರುತ್ತದೆ, ಖಾಸಗಿ ಮನರಂಜನಾ ವಿಮಾನಗಳು ಮತ್ತು ವಾಣಿಜ್ಯ ಮತ್ತು ಪ್ರವಾಸಿ ವಿಮಾನಗಳು ಎರಡೂ ಇಲ್ಲಿ ಪ್ರಯಾಣಿಸುತ್ತಿರುತ್ತದೆ.

2018 ರಲ್ಲಿ, "ಓಪನ್‌ ಡೋರ್‌" ವಿಮಾನಗಳನ್ನು ನೀಡುವ ಚಾರ್ಟರ್ ಹೆಲಿಕಾಪ್ಟರ್ ಪೂರ್ವ ನದಿಗೆ ಅಪ್ಪಳಿಸಿ ಐದು ಜನರನ್ನು ಬಲಿ ತೆಗೆದುಕೊಂಡಿತು. 2009 ರಲ್ಲಿ, ಹಡ್ಸನ್ ನದಿಯ ಮೇಲೆ ವಿಮಾನ ಮತ್ತು ಪ್ರವಾಸಿ ಹೆಲಿಕಾಪ್ಟರ್ ನಡುವೆ ಡಿಕ್ಕಿಯಾಗಿ ಒಂಬತ್ತು ಜನರು ಸಾವನ್ನಪ್ಪಿದರು ಎಂದು ಅಸೋಸಿಯೇಟೆಡ್ ಪ್ರೆಸ್ ವರದಿ ಮಾಡಿದೆ.