ಭಾರತದ ತ್ಯಾಜ್ಯ ಲಾಸ್ ಎಂಜಿಲೀಸ್‌ನಲ್ಲಿ: ಟ್ರಂಪ್ ಇರುವುದು ಯಾವ ಜಗತ್ತಿನಲ್ಲಿ?

ಭಾರತದ ಕೈಗಾರಿಕೆಗಳ ತ್ಯಾಜ್ಯ ಲಾಸ್ ಎಂಜಿಲೀಸ್‌ನಲ್ಲಿ ತೇಲುತ್ತದೆ ಎಂದ ಟ್ರಂಪ್| ಎಕನಾಮಿಕ್ ಕ್ಲಬ್ ಆಫ್ ನ್ಯೂಯಾರ್ಕ್‌ ಉದ್ದೇಶಿಸಿ ಮಾತನಾಡಿದ ಟ್ರಂಪ್| ಪ್ಯಾರಿಸ್ ಹವಾಮಾನ ಒಪ್ಪಂದದಿಂದ ಹಿಂದೆ ಸರಿದಿದ್ದಕ್ಕೆ ಸಮಜಾಯಿಷಿ| 'ಭಾರತ ಹಾಗೂ ಚೀನಾದ ಬೃಹತ್ ಕೈಗಾರಿಕೆಗಳು ಉಂಟುಮಾಡುವ ಮಾಲಿನ್ಯ ಲಾಸ್ ಎಂಜಿಲೀಸ್‌ಗೆ ಬರುತ್ತದೆ'| ಸಭಿಕರಲ್ಲಿ ಅಚ್ಚರಿ ಮೂಡಿಸಿದ ಡೋನಾಲ್ಡ್ ಟ್ರಂಪ್ ಹೇಳಿಕೆ| 

ನ್ಯೂಯಾರ್ಕ್(ನ.14): ಎತ್ತಣ ಮಾಮರ ಎತ್ತಣ ಕೋಗಿಲೆ.. ಎಂಬಂತೆ ಭಾರತದ ತ್ಯಾಜ್ಯಕ್ಕೂ ದೂರದ ಅಮೆರಿಕದ ಲಾಸ್ ಎಂಜಿಲೀಸ್‌ಗೂ ಏನು ಸಂಬಂಧ ಎಂಬುದನ್ನು ಕೇವಲ ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಮಾತ್ರ ಹೇಳಬಲ್ಲರು.

ಭಾರತ, ಚೀನಾ ರಾಷ್ಟ್ರಗಳ ಕೈಗಾರಿಕೆಗಳ ಮಾಲಿನ್ಯ ಅಮೆರಿಕದ ಲಾಸ್ ಎಂಜಿಲೀಸ್‌ಗೆ ಬಂದು ಸೇರುತ್ತಿದೆ ಎಂದು ಹೇಳುವ ಮೂಲಕ ಟ್ರಂಪ್ ನಗೆಪಾಟಲೀಗಿಡಾಗಿದ್ದಾರೆ.

ಎಕನಾಮಿಕ್ ಕ್ಲಬ್ ಆಫ್ ನ್ಯೂಯಾರ್ಕ್‌ ಉದ್ದೇಶಿಸಿ ಮಾತನಾಡಿದ ಟ್ರಂಪ್, 2015 ರ ಪ್ಯಾರಿಸ್ ಹವಾಮಾನ ಒಪ್ಪಂದದಿಂದ ಹಿಂದೆ ಸರಿದಿದ್ದರ ಕುರಿತು ಸಮಜಾಯಿಷಿ ನೀಡುತ್ತಿದ್ದರು.

ಈ ವೇಳೆ ಭಾರತ ಹಾಗೂ ಚೀನಾದ ಬೃಹತ್ ಕೈಗಾರಿಕೆಗಳು ಉಂಟುಮಾಡುವ ಮಾಲಿನ್ಯ ಸಮುದ್ರಕ್ಕೆ ಸೇರಿ, ಅದು ಲಾಸ್ ಎಂಜಿಲೀಸ್‌ನಲ್ಲಿ ಬಂದು ತೇಲುತ್ತದೆ ಎಂದು ಹೇಳುವ ಮೂಲಕ ಸಭಿಕರನ್ನು ಅಚ್ಚರಿಗೆ ದೂಡಿದರು.

ಹವಾಮಾನ ಬದಲಾವಣೆಯನ್ನು ಬಹಳ ಸಂಕೀರ್ಣ ವಿಷಯ ಎಂದು ಹೇಳಿರುವ ಟ್ರಂಪ್, ತಮ್ಮನ್ನು ಪರಿಸರವಾದಿ ಎಂದು ಕರೆದುಕೊಳ್ಳುವ ಮೂಲಕ ಅಪಹಸ್ಯಕ್ಕೆ ಗುರಿಯಾಗಿದ್ದಾರೆ. 

ಪ್ಯಾರಿಸ್ ಹವಾಮಾನ ಒಪ್ಪಂದ ಮಾಲಿನ್ಯ ಉಂಟು ಮಾಡುವ ದೇಶಗಳ ಪರವಾಗಿದ್ದು, ಅಮೆರಿಕವನ್ನು ವಿವಿಧ ರೀತಿಯಲ್ಲಿ ಶೋಷಣೆ ಮಾಡುತ್ತಿದೆ. ಇದೇ ಕಾರಣಕ್ಕೆ ಒಪ್ಪಂದದಿಂದ ಹಿಂದೆ ಸರಿದ್ದಾಗಿ ಟ್ರಂಪ್ ಹೇಳಿದ್ದಾರೆ.