ಮೆಕ್ಸಿಕನ್ ಸುಂದರಿ ಆಂಡ್ರಿಯಾ ಮುಡಿಗೆ 'ಭುವನ ಸುಂದರಿ' ಕಿರೀಟ!

* ಮೆಕ್ಸಿಕನ್ ಮೂಲದ ಆಂಡ್ರಿಯಾ ಪಾಲಾಯ್ತು Miss Universe 2021 ಕಿರೀಟ  * 69ನೇ ಭುವನ ಸುಂದರಿ ಪಟ್ಟ ಗಳಿಸಿದ ಆಂಡ್ರಿಯಾ * ಕೊರೊನಾ ಸಂಬಂಧಿತ ಪ್ರಶ್ನೆಗೆ ಉತ್ತರಿಸಿ ಮನಗೆದ್ದ ಆಂಡ್ರಿಯಾ

ಫ್ಲೋರಿಡಾ(ಮೇ.17): ಮೆಕ್ಸಿಕೋದ ಸುಂದರಿ ಆಂಡ್ರಿಯಾ ಮೆಜಾ 69ನೇ ಭುವನ ಸುಂದರಿ​ ಕಿರೀಟವನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ. ಫ್ಯಾಷನ್​ ಲೋಕದಲ್ಲಿ ಸಾಧನೆ ಮಾಡಿರುವ ಆಂಡ್ರಿಯಾ ವೃತ್ತಿಯಲ್ಲಿ ಸಾಫ್ಟ್​ವೇರ್ ಇಂಜಿನಿಯರ್.​ Miss Universe 2021 ಕಿರೀಟ ಗೆಲ್ಲುವ ಮೂಲಕ, ಈ ಕೀರ್ತಿಗೆ ಪಾತ್ರರಾದ ಮೆಕ್ಸಿಕೋದ ಮೂರನೇ ಸುಂದರಿಯಾಗಿ ಆಂಡ್ರಿಯಾ ಹೊರ ಹೊಮ್ಮಿದ್ದಾರೆ.

ಮೇ 16ರಂದು ಫ್ಲೋರಿಡಾದಲ್ಲಿ ನಡೆದ ಮಿಸ್​ ಯೂನಿವರ್ಸ್​ ಅಂತಿಮ ಸುತ್ತಿನ ಸ್ಪರ್ಧೆಯಲ್ಲಿ ಆಂಡ್ರಿಯಾ ಗೆಲುವಿನ ನಗೆ ಬೀರಿದ್ದು, ಬ್ರೆಜಿಲ್​ನ ಜೂಲಿಯಾ ಗಾಮಾ ಮೊದಲ ರನ್ನರ್​ ಅಪ್​ ಆಗಿ ಹೊರಹೊಮ್ಮಿದರು. ಪೆರುವಿನ ಜೆನಿಕ್​ ಮಸೆಟಾ ಅವರು ಎರಡನೇ ರನ್ನರ್​ ಅಪ್​ ಸ್ಥಾನ ಪಡೆದುಕೊಂಡರು. ಭಾರತದಿಂದ ಸ್ಪರ್ಧಿಸಿದ್ದ ಅಡ್ಲಿನ್​ ಕಾಸ್ಟಿಲಿನೋ ಮೂರನೇ ರನ್ನರ್​ ಅಪ್​ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. ಆಂಡ್ರಿಯಾ ಮೆಜಾಗೆ ಕಳೆದ ಬಾರಿಯ 'ಮಿಸ್ ಯೂನಿವರ್ಸ್' ದಕ್ಷಿಣ ಆಫ್ರಿಕಾದ ಜೊಜಿಬಿನಿ ತುಂಜಿ ಕಿರೀಟ ತೊಡಿಸಿದ್ದಾರೆ.

ಮಿಸ್​ ಯೂನಿವರ್ಸ್​ ಸ್ಪರ್ಧೆಯ ಪ್ರಶ್ನೋತ್ತರ ಸುತ್ತಿನಲ್ಲಿ ಆಂಡ್ರಿಯಾ ಮೆಜಾಗೆ ಕೊರೋನಾ ಸಂಬಂಧಿತ ಪ್ರಶ್ನೆ ಕೇಳಲಾಯಿತು. ‘ಒಂದು ವೇಳೆ ನೀವು ನಿಮ್ಮ ದೇಶದ ಲೀಡರ್​ ಆಗಿದ್ದರೆ, ಈ ಕೊರೋನಾ​ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸುತ್ತಿದ್ದಿರಿ?’ ಎಂದು ತೀರ್ಪುಗಾರರು ಪ್ರಶ್ನಿಸಿದ್ದಾರೆ. ಈ ಪ್ರಶ್ನೆಗೆ ದಿಟ್ಟತನದಿಂದ ಉತ್ತರಿಸಿದ ಆಂಡ್ರಿಯಾ ಕೊವಿಡ್​ ನಿಯಂತ್ರಿಸಲು ನಿರ್ದಿಷ್ಟವಾದ ಕ್ರಮ ಯಾವುದೂ ಇಲ್ಲ, ಹೀಗಾಗಿ ಪರಿಸ್ಥಿತಿ ಕೈ ಮೀರುವ ಮುನ್ನ ನಾನು ಲಾಕ್​ಡೌನ್​ ಮಾಡಿಸುತ್ತಿದ್ದೆ. ಯಾಕೆಂದರೆ ಈಗಾಗಲೇ ನಾವು ಅನೇಕ ಜೀವ ಕಳೆದುಕೊಂಡಿದ್ದೇವೆ. ಅದನ್ನು ಸಹಿಸಲು ಸಾಧ್ಯವಿಲ್ಲ. ನಮ್ಮ ಜನರ ಕಾಳಜಿಯನ್ನು ನಾವು ಮಾಡಬೇಕು. ಪ್ರಾರಂಭದಲ್ಲಿಯೇ ಲಾಕ್​ಡೌನ್​ ಮಾಡುವ ಮೂಲಕ ನಾನು ಜನರ ರಕ್ಷಣೆ ಮಾಡುತ್ತಿದ್ದೆ ಎಂದು ಉತ್ತರಿಸಿದ ಆಂಡ್ರಿಯಾ ಎಲ್ಲರ ಚಪ್ಪಾಳೆ ಗಿಟ್ಟಿಸಿಕೊಂಡಿದ್ದರು.