Fact Check ಸರ್ಕಾರದಿಂದ ವ್ಯಾಟ್ಸ್ಆ್ಯಪ್ ಮೆಸೇಜ್, ವಿಡಿಯೋ ಆಡಿಯೋ ಕಾಲ್ ರೆಕಾರ್ಡ್ ಸುದ್ದಿ ಸುಳ್ಳು!

ಕೇಂದ್ರ ಸರ್ಕಾರ ವ್ಯಾಟ್ಸ್ಆ್ಯಪ್ ಮೆಸೇಜ್ ಮಾನಿಟರ್, ವಿಡಿಯೋ ಹಾಗೂ ಆಡಿಯೋ ಕಾಲ್ ರೆಕಾರ್ಡ್ ಮಾಡಿಕೊಳ್ಳುತ್ತಿದೆ. ಗ್ರೂಪ್ ಆಡ್ಮಿನ್ ಸೇರಿದಂತೆ ವ್ಯಾಟ್ಸ್ಆ್ಯಪ್ ಬಳಕೆದಾರರ ಮೇಲೆ ಕ್ರಮ ಕೈಗೊಳ್ಳಲಾಗುತ್ತಿದೆ ಅನ್ನೋ ಸಂದೇಶ ಭಾರಿ ಹರಿದಾಡುತ್ತಿದೆ. 3 ರೆಡ್ ಟಿಕ್ ಇದ್ದರೆ ನಿಮ್ಮ ವಿರುದ್ಧ ವಿಚಾರಣೆ ಆರಂಭಿಸಲಾಗಿದೆ ಅನ್ನೋ ಸಂದೇಶಗಳು ಹರಿದಾಡುತ್ತಿದೆ. ಇದರ ಸತ್ಯಾಸತ್ಯತೆ ಏನು?  

ನವದೆಹಲಿ(ಜು.02): ವ್ಯಾಟ್ಸ್ಆ್ಯಪ್ ಸೇರಿದಂತೆ ಹಲವು ಮೆಸೇಜಿಂಗ್ ಪ್ಲಾಟ್‌ಫಾರ್ಮ್, ಸಾಮಾಜಿಕ ಮಾಧ್ಯಮದಲ್ಲಿ ಸಂದೇಶವೊಂದು ಹರಿದಾಡುತ್ತಿದೆ. ನೀವು ಕಳುಹಿಸುವ ಪ್ರತಿಯೊಂದು ವ್ಯಾಟ್ಸ್ಆ್ಯಪ್ ಸಂದೇಶವನ್ನು ಕೇಂದ್ರ ಸರ್ಕಾರ ಮಾನಿಟರ್ ಮಾಡುತ್ತದೆ. ಆಡಿಯೋ-ವಿಡಿಯೋ ಕಾಲ್ ರೆಕಾರ್ಡ್ ಮಾಡಲಾಗುತ್ತಿದೆ. ಇನ್ನು ವ್ಯಾಟ್ಸ್ಆ್ಯಪ್ ಗ್ರೂಪ್ ನಿಯಮದಲ್ಲೂ ಮಹತ್ತರ ಬದಲಾವಣೆ ಮಾಡಲಾಗಿದೆ. ಒಂದು ಟಿಕ್ ಇದ್ದರೆ ಮಸೇಜ್ ಸೆಂಡ್ ಆಗಿದೆ ಎಂದು ಆರ್ಥ.ಅದೇ 3 ರೆಡ್ ಟಿಕ್ ಇದ್ದರೆ ನಿಮ್ಮ ವಿರುದ್ದ ಕೇಂದ್ರ ಸರ್ಕಾರ ಕಾನೂನು ಕ್ರಮ ಕೈಗೊಳ್ಳಲು ಮುಂದಾಗಿದೆ. ಶೀಘ್ರದಲ್ಲೇ ಸಮನ್ಸ್ ಬರಲಿದೆ ಎಂದರ್ಥ ಎಂಬ ಸಂದೇಶ ಹರಿದಾಡುತ್ತಿದೆ. ಈ ಸಂದೇಶ ಮುಂದಿಟ್ಟುಕೊಂಡು ಕೆಲವರು ಕೇಂದ್ರ ಸರ್ಕಾರವನ್ನು ಟೀಕಿಸುವ, ಕೇಂದ್ರದ ವಿರುದ್ದ ಆಕ್ರೋಶ ಹೊರಹಾಕುತ್ತಿದ್ದಾರೆ. ಆದರೆ ಇದು ಸುಳ್ಳು ಸುದ್ದಿ. ಈ ರೀತಿಯ ಯಾವುದೇ ನಿಯವನ್ನು ಸರ್ಕಾರವಾಗಲಿ, ವ್ಯಾಟ್ಸ್ಆ್ಯಪ್ ಆಗಲಿ ಜಾರಿ ಮಾಡಿಲ್ಲ ಎಂದು ನಂಬಲರ್ಹ ಮೂಲಗಳು ಸ್ಪಷ್ಟಪಡಿಸಿದೆ.

ಸದ್ಯ ಹರಿದಾಡುತ್ತಿರುವ ಫಾರ್ವರ್ಡ್ ಸಂದೇಶ ಸಂಪೂರ್ಣ ನಕಲಿಯಾಗಿದೆ. ಈ ರೀತಿಯ ಯಾವುದೇ ನಿಯಮಗಳು ಜಾರಿಯಾಗಿಲ್ಲ. ಸರ್ಕಾರ ಯಾವುದೇ ಮಾಹಿತಿಗಳನ್ನು ಸಂದೇಶಗಳನ್ನು ಮಾನಿಟರ್ ಮಾಡುತ್ತಿಲ್ಲ. ಜೊತೆಗೆ ಆಡಿಯೋ, ವಿಡಿಯೋ ಕಾಲ್ ರೆಕಾರ್ಡ್ ಮಾಡುತ್ತಿಲ್ಲ. ಈ ರೀತಿಯ ಯಾವುದೇ ನೀತಿಗಳು ಭಾರತದಲ್ಲಿ ಜಾರಿಯಾಗಿಲ್ಲ ಎಂದು ಅರ್ಹ ಮೂಲಗಳು ಸ್ಪಷ್ಟಪಡಿಸಿದೆ.

ಹೊಸ ಸಂವಹನ ನೀತಿ ಎಂದು 11 ಬದಲಾವಣೆಯನ್ನು ಪಟ್ಟಿ ಮಾಡಿರುವ ಸಂದೇಶ ಹರಿದಾಟುತ್ತಿದೆ. ಇದರ ಜೊತೆಗೆ ವ್ಯಾಟ್ಸ್ಆ್ಯಪ್ ಗ್ರೂಪ್ ಸದಸ್ಯರಿಗೆ ಹೊಸ ನಿಯಮ ಎಂದು 7 ಅಂಶಗಳ ಪಟ್ಟಿಯನ್ನು ಈ ಫಾರ್ವರ್ಡ್ ಸಂದೇಶದಲ್ಲಿ ನೀಡಲಾಗಿದೆ.

ಫಾರ್ವರ್ಡ್ ಸಂದೇಶದಲ್ಲಿ ಏನಿದೆ?

ನೂತನ ಸಂವಹನ ನೀತಿ ವ್ಯಾಟ್ಸ್ಆ್ಯಪ್ ಹಾಗೂ ವ್ಯಾಟ್ಸ್ಆ್ಯಪ್ ಕಾಲ್(ಆಡಿಯೋ, ವಿಡಿಯೋ)ನಾಳೆಯಿಂದ ಜಾರಿ:
1 ಎಲ್ಲಾ ಕರೆಗಳು ರೆಕಾರ್ಡ್ ಆಗಲಿದೆ
2 ರೆಕಾರ್ಡ್ ಆಗಿರುವ ಎಲ್ಲಾ ಕರೆಗಳು ಸೇವ್ ಆಗಲಿದೆ
3 ವ್ಯಾಟ್ಸ್ಆ್ಯಪ್, ಫೇಸ್‌ಬುಕ್, ಟ್ವಿಟರ್, ಇನ್‌ಸ್ಟಾಗ್ರಾಂ, ಹಾಗೂ ಎಲ್ಲಾ ಸಾಮಾಜಿಕ ಮಾಧ್ಯಮಗಳನ್ನು ಸರ್ಕಾರ ಮೇಲ್ವಿಚಾರಣೆ ಮಾಡಲಿದೆ
4 ನಿಮ್ಮ ಡಿವೈಸನ್ನು ಸಚಿವರ ಸಿಸ್ಟಮ್ ಜೊತೆ ಕನೆಕ್ಟ್ ಮಾಡಲಾಗುತ್ತದೆ
5 ಯಾರಿಗಾದರೂ ಸಂದೇಶ ಕಳಹಿಸುವ ಮುನ್ನ ಎಚ್ಚರಿಕೆಯಿಂದ ಇರಿ
6 ಮಕ್ಕಳು, ಸಹೋದರರು, ಗೆಳಯರು, ಆಪ್ತರು, ಸಂಬಂಧಿಕರು ಸೇರಿದಂತೆ ಆಪ್ತರ ಕುರಿತು ಎಚ್ಚರಿಕೆ ವಹಿಸಿ
7 ಸರ್ಕಾರದ ವಿರುದ್ಧ, ಪ್ರಧಾನಿ ವಿರುದ್ಧ, ಸದ್ಯದ ರಾಜಕೀಯ ಸ್ಥಿತಿಗತಿ, ಸದ್ಯದ ಪರಿಸ್ಥಿತಿ ಕುರಿತು ಯಾವುದೇ ಸಂದೇಶ ಕಳುಹಿಸಬೇಡಿ
8 ರಾಜಕೀಯ ವಿರುದ್ಧ, ಧಾರ್ಮಿಕತೆ ಕುರಿತು ಕೆಟ್ಟ ಸಂದೇಶ ಕಳುಹಿಸುವುದು ಅಪರಾಧ ಎಂದು ಪರಗಣಿಸಲಾಗುತ್ತದೆ. ಈ ನಡೆಗೆ ವಾರೆಂಟ್ ಇಲ್ಲದೆ ಬಂಧನವಾಗಲಿದೆ.
9 ಪೊಲೀಸರಿಂದ ಒಂದು ನೋಟಿಫಿಕೇಶನ್ ಬರಲಿದೆ. ಬಳಿಕ ಸೈಬರ್ ಕ್ರೈಮ್ ಈ ಪ್ರರಕರಣದ ತನಿಖೆ ನಡೆಸಲಿದೆ. ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಲಾಗುತ್ತದೆ.
10 ಎಲ್ಲಾ ಗ್ರೂಪ್ ಸದಸ್ಯರು ಸೇರಿದಂತೆ ವ್ಯಾಟ್ಸ್ಆ್ಯಪ್ ಬಳಕೆದಾರರು ಈ ಸಂದೇಶದ ಕುರಿತು ಗಮನವಿಡಿ
11 ಸಂದೇಶ ಕಳುಹಿಸುವಾಗ ಎಚ್ಚರಿಕೆ ವಹಿಸಿ, ಈ ಮಾಹಿತಿಯನ್ನು ಎಲ್ಲರಿಗೂ ತಿಳಿಸಿ, ಜಾಗೃತೆಯಾಗಿರಿ

ವ್ಯಾಟ್ಸ್ಆ್ಯಪ್ ಗ್ರೂಪ್ ಸದಸ್ಯರಿಗೆ ಅತ್ಯಂತ ಮಹತ್ವದ ಸಂದೇಶ
1. ಒಂದು ಟಿಕ್( ✓ )= ಸಂದೇಶ ಸೆಂಡ್ ಮಾಡಲಾಗಿದೆ ಎಂದು ಅರ್ಥ
2. ಎರಡು ಟಿಕ್ ( ✓✓ ) = ಕಳುಹಿಸಿದ ಸಂದೇಶ ತಲುಪಿದೆ ಎಂದರ್ಥ
3. ಎರಡು ಬ್ಲೂ ಟಿಕ್ ( ✓✓)= ಸಂದೇಶವನ್ನು ಓದಿದ್ದಾರೆ ಎಂದರ್ಥ
4 ಮೂರು ಬ್ಲೂ ಟಿಕ್(✓✓✓ )= ಸರ್ಕಾರ ನಿಮ್ಮ ಸಂದೇಶದ ಕುರಿತು ಗಮನಹರಿಸಿದ ಎಂದರ್ಥ 
5 ಎರಡು ಬ್ಲೂಟಿಕ್( ✓✓ ) ಒಂದು ರೆಡ್ ಟಿಕ್(✓)= ಸರ್ಕಾರ ನಿಮ್ಮ ವಿರುದ್ದ ಕ್ರಮ ಕೈಗೊಳ್ಳಲಿದೆ ಎಂದರ್ಥ 
6. ಒಂದು ಬ್ಲೂ ಟಿಕ್ (✓ ) ಎರಡು ರೆಡ್ ಟಿಕ್( ✓✓) =  ಸರ್ಕಾರ ನಿಮ್ಮ ಮಾಹಿತಿಯನ್ನು ಪರಿಶೀಲಿಸುತ್ತಿದೆ ಎಂದರ್ಥ 
7 ಮೂರು ರೆಡ್ ಟಿಕ್( ✓✓✓) = ಸರ್ಕಾರ ನಿಮ್ಮ ವಿರುದ್ದ ಕ್ರಮ ಕೈಗೊಳ್ಳಲು ಪ್ರಕ್ರಿಯೆ ಆರಂಭಿಸಿದೆ ಎಂದರ್ಥ