ಸ್ಯಾಂಡಲ್​ವುಡ್​ನ ಮುಂದಿನ ಹೆಜ್ಜೆ ಸ್ಟಾರ್​ಗಳ ಸಮರ! ಡಿಸೆಂಬರ್‌ ನಲ್ಲಿ ಬಿಗ್ ಸ್ಟಾರ್‌ಗಳ ಸಿನಿಮಾ ಹಬ್ಬ!

ಕಳೆದ ವರ್ಷ ಮೊದಲಾರ್ಧ ಸೋತು ಸೊರಗಿದ್ದ ಸ್ಯಾಂಡಲ್​ವುಡ್ ದ್ವಿತಿಯಾರ್ಧದಲ್ಲಿ ಗೆದ್ದು ಬೀಗಿತ್ತು. ಈ ವರ್ಷ ಕೂಡ ಅಂಥದ್ದೇ ರಿಸಲ್ಟ್ ಬರ್ತಾ ಇದೆ. ಅಸಲಿಗೆ ಈ ವರ್ಷದ ಮೊದಲಾರ್ಧದಲ್ಲಿ ಯಾವುದೇ ದೊಡ್ಡ ಹಿಟ್ ಸಿನಿಮಾ ಬಂದಿರಲಿಲ್ಲ. ಜುಲೈನಲ್ಲಿ ತೆರೆಗೆ ಬಂದ ಎಕ್ಕಾ, ಮತ್ತು ಜೂನಿಯರ್ ತಕ್ಕ ಮಟ್ಟಿಗೆ ಪ್ರೇಕ್ಷಕರನ್ನ ಚಿತ್ರಮಂದಿರಕ್ಕೆ ಕರೆತಂದಿದ್ವು. ಆದ್ರೆ ಸಿನಿಪ್ರೀಯರನ್ನ ಸುನಾಮಿಯಂತೆ ಥಿಯೇಟರ್​ಗೆ ನುಗ್ಗಿಸಿದ್ದು ಸು ಫ್ರಂ ಸೋ ಸಿನಿಮಾ.

ರಾಜ್ ಬಿ ಶೆಟ್ಟಿ ನಟನೆ ನಿರ್ಮಾಣದ ಸು ಫ್ರಂ ಸೋ ಸಿನಿಮಾ ಈ ವರ್ಷದ ಅಚ್ಚರಿಯ ಗೆಲುವು. ಜುಲೈ ಕೊನೆವಾರ ತೆರೆಗೆ ಬಂದ ಈ ಕಾಮಿಡಿ ಡ್ರಾಮಾ ನೋಡಲಿಕ್ಕೆ ರಾಜ್ಯಾದ್ಯಂತ ಸಿನಿಪ್ರಿಯರು ಥಿಯೇಟರ್ ಗೆ ನುಗ್ಗಿದ್ರು. 50 ದಿನಗಳ ಕಾಲ ಯಶಸ್ವಿ ಪ್ರದರ್ಶನ ಕಂಡ ಈ ಸಿನಿಮಾ ಪರಬಾಷೆಗಳಲ್ಲೂ ಕಮಾಲ್ ಮಾಡ್ತು, ಜಸ್ಟ್ 4 ಕೋಟಿ ಬಜೆಟ್​​ನ ಈ ಸಿನಿಮಾ ಗಳಿಸಿದ್ದು ಭರ್ತಿ 100 ಕೋಟಿ. ಇನ್ನೂ ಅಕ್ಟೋಬರ್ 2 ರಂದು ಬಂದ ಕಾಂತಾರ ಚಾಪ್ಟರ್-1 ಅಂತೂ ವಿಶ್ವದಾದ್ಯಂತ ಜಯಭೇರಿ ಬಾರಿಸ್ತಾ ಇದೆ. ಈಗಾಗ್ಲೇ 550 ಕೋಟಿಗೂ ಅಧಿಕ ಬಾಕ್ಸಾಫೀಸ್ ಗಳಿಕೆ ಮಾಡಿರೋ ಸಿನಿಮಾ ಎರಡನೇ ವಾರಾಂತ್ಯವೂ ಕಮಾಲ್ ಮಾಡಿದೆ.

ಹೌದು ಕಾಂತಾರ-1 ನಂತರ ಏನು..? ಅಂತ ಕೇಳೋದಾದ್ರೆ ದೊಡ್ಡ ಲಿಸ್ಟೇ ಇದೆ. ರಾಜ್ ಶೆಟ್ಟಿ, ಪ್ರಜ್ವಲ್ ದೇವರಾಜ್ ನಟನೆಯ ಕರಾವಳಿ, ಡಾರ್ಲಿಂಗ್ ಕೃಷ್ಣ ಶಶಾಂಕ್ ಜೋಡಿಯ ಬ್ರ್ಯಾಟ್ ಸಿನಿಮಾಗಳು ರಿಲೀಸ್​ಗೆ ಸಜ್ಜಾಗಿವೆ. ಡಿಸೆಂಬರ್​​ನಲ್ಲಂತೂ ಕನ್ನಡದಲ್ಲಿ ಸಿನಿಮಾ ಹಬ್ಬವೇ ನಡೆಯಲಿದೆ. ಡಿಸೆಂಬರ್ 12ಕ್ಕೆ ದರ್ಶನ್ ನಟನೆಯ ದಿ ಡೆವಿಲ್ ಸಿನಿಮಾ ತೆರೆಗೆ ಬರಲಿದೆ. ದಾಸ ಜೈಲಲ್ಲಿದ್ರೂ ದೊಡ್ಡ ಹಬ್ಬ ಮಾಡಬೇಕು ಅಂತ ಫ್ಯಾನ್ಸ್ ಸಜ್ಜಾಗಿದ್ದಾರೆ.

ಇನ್ನೂ ಡಿಸೆಂಬರ್ 20ಕ್ಕೆ 45 ಸಿನಿಮಾ ರಿಲೀಸ್ ಆಗಲಿದೆ. ಶಿವರಾಜ್​ಕುಮಾರ್, ಉಪೇಂದ್ರ ಮತ್ತು ರಾಜ್ ಶೆಟ್ಟಿ ನಟಿಸಿರೋ ಈ ಮಲ್ಟಿಸ್ಟಾರರ್ ಮೂವಿ ಬಗ್ಗೆಯೂ ದೊಡ್ಡ ನಿರೀಕ್ಷೆ ಇದೆ. ಇವೆಲ್ಲದರ ಜೊತೆಗೆ ವರ್ಷಾಂತ್ಯಕ್ಕೆ ರಂಜನೆಯ ಕಿಚ್ಚು ಹಚ್ಚೋದಕ್ಕೆ ಕಿಚ್ಚ ಎಂಟ್ರಿ ಕೊಡಲಿದ್ದಾರೆ. ಕ್ರಿಸ್​​ಮಸ್​​ಗೆ ಕಿಚ್ಚ ಸುದೀಪ್ ನಟನೆಯ ಮಾರ್ಕ್ ಸಿನಿಮಾ ರಿಲೀಸ್ ಆಗಲಿದೆ. ಸ್ಯಾಂಡಲ್​ವುಡ್ ಬರಲಿರೋ ಮೂರು ತಿಂಗಳಲ್ಲಿ ಮತ್ತೆ ನೂರಾರು ಕೋಟಿ ಲಾಭ ಮಾಡೋ ನಿರೀಕ್ಷೆಯಲ್ಲಿದೆ.