2014ರಲ್ಲೇ ಯಾಹೂ ಬಳಕೆದಾರರ ಮಾಹಿತಿಗಳಿಗೆ ಕನ್ನ!

ಕ್ಯಾಲಿಫೋರ್ನಿಯಾ(ಸೆ.23): ಯಾಹೂ ವೆಬ್‌ಸೈಟ್‌ ಮಾಹಿತಿಗಳಿಗೆ ಕನ್ನ ಹಾಕಲಾಗಿದೆ ಎಂಬ ಆಘಾತಕಾರಿ ವಿಚಾರ ತಡವಾಗಿ ಬೆಳಕಿಗೆ ಬಂದಿದೆ. ವಿಶ್ವಾದ್ಯಂತ ಚಾಲ್ತಿಯಲ್ಲಿರುವ ಯಾಹೂವಿನ 6.72 ಕೋಟಿ ಗ್ರಾಹಕರ ಮಾಹಿತಿಗಳಿಗೆ 2014ರಲ್ಲೇ ಕನ್ನ ಹಾಕಲಾಗಿದ್ದು, ಸಂಸ್ಥೆ ಕೈಗೊಂಡ ತನಿಖೆಯಲ್ಲಿ ಈ ಬಗ್ಗೆ ಬಹಿರಂಗವಾಗಿದೆ.

‘ರಾಷ್ಟ್ರವೊಂದರ ಸರ್ಕಾರಿ ಪ್ರಾಯೋಜಿತ ಸಂಸ್ಥೆ’ಯೇ ಹ್ಯಾಕ್‌ ಮಾಡಿಸಿದೆ ಎಂದು ಯಾಹೂ ಆರೋಪಿಸಿದೆ. ಆದರೆ, ಯಾವ ರಾಷ್ಟ್ರ ಈ ಕೃತ್ಯ ಮಾಡಿಸಿದೆ ಎಂಬುದನ್ನು ಬಹಿರಂಗ ಪಡಿಸಲು ನಿರಾಕರಿಸಿದೆ. ಈ ಘಟನೆ 2 ವರ್ಷಗಳ ಹಿಂದೆ ಸಂಭವಿಸಿದ ಹೊರತಾಗಿಯೂ ಯಾಹೂ ತನ್ನ ಗ್ರಾಹಕರಿಗೆ ಈ ವಿಚಾರ ತಿಳಿಸಿದ್ದು ಈಗ. ಇದರಿಂದ ಬೇಸರಗೊಂಡ ಗ್ರಾಹಕರು ಯಾಹೂ ಸಿಇಒ ಸ್ಥಾನಕ್ಕೆ ಮರಿಸ್ಸಾ ರಾಜಿನಾಮೆ ನೀಡಬೇಕೆಂದು ಒತ್ತಾಯಿಸಿದ್ದಾರೆ.

ಏನೇನು ಹ್ಯಾಕ್‌?: ಹೆಸರು, ಇಮೇಲ್‌ ವಿಳಾಸ, ದೂರವಾಣಿ ಸಂಖ್ಯೆ, ಜನ್ಮ ದಿನಾಂಕ, ಪಾಸ್‌ವರ್ಡ್‌ಗಳು ಮತ್ತು ಪಾಸ್‌ವರ್ಡ್‌ ಬದಲಾವಣೆ ವೇಳೆ ಬಳಸುವ ಸೆಕ್ಯೂರಿಟಿ ಪ್ರಶ್ನೆ ಮತ್ತು ಉತ್ತರಗಳೂ ಹ್ಯಾಕ್‌ ಆಗಿವೆ. ಕನ್ನ ಹಾಕಲಾದ ಮಾಹಿತಿಗಳನ್ನು ‘ಡಾರ್ಕ್ ವೆಬ್‌’ಗೆ ಕೇವಲ ರೂ.1.20 ಲಕ್ಷಕ್ಕೆ ಮಾರಾಟ ಮಾಡಿರುವ ಸಾಧ್ಯತೆಯಿದ್ದು, ಈ ದಾಖಲೆಗಳನ್ನಿಟ್ಟುಕೊಂಡು ಬಳಕೆದಾರರಿಗೆ ಬ್ಲಾಕ್‌ಮೇಲ್‌ ಮಾಡುವ ಉದ್ದೇಶವಿರಬಹುದು ಎಂದು ಯಾಹೂ ಶಂಕಿಸಿದೆ. ಆದರೆ, ಯಾಹೂ ಬಳಕೆದಾರರ ಬ್ಯಾಂಕ್‌ ಅಕೌಂಟ್‌, ಡೆಬಿಟ್‌, ಕ್ರೆಡಿಟ್‌ ಕಾರ್ಡ್‌ಗಳ ಮಾಹಿತಿಗೆ ಯಾವುದೇ ಧಕ್ಕೆಯಾಗಿಲ್ಲ ಸಂಸ್ಥೆ ಸ್ಪಷ್ಟಪಡಿಸಿದೆ.