ಬಳ್ಳಾರಿ ಉಪ ಚುನಾವಣೆ : ಕಾಂಗ್ರೆಸ್ ನಲ್ಲಿ ಅಚ್ಚರಿಯ ಬೆಳವಣಿಗೆ

ಬಳ್ಳಾರಿಯಲ್ಲಿ ನಡೆಯುವ ಲೋಕಸಭಾ ಉಪ ಚುನಾವಣೆ ಅಭ್ಯರ್ಥಿ ಆಯ್ಕೆಯಲ್ಲಿ ಅಚ್ಚರಿಯ ಬೆಳವಣಿಗೆಯೊಂದು ನಡೆದಿದೆ. ಕಾಂಗ್ರೆಸ್ ನಿಂದ ಉಗ್ರಪ್ಪ ಅವರನ್ನ ಅಭ್ಯರ್ಥಿಯಾಗಿ ಆಯ್ಕೆ ಮಾಡಲಾಗಿದೆ. 

ಬೆಂಗ​ಳೂರು :  ಅಚ್ಚ​ರಿಯ ಬೆಳ​ವ​ಣಿ​ಗೆ​ಯೊಂದ​ರಲ್ಲಿ ಹಿರಿಯ ನಾಯಕ ವಿ.ಎಸ್‌. ಉಗ್ರ​ಪ್ಪ ಅವ​ರನ್ನು ಬಳ್ಳಾರಿ ಲೋಕ​ಸಭಾ ಕ್ಷೇತ್ರದ ಉಪ ಚುನಾ​ವ​ಣೆ ಅಭ್ಯ​ರ್ಥಿ​ಯಾಗಿ ಕಾಂಗ್ರೆಸ್‌ ಪ್ರಕ​ಟಿ​ಸಿದೆ.

ಕಡೆ ಕ್ಷಣ​ದ​ವ​ರೆಗೂ ಬಳ್ಳಾರಿ ಕ್ಷೇತ್ರದ ಟಿಕೆಟ್‌ ಶಾಸಕ ನಾಗೇಂದ್ರ ಅವರ ಸಹೋ​ದರ ವೆಂಕ​ಟೇಶ್‌ ಪ್ರಸಾದ್‌ ಅವ​ರಿಗೆ ಲಭಿ​ಸ​ಲಿದೆ ಎಂದೇ ಹೇಳ​ಲಾ​ಗಿತ್ತು. ಆದರೆ, ಸೋಮ​ವಾರ ಎಐ​ಸಿ​ಸಿಯು ಬಳ್ಳಾ​ರಿಗೆ ವಿ.ಎಸ್‌. ಉಗ್ರಪ್ಪ ಹಾಗೂ ಜಮ​ಖಂಡಿ ವಿಧಾ​ನ​ಸಭಾ ಕ್ಷೇತ್ರದ ಉಪ ಚುನಾ​ವ​ಣೆಗೆ ಆನಂದ ನ್ಯಾಮ​ಗೌಡ ಅವರ ಹೆಸ​ರನ್ನು ಘೋಷಿ​ಸಿ​ದೆ.

ತೀವ್ರ ಲಾಬಿ ನಡೆ​ಸಿದ ವೆಂಕ​ಟೇಶ್‌ ಪ್ರಸಾದ್‌ ಅವರನ್ನು ಕಡೆ ಕ್ಷಣ​ದಲ್ಲಿ ಕೈಬಿಟ್ಟು ಉಗ್ರಪ್ಪ ಅವ​ರನ್ನು ಆಯ್ಕೆ ಮಾಡಲು ಪ್ರಸಾದ್‌ಗೆ ಟಿಕೆಟ್‌ ನೀಡಿ​ದರೆ ಬಳ್ಳಾ​ರಿ ಶಾಸ​ಕರ ಒಂದು ಬಣ ಒಳ ಏಟು ನೀಡ​ಬ​ಹುದು ಎಂಬ ಭೀತಿ ಕಾರ​ಣ​ವಾ​ಗಿದೆ ಎನ್ನ​ಲಾ​ಗಿದೆ. ಬಳ್ಳಾ​ರಿ​ಯಲ್ಲಿ ಶಾಸ​ಕರ ಎರಡು ಬಣ ನಿರ್ಮಾಣವಾಗಿದೆ. ಈ ಬಣ​ಗಳು ಪರಸ್ಪರ ಕಾಲೆ​ಳೆ​ಯು​ವಲ್ಲಿ ನಿರ​ತವಾಗಿ​ವೆ ಎಂಬ ಗುಮಾನಿ ರಾಜ್ಯ ನಾಯ​ಕ​ರಿಗೆ ಇದೆ. ರಾಜ್ಯ ಕಾಂಗ್ರೆಸ್‌ ನಾಯ​ಕರು ಹಾಗೂ ಹೈಕ​ಮಾಂಡ್‌ ನಾಯ​ಕರ ಒತ್ತಡದ ಪರಿ​ಣಾ​ಮ​ವಾಗಿ ಯಾರಿಗೆ ಟಿಕೆಟ್‌ ನೀಡಿ​ದರೂ ಕೆಲಸ ಮಾಡು​ವು​ದಾಗಿ ಶಾಸ​ಕರು ಹೇಳು​ತ್ತಿ​ದ್ದರೂ, ಅಂತಿ​ಮ​ವಾಗಿ ಒಳ ಏಟು ನೀಡ​ಬ​ಹುದು ಎಂಬ ಆತಂಕವೇ ಟಿಕೆಟ್‌ ವಿ.ಎಸ್‌. ಉಗ್ರಪ್ಪ ಅವರ ಪಾಲಾ​ಗಲು ಕಾರಣ ಎಂದು ವ್ಯಾಖ್ಯಾ​ನಿ​ಸ​ಲಾ​ಗು​ತ್ತಿ​ದೆ.

ಈ ಕ್ಷೇತ್ರಕ್ಕೆ ಹಲವು ಪ್ರಭಾವಿಗಳು ಟಿಕೆ​ಟ್‌​ಗಾಗಿ ತೀವ್ರ ಪೈಪೋಟಿ ನಡೆ​ಸಿ​ದ್ದ​ರಿಂದ ಟಿಕೆಟ್‌ ಹಂಚಿಕೆ ಕಾಂಗ್ರೆಸ್‌ ಪಾಲಿಗೆ ಬಿಸಿ ತುಪ್ಪ​ವಾ​ಗಿತ್ತು. ಬಳ್ಳಾ​ರಿಯ ಶಾಸ​ಕ​ರಿಂದ ಹಿಡಿದು ರಾಜ್ಯಮಟ್ಟದ ನಾಯ​ಕ​ರ​ವ​ರೆಗೂ ಒಬ್ಬೊಬ್ಬರು ಒಬ್ಬೊಬ್ಬ ಅಭ್ಯರ್ಥಿ ಪರ​ವಾಗಿ ಲಾಬಿ ನಡೆ​ಸಿ​ದ್ದ​ರಿಂದ ಈ ಕಗ್ಗಂಟು ನಿವಾ​ರಿ​ಸಲು ಕಾಂಗ್ರೆಸ್‌ ಸಾಕಷ್ಟುಸರ್ಕಸ್‌ ಕೂಡ ಮಾಡಿತ್ತು. ನಾಗೆæೕಂದ್ರ ಸಹೋದರ ವೆಂಕ​ಟೇಶ್‌ ಪ್ರಸಾದ್‌, ಸತೀಶ್‌ ಜಾರ​ಕಿ​ಹೊಳಿ ಸಂಬಂಧಿ ದೇವೇಂದ್ರಪ್ಪ, ಸ್ಥಳೀಯರಾದ ನಾಗ​ರಾಜ್‌ ಗುಜ್ಜಲ್‌, ನೆಟ್ಟ​ಕ​ಲ್ಲಪ್ಪ ಅವರು ತೀವ್ರ ಪೈಪೋಟಿ ನಡೆ​ಸಿ​ದ್ದರು. ಈ ನಡುವೆ, ಲೋಕ​ಸಭಾ ಚುನಾ​ವ​ಣೆ​ಗೆ ರಾಜ್ಯಮಟ್ಟದ ನಾಯ​ಕ​ರೊ​ಬ್ಬ​ರನ್ನು ಕಣಕ್ಕೆ ಇಳಿ​ಸುವ ಚಿಂತನೆ ಹಿನ್ನೆ​ಲೆ​ಯಲ್ಲಿ ವಿ.ಎಸ್‌.ಉಗ್ರಪ್ಪ ಅವರ ಹೆಸರು ಚಾಲನೆಗೆ ಬಂದಿತ್ತು. ಪಕ್ಷ ಟಿಕೆಟ್‌ ನೀಡಿ​ದರೆ ಸ್ಪರ್ಧಿ​ಸು​ವು​ದಾಗಿ ಉಗ್ರಪ್ಪ ತಿಳಿಸಿದ್ದರು.

ಆದರೆ, ಪಕ್ಷದ ಅಭ್ಯರ್ಥಿ ಆಯ್ಕೆ​ಗಾಗಿ ರಾಜ್ಯ ನಾಯ​ಕರು ನಡೆಸಿದ ಸಭೆಗಳಲ್ಲಿ ಹೆಚ್ಚಾಗಿ ವೆಂಕ​ಟೇಶ್‌ ಪ್ರಸಾದ್‌ ಹಾಗೂ ದೇವೇಂದ್ರಪ್ಪ ಅವರ ಹೆಸರಿನ ಕುರಿತು ಚರ್ಚೆ ನಡೆ​ದಿತ್ತು. ಬಳ್ಳಾ​ರಿಯ ಬಿಜೆ​ಪಿಯ ಅಭ್ಯ​ರ್ಥಿ​ಗಳು ಅಬ್ಬ​ರದ ಪ್ರಚಾರ ನಡೆ​ಸ​ಲಿದ್ದು, ಆರ್ಥಿಕ ಸಂಪ​ನ್ಮೂ​ಲವೂ ಭರ್ಜ​ರಿ​ಯಾ​ಗಿದೆ. ಹೀಗಾಗಿ ಅವ​ರಿಗೆ ತಕ್ಕ ಪೈಪೋಟಿ ನೀಡು​ವಂತ​ಹ​ವರಿಗೆ ಟಿಕೆಟ್‌ ನೀಡ​ಬೇಕು ಎಂಬ ಚಿಂತನೆ ಹಿನ್ನೆ​ಲೆ​ಯಲ್ಲಿ ನಾಯಕ ಸಮಾ​ಜ​ದ​ವರೇ ಹಾಗೂ ಆರ್ಥಿ​ಕ​ವಾಗಿ ಬಲ​ವಾ​ಗಿ​ರುವ ವೆಂಕ​ಟೇಶ್‌ ಪ್ರಸಾದ್‌ ಹಾಗೂ ದೇವೆಂದ್ರಪ್ಪ ಅವರ ಹೆಸರು ಚರ್ಚೆ​ಯಾ​ಗಲು ಕಾರ​ಣ​ವಾ​ಗಿ​ತ್ತು.

ಈ ನಡುವೆ, ಲೋಕ​ಸ​ಭೆಯಂತಹ ದೊಡ್ಡ ಚುನಾ​ವ​ಣೆ​ಯಲ್ಲಿ ಕೇವಲ ಹಣ​ದಿಂದಲೇ ಗೆಲ್ಲು​ವುದು ಸಾಧ್ಯ​ವಿಲ್ಲ. ಸೀಮಿತ ವ್ಯಾಪ್ತಿ ಹೊಂದಿ​ರುವ ವಿಧಾ​ನ​ಸಭೆ ಚುನಾ​ವ​ಣೆ​ಗ​ಳಲ್ಲಿ ಹಣ ಹೆಚ್ಚು ಕೆಲಸ ಮಾಡ​ಬ​ಹುದು. ಆದರೆ, ಲೋಕ​ಸಭೆ ಚುನಾ​ವ​ಣೆ​ಯಲ್ಲಿ ರಾಷ್ಟ್ರ ಮಟ್ಟದ ವಿಚಾ​ರ​ಗಳು ಹಾಗೂ ಅಭ್ಯ​ರ್ಥಿಯ ವರ್ಚಸ್ಸು ಕೆಲಸ ಮಾಡು​ತ್ತದೆ. ಹೀಗಾಗಿ ಆರ್ಥಿಕ ಸಾಮ​ರ್ಥ್ಯ​ಕ್ಕಿಂತಲೂ ವರ್ಚಸ್ವಿ ನಾಯ​ಕ​ರನ್ನು ಕಣಕ್ಕೆ ಇಳಿ​ಸ​ಬೇಕು ಎಂದು ಕೆ.ಸಿ.ಕೊಂಡಯ್ಯ ಅವ​ರಂತಹ ನಾಯ​ಕ​ರು ವಾದ ಮಂಡಿ​ಸಿ​ದ್ದ​ರು.

ಇಂತಹ ವರ್ಚಸ್ವಿ ನಾಯ​ಕರ ಪೈಕಿ ವಾಲ್ಮೀಕಿ ಸಮಾ​ಜ​ದ​ವ​ರಾದ ಸತೀಶ್‌ ಜಾರ​ಕಿ​ಹೊಳಿ ಅಥವಾ ವಿ.ಎಸ್‌.ಉಗ್ರಪ್ಪ ಅವ​ರನ್ನು ಕಣಕ್ಕೆ ಇಳಿ​ಸು​ವುದು ಉತ್ತಮ. ಸತೀಶ್‌ ಜಾರ​ಕಿ​ಹೊಳಿ ಅವರು ವಾಲ್ಮೀಕಿ ಜನಾಂಗದ ಮೇಲೆ ಹಿಡಿತ ಹೊಂದಿ​ದ್ದಾರೆ. ಕ್ಷೇತ್ರದ ಹೊರ​ಗಿ​ನ​ವ​ರಾ​ದರೂ ರಾಜ್ಯ ಮಟ್ಟದ ವರ್ಚಸ್ಸು ಹೊಂದಿ​ದ್ದಾರೆ. ಹೀಗಾಗಿ ಅವರು ಸೂಚಿ​ಸು​ತ್ತಿ​ರುವ ದೇವೇಂದ್ರಪ್ಪ ಅವ​ರಿ​ಗಿಂತ ಅವ​ರನ್ನೇ ಕಣಕ್ಕೆ ಇಳಿ​ಸ​ಬೇಕು ಎಂದು ವಾದ ಮಾಡ​ಲಾ​ಗಿ​ತ್ತು.

ಆದರೆ, ಬಳ್ಳಾ​ರಿ​ಯಿಂದ ಸ್ಪರ್ಧಿ​ಸಲು ಸತೀಶ್‌ ಜಾರ​ಕಿ​ಹೊ​ಳಿ ಸ್ಪಷ್ಟ​ವಾಗಿ ನಿರಾ​ಕ​ರಿ​ಸಿ​ದ್ದ​ರಿಂದ ರಾಜ್ಯ ಮಟ್ಟದ ವರ್ಚಸ್ಸು ಹೊಂದಿ​ರುವ ಹಾಗೂ ಬಿಜೆಪಿ ಅಧಿ​ಕಾ​ರ​ದ​ಲ್ಲಿದ್ದ ಅವ​ಧಿ​ಯಲ್ಲಿ ಬಳ್ಳಾ​ರಿಯ ಗಣಿ ಧಣಿ​ಗಳ ವಿರುದ್ಧ ಹೋರಾಟ ರೂಪು​ಗೊ​ಳ್ಳಲು ಪ್ರಮುಖ ಪ್ರೇರ​ಕ​ರಲ್ಲಿ ಒಬ್ಬ​ರಾ​ಗಿದ್ದ ವಿ.ಎಸ್‌. ಉಗ್ರ​ಪ್ಪ ಅವ​ರ ಹೆಸ​ರನ್ನು ಪರಿ​ಗ​ಣಿ​ಸ​ಬೇಕು ಎಂದು ಆಗ್ರ​ಹಿ​ಸ​ಲಾ​ಗಿ​ತ್ತು.

ಇಷ್ಟಾ​ಗಿಯೂ ರಾಜ್ಯ ಮಟ್ಟದ ನಾಯ​ಕರ ಸಭೆ​ಗ​ಳಲ್ಲಿ ವೆಂಕ​ಟೇಶ್‌ ಪ್ರಸಾದ್‌ ಹಾಗೂ ದೇವೇಂದ್ರಪ್ಪ ಅವರ ಹೆಸರೇ ಮುಂಚೂ​ಣಿ​ಯ​ಲ್ಲಿತ್ತು. ಆದರೆ, ಈ ಇಬ್ಬರ ಪೈಕಿ ಯಾರನ್ನು ಆಯ್ಕೆ ಮಾಡಿ​ದರೂ ಕಾಂಗ್ರೆ​ಸ್‌ನ ಒಂದು ಬಣ ವಿರು​ದ್ಧ​ವಾಗಿ ಕೆಲಸ ಮಾಡುವ ಸಾಧ್ಯತೆ ಕಂಡು ಬಂದ ಹಿನ್ನೆ​ಲೆ​ಯಲ್ಲಿ ಪರ್ಯಾಯ ಅಭ್ಯರ್ಥಿ ಹುಡು​ಕಾ​ಟ ನಡೆ​ಸಿದ ಕಾಂಗ್ರೆಸ್‌ ನಾಯ​ಕ​ರಿಗೆ ವಿ.ಎಸ್‌. ಉಗ್ರಪ್ಪ ಅಪ್ಯಾ​ಯ​ಮಾ​ನ​ವಾಗಿ ಕಂಡರು ಎಂದು ಮೂಲಗಳು ಹೇಳು​ತ್ತವೆ.