ಬಿಬಿಎಂಪಿ ಕಳೆದ ವರ್ಷದ ಬಜೆಟ್‌ಗೆ ಕತ್ತರಿ; ಈ ಬಾರಿ ಆರ್ಥಿಕ ಶಿಸ್ತಿಗೆ ತಿಲಾಂಜಲಿ?

ಬಾರದ ಆದಾಯವನ್ನು ನೆಚ್ಚಿಕೊಂಡು ಕಳೆದ ವರ್ಷ ಬಿಬಿಎಂಪಿ ಮಂಡಿಸಿದ್ದ ₹11,885 ಕೋಟಿ ವೆಚ್ಚದ ಆಯವ್ಯಯಕ್ಕೆ ಕತ್ತರಿ ಬಿದ್ದಿದ್ದು, ಬಜೆಟ್‌ ಗಾತ್ರವನ್ನು ₹9,537 ಕೋಟಿಗೆ ಕುಗ್ಗಿಸಲಾಗುತ್ತಿದೆ.

ವಿಶ್ವನಾಥ ಮಲೇಬೆನ್ನೂರು

ಬೆಂಗಳೂರು (ಫೆ.2): ಬಾರದ ಆದಾಯವನ್ನು ನೆಚ್ಚಿಕೊಂಡು ಕಳೆದ ವರ್ಷ ಬಿಬಿಎಂಪಿ ಮಂಡಿಸಿದ್ದ ₹11,885 ಕೋಟಿ ವೆಚ್ಚದ ಆಯವ್ಯಯಕ್ಕೆ ಕತ್ತರಿ ಬಿದ್ದಿದ್ದು, ಬಜೆಟ್‌ ಗಾತ್ರವನ್ನು ₹9,537 ಕೋಟಿಗೆ ಕುಗ್ಗಿಸಲಾಗುತ್ತಿದೆ.

ಈ ಮೂಲಕ ಬಿಬಿಎಂಪಿಯ 2023-24ನೇ ಸಾಲಿನ ₹2,350 ಕೋಟಿ ಮೊತ್ತದ ವಿವಿಧ ಯೋಜನೆಗಳಿಗೆ ಕತ್ತರಿ ಬೀಳುವ ಸಾಧ್ಯತೆ ಇದೆ.
ಬಿಬಿಎಂಪಿಯು ಕಳೆದ ವರ್ಷ ಬರೋಬ್ಬರಿ ₹11,158 ಕೋಟಿ ಆದಾಯ ನಿರೀಕ್ಷೆ ಇಟ್ಟುಕೊಂಡು ₹11,157 ಕೋಟಿ ವೆಚ್ಚದ ಯೋಜನೆಗಳನ್ನು ಘೋಷಣೆ ಮಾಡಿತ್ತು. ರಾಜ್ಯ ಸರ್ಕಾರವೂ ಬಿಬಿಎಂಪಿಯ ಬಜೆಟ್‌ಗೆ ಅನುಮೋದನೆ ಸಂದರ್ಭದಲ್ಲಿ ಇನ್ನಷ್ಟು ಅನುದಾನ ನೀಡುವುದಾಗಿ ತಿಳಿಸಿ ಪಾಲಿಕೆ ಬಜೆಟ್‌ ಗಾತ್ರವನ್ನು ₹11,885 ಕೋಟಿಗೆ ಹೆಚ್ಚಿಸಲಾಗಿತ್ತು.

ಆದರೀಗ ಬಿಬಿಎಂಪಿಯು ಬಜೆಟ್‌(BBMP Budget) ಮಂಡನೆ ವೇಳೆ ತಿಳಿಸಿದ್ದ ಪ್ರಮುಖ ಆದಾಯ ಮೂಲಗಳಿಂದ ನಿರೀಕ್ಷಿತ ಆದಾಯ ಬಂದಿಲ್ಲ. ಹೀಗಾಗಿ, ಬಜೆಟ್‌ ಗಾತ್ರವನ್ನು ಆರ್ಥಿಕ ವರ್ಷಾಂತ್ಯದಲ್ಲಿ ಕಡಿತಗೊಳಿಸುವುದಕ್ಕೆ ಮುಂದಾಗಿದೆ.

ಬಾರದ ಆದಾಯ ಯಾವುವು?: ಬಿಬಿಎಂಪಿಯು ಬಿ ಖಾತಾ ಆಸ್ತಿಗಳಿಗೆ ಎ ಖಾತಾ ಮಾನ್ಯತೆ ನೀಡುವ ಮೂಲಕ ಸುಮಾರು ₹1 ಸಾವಿರ ಕೋಟಿಗೂ ಅಧಿಕ ಆದಾಯವನ್ನು ನಿರೀಕ್ಷೆ ಮಾಡಿತ್ತು. ಆದರೆ, ಆ ಪ್ರಕ್ರಿಯೆ ಆಗದ ಕಾರಣ ಆದಾಯ ಬಂದಿಲ್ಲ.

ಇನ್ನು ನಗರದಲ್ಲಿ ಫ್ಲೆಕ್ಸ್‌, ಬ್ಯಾನರ್‌ ಸೇರಿದಂತೆ ಹೊರಾಂಗಣ ಜಾಹೀರಾತು ನಿಷೇಧಿಸಲಾಗಿದೆ. ಜಾಹೀರಾತು ಬೈಲಾ ತಿದ್ದುಪಡಿಗೊಳಿಸಿ ಸುಮಾರು ₹750 ಕೋಟಿ ಆದಾಯ ಗಳಿಸುವ ನಿರೀಕ್ಷೆ ಹೊಂದಲಾಗಿತ್ತು. ಆದರೆ, ಆ ಕಾರ್ಯವೂ ಆಗಿಲ್ಲ. ಹಾಗಾಗಿ, ಆದಾಯ ಕೊರತೆ ಉಂಟಾಗಿದೆ.

ಜತೆಗೆ, ₹4,400 ಕೋಟಿಗೂ ಅಧಿಕ ಆಸ್ತಿ ತೆರಿಗೆ ವಸೂಲಿ ಮಾಡುವ ಗುರಿ ಹಾಕಿಕೊಳ್ಳಲಾಗಿತ್ತು. ಆದರೆ, ಇದೀಗ ಸುಮಾರು ₹3,300 ಕೋಟಿ ಆಸ್ತಿ ತೆರಿಗೆ ವಸೂಲಿ ಆಗಿದೆ. ಈ ಎಲ್ಲಾ ಕಾರಣದಿಂದ ಕಳೆದ ವರ್ಷ ಬಿಬಿಎಂಪಿಯ ಬಜೆಟ್‌ಗೆ ಕತ್ತರಿ ಹಾಕಲಾಗುತ್ತಿದೆ.

₹2,350 ಕೋಟಿಗಾಗಿ ಸರ್ಕಾರಕ್ಕೆ ಜೋತು: ರಾಜ್ಯ ಸರ್ಕಾರವೂ ಕಳೆದ ಸಾಲಿನಲ್ಲಿ ಬಿಬಿಎಂಪಿಗೆ ಸುಮಾರು ₹4 ಸಾವಿರ ಕೋಟಿ ಅನುದಾನ ನೀಡಿದೆ. ಇದೀಗ ಕೊರತೆ ಆಗಿರುವ ₹2,350 ಕೋಟಿ ಪೈಕಿ ರಾಜ್ಯ ಸರ್ಕಾರವೂ ವಿಶೇಷ ಮೂಲಸೌಕರ್ಯ ಕಾರ್ಯಕ್ರಮದಡಿ ₹2 ಸಾವಿರ ಕೋಟಿ ಹಾಗೂ ರಾಜ್ಯ ಹಣಕಾಸು ಆಯೋಗದಡಿ ₹350 ಕೋಟಿಗಳನ್ನು ಬಿಬಿಎಂಪಿಗೆ ಮಂಜೂರು ಮಾಡಿದರೆ ಬಜೆಟ್‌ನಲ್ಲಿ ಘೋಷಣೆ ಮಾಡಿದ ಯೋಜನೆಗಳನ್ನು ಮುಂದುವರೆಸಬಹುದು ಎಂದು ಸರ್ಕಾರಕ್ಕೆ ಬಿಬಿಎಂಪಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಬಾರಿಯೂ ಆರ್ಥಿಕ ಶಿಸ್ತಿಗೆ ತಿಲಾಂಜಲಿ?

ಕಳೆದ ಎರಡು ವರ್ಷಗಳ ಹಿಂದೆ ಬಿಬಿಎಂಪಿಯ ಆದಾಯಕ್ಕೆ ತಕ್ಕಂತೆ ಬಜೆಟ್‌ ರೂಪಿಸಿ ಮಂಡನೆ ಮಾಡುವುದು ಮತ್ತು ಅನಗತ್ಯ ಘೋಷಣೆಗಳಿಗೆ ಮೂಗುದಾರ ಹಾಕುವ ಉದ್ದೇಶದಿಂದ ಬಿಬಿಎಂಪಿ ವಿತ್ತೀಯ ಹೊಂದಾಣಿಕೆ ಮತ್ತು ಬಜೆಟ್‌ ನಿರ್ವಹಣೆ ನಿಯಮ-2021 ಜಾರಿಗೊಳಿಸಲಾಗಿದೆ. ಆದರೆ, 2022-23 ಹಾಗೂ 2023-24ನೇ ಸಾಲಿನ ಬಿಬಿಎಂಪಿ ಬಜೆಟ್‌ ರೂಪಿಸುವ ವೇಳೆ ಪಾಲನೆ ಮಾಡಿಲ್ಲ.

ಲೋಕಸಭಾ ಚುನಾವಣೆ ಇರುವ ಹಿನ್ನೆಲೆಯಲ್ಲಿ 2024-25ನೇ ಸಾಲಿನ ಬಜೆಟ್‌ನಲ್ಲಿ ಪಾಲನೆ ಮಾಡುವ ಸಾಧ್ಯತೆ ಇಲ್ಲ. ಒಂದು ವೇಳೆ ಬಿಬಿಎಂಪಿ ವಿತ್ತೀಯ ಹೊಂದಾಣಿಕೆ ಮತ್ತು ಬಜೆಟ್‌ ನಿರ್ವಹಣೆ ನಿಯಮ ಪಾಲನೆ ಮಾಡಿದರೆ ₹9,332 ಕೋಟಿ ಮೊತ್ತ ಮೀರದಂತೆ ಬಿಬಿಎಂಪಿ ಬಜೆಟ್‌ ಮಂಡಿಸಬೇಕಾಗಲಿದೆ.

ಹಣ ಕೊಟ್ಟರೆ ಕಾರ್ಯಕ್ರಮ: ಬಜೆಟ್‌ ಮಂಡನೆಗೆ ಮುನ್ನ ಕಳೆದ ವರ್ಷದ ಬಜೆಟ್‌ ಪರಿಷ್ಕರಣೆ ಮಾಡಲಾಗುವುದು. ಕೊರತೆ ಉಂಟಾಗಿ ರಾಜ್ಯ ಸರ್ಕಾರ ಹೆಚ್ಚಿನ ಹಣ ನೀಡಿದರೆ ಎಲ್ಲ ಕಾರ್ಯಕ್ರಮ ಮುಂದುವರೆಸಲಾಗುವುದು ಎಂದು ತುಷಾರ್‌ ಗಿರಿನಾಥ್‌ ತಿಳಿಸಿದ್ದಾರೆ.