ಐಎಫ್ಎಫ್ಐ ಚಲನಚಿತ್ರೋತ್ಸವ ಭಾರತೀಯ ಸಿನಿಮೀಯ ಪರಂಪರೆ ಕಲೆ, ಸಂಸ್ಕೃತಿಯನ್ನು ವಿಶ್ವಮಟ್ಟದಲ್ಲಿ ಪರಿಚಯಿಸುವ ಉತ್ಸವವಾಗಿದೆ. ಪ್ರಮುಖವಾಗಿ ಯುವ ನಿರ್ದೇಶಕರನ್ನು ಗುರುತಿಸುವುದು, ಹೊಸ ಚಿತ್ರಗಳನ್ನು ಉತ್ತೇಜಿಸುವುದು ಮತ್ತು ಭಾರತೀಯ ಅಪ್ರತಿಮ ಚಿತ್ರತಾರೆಗಳಿಗೆ ಗೌರವ ಸಲ್ಲಿಸುವ ವೇದಿಕೆಯಾಗಿದೆ.
ಗೋವಾದ ಸುಂದರ ಕರಾವಳಿಗೆ ಸಿನಿಮೀಯ ಆಚರಣೆಯ ಹೊಸ ಅಲೆಯನ್ನು ತರಲು ಐಎಫ್ಎಫ್ಐ ಸಜ್ಜಾಗಿದೆ. ಈ ವರ್ಷದ ಚಿತ್ರೋತ್ಸವವು ಕೇವಲ ಚಲನಚಿತ್ರ ಪ್ರದರ್ಶನಕ್ಕಿಂತ ಮೀರಿದ ಭರವಸೆ ಒಳಗೊಂಡಿದೆ. ಇದು ಜಾಗತಿಕ ಸಂಸ್ಕೃತಿಗಳ ಸಂಯೋಜನೆ, ಉದಯೋನ್ಮುಖ ಧ್ವನಿಗಳಿಗೆ ಉಡ್ಡಯನ ವೇದಿಕೆ ಮತ್ತು ಭಾರತದ ಸಿನಿಮೀಯ ಪರಂಪರೆಗೆ ಆಳವಾದ ಗೌರವಕ್ಕೆ ಸಾಕ್ಷಿಯಾಗಲಿದೆ. ʻಐಎಫ್ಎಫ್ಐ-2024ʼ ತನ್ನದೇ ಆದ ವಿಕಾಸದಲ್ಲಿ ಒಂದು ದಿಟ್ಟ ಹೆಜ್ಜೆಯಾಗಿದೆ. ಅಷ್ಟೇ ಅಲ್ಲದೆ, ಜಾಗತಿಕ ವೇದಿಕೆಯಲ್ಲಿ ಭಾರತದ ರೋಮಾಂಚಕ ಸಂಸ್ಕೃತಿ ಮತ್ತು ಸಿನೆಮಾ ಕಲೆ ಎರಡನ್ನೂ ಆಚರಿಸುವ ವಿಶಿಷ್ಟ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವೂ ಹೌದು.
ಕಂಟ್ರಿ ಆಫ್ ಫೋಕಸ್‌
undefined
ಈ ವರ್ಷ ಆಸ್ಟ್ರೇಲಿಯಾವನ್ನು ʻಐಎಫ್ಎಫ್ಐʼ ತನ್ನ ‘ಗಮನ ಕೇಂದ್ರೀಕರಿಸುವ ದೇಶ’ (ಕಂಟ್ರಿ ಆಫ್ ಫೋಕಸ್‌) ಎಂದು ಗುರುತಿಸಲಿದ್ದು, ಆ ಮೂಲಕ ಸಂಸ್ಕೃತಿಗಳನ್ನು ಬೆಸೆಯುವ ಮತ್ತು ಅಂತಾರಾಷ್ಟ್ರೀಯ ತಿಳಿವಳಿಕೆಯನ್ನು ಬೆಳೆಸುವ ಉತ್ಸವದ ಬದ್ಧತೆಯನ್ನು ಒತ್ತಿಹೇಳುತ್ತದೆ. ಈ ವಿಭಾಗವು ಆಸ್ಟ್ರೇಲಿಯಾದ ಸಿನೆಮಾದ ಹೃದಯ ಭಾಗಕ್ಕೆ ಪ್ರವೇಶಿಸಲು ಭಾರತೀಯ ಪ್ರೇಕ್ಷಕರಿಗೆ ಅನುವು ಮಾಡಿಕೊಡುತ್ತದೆ. ಗಂಭೀರ ನಾಟಕಗಳಿಂದ ಹಿಡಿದು ಸಾಹಸಮಯ ಹಾಸ್ಯಗಳು ಮತ್ತು ಪ್ರತಿಫಲನಾತ್ಮಕ ಸಾಕ್ಷ್ಯಚಿತ್ರಗಳವರೆಗಿನ ಚಲನಚಿತ್ರಗಳ ಉತ್ಕೃಷ್ಟ ಆಯ್ಕೆಯನ್ನು ಅನ್ವೇಷಿಸುತ್ತದೆ. ಈ ಕೇಂದ್ರೀಕೃತ ದೃಷ್ಟಿಕೋನದ ಮೂಲಕ, ಪ್ರೇಕ್ಷಕರು ಆಸ್ಟ್ರೇಲಿಯಾದ ವಿಶಿಷ್ಟ ಮತ್ತು ವಿಕಸನಗೊಳ್ಳುತ್ತಿರುವ ಸಿನಿಮೀಯ ಭಾಷೆಯನ್ನು ಅನುಭವಿಸಬಹುದು. ಆ ಮೂಲಕ ಈ ಚಲನಚಿತ್ರೋತ್ಸವವು ಪರಸ್ಪರ ಅಂತರ-ಸಂಸ್ಕೃತಿ ಮನ್ನಣೆ ಮತ್ತು ಸಂವಾದಕ್ಕೆ ಪ್ರಬಲ ವೇದಿಕೆ ಒದಗಿಸುತ್ತದೆ. ಹಾಗೆ ಮಾಡುವ ಮೂಲಕ, ʻಐಎಫ್ಎಫ್ಐ-2024ʼ ತನ್ನ ವ್ಯಾಪ್ತಿಯಲ್ಲಿ ಸಾಂಪ್ರದಾಯಿಕ ಚಲನಚಿತ್ರ ಪ್ರದರ್ಶನದ ಗಡಿಗಳನ್ನು ಮೀರಿ ವಿಸ್ತರಿಸುತ್ತದೆ. ಈ ಚಿತ್ರೋತ್ಸವವು ವಿಶ್ವದ ಕಥೆಗಳು, ಜನರು ಮತ್ತು ಸಂಸ್ಕೃತಿಗಳ ನಡುವಿನ ಸೇತುವೆಯಾಗಿ ಇರಿಸುತ್ತದೆ.
ಯುವ ನಿರ್ದೇಶಕರಿಗೆ ಮನ್ನಣೆ
ʻಐಎಫ್ಎಫ್ಐ-2024ʼನ ಹೊಸ ಸೇರ್ಪಡೆಯೆಂದರೆ, ‘ಭಾರತೀಯ ಚಲನಚಿತ್ರದ ಅತ್ಯುತ್ತಮ ಚೊಚ್ಚಲ ನಿರ್ದೇಶಕ’ ಪ್ರಶಸ್ತಿ. ಇದು ಮುಂದಿನ ಪೀಳಿಗೆಯ ಭಾರತೀಯ ಚಲನಚಿತ್ರ ನಿರ್ಮಾಪಕರ ಮೇಲೆ ಬೆಳಕು ಚೆಲ್ಲುತ್ತದೆ. ಈ ಪ್ರಶಸ್ತಿ ಕೇವಲ ಮನ್ನಣೆಯಲ್ಲ, ಇದು ಯುವ ನಿರ್ದೇಶಕರ ವೃತ್ತಿಜೀವನದಲ್ಲಿ ಒಂದು ಪ್ರಮುಖ ಕ್ಷಣವಾಗಿದ್ದು, ಭಾರತೀಯ ಚಿತ್ರರಂಗದಲ್ಲಿ ಹೊಸ ದೃಷ್ಟಿಕೋನಗಳಿಗೆ ಹಾದಿ ಮಾಡಿಕೊಡುತ್ತದೆ. ಚೊಚ್ಚಲ ನಿರ್ದೇಶಕರಿಗೆ ಈ ವರ್ಗವನ್ನು ಅರ್ಪಿಸುವ ಮೂಲಕ, ನವೀನ ಧ್ವನಿಗಳನ್ನು ಪೋಷಿಸುವ ಮತ್ತು ಹೆಚ್ಚುತ್ತಿರುವ ಸ್ಪರ್ಧಾತ್ಮಕ ಉದ್ಯಮದಲ್ಲಿ ಅವರಿಗೆ ಮನ್ನಣೆ ಪಡೆಯಲು ನೆರವಾಗುವ ಬದ್ಧತೆಯನ್ನು ʻಐಎಫ್ಎಫ್ಐʼ ಸಂಕೇತಿಸುತ್ತದೆ. ಅನೇಕ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳು ಸ್ಥಾಪಿತ ಪ್ರತಿಭೆಗಳ ಮೇಲೆ ಗಮನ ಕೇಂದ್ರೀಕರಿಸುತ್ತವೆ. ಆದರೆ, ʻಐಎಫ್ಎಫ್ಐʼ ಚೊಚ್ಚಲ ಚಲನಚಿತ್ರ ನಿರ್ದೇಶಕರನ್ನು ಗುರುತಿಸುವುದು, ಅವರ ಬೆಳವಣಿಗೆಯನ್ನು ಉತ್ತೇಜಿಸುವುದು ಮತ್ತು ಭಾರತೀಯ ಸಿನೆಮಾದ ಭವಿಷ್ಯವನ್ನು ರೂಪಿಸಲು ಪ್ರಯತ್ನಿಸುತ್ತದೆ.
ಅಪ್ರತಿಮ ಸಿನಿತಾರೆಗಳಿಗೆ ಗೌರವ
ಈ ವರ್ಷದ ಚಿತ್ರೋತ್ಸವದಲ್ಲಿ ಭಾರತೀಯ ಚಿತ್ರರಂಗದ 4 ಅಪ್ರತಿಮ ರತ್ನಗಳಾದ - ರಾಜ್ ಕಪೂರ್, ತಪನ್ ಸಿನ್ಹಾ, ಅಕ್ಕಿನೇನಿ ನಾಗೇಶ್ವರ ರಾವ್ (ಎಎನ್ಆರ್) ಮತ್ತು ಮೊಹಮ್ಮದ್ ರಫಿ ಅವರಿಗೆ ಗೌರವ ಸಲ್ಲಿಸಲಾಗುವುದು. ಚಿತ್ರೋದ್ಯಮದ ಈ ದಂತಕಥೆಗಳು ಭಾರತದ ಸಿನಿಮೀಯ ಪರಂಪರೆಯನ್ನು ರೂಪಿಸಿದ್ದಾರೆ ಮತ್ತು ತಲೆಮಾರುಗಳಾದ್ಯಂತ ಪ್ರೇಕ್ಷಕರ ಹೃದಯವನ್ನು ಗೆದ್ದಿದ್ದಾರೆ. ಮರು ಸಂಸ್ಕರಿತ ಕ್ಲಾಸಿಕ್‌ ಚಿತ್ರಗಳು ಮತ್ತು ವಿಶೇಷವಾಗಿ ಆಯ್ದ ಶ್ರೇಷ್ಠ ಪ್ರಸ್ತುತಿಗಳ ಮೂಲಕ, ʻಐಎಫ್ಎಫ್ಐʼ ಈ ದಂತಕತೆಗಳ ಕಲಾತ್ಮಕತೆಗೆ ಜೀವ ತುಂಬಿ ಹೊಸ ಪೀಳಿಗೆಯ ಮುಂದಿರಿಸುತ್ತದೆ. ಜೊತೆಗೆ, ಜಾಗತಿಕ ವೀಕ್ಷಕರಿಗೆ ಭಾರತದ ಶ್ರೀಮಂತ ಸಿನಿಮೀಯ ಇತಿಹಾಸದ ಅರ್ಥಪೂರ್ಣ ನೋಟವನ್ನು ಒದಗಿಸುತ್ತದೆ. ʻಐಎಫ್ಎಫ್ಐʼನ ʻಫಿಲ್ಮ್ ಬಜಾರ್ʼ ಈಗ ತನ್ನ 18ನೇ ವರ್ಷಕ್ಕೆ ಕಾಲಿಟ್ಟಿದೆ. ಇದು ಚಲನಚಿತ್ರ ನಿರ್ಮಾಪಕರು, ಹಣಕಾಸು ಒದಗಿಸುವವರು, ವಿತರಕರು ಮತ್ತು ಅಂತಾರಾಷ್ಟ್ರೀಯ ಉದ್ಯಮದ ನಾಯಕರನ್ನು ಒಟ್ಟುಗೂಡಿಸುವ ಕ್ರಿಯಾತ್ಮಕ ಮಾರುಕಟ್ಟೆಯಾಗಿದೆ. ʻಫಿಲ್ಮ್ ಬಜಾರ್ʼನ ವೀಕ್ಷಣಾ ಕೊಠಡಿಯಲ್ಲಿ 200ಕ್ಕೂ ಹೆಚ್ಚು ಚಲನಚಿತ್ರಗಳು ಪ್ರದರ್ಶನಗೊಂಡಿದ್ದು, ಹೊಸ ಕಥೆಗಳು, ಹೂಡಿಕೆದಾರರನ್ನು ಹುಡುಕುವ, ಚಲನಚಿತ್ರಗಳು ವಿತರಕರೊಂದಿಗೆ ಸಂಪರ್ಕ ಸಾಧಿಸುವ ಮತ್ತು ಸಹಯೋಗಗಳಿಗೆ ಇದು ವೇದಿಕೆಯಾಗಿದೆ. ಈ ವಿಶೇಷ ವೇದಿಕೆಯು ʻಐಎಫ್ಎಫ್ಐʼಅನ್ನು ಇತರ ಚಲನಚಿತ್ರೋತ್ಸವ ಗಳಿಗಿಂತ ವಿಶೇಷವಾ ಗಿಸುತ್ತದೆ. ಚಿತ್ರೋತ್ಸವದ ವ್ಯಾಪ್ತಿಯನ್ನು ಮೀರಿ ಸಿನಿಮಾದ ಯೋಜನೆಗಳು ಬೆಳೆಯಲು ಮತ್ತು ಪ್ರವರ್ಧಮಾನಕ್ಕೆ ಬರಲು ಅವಕಾಶಗಳನ್ನು ಸೃಷ್ಟಿಸುತ್ತದೆ. ಭಾರತೀಯ ಮತ್ತು ಅಂತಾರಾಷ್ಟ್ರೀಯ ಚಲನಚಿತ್ರ ನಿರ್ಮಾಪಕರಿಗೆ, ಜಾಗತಿಕ ಪ್ರೇಕ್ಷಕರಿಗೆ ಪ್ರವೇಶದ್ವಾರವನ್ನು ʻಫಿಲ್ಮ್ ಬಜಾರ್ʼ ಒದಗಿಸುತ್ತದೆ.
ಕಥೆ ಹೇಳುವ ಉತ್ಸಾಹ ಪ್ರದರ್ಶನ
ʻಐಎಫ್ಎಫ್ಐʼನ ʻಇಂಡಿಯನ್‌ ಪನೋರಮಾʼ ವಿಭಾಗವು ಉತ್ಸವದ ಹೆಗ್ಗುರುತಾಗಿದ್ದು, ಪ್ರೇಕ್ಷಕರಿಗೆ ಸಮಕಾಲೀನ ಭಾರತೀಯ ಸಿನೆಮಾದ ವೈವಿಧ್ಯಮಯ ಆಯ್ಕೆಯನ್ನು ಮುಂದಿಡುತ್ತದೆ. 25 ಚಲನಚಿತ್ರಗಳು ಮತ್ತು 20 ನಾನ್-ಫೀಚರ್ ಚಲನಚಿತ್ರಗಳನ್ನು ಅವುಗಳ ಸಿನಿಮೀಯ ಉತ್ಕೃಷ್ಟತೆ, ವಿಷಯಾಧಾರಿತ ಅನುರಣನ ಮತ್ತು ಸೌಂದರ್ಯದ ಸೃಜನಶೀಲ ತೆಗಾಗಿ ಆಯ್ಕೆ ಮಾಡಲಾಗಿದ್ದು, ʻಇಂಡಿಯನ್‌ ಪನೋರಮಾʼಮ ಭಾರತೀಯ ಕಥೆ ಹೇಳುವ ಉತ್ಸಾಹ ಮತ್ತು ವೈವಿಧ್ಯ ತೆಯನ್ನು ಪ್ರದರ್ಶಿಸುತ್ತದೆ. ಅಂತಾರಾಷ್ಟ್ರೀಯ ಭಾಗಿದಾರರಿಗೆ, ಇದು ಭಾರತದ ಸಾಮಾಜಿಕ-ಸಾಂಸ್ಕೃತಿಕ ಭೂದೃಶ್ಯದ ಬಗ್ಗೆ ಅಧಿಕೃತ ಒಳನೋಟವನ್ನು ಒದಗಿಸುತ್ತದೆ, ಪ್ರಾದೇಶಿಕ ನಿರೂಪಣೆಗಳಿಂದ ಹಿಡಿದು ಹೊಸ ಚೊಚ್ಚಲ ಪ್ರಯೋಗಗಳವರೆಗೆ ಎಲ್ಲವನ್ನೂ ಬೆಳಕಿಗೆ ತರುತ್ತದೆ. ಈ ವಿಭಾಗವು ಭಾರತೀಯ ಸಿನೆಮಾವನ್ನು ಅದರ ಎಲ್ಲಾ ಆಳ ಮತ್ತು ವೈವಿಧ್ಯತೆಯಲ್ಲಿ ಪ್ರಸ್ತುತಪಡಿಸುವ ʻಐಎಫ್ಎಫ್ಐʼನ ಧ್ಯೇಯವನ್ನು ಬಲಪಡಿಸುತ್ತದೆ.
ಯುವ ಪ್ರತಿಭೆಗಳ ಅನಾವರಣ
ವಾರ್ತಾ ಮತ್ತು ಪ್ರಸಾರ ಸಚಿವಾಲಯ ಹಾಗೂ ʻರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮʼವು(ಎನ್ಎಫ್‌ಡಿಸಿ) ಯುವ ಚಲನಚಿತ್ರ ನಿರ್ಮಾಪಕರನ್ನು ಪೋಷಿಸಲು ರೂಪಿಸಿರುವ ‘ಕ್ರಿಯೇಟಿವ್ ಮೈಂಡ್ಸ್ ಆಫ್ ಟುಮಾರೊ’(ಸಿಎಂಒಟಿ) ಕಾರ್ಯಕ್ರಮವು ʻಐಎಫ್ಎಫ್ಐ-2024ʼರ ಅತ್ಯುತ್ತಮ ಉಪಕ್ರಮಗಳಲ್ಲಿ ಒಂದಾಗಿದೆ. ಕಿರುಚಿತ್ರಗಳು, ಸಾಕ್ಷ್ಯಚಿತ್ರಗಳು ಮತ್ತು ಅನಿಮೇಷನ್‌ಗಳನ್ನು ಪ್ರದರ್ಶಿಸಲು ಉದಯೋನ್ಮುಖ ಧ್ವನಿಗಳಿಗೆ ʻಸಿಎಂಒಟಿʼ ಒಂದು ವೇದಿಕೆಯನ್ನು ಒದಗಿಸುತ್ತದೆ, ಜೊತೆಗೆ ಅನುಭವಿ ಉದ್ಯಮ ವೃತ್ತಿಪರರೊಂದಿಗೆ ಸಂಪರ್ಕವನ್ನು ಸುಗಮಗೊಳಿಸುತ್ತದೆ. ʻಸಿಎಂಒಟಿʼ ಮೂಲಕ, ಯುವ ಪ್ರತಿಭೆಗಳನ್ನು ʻಐಎಫ್ಎಫ್ಐʼ ಅನಾವರಣಗೊಳಿಸುವುದಲ್ಲದೆ, ಮುಂದಿನ ಪೀಳಿಗೆಯ ಭಾರತೀಯ ಚಲನಚಿತ್ರ ನಿರ್ಮಾಪಕರಿಗೆ ಹೊಸ ಸಂಪನ್ಮೂಲಗಳು ಹಾಗೂ ಸಂಪರ್ಕಗಳನ್ನು ಒದಗಿಸುತ್ತದೆ.
ವಿಶ್ವ ವೇದಿಕೆಯತ್ತ ನಿರ್ಮಾಪಕರು
ʻಕೇನ್ಸ್-2024ʼ ಚಲನಚಿತ್ರೋತ್ಸವದಲ್ಲಿ ವಿಶ್ವದ ಗಮನವನ್ನು ಸೆಳೆದ ʻಭಾರತ್ ಪರ್ವ್ʼನ ಅಂಶಕ್ಕೆ ಅನುಗುಣವಾಗಿ, ʻಐಎಫ್ಎಫ್ಐʼ ಭಾರತದ ವೈವಿಧ್ಯಮಯ ಸಾಂಸ್ಕೃತಿಕ ಪರಂಪರೆಯ ಆಚರಣೆಯನ್ನು ಮುಂದೆ ತರಲಿದೆ. ಭಾರತದ ಶ್ರೀಮಂತ ಸಂಪ್ರದಾಯಗಳು ಮತ್ತು ವೈವಿಧ್ಯತೆಯಲ್ಲಿ ಏಕತೆಯನ್ನು ಎತ್ತಿ ತೋರುವ ʻಭಾರತ್ ಪರ್ವ್ʼ, ʻಐಎಫ್ಎಫ್ಐʼನಲ್ಲಿ ತನ್ನ ಸಿನಿಮೀಯ ಅಭಿವ್ಯಕ್ತಿಯನ್ನು ಕಂಡುಕೊಳ್ಳಲಿದೆ. ಚಲನಚಿತ್ರಗಳು, ಕಾರ್ಯಕ್ರಮಗಳು ಭಾರತದ ಬಹುಮುಖಿ ಗುರುತನ್ನು ಪ್ರತಿಬಿಂಬಿಸುತ್ತವೆ. ʻಐಎಫ್ಎಫ್ಐ-2024ʼ ಭಾರತೀಯ ಚಿತ್ರರಂಗದ ಪರಿವರ್ತನಾತ್ಮಕ ಕ್ಷಣವನ್ನು ಅನುಭವಕ್ಕೆ ತರುತ್ತದೆ. ಇದು ಭಾರತೀಯ ಚಲನಚಿತ್ರ ನಿರ್ಮಾಪಕರನ್ನು ವಿಶ್ವ ವೇದಿಕೆಗೆ ತಲುಪಿಸುವ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ಕಲೆಯಲ್ಲಿ ಜಾಗತಿಕ ನಾಯಕನಾಗಬೇಕೆಂಬ ಭಾರತದ ಆಕಾಂಕ್ಷೆಗಳಿಗೆ ಅನುಗುಣವಾಗಿ ಉದಯೋನ್ಮುಖ ಪ್ರತಿಭೆಗಳು, ಜಾಗತಿಕ ಸಹಯೋಗ ಮತ್ತು ಸಾಂಸ್ಕೃತಿಕ ವಿನಿಮಯಕ್ಕೆ ಈ ಉತ್ಸವವು ಒತ್ತು ನೀಡುತ್ತದೆ. ಉದ್ಯಮ ಉಪಕ್ರಮಗಳು, ಹೊಸ ಪ್ರತಿಭೆಗಳನ್ನು ಗುರುತಿಸುವುದು ಮತ್ತು ಸಿನಿಮೀಯ ಪರಂಪರೆಯ ಆಚರಣೆಯು ʻಐಎಫ್ಎಫ್ಐʼನ ವಿಶಿಷ್ಟ ಸಂಯೋಜನೆಯಾಗಿದ್ದು, ಭಾರತೀಯ ಸಿನಿಮಾದ ಬೆಳವಣಿಗೆಯಲ್ಲಿ ಮತ್ತು ಜಾಗತಿಕ ವೇದಿಕೆಯಲ್ಲಿ ಪ್ರಮುಖ ಪಾತ್ರ ವಹಿಸಲು ಅನುವು ಮಾಡಿಕೊಡುತ್ತದೆ.
ಉದ್ಯಮದ ಮೇಲೆ ಭರವಸೆ
ಈ ವರ್ಷದ ಆವೃತ್ತಿಯು ಉದ್ಯಮದ ಮೇಲೆ ಅಳಿಸಲಾಗದ ಪ್ರಭಾವವನ್ನು ಬೀರುವ ಭರವಸೆ ನೀಡಲಿದೆ. ʻಐಎಫ್ಎಫ್ಐʼ ಅನ್ನು ಭಾರತದ ಸಿನಿಮೀಯ ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ಹಾಗೂ ಸಿನಿಮಾದ ಭವಿಷ್ಯವನ್ನು ಸಕ್ರಿಯವಾಗಿ ರೂಪಿಸುವ ಉತ್ಸವವೆಂದು ಮರು ವ್ಯಾಖ್ಯಾನಿಸಲಿದೆ. ಅಂತಾರಾಷ್ಟ್ರೀಯ ಚಲನಚಿತ್ರ ನಿರ್ಮಾಪಕರಿಗೆ, ʻಐಎಫ್ಎಫ್ಐ-2024ʼ ಭಾರತದ ರೋಮಾಂಚಕ ಸಿನಿಮೀಯ ಭೂದೃಶ್ಯದೊಂದಿಗೆ ಸಂಪರ್ಕ ಸಾಧಿಸಲು ಸಾಟಿಯಿಲ್ಲದ ಅವಕಾಶವನ್ನು ನೀಡುತ್ತದೆ. ವೈವಿಧ್ಯಮಯ ಭಾರತೀಯ ಪ್ರೇಕ್ಷಕರಿಗೆ ಮಾನ್ಯತೆ, ʻಫಿಲ್ಮ್ ಬಜಾರ್ʼನ ಸಂಪನ್ಮೂಲಗಳಿಗೆ ಪ್ರವೇಶ ಹಾಗೂ ಆಸ್ಟ್ರೇಲಿ ಯಾದ ಅನಾವರಣದಂತಹ ವಿಭಾಗಗಳ ಮೂಲಕ ಅಂತಾರಾಷ್ಟ್ರೀಯ ಚಲನಚಿತ್ರ ನಿರ್ಮಾಪಕರಿಗೆ ಭಾರತದ ಅಭಿರುಚಿ, ಪ್ರವೃತ್ತಿಗಳು ಮತ್ತು ಅವಕಾಶಗಳ ಬಗ್ಗೆ ಒಳನೋಟಗಳನ್ನು ʻಐಎಫ್ಎಫ್ಐʼ ಒದಗಿಸಲಿದೆ. ಅಪ್ರತಿಮ ಭಾರತೀಯ ಕಲಾವಿದರಿಗೆ ʻಐಎಫ್ಎಫ್ಐʼ ಸಲ್ಲಿಸುವ ಗೌರವವು ಶ್ರೀಮಂತ ಸಾಂಸ್ಕೃತಿಕ ಸಂದರ್ಭಕ್ಕೆ ವೇದಿಕೆ ಒದಗಿಸುತ್ತದೆ.
55ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವು, ಸಂಪ್ರದಾಯವನ್ನು ಮುಂದಾಲೋಚನೆಯ ನಾವೀನ್ಯತೆಯೊಂದಿಗೆ ಸಂಯೋಜಿಸುವ ಉತ್ಸವವಾಗಿದೆ. ಇದು ನಾಳೆಯ ಧ್ವನಿಗಳಿಗೆ ಕಿವಿಯಾಗುವ ಜೊತೆಗೆ ಭಾರತೀಯ ಚಿತ್ರರಂಗದ ಅಪ್ರತಿಮ ತಾರೆಗಳಿಗೆ ಗೌರವ ಸಲ್ಲಿಸುತ್ತದೆ. ʻಭಾರತ್ ಪರ್ವ್ʼನ ಆಶಯದಿಂದ ಹಿಡಿದು, ಮೊದಲ ಬಾರಿ ನಿರ್ದೇಶನ ಮಾಡುವ ಉದಯೋನ್ಮುಖ ಪ್ರತಿಭೆಗಳಿಗೆ ಹೊಸ ಪ್ರಶಸ್ತಿಯವರೆಗೆ ಚಿತ್ರರಂಗದ ವಿಕಸನದ ಸ್ವರೂಪವನ್ನು ʻಐಎಫ್ಎಫ್ಐ-2024ʼ ಸಾಕಾರಗೊಳಿಸುತ್ತದೆ. ಸಂಪರ್ಕದ ಸಾಧನವಾಗಿ ಕಥೆ ಹೇಳುವ ಶಕ್ತಿಯನ್ನು ಆಚರಿಸುತ್ತದೆ. ಈ ಉತ್ಸವವು ಅಂತಾರಾಷ್ಟ್ರೀಯ ಚಲನಚಿತ್ರ ನಿರ್ಮಾಪಕರು, ಉದ್ಯಮದ ನಾಯಕರು ಮತ್ತು ಪ್ರೇಕ್ಷಕರನ್ನು ಒಟ್ಟಿಗೆ ಸೆಳೆಯುವುದರಿಂದ, ಇದು ಭಾರತಕ್ಕೆ ಜಾಗತಿಕ ಸಿನೆಮಾ ಕ್ಷೇತ್ರದಲ್ಲಿ ಪ್ರಮುಖ ಸ್ಥಾನ ಕಲ್ಪಿಸುತ್ತದೆ.