Wrestlers Protest ಹೊಸ ಪಾರ್ಲಿಮೆಂಟ್‌ಗೆ ಘೇರಾವ್‌ ಹಾಕಲು ಹೊರಟ ಕುಸ್ತಿಪಟುಗಳ ಸೆರೆ

ಜಂತರ್‌ ಮಂತರ್‌ನಲ್ಲಿ ಹೈಡ್ರಾಮಾ ಬ್ರಿಜ್‌ಭೂಷಣ್‌ ಬಂಧನಕ್ಕೆ ಪಟ್ಟು ಸಂಜೆ ಮಹಿಳಾ ರೆಸ್ಲರ್‌ಗಳ ಬಿಡುಗಡೆ  

ನವ​ದೆ​ಹ​ಲಿ(ಮೇ.29): ಲೈಂಗಿಕ ಕಿರು​ಕುಳ ಪ್ರಕ​ರ​ಣ​ದಲ್ಲಿ 2 ಎಫ್‌​ಐ​ಆರ್‌ ದಾಖ​ಲಾ​ದರೂ ಭಾರತೀಯ ಕುಸ್ತಿ ಫೆಡ​ರೇ​ಶ​ನ್‌​ (​ಡ​ಬ್ಲ್ಯು​ಎ​ಫ್‌​ಐ) ಅಧ್ಯಕ್ಷ ಬ್ರಿಜ್‌​ಭೂ​ಷಣ್‌ ಸಿಂಗ್‌ರನ್ನು ಇನ್ನೂ ಬಂಧಿ​ಸದಿ​ರು​ವು​ದನ್ನು ಪ್ರಶ್ನಿಸಿ ಭಾನು​ವಾರ ನೂತನ ಸಂಸತ್‌ ಭವ​ನಕ್ಕೆ ಮುತ್ತಿಗೆ ಹಾಕುವ ಕುಸ್ತಿ​ಪ​ಟು​ಗ​ಳ ಪ್ರಯತ್ನ ಭಾರೀ ಹೈಡ್ರಾಮಾಕ್ಕೆ ಕಾರ​ಣ​ವಾ​ಗಿದೆ. ಪ್ರಧಾನಿ ನರೇಂದ್ರ ಮೋದಿ ನೂತನ ಸಂಸತ್‌ ಭವ​ನ ಉದ್ಘಾ​ಟಿ​ಸಿದ ದಿನವೇ ಒಲಿಂಪಿಕ್‌ ಸಾಧ​ಕ​ರನ್ನು ನಡು ರಸ್ತೆಯಲ್ಲೇ ಬಂಧಿ​ಸಿದ ಘಟನೆಗೆ ತೀವ್ರ ಆಕ್ರೋ​ಶ ಕೂಡಾ ವ್ಯಕ್ತ​ವಾ​ಗಿ​ದೆ.

ಬ್ರಿಜ್‌ಭೂಷಣ್‌ ಬಂಧ​ನ​ಕ್ಕಾಗಿ ಪಾರ್ಲಿ​ಮೆಂಟ್‌ ಮುಂಭಾ​ಗ ‘ಮಹಾ​ ಪಂಚಾ​ಯತ್‌’ ಹೆಸ​ರಿ​ನಲ್ಲಿ ಬೃಹತ್‌ ಹೋರಾಟ ಸಂಘ​ಟಿ​ಸಲು ನಿರ್ಧ​ರಿ​ಸಿ ಭಾನು​ವಾರ ಮುಂಜಾನೆ ಜಂತರ್‌ ಮಂತ​ರ್‌​ನಿಂದ ಮೆರ​ವ​ಣಿಗೆ ಆರಂಭಿ​ಸಿದ ಕುಸ್ತಿ​ಪ​ಟು​ಗ​ಳನ್ನು ಮಾರ್ಗ ಮಧ್ಯೆಯೇ ಪೊಲೀ​ಸರು ತಡೆ​ದಿ​ದ್ದಾರೆ. ಈ ವೇಳೆ ಕುಸ್ತಿ​ಪ​ಟು​ಗಳು ಹಾಗೂ ಪೊಲೀ​ಸರ ನಡುವೆ ಸಂಘರ್ಷ ಏರ್ಪ​ಟ್ಟಿದ್ದು, ಭಜ​ರಂಗ್‌ ಪೂನಿಯಾ, ಸಾಕ್ಷಿ ಮಲಿಕ್‌, ವಿನೇಶ್‌ ಫೋಗಾಟ್‌ ಸೇರಿ​ದಂತೆ ಹಲ​ವ​ರನ್ನು ಪೊಲೀಸರು ತಮ್ಮ ವಾಹ​ನ​ಗ​ಳಲ್ಲಿ ಕರೆ​ದೊ​ಯ್ದಿ​ದ್ದಾರೆ. ಬಳಿಕ ಜಂತರ್‌ ಮಂತ​ರ್‌​ನ ಪ್ರತಿ​ಭ​ಟನಾ ಸ್ಥಳ​ವನ್ನೂ ಪೊಲೀ​ಸರು ತೆರ​ವು​ಗೊ​ಳಿ​ಸಿದ್ದು, ಅಲ್ಲಿದ್ದ ಬೆಡ್‌, ಕೂಲರ್‌ ಸೇರಿ​ದಂತೆ ಇತರ ವಸ್ತು​ಗ​ಳನ್ನು ವಶಕ್ಕೆ ಪಡೆ​ದು​ಕೊಂಡಿ​ದ್ದಾರೆ. ಸಂಜೆಯ ವೇಳೆಗೆ ಮಹಿಳಾ ಕುಸ್ತಿಪಟುಗಳನ್ನು ಪೊಲೀಸರು ಬಿಡುಗಡೆ ಮಾಡಿದ್ದಾರೆ.

ಬಂಧನಕ್ಕೆ ತೀವ್ರ ಖಂಡ​ನೆ:

ಪ್ರತಿ​ಭ​ಟನಾನಿರತರು ರಸ್ತೆಗೆ ಬಿದ್ದಿ​ರುವ, ಅವ​ರನ್ನು ಪೊಲೀ​ಸರು ಎಳೆ​ದಾ​ಡು​ತ್ತಿ​ರುವ ಫೋಟೋ, ವಿಡಿ​ಯೋ​ಗ​ಳು ಭಾರೀ ವೈರಲ್‌ ಆಗಿವೆ. ಅದಕ್ಕೆ ವಿವಿಧ ರಾಜ​ಕೀಯ ಪಕ್ಷ​ಗಳ ನಾಯ​ಕರು ತೀವ್ರ ಖಂಡನೆ ವ್ಯಕ್ತ​ಪ​ಡಿ​ಸಿ​ದ್ದಾರೆ. ‘ಪ​ಟ್ಟಾ​ಭಿ​ಷೇಕ ಮುಗಿ​ದಿದೆ. ದುರ​ಹಂಕಾರಿ ರಾಜ ಪ್ರಜೆ​ಗಳ ಧ್ವನಿ ಅಡ​ಗಿ​ಸು​ತ್ತಿ​ದ್ದಾ​ನೆ’ ಎಂದು ರಾಹುಲ್‌ ಗಾಂಧಿ ಟ್ವೀಟ್‌ ಮಾಡಿದ್ದು, ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಕೂಡಾ ಕಿಡಿ​ಕಾ​ರಿ​ದ್ದಾರೆ. ಒಲಿಂಪಿಕ್ಸ್‌ ಚಾಂಪಿ​ಯನ್‌ ನೀರಜ್‌ ಚೋಪ್ರಾ, ‘ಘ​ಟ​ನೆ​ಯಿಂದ ನೋವಾ​ಗಿದೆ. ಕುಸ್ತಿ​ಪ​ಟು​ಗ​ಳನ್ನು ಚೆನ್ನಾಗಿ ನಡೆ​ಸಿ​ಕೊ​ಳ್ಳ​ಬ​ಹು​ದಿ​ತ್ತು’ ಎಂದು ಅಸ​ಮಾ​ಧಾನ ವ್ಯಕ್ತ​ಪ​ಡಿ​ಸಿ​ದ್ದಾ​ರೆ.

ದೇಶ ವಿರೋಧಿ ಕೃತ್ಯ:

ಘಟನೆ ಬಗ್ಗೆ ಪ್ರತಿ​ಕ್ರಿ​ಯಿ​ಸಿ​ರುವ ದೆಹಲಿ ಪೊಲೀಸ್‌ ಅಧಿ​ಕಾರಿ ದೀಪೇಂದ್ರ ಪಾಠಕ್‌, ‘ಉದ್ಘಾ​ಟನೆ ದಿನವೇ ಸಂಸತ್‌ ಭವನಕ್ಕೆ ಮಾಚ್‌ರ್‍ ನಡೆ​ಸು​ವುದು ದೇಶ ವಿರೋಧಿ ಕೃತ್ಯ. ಹೀಗಾಗಿ ಕುಸ್ತಿ​ಪ​ಟು​ಗಳ ಮೆರ​ವ​ಣಿ​ಗೆಗೆ ಅವ​ಕಾ​ಶ​ವಿಲ್ಲ. ನಿಯಮ ಉಲ್ಲಂಘಿ​ಸಿ​ದ್ದಕ್ಕೆ ಅವ​ರನ್ನು ಬಂಧಿ​ಸಿ​ದ್ದೇವೆ. ತನಿಖೆ ನಡೆಸಿ ಕ್ರಮ ಕೈಗೊ​ಳ್ಳು​ತ್ತೇ​ವೆ’ ಎಂದಿ​ದ್ದಾ​ರೆ.

ನಾವು ಮಾಡಿದ ತಪ್ಪೇ​ನು?:

ಪೊಲೀ​ಸರು ತಮ್ಮನ್ನು ಬಂಧಿ​ಸಿ​ದ್ದಕ್ಕೆ ಕಿಡಿ​ಕಾ​ರಿದ ವಿನೇಶ್‌, ‘ನವ ಭಾರ​ತಕ್ಕೆ ಸ್ವಾಗತ. ಇಲ್ಲಿ ಅ​ಪ​ರಾ​ಧಿ​ಗಳು ಮುಕ್ತ​ವಾಗಿ ಓಡಾ​ಡು​​ತ್ತಿ​ದ್ದಾರೆ. ದೇಶ​ಕ್ಕಾಗಿ ಪದಕ ಗೆದ್ದ​ವರನ್ನು ನ್ಯಾಯ ಕೇಳಿ​ದ್ದಕ್ಕೆ ಬಂಧಿಸಿ ಜೈಲಲ್ಲಿ ಇಡು​ತ್ತಿ​ದ್ದಾರೆ. ಯಾವು​ದಾ​ದರೂ ಸರ್ಕಾರ ಚಾಂಪಿ​ಯನ್‌ ಅಥ್ಲೀ​ಟ್‌​ಗಳ ಜೊತೆ ಈ ರೀತಿ ವರ್ತಿ​ಸಿ​ದೆ​ಯೇ? ನಾವು ಮಾಡಿದ ಅಪ​ರಾ​ಧ​ವಾ​ದರೂ ಏನು? ಲೈಂಗಿಕ ಕಿರು​ಕುಳ ಆರೋಪಿ ಬ್ರಿಜ್‌​ಭೂ​ಷಣ್‌ ಪಾರ್ಲಿ​ಮೆಂಟ್‌​ನಲ್ಲಿದ್ದರೆ, ನಮ್ಮನ್ನು ರಸ್ತೆ​ಯಲ್ಲಿ ಎಳೆ​ದೊ​ಯ್ಯು​ತ್ತಿ​ದ್ದಾರೆ. ವಿಶ್ವವೇ ನಮ್ಮನ್ನು ನೋಡು​ತ್ತಿ​ದೆ. ಇದು ಭಾರ​ತೀಯ ಕ್ರೀಡೆಯ ಕರಾಳ ದಿನ​’ ಎಂದು ಆಕ್ರೋಶ ವ್ಯಕ್ತ​ಪ​ಡಿ​ಸಿ​ದ್ದಾ​ರೆ. ಅಲ್ಲದೆ ಸರ್ಕಾರದ ಇಂಥ ಕ್ರಮದ ಹೊರತಾಗಿಯೂ ತಾವು ಜಂತರ್‌ ಮಂತರ್‌ನಲ್ಲೇ ಪ್ರತಿಭಟನೆ ಮುಂದುವರೆಸುವುದಾಗಿ ಘೋಷಿಸಿದ್ದಾರೆ.