ಗೆಲುವಿನೊಂದಿಗೆ ತವರಿನ ಚರಣ ಮುಗಿಸಿದ ಯು ಮುಂಬಾ

ಈ ಗೆಲುವಿನೊಂದಿಗೆ ಎ ವಲಯದಲ್ಲಿ ಯು ಮುಂಬಾ ಎರಡನೇ ಸ್ಥಾನಕ್ಕೆ ಏರಿತು. ಯು ಮುಂಬಾ ತಾನಾಡಿದ 11 ಪಂದ್ಯಗಳಲ್ಲಿ 5 ಗೆಲುವು 6 ಸೋಲಿನೊಂದಿಗೆ 29 ಅಂಕ ಕಲೆ ಹಾಕಿದೆ.

ಮುಂಬೈ(ಆ.31): ಸ್ಟಾರ್ ರೈಡರ್ ಕಾಶಿಲಿಂಗ ಅಡಕೆ ಅವರ ಆಕರ್ಷಕ ಆಟದ ನೆರವಿನಿಂದ ಯು ಮುಂಬಾ ತಂಡ, ಜೈಪುರ ಪಿಂಕ್ ಫ್ಯಾಂಥರ್ಸ್‌ ವಿರುದ್ಧ 36-32 ಅಂಕಗಳ ಅಂತರದಿಂದ ಗೆಲುವು ಸಾಧಿಸಿದೆ. ಈ ಮೂಲಕ ಗೆಲುವಿನಿಂದ ತವರಿನ ಚರಣಕ್ಕೆ ಮುಂಬಾ ವಿದಾಯ ಹೇಳಿದೆ.

ಮೊದಲಾರ್ಧ ಮುಕ್ತಾಯದ ವೇಳೆಗೆ 15-16 ಅಂಕಗಳ ಹಿನ್ನಡೆಯಲ್ಲಿದ್ದ ಅನೂಪ್ ಕುಮಾರ್ ನೇತೃತ್ವದ ಯು ಮುಂಬಾ ಆ ನಂತರ ಪುಟಿದೆದ್ದಿತು.

ಕೊನೆ ಕ್ಷಣದವರೆಗೂ ರೋಚಕ ಹಣಾಹಣಿಯಿಂದ ಕೂಡಿದ ಪಂದ್ಯದಲ್ಲಿ ಕೊನೆಯ 2 ನಿಮಿಷ ಬಾಕಿ ಇದ್ದಾಗ ಅಂಕಗಳು 32-32ರಿಂದ ಸಮಗೊಂಡಿತ್ತು. ಈ ವೇಳೆ ರೈಡಿಂಗ್‌'ಗೆ ತೆರಳಿದ ಅಡಕೆ ಎರಡು ಅಂಕ ಗಳಿಸುವ ಪಂದ್ಯ ಗತಿಯನ್ನು ಬದಲಿಸಿದರು.

ಕೊನೆಗೆ ಜೈಪುರ ಜಸ್ವೀರ್ ಸಿಂಗ್‌'ರನ್ನು ಟ್ಯಾಕಲ್ ಮಾಡುವ ಮೂಲಕ ಮುಂಬಾ ಅಂತರವನ್ನು 35-32ಕ್ಕೇರಿಸಿಕೊಂಡಿತು. ಈ ವೇಳೆ ಮುಂಬಾಗೆ ತಾಂತ್ರಿಕವಾಗಿ ಮತ್ತೊಂದು ಅಂಕ ಲಭಿಸಿ, ಅಂತಿಮವಾಗಿ ಗೆಲುವಿನ ನಗೆ ಬೀರಿತು.

ಈ ಗೆಲುವಿನೊಂದಿಗೆ ಎ ವಲಯದಲ್ಲಿ ಯು ಮುಂಬಾ ಎರಡನೇ ಸ್ಥಾನಕ್ಕೆ ಏರಿತು. ಯು ಮುಂಬಾ ತಾನಾಡಿದ 11 ಪಂದ್ಯಗಳಲ್ಲಿ 5 ಗೆಲುವು 6 ಸೋಲಿನೊಂದಿಗೆ 29 ಅಂಕ ಕಲೆ ಹಾಕಿದೆ.