ಪ್ರೊ ಕಬಡ್ಡಿ-5: ಇಂದು ಆಟಗಾರರ ಹರಾಜು

ಜೈಪುರ ತಂಡವೊಂದನ್ನು ಹೊರತುಪಡಿಸಿ ಎಲ್ಲಾ ಏಳು ತಂಡಗಳು ತಲಾ ಒಬ್ಬ ಆಟಗಾರನನ್ನು ಈ ಆವೃತ್ತಿಗೆ ಉಳಿಸಿಕೊಂಡಿವೆ. ಇಂದು ಹಾಗೂ ನಾಳೆ ನಡೆಯುವ ಹರಾಜನಲ್ಲಿ ಆಟಗಾರರನ್ನು 3 ವಿವಿಧ ಗುಂಪುಗಳಾಗಿ ವಿಗಂಡಿಸಲಾಗಿದೆ.

ನವದೆಹಲಿ(ಮೇ.22): 5ನೇ ಆವೃತ್ತಿಯ ಪ್ರೊ-ಕಬಡ್ಡಿಗೆ ಇಂದು ಆಟಗಾರರ ಹರಾಜು ನಡೆಯಲಿದ್ದು, ನಾಲ್ಕು ಹೊಸ ತಂಡಗಳು ಸೇರಿ ಒಟ್ಟು 12 ತಂಡಗಳು ಆಟಗಾರರನ್ನು ಖರೀದಿಸಲಿವೆ.

ಸುಮಾರು 350ಕ್ಕೂ ಹೆಚ್ಚು ದೇಶಿ ಹಾಗೂ ವಿದೇಶಿ ಆಟಗಾರರು ಹರಾಜಿನಲ್ಲಿ ಪಾಲ್ಗೊಳ್ಳುತ್ತಿ​ದ್ದಾರೆ. ಜೈಪುರ ತಂಡವೊಂದನ್ನು ಹೊರತುಪಡಿಸಿ ಎಲ್ಲಾ ಏಳು ತಂಡಗಳು ತಲಾ ಒಬ್ಬ ಆಟಗಾರನನ್ನು ಈ ಆವೃತ್ತಿಗೆ ಉಳಿಸಿಕೊಂಡಿವೆ. ಇಂದು ಹಾಗೂ ನಾಳೆ ನಡೆಯುವ ಹರಾಜನಲ್ಲಿ ಆಟಗಾರರನ್ನು 3 ವಿವಿಧ ಗುಂಪುಗಳಾಗಿ ವಿಗಂಡಿಸಲಾಗಿದೆ.

‘ಎ' ಗುಂಪಿನಲ್ಲಿ ಈ ಮೊದಲಿನ ಆವೃತ್ತಿಗಳಲ್ಲಿ ಆಡಿದ್ದ ಪ್ರತಿಷ್ಠಿತ ಆಟಗಾರರಿದ್ದರೆ, ‘ಬಿ' ಗುಂಪಿನಲ್ಲಿ ಉಳಿದ ಭಾರತೀಯ ಹಾಗೂ ವಿದೇಶಿ ಆಟಗಾರರಿದ್ದಾರೆ. ‘ಸಿ' ಗುಂಪಿನಲ್ಲಿ ನೂತನ ಯುವ ಆಟಗಾರರಿದ್ದಾರೆ. ಪ್ರತಿ ತಂಡ 18-25 ಆಟಗಾರರನ್ನು ಖರೀದಿಸಬಹು​ದಾಗಿದೆ. ಇದರಲ್ಲಿ ಒಬ್ಬ ಪ್ರತಿಷ್ಠಿತ ಆಟಗಾರನನ್ನು ನೇರವಾಗಿ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ. ಜತೆಗೆ ಮೂವರು ನೂತನ ಯುವ ಆಟಗಾರರು ಹಾಗೂ ಕನಿಷ್ಠ 2, ಗರಿಷ್ಠ 4 ವಿದೇಶಿ ಆಟಗಾರರನ್ನು ಖರೀದಿ​ಸಬಹುದಾಗಿದೆ. 

‘ಎ' ಗುಂಪಿನಲ್ಲಿರುವ ಆಟಗಾರರ ಮೂಲಬೆಲೆ ರೂ.35 ಲಕ್ಷಗಳಾದರೆ, ‘ಬಿ' ಗುಂಪಿನಲ್ಲಿರುವವರಿಗೆ ರೂ.20 ಲಕ್ಷ ಹಾಗೂ ‘ಸಿ' ಗುಂಪಿನಲ್ಲಿರುವ ಆಟಗಾರರಿಗೆ ರೂ.12 ಲಕ್ಷವಾಗಿದೆ. ಇನ್ನು ಯುವ ಆಟಗಾ​ರರಿಗೆ ರೂ.6 ಲಕ್ಷ ಸಂಭಾವನೆ ನಿಗದಿ ಪಡಿಸಲಾಗಿದೆ. ಪ್ರತಿ ತಂಡ ಗರಿಷ್ಠ ರೂ.4 ಕೋಟಿ ಖರ್ಚು ಮಾಡಬಹುದಾಗಿದೆ.