Commonwealth Games: ಸಿಂಧು, ಶ್ರೀಕಾಂತ್ ಕ್ವಾರ್ಟರ್ಗೆ ಲಗ್ಗೆ
ಸಾರಾಂಶ
* ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಮುಂದುವರೆದ ಸಿಂಧು, ಶ್ರೀಕಾಂತ್ ಗೆಲುವಿನ ನಾಗಾಲೋಟ * ಪದಕಕ್ಕೆ ಮತ್ತಷ್ಟು ಹತ್ತಿರವಾದ ಭಾರತೀಯ ಶಟ್ಲರ್ಗಳು * ಲಕ್ಷ್ಯ ಸೆನ್ ಹಾಗೂ ಪಾರುಪಳ್ಳಿ ಕಶ್ಯಪ್ ಪ್ರಿ ಕ್ವಾರ್ಟರ್ ಫೈನಲ್ಗೆ ಲಗ್ಗೆ
ಬರ್ಮಿಂಗ್ಹ್ಯಾಮ್(ಆ.06): ಕಾಮನ್ವೆಲ್ತ್ ಗೇಮ್ಸ್ನ ಬ್ಯಾಡ್ಮಿಂಟನ್ನಲ್ಲಿ ಭಾರತದ ತಾರಾ ಶಟ್ಲರ್ಗಳಾದ ಪಿ.ವಿ.ಸಿಂಧು ಹಾಗೂ ಕಿದಂಬಿ ಶ್ರೀಕಾಂತ್ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ. ಶುಕ್ರವಾರ ಮಹಿಳಾ ಸಿಂಗಲ್ಸ್ನಲ್ಲಿ ಸಿಂಧು ಉಗಾಂಡದ ಹುಸಿನಾ ಕೊಬುಗಬೆ ವಿರುದ್ಧ 21-10, 21-9 ನೇರ ಗೇಮ್ಗಳಿಂದ ಗೆದ್ದರೆ, ಪುರುಷರ ಸಿಂಗಲ್ಸ್ನಲ್ಲಿ ಶ್ರೀಕಾಂತ್ ಶ್ರೀಲಂಕಾದ ದುಮಿಂಡು ಅಬೇವಿಕ್ರಮ ವಿರುದ್ಧ 21-9, 21-12ರಿಂದ ಜಯಿಸಿದರು. ಮಹಿಳಾ ಡಬಲ್ಸ್ನಲ್ಲಿ ತ್ರೀಸಾ ಜಾಲಿ-ಗಾಯತ್ರಿ ಗೋಪಿಚಂದ್ ಕೂಡಾ ಕ್ವಾರ್ಟರ್ಗೆ ತಲುಪಿದರು. ಇದೇ ವೇಳೆ ಲಕ್ಷ್ಯ ಸೆನ್ ಹಾಗೂ ಪಾರುಪಳ್ಳಿ ಕಶ್ಯಪ್ ಪ್ರಿ ಕ್ವಾರ್ಟರ್ ಫೈನಲ್ಗೆ ಲಗ್ಗೆ ಇಟ್ಟಿದ್ದಾರೆ.
ಬಾಕ್ಸಿಂಗ್: ಭಾರತಕ್ಕೆ 7ನೇ ಪದಕ ಖಚಿತ
ಬರ್ಮಿಂಗ್ಹ್ಯಾಮ್ ಗೇಮ್ಸ್ನಲ್ಲಿ ಭಾರತ ಬಾಕ್ಸಿಂಗ್ನಲ್ಲಿ 7 ಪದಕಗಳನ್ನು ಖಚಿತಪಡಿಸಿಕೊಂಡಿದೆ. ಗುರುವಾರ ರೋಹಿತ್ ಟೋಕಸ್ 67 ಕೆ.ಜಿ. ವಿಭಾಗದ ಸ್ಪರ್ಧೆಯಲ್ಲಿ ನ್ಯೂಯೆ ದೇಶದ ಕ್ಸೇವಿಯರ್ ಮತಾಫ-ಇಕಿನೊಫೆ ವಿರುದ್ಧ 5-0 ಅಂತರದಲ್ಲಿ ಗೆದ್ದು ಸೆಮಿಫೈನಲ್ಗೆ ಲಗ್ಗೆ ಇಟ್ಟರು. ಈಗಾಗಲೇ ಅಮಿತ್ ಪಂಘಾಲ್, ನಿಖಾತ್ ಜರೀನ್ ಸೇರಿದಂತೆ 6 ಬಾಕ್ಸರ್ಗಳು ಸೆಮೀಸ್ಗೆ ಲಗ್ಗೆ ಇಟ್ಟಿದ್ದರು. ಬಾಕ್ಸಿಂಗ್ನಲ್ಲಿ ಸೆಮೀಸ್ನಲ್ಲಿ ಸೋತವರಿಗೂ ಕಂಚಿನ ಪದಕ ಸಿಗಲಿದೆ.
4*400 ಮೀ. ರಿಲೇ: ಭಾರತ ತಂಡ ಫೈನಲ್ಗೆ
ಪುರುಷರ 4*400 ಮೀ. ರಿಲೇಯಲ್ಲಿ ಭಾರತ ತಂಡ ಫೈನಲ್ ಪ್ರವೇಶಿಸಿದೆ. ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ಅನಸ್ ಯಹಿಯಾ, ನಿರ್ಮಲ್, ಮುಹಮ್ಮದ್ ಅಜ್ಮಲ್, ಅಮೊಲ್ ಜಾಕೊಬ್ ಅವರನ್ನೊಳಗೊಂಡ ತಂಡ 3 ನಿಮಿಷ 06.97 ಸೆಕೆಂಡ್ಗಳಲ್ಲಿ ಗುರಿ ತಲುಪಿ, ಹೀಟ್ಸ್ನಲ್ಲಿ 2ನೇ ಹಾಗೂ ಒಟ್ಟಾರೆ 6ನೇ ಸ್ಥಾನಿಯಾಗಿ ಪದಕ ಸುತ್ತಿಗೆ ತಲುಪಿತು.
Commonwealth Games 2022: ಎದುರಾಳಿಯನ್ನು ಫಾಲ್ ಮಾಡಿ ಸೂಪರ್ ಗೆಲುವು ಕಂಡ ಸಾಕ್ಷಿಗೆ ಸ್ವರ್ಣ!
ಟಿಟಿ: ಮನಿಕಾ-ಸತ್ಯನ್, ಶರತ್-ಶ್ರೀಜಾ ಕ್ವಾರ್ಟರ್ಗೆ
ಟೇಬಲ್ ಟೆನಿಸ್ನಲ್ಲಿ ಭಾರತದ ಮನಿಕಾ ಬಾತ್ರಾ-ಜಿ.ಸತ್ಯನ್, ಶರತ್ ಕಮಾಲ್-ಅಕುಲಾ ಶ್ರೀಜಾ, ಸತ್ಯನ್-ಶರತ್ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ. ಮನಿಕಾ ಹಾಗೂ ಶ್ರೀಜಾ ಸಿಂಗಲ್ಸ್ನಲ್ಲೂ ಅಂತಿಮ 8ರ ಘಟ್ಟ ತಲುಪಿದ್ದಾರೆ. ಶುಕ್ರವಾರ ಮಿಶ್ರ ಡಬಲ್ಸ್ ಪ್ರಿ ಕ್ವಾರ್ಟರ್ನಲ್ಲಿ ಮನಿಕಾ-ಸತ್ಯನ್ ಜೋಡಿ ನೈಜೀರಿಯಾದ ಜೋಡಿ ವಿರುದ್ಧ 11-7, 11-6, 11-7 ಅಂತರದಲ್ಲಿ ಜಯಗಳಿಸಿದರೆ, ಶರತ್-ಶ್ರೀಜಾ ಜೋಡಿ ಮಲೇಷ್ಯಾದ ಜೋಡಿ ವಿರುದ್ಧ 5-11, 11-2, 11-6, 11-5 ಅಂತರದಲ್ಲಿ ಗೆದ್ದು ಅಂತಿಮ 8ರ ಘಟ್ಟ ತಲುಪಿತು. ಶರತ್-ಸತ್ಯನ್ ಜೋಡಿ ಪುರುಷರ ಡಬಲ್ಸ್ನಲ್ಲಿ ಬಾಂಗ್ಲಾದೇಶದ ಜೋಡಿಗೆ ಸೋಲುಣಿಸಿತು. ಇನ್ನು, ಮನಿಕಾ ಮಹಿಳಾ ಸಿಂಗಲ್ಸ್ನಲ್ಲಿ ಆಸ್ಪ್ರೇಲಿಯಾದ ಜೀ ಮಿನ್ಯಂಗ್ ವಿರುದ್ಧ ಗೆದ್ದರೆ, ಶ್ರೀಜಾ ವೇಲ್ಸ್ನ ಶಾರ್ಲೊಟ್ ಕ್ಯಾರೆ ವಿರುದ್ಧ ಜಯಗಳಿಸಿದರು.
ಪ್ಯಾರಾ ಟೇಬಲ್ ಟೆನಿಸ್: ಭವಿನಾ ಪಟೇಲ್ ಫೈನಲ್ಗೆ
ಟೋಕಿಯೋ ಪ್ಯಾರಾಲಿಂಪಿಕ್ಸ್ ಬೆಳ್ಳಿ ಪದಕ ವಿಜೇತೆ, ಭಾರತದ ಭವಿನಾ ಪಟೇಲ್ ಕಾಮನ್ವೆಲ್ತ್ ಗೇಮ್ಸ್ನ ಪ್ಯಾರಾ ಟೇಬಲ್ ಟೆನಿಸ್ನಲ್ಲಿ ಫೈನಲ್ ಪ್ರವೇಶಿಸಿದ್ದಾರೆ. ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ಭವಿನಾ ಮಹಿಳಾ ಸಿಂಗಲ್ಸ್ 3-5 ವಿಭಾಗದಲ್ಲಿ ಇಂಗ್ಲೆಂಡ್ನ ಸ್ಯೂ ಬೈಲಿ ವಿರುದ್ಧ 11-6, 11-6, 11-6 ಅಂತರದಲ್ಲಿ ಗೆದ್ದು ಪದಕ ಸುತ್ತಿಗೆ ಲಗ್ಗೆ ಇಟ್ಟರು. ಆದರೆ ಸೋನಲ್ಬೆನ್ ಪಟೇಲ್ ಹಾಗೂ ರಾಜ್ ಅಲಗಾರ್ ಸೆಮಿಫೈನಲ್ನಲ್ಲಿ ಸೋತಿದ್ದು, ಕಂಚಿನ ಪದಕಕ್ಕೆ ಸೆಣಸಲಿದ್ದಾರೆ.
ಕ್ರಿಕೆಟ್ ಮತ್ತು ಕ್ರೀಡಾ ಜಗತ್ತಿನ (Sports News in Kannada) ಕ್ಷಣಕ್ಷಣದ ಕನ್ನಡ ಸುದ್ದಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಐಪಿಎಲ್ ಲೈವ್ ಸೇರಿದಂತೆ ಟೀಂ ಇಂಡಿಯಾದ ಬ್ರೇಕಿಂಗ್ ಸುದ್ದಿ (Cricket News in Kannada), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ ಸಂಪೂರ್ಣ ಮಾಹಿತಿ ನಿಮ್ಮ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗೂ ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.