Man Faced Shield Bug ಉಡುಪಿಯಲ್ಲಿ ಮಾನವ ಮುಖದ ಹಾರುವ ಕೀಟ ಪತ್ತೆ!

ಮನುಷ್ಯ ಮುಖವನ್ನೇ ಹೋಲುವ, ಮರದಿಂದ ಮರಕ್ಕೆ ಹಾರುವ ಅಪರೂಪದ ಕೀಟವೊಂದು ಉಡುಪಿಯಲ್ಲಿ ಪತ್ತೆಯಾಗಿದೆ. ಈ ಕೀಟವನ್ನು ಬೆನ್ನುಳ್ಳ ಕೀಟ ಅಥವಾ ಇಂಗ್ಲಿಷ್ ಭಾಷೆಯಲ್ಲಿ ಮ್ಯಾನ್ ಫೇಸ್ಡ್ ಬಗ್ ಎಂದು ಕರೆಯುತ್ತಾರೆ.

ವರದಿ: ಶಶಿಧರ ಮಾಸ್ತಿಬೈಲು, ಏಷ್ಯಾನೆಟ್ ಸುವರ್ಣ ನ್ಯೂಸ್

ಉಡುಪಿ (ಎ.28): ಪ್ರಕೃತಿ ದಿನಕ್ಕೊಂದು ವಿಸ್ಮಯವನ್ನು ತೋರಿಸುತ್ತದೆ. ನನಗೆ ಯಾರು ಸಾಟಿ ಇಲ್ಲ ಎಂದು ಮಾನವ ಬೀಗುತ್ತಿದ್ದರೆ, ಮಾನವ ಅಹಂಕಾರ ಕ್ಕೆ ಸಡ್ಡು ಹೊಡೆಯುವ ರೀತಿಯಲ್ಲಿ ಚಮಕ್ ಕೊಡುತ್ತದೆ! ಇದೀಗ ಮನುಷ್ಯ ಮುಖವನ್ನೇ ಹೋಲುವ, ಮರದಿಂದ ಮರಕ್ಕೆ ಹಾರುವ ಅಪರೂಪದ ಕೀಟವೊಂದು (insect ) ಉಡುಪಿಯಲ್ಲಿ (Udupi) ಪತ್ತೆಯಾಗಿದೆ.

ಒಮ್ಮೆ ನೋಡಿದರೆ ಮತ್ತೊಮ್ಮೆ ಕಣ್ಣುಜ್ಜಿ ನೋಡಬೇಕು ಅನಿಸುವಂತ ರೂಪ. ಈ ಕೀಟವನ್ನು ಬೆನ್ನುಳ್ಳ ಕೀಟ ಅಥವಾ ಇಂಗ್ಲಿಷ್ ಭಾಷೆಯಲ್ಲಿ ಮ್ಯಾನ್ ಫೇಸ್ಡ್ ಶೀಲ್ಡ್ ಬಗ್ (man-faced shield bug) ಎಂದು ಕರೆಯುತ್ತಾರೆ. ಕಾರ್ಕಳ ಬೈಪಾಸ್ ಬಳಿಯ ತಾಳೆ ತೋಟದಲ್ಲಿ ಈ ಅಪರೂಪದ ಕೀಟ ಕಂಡುಬಂದಿದೆ.

ತಲೆಯ ಮೇಲೊಂದು ಮಕ್ಮಲ್ ಟೋಪಿ, ಕಪ್ಪು ಕಾಡಿಗೆ ಹಚ್ಚಿದಂತಹಾ ಸುಂದರ ಕಣ್ಣುಗಳು, ದೊಡ್ಡ ಮೂಗಿನ ಕೆಳಗೆ ಚಾರ್ಲಿ ಚಾಪ್ಲಿನ್ ಮೀಸೆ. ಒಮ್ಮೆಗೆ ದೂರದಿಂದ ನೋಡಿದರೆ ಹಾರುವ ಮಾನವ ಮುಖದಂತೆ ಕಾಣುತ್ತದೆ.

ಸಿಡುಕ ಮಾನವ ಮುಖದಂತೆ ಕಾಣುವ  ಈ ಕೀಟವು ಭಾರತ ಸಹಿತ ದಕ್ಷಿಣ ಏಷ್ಯಾ ರಾಷ್ಟ್ರಗಳ ಕರಾವಳಿ ಭಾಗದಲ್ಲಿ (Costal area) ಕಂಡುಬರುತ್ತವೆ. ಕೆಂಪು, ಹಳದಿ, ಕಿತ್ತಳೆ, ಕಂದು ಬಣ್ಣದಲ್ಲಿರುವ ಈ ಕೀಟ ಬೆಳಿಗ್ಗೆ ಸುಮಾರು 7 ಗಂಟೆಯಿಂದ ಎಂಟು ಗಂಟೆಯ ಅವಧಿಯಲ್ಲಿ ಸೂರ್ಯನ ಎಳೆಬಿಸಿಲಿನ ಶಾಖವನ್ನು ಹೀರುತ್ತಾ ಗಿಡದಿಂದ ಗಿಡಕ್ಕೆ ಹಾರುತ್ತದೆ. ಮುಂಜಾನೆಯ ಈ ವಿಹಾರದ ವೇಳೆ ಅಪರೂಪದ ಕೀಟ ತೀರಾ ಅಪರೂಪ ಎಂಬಂತೆ ಕಾಣಸಿಗುತ್ತದೆ.

ಫೆಬ್ರವರಿಯಿಂದ ಮೇ ಅವಧಿಯಲ್ಲಿ ಕಂಡುಬರುವ ಈ ಕೀಟವು ಚಿಗುರು, ಕಾಂಡ, ಹಣ್ಣಿನಿಂದ ರಸವನ್ನು ಹೀರುತ್ತದೆ. ತಾಳೆಗರಿಯಲ್ಲಿ ಸ್ವಚ್ಛಂದ ವಿವರಿಸುವ ಮ್ಯಾನ್ ಫೇಸ್ಡ್ ಶೀಲ್ಡ್ ಬಗ್ ನಿರುಪದ್ರವಿ ಜೀವಿ (Harmless creature).

ಗಾತ್ರದಲ್ಲಿ ಗಂಡು (Male) ಚಿಕ್ಕದಾದರೆ ಹೆಣ್ಣು (Female) ಸ್ವಲ್ಪ ದೊಡ್ಡದು. ಈ ಕೀಟಗಳು ಗುಂಪಲ್ಲಿ ಮೊಟ್ಟೆ ಇಡುತ್ತವೆ 25ರಿಂದ 30 ದಿನವಷ್ಟೇ ಇದರ ಆಯುಷ್ಯ. ತಂಪು ಹವಾಮಾನ (Cold weather) ಇದ್ದರೆ ಇವುಗಳ ಜೀವನ ದೀರ್ಘವಾಗಿರುತ್ತದೆ ಎಂದು ತಜ್ಞರು ಹೇಳುತ್ತಾರೆ.

ಕೊಳವೆಯಾಕಾರದಲ್ಲಿ ಇರುವ ಬಾಯಿಯನ್ನು ಮುಚ್ಚಿ ರಸಹೀರುವ ಈ ಕೀಟವನ್ನು ವೈಜ್ಞಾನಿಕವಾಗಿ ಕೆಟ ಕ್ಯಾಂಥನ್ ಇನ್ ಕಾರ್ನೇಟಸ್ (Catacanthus incarnatus) ಎಂದು ಕರೆಯಲಾಗುತ್ತದೆ. ಫೆಂಟಟೋಮಿಡೆ (Pentatomidae) ಜಾತಿಗೆ ಸೇರಿದ್ದು ಮಕ್ಕಳಿಗೆ ಹಾಗೂ ಕೀಟಶಾಸ್ತ್ರರಿಗೆ (Entomology) ಇದರ ಬಗ್ಗೆ ಅಧ್ಯಯನ ಮಾಡುವುದು ಅತ್ಯಂತ ಆಸಕ್ತಿದಾಯಕ ವಿಷಯವಾಗಿದೆ. ಪರಿಸರವನ್ನು ಸೂಕ್ಷ್ಮವಾಗಿ ಅವಲೋಕಿಸುವ ತಾಳ್ಮೆ ಇದ್ದವರಿಗೆ ಈ ಅಪರೂಪದ ಕೀಟದ ದರ್ಶನ ಭಾಗ್ಯ ಸಿಗಬಹುದು.