ಕುಟುಂಬ ಕದನ: ಬಳ್ಳಾರಿ ನಗರ ಕ್ಷೇತ್ರದಲ್ಲಿ ರೆಡ್ಡಿ ಕುಟುಂಬದ ಜಿದ್ದಾ​ಜಿ​ದ್ದಿ?

ಜನಾ​ರ್ದನ ರೆಡ್ಡಿ ಸೋದರ ಸೋಮ​ಶೇ​ಖರ ರೆಡ್ಡಿ ಕ್ಷೇತ್ರದ ಹಾಲಿ ಶಾಸ​ಕ, ಈ ಬಾರಿ ಕ್ಷೇತ್ರ​ದಿಂದ ಜನಾ​ರ್ದನ ರೆಡ್ಡಿ ಪತ್ನಿ ಅರು​ಣಾ ಕಣ​ಕ್ಕಿ​ಳಿ​ವ ಸಾಧ್ಯ​ತೆ. 

ಕೆ.ಎಂ.ಮಂಜುನಾಥ್‌

ಬಳ್ಳಾರಿ(ಫೆ.20): ಕೈ-ಕಮಲ ಪಕ್ಷಗಳ ನಡುವೆ ಸಾಂಪ್ರದಾಯಿಕ ಹೋರಾಟಕ್ಕೆ ಸಾಕ್ಷಿ​ಯಾ​ಗುತ್ತಾ ಬಂದಿದ್ದ ಬಳ್ಳಾರಿ ನಗರ ಕ್ಷೇತ್ರದಲ್ಲಿ ಈ ಬಾರಿ ಗಣಿ ಧಣಿ, ಮಾಜಿ ಸಚಿವ ಜನಾರ್ದನ ರೆಡ್ಡಿ ಅಸ್ವಿತ್ವಕ್ಕೆ ತಂದ ‘ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷ’ದ ಪ್ರವೇಶ ತೀವ್ರ ಕುತೂ​ಹಲ ಮೂಡಿ​ಸಿ​ದೆ.

ಕಾಂಗ್ರೆಸ್‌ನ ಭದ್ರಕೋಟೆ ಎಂದೇ ಬಿಂಬಿತವಾಗಿದ್ದ ಬಳ್ಳಾರಿಯಲ್ಲಿ ಕಮಲ ರಾರಾಜಿಸಲು ಕಾರಣವಾಗಿದ್ದೇ 1999ರಲ್ಲಿ ಸೋನಿಯಾಗಾಂಧಿ ಹಾಗೂ ಸುಷ್ಮಾಸ್ವರಾಜ್‌ ಅವರ ನಡು​ವಿನ ಲೋಕಸಭಾ ಚುನಾವಣಾ ಸ್ಪರ್ಧೆ. 2004ರಲ್ಲಿ ಈಗಿನ ಸಾರಿಗೆ ಸಚಿ​ವ ಬಿ.ಶ್ರೀರಾಮುಲು ಬಿಜೆಪಿಯಿಂದ ಸ್ಪರ್ಧಿಸಿ ಮೊದಲ ಬಾರಿ ಕಮಲ ಅರ​ಳಿ​ಸಿ​ದ​ರೆ, 2008ರಲ್ಲಿ ಬಿಜೆಪಿಯಿಂದ ಸ್ಪರ್ಧಿ​ಸಿದ್ದ ಜನಾ​ರ್ದನ ರೆಡ್ಡಿ ಸೋದ​ರ ಜಿ.ಸೋಮಶೇಖರ ರೆಡ್ಡಿ ಗೆದ್ದಿದ್ದಾ​ರೆ. 2013ರಲ್ಲಿ ಕಾಂಗ್ರೆಸ್‌ನ ಅನಿಲ್‌ಲಾಡ್‌ ಜಯ ಪಡೆದರೆ, 2018ರಲ್ಲಿ ಸೋಮಶೇಖರ ರೆಡ್ಡಿ ಮತ್ತೆ ಜಯ ಗಳಿಸಿದ್ದಾರೆ.

ಕಮಲ ಪಕ್ಕಾ, ಕೈಗೆ ಸಿಗುತ್ತಿಲ್ಲ ಲೆಕ್ಕ: ಬಳ್ಳಾರಿ ನಗರ ವಿಧಾನಸಭಾ ಕ್ಷೇತ್ರಕ್ಕೀಗ ಜಿ.ಸೋಮಶೇಖರ ರೆಡ್ಡಿ ಶಾಸಕ. ಮುಂದಿ​ನ ಚುನಾ​ವ​ಣೆ​ಯಲ್ಲೂ ಬಿಜೆ​ಪಿ​ಯಿಂದ ಅವರೇ ಟಿಕೆಟ್‌ ಆಕಾಂಕ್ಷಿ. ಇನ್ನು ಕಾಂಗ್ರೆಸ್‌ನಲ್ಲಿ ಸ್ಪರ್ಧಾ​ಕಾಂಕ್ಷಿ​ಗಳ ದೊಡ್ಡ​ಪ​ಟ್ಟಿಯೇ ಇದೆ. ಮಾಜಿ ಸಚಿವ ಮುಂಡ್ಲೂರು ದಿವಾಕರಬಾಬು, ಮಾಜಿ ಸಚಿವ ಅಲ್ಲಂ ವೀರಭದ್ರಪ್ಪ, ಭರತ್‌ ರೆಡ್ಡಿ, ಅಲ್ಲಂ ಪ್ರಶಾಂತ್‌ ಮುಂಚೂಣಿಯಲ್ಲಿರುವ ಹೆಸರು. ಇವರಲ್ಲದೆ ಅರ್ಜಿ ಸಲ್ಲಿಸಿದವರು 15ಕ್ಕೂ ಹೆಚ್ಚು ಮಂದಿ ಇದ್ದಾ​ರೆ.
ಸದ್ಯ ಕ್ಷೇತ್ರ​ದಲ್ಲಿ ಜನಾರ್ದನ ರೆಡ್ಡಿ ಅವ​ರ ನೂತನ ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷ ಹೆಚ್ಚು ಸದ್ದು ಮಾಡುತ್ತಿದ್ದು, ರೆಡ್ಡಿ ತಮ್ಮ ಪತ್ನಿ ಲಕ್ಷ್ಮಿ ಅರುಣಾ ಅವರನ್ನೇ ಇಲ್ಲಿಂದ ಕಣ​ಕ್ಕಿ​ಳಿ​ಸುವ ಸುಳಿವು ನೀಡಿ​ದ್ದಾರೆ. ಒಂದು ವೇಳೆ ಅರುಣಾ ರೆಡ್ಡಿ ಕಣ​ಕ್ಕಿ​ಳಿ​ಯು​ವುದು ಖಚಿ​ತ​ವಾ​ದರೆ ರೆಡ್ಡಿ ಕುಟುಂಬದ ನಡು​ವಿನ ಸಮ​ರ​ಕ್ಕೆ ಈ ಕ್ಷೇತ್ರ ವೇದಿಕೆ ಒದ​ಗಿ​ಸ​ಲಿ​ದೆ. ಹೀಗಾಗಿ ಬಳ್ಳಾರಿ ನಗರ ಕ್ಷೇತ್ರ ಇಡೀ ರಾಜ್ಯದ ಗಮನ ಸೆಳೆ​ಯು​ತ್ತಿ​ದೆ.

ಕ್ಷೇತ್ರ​ದಲ್ಲಿ ಕಾಂಗ್ರೆ​ಸ್‌​ನಿಂದ ಟಿಕೆಟ್‌ ಆಕಾಂಕ್ಷಿ​ಯಾ​ಗಿ​ರುವ ಉದ್ಯಮಿ, ಮಾಜಿ ಶಾಸಕ ಸೂರ್ಯನಾರಾಯಣ ರೆಡ್ಡಿ ಪುತ್ರರೂ ಆಗಿ​ರು​ವ ಭರತ್‌ ರೆಡ್ಡಿ ಈಗಾಗಲೇ ಮತದಾರರ ಓಲೈಕೆ ಶುರು ಮಾಡಿದ್ದು, ಸುಮಾರು ಒಂದು ಲಕ್ಷಕ್ಕೂ ಹೆಚ್ಚು ಕುಕ್ಕರ್‌ಗಳನ್ನು ತಾವೇ ಖುದ್ದು ಮನೆಗಳಿಗೆ ತೆರಳಿ ವಿತರಿಸಿ​ದ್ದಾರೆ. ಇನ್ನು ಜನಾರ್ದನ ರೆಡ್ಡಿ ಪತ್ನಿ ಲಕ್ಷ್ಮಿ ಅರುಣಾ ಮಹಿಳಾ ಮತದಾರರನ್ನು ಗುರಿಯಾಗಿಸಿಕೊಂಡು ಮನೆಮನೆಗೆ ಸೀರೆ ವಿತರಿಸಲು ಯೋಜನೆ ರೂಪಿಸಿಕೊಂಡಿದ್ದಾರೆ.

ಜಾತಿವಾರು ಲೆಕ್ಕಾಚಾರ ಜೋರು

ಬಳ್ಳಾರಿ ನಗರ ಕ್ಷೇತ್ರದಲ್ಲಿ ಒಟ್ಟು 2,47,405 ಮತದಾರರಿದ್ದಾರೆ. ಈ ಪೈಕಿ 1,20,421 ಪುರುಷರು ಹಾಗೂ 1,26,984 ಮಹಿಳಾ ಮತದಾರರಿದ್ದಾರೆ. ಜಾತಿವಾರು ಲೆಕ್ಕದಲ್ಲಿ ವೀರಶೈವ ಲಿಂಗಾಯತ 35 ಸಾವಿರ, ಪರಿಶಿಷ್ಟಜಾತಿ 50 ಸಾವಿರ, ಪರಿಶಿಷ್ಟಪಂಗಡ 20,800 ಹಾಗೂ ಮುಸ್ಲಿಂ ಮತದಾರರು 44,500ದ ಆಜು​ಬಾಜು ಇರ​ಬ​ಹು​ದು. ಕಾಂಗ್ರೆಸ್‌ ಪರಿಶಿಷ್ಟಜಾತಿ, ಮುಸ್ಲಿಂ, ಕುರುಬ ಸಮುದಾಯದ ಮತಗಳನ್ನು ನಂಬಿಕೊಂಡಿದೆ. ಬಿಜೆಪಿ ಲಿಂಗಾಯತ, ಬ್ರಾಹ್ಮಣ, ಬಲಿಜ, ಪರಿಶಿಷ್ಟಪಂಗಡ ಹಾಗೂ ಇತರೆ ಹಿಂದುಳಿದ ವರ್ಗಗಳ ಮೇಲೆ ಕಣ್ಣಿ​ಟ್ಟಿದೆ. ಹೊಸ ಪಕ್ಷ ಸ್ಥಾಪಿಸಿ ಪತ್ನಿಯನ್ನು ಅಖಾಡಕ್ಕೆ ಇಳಿಸಲು ಸಜ್ಜಾಗಿರುವ ಜನಾರ್ದನ ರೆಡ್ಡಿ, ಎಸ್ಸಿ-ಎಸ್ಟಿ, ಮುಸ್ಲಿಂ, ಕುರುಬ ಮತ​ಗಳನ್ನು ಬಾಚಿ​ಕೊ​ಳ್ಳುವ ವಿಶ್ವಾಸದಲ್ಲಿದ್ದಾರೆ.

ಕ್ಷೇತ್ರ ಪರಿ​ಚ​ಯ

ಕಳೆದ ಆರೂವರೆ ದಶಕದಲ್ಲಿ ಬಳ್ಳಾರಿ ನಗ​ರ ಕ್ಷೇತ್ರ​ದಲ್ಲಿ ನಡೆದ 14 ಚುನಾವಣೆಗಳಲ್ಲಿ 6 ಬಾರಿ ಕಾಂಗ್ರೆಸ್‌, 3 ಬಾರಿ ಬಿಜೆಪಿ, 2 ಬಾರಿ ಪಕ್ಷೇತರ ಅಭ್ಯರ್ಥಿ ಗೆದ್ದಿದ್ದಾರೆ. ಹಾಲಿ ಸಾರಿಗೆ ಸಚಿವ ಬಿ.ಶ್ರೀ​ರಾ​ಮುಲು ಈ ಕೇತ್ರ​ದಲ್ಲಿ ಕಮಲ ಅರ​ಳಿ​ಸಿದ್ದು, ಸೋಮ​ಶೇ​ಖರ ರೆಡ್ಡಿ ಅವರು ಎರಡು ಬಾರಿ ಗೆದ್ದಿ​ದ್ದಾರೆ. ಹಾಲಿ ಶಾಸ​ಕರೂ ಆಗಿ​ರುವ ಸೋಮ​ಶೇ​ಖರ ರೆಡ್ಡಿ ಈ ಬಾರಿಯೂ ಬಿಜೆಪಿ ಅಭ್ಯ​ರ್ಥಿ​ಯಾ​ಗುವ ನಿರೀಕ್ಷೆ ಇದೆ.