ಕೊರೋನಾ ವೈರಸ್‌ನಿಂದ ಪಾರಾಗಲು ನಮ್ಮ ಬಳಿ ಇದೆ ಉಪಾಯ!

ಜಗತ್ತನ್ನೇ ಕಾಡುತ್ತಿದೆ ಕೊರೋನಾ ವೈರಸ್ ಭೀತಿ/ ಚೀನಾಕ್ಕೆ ತೆರಳುವ ಸ್ಥಿತಿ ಬಂದರೆ ಏನು ಮಾಡ್ತೀರಾ?/ ನಾವು ಒಂದಿಷ್ಟು ಸಲಹೆ ಕೊಡ್ತೇವೆ ಕೇಳಿ/ ಚೀನಾ ಪ್ರವಾಸ ಮುಂದಕ್ಕೆ ಹಾಕುವುದು ಒಳಿತು.

ಬೆಂಗಳೂರು(ಜ. 30) ಚೀನಾದಲ್ಲಿ ಕಾಣಿಸಿಕೊಂಡ ಕೊರೋನಾ ವೈರಸ್ ಜೀವಗಳ ಬಲಿಪಡೆಯುತ್ತ ಮರಣ ಮೃದಂಗ ಬಾರಿಸುತ್ತ ನಡೆಯುತ್ತಿದೆ.  ಕಾರಣ-ಪರಿಹಾರ ಎಲ್ಲ  ಹುಡುಕುವ ಕೆಲಸಗಳು ಒಂದೇ ಸಮನಾಗಿ ನಡೆಯುತ್ತಲೇ ಇವೆ. 

ಕೇರಳದ ವಿದ್ಯಾರ್ಥಿಯೊಬ್ಬರಿಗೂ ಕಾಣಿಸಿಕೊಂಡಿದೆ ಎನ್ನುವುದು ಮತ್ತಷ್ಟು ಆತಂಕ ತಂದಿರುವ ಇಂದಿನ ಸುದ್ದಿ.  ಚೀನಾ ಪ್ರವಾಸ ಮಾಡಲೇಬಾರದು ಈ ಸಂದರ್ಭದಲ್ಲಿ ಎನ್ನುವುದು ಮೊದಲ ಎಚ್ಚರಿಕೆ. ಅದಕ್ಕೂ ಮೀರಿ ಅನಿವಾರ್ಯವಾಗಿ ಚೀನಾಕ್ಕೆ ತೆರಳಲೇಬೇಕಾದ ಸಂದರ್ಭ ಬಂದರೆ ಏನು ಮಾಡಬೇಕು? ನಾವು ಒಂದಿಷ್ಟು ಸಲಹೆ ನೀಡುತ್ತಿದ್ದೇವೆ  ಕೇಳಿಕೊಂಡು ಬನ್ನಿ...

ವೈರಸ್ ಕಾಡಿದರೆ  ಲಕ್ಷಣ:  ಜ್ವರ, ಕಾಡುವ ಕೆಮ್ಮು ಉಸಿರಾಟದ ಸಮಸ್ಯೆ ಈ ವೈರಸ್ ನಿಂದ ಕಾಣಿಸಿಕೊಳ್ಳುವ ಆರಂಭಿಕ ಲಕ್ಷಣ. ಇದೊಂದು ಪ್ರಾಣಿಗಳಿಂದ ಮಾನವರಿಗೆ ಹರಡುವ ಕಾಯಿಲೆ.

ಚೀನಾಗೆ ತೆರಳುತ್ತಿರುವ ಯಾತ್ರಿಕರು ಈ ಕೆಳಗಿನ ಸರಳ ಆರೋಗ್ಯ ಸಲಹೆಗಳನ್ನು ಪಾಲಿಸಿ

* ವೈಯಕ್ತಿಕ ನೈರ್ಮಲ್ಯ ಕಾಪಾಡಿಕೊಳ್ಳಿ
* ಸಾಬೂನು ಬಳಸಿಕೊಂಡು ಕೈಗಳನ್ನು ತೊಳೆಯುತ್ತಿರಿ. 
* ಕೆಮ್ಮುವಾಗ ಹಾಗೂ ಸೀನುವಾಗ ನಿಮ್ಮ ಬಾಯನ್ನು ಮುಚ್ಚಿಕೊಳ್ಳಿ.
* ಅನಾರೋಗ್ಯ ಇದ್ದವರಿಂದ ದೂರವಿರಿ. ಶೀತ, ನೆಗಡಿ ಇರುವವರಿಂದ ಬಲು ದೂರವಿದ್ದರೊಳಿತು.
* ಪ್ರಾಣಿಗಳ ಜೊತೆ ಒಡನಾಟ ಬೇಡ. ಹಸಿ ಮಾಂಸ, ಅರ್ಧ ಬೆಂದ ಮಾಂಸಾಹಾರ ವರ್ಜಿಸಿ. 
* ತೋಟಕ್ಕೆ, ಪ್ರಾಣಿ ಸಂತೆಗೆ, ಮಾಂಸ ಮಾರುವ ಸ್ಥಳಕ್ಕೆ ಹೋಗಲೇ ಬೇಡಿ.
* ಶೀತ, ನೆಗಡಿ, ಕೆಮ್ಮು ಇದ್ದರೆ ಮಾಸ್ಕ್ ಧರಿಸಿಕೊಳ್ಳಿ
* ನೆರವಾಗಲು  (+91-11-23978046)-24*7 ಕೇಂದ್ರ ಆರೋಗ್ಯ ಸಚಿವಾಲಯವನ್ನು ಸಂಪರ್ಕಿಸಿ ಹೆಚ್ಚಿನ ಮಾಹಿತಿ ಪಡೆದುಕೊಳ್ಳಬಹುದು