ಹೆಚ್-1ಬಿ ವೀಸಾ ಎಫೆಕ್ಟ್: 10 ಸಾವಿರ ಅಮೆರಿಕನ್ನರ ನೇಮಕಾತಿಗೆ ಇನ್ಫೋಸಿಸ್ ಚಿಂತನೆ

ಇನ್ಫೋಸಿಸ್ ಸಂಸ್ಥೆ 2016-17ರ ವರ್ಷದಲ್ಲಿ 10.2 ಬಿಲಿಯನ್ ಡಾಲರ್(ಸುಮಾರು 65 ಸಾವಿರ ಕೋಟಿ ರೂ.) ಇದೆ. ಇದರಲ್ಲಿ ಶೇ.60 ಆದಾಯವು ಉತ್ತರ ಅಮೆರಿಕದ ಮಾರುಕಟ್ಟೆಯಿಂದಲೇ ಸಿಗುತ್ತದೆ. ಈ ಹಿನ್ನೆಲೆಯಲ್ಲಿ ತನ್ನ ಸಂಸ್ಥೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಅಮೆರಿಕನ್ನರನ್ನ ನೇಮಿಸಿಕೊಳ್ಳಲು ಇನ್ಫೋಸಿಸ್ ನಿರ್ಧರಿಸಿದೆ ಎನ್ನಲಾಗಿದೆ.

ಸ್ಯಾನ್ ಫ್ರಾನ್ಸಿಸ್ಕೋ(ಮೇ 02): ಹೆಚ್-1ಬಿ ವೀಸಾ ವಿಚಾರದಲ್ಲಿ ಅಮೆರಿಕ ಬಿಗಿ ನಿಲುವು ತೋರುತ್ತಿರುವಂತೆಯೇ ಇನ್ಫೋಸಿಸ್ ಸಂಸ್ಥೆಯಲ್ಲಿ ಭಾರತೀಯರ ಸಂಖ್ಯೆ ಕ್ಷೀಣಿಸುವ ಸಾಧ್ಯತೆ ಇದೆ. ನೇಮಕಾತಿಯಲ್ಲಿ ಬಹುತೇಕ ಭಾರತೀಯರಿಗೆ ಆದ್ಯತೆ ಕೊಡುತ್ತಿದ್ದ ಇನ್ಫೋಸಿಸ್ ಇನ್ಮುಂದೆ ಅಮೆರಿಕನ್ನರಿಗೆ ಮಣೆ ಹಾಕಲು ನಿರ್ಧರಿಸಿದೆ. ಮುಂದಿನ 2 ವರ್ಷಗಳಲ್ಲಿ 10 ಸಾವಿರ ಅಮೆರಿಕನ್ನರನ್ನು ಕೆಲಸಕ್ಕೆ ಸೇರಿಸಿಕೊಳ್ಳಲು ಇನ್ಫೋಸಿಸ್ ಯೋಜಿಸಿದೆ. ಅಷ್ಟೇ ಅಲ್ಲ, ಅಮೆರಿಕದಲ್ಲಿ ನಾಲ್ಕು ಟೆಕ್ನಾಲಜಿ ಅಂಡ್ ಇನೋವೇಶನ್ ಹಬ್'ಗಳನ್ನು ಸ್ಥಾಪಿಸಲು ಉದ್ದೇಶಿಸಿದೆ. ಆ ಮೂಲಕ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್, ಮಷಿನ್ ಲರ್ನಿಂಗ್ ಇತ್ಯಾದಿ ಹೊಸ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ತನ್ನ ಬಲ ವೃದ್ಧಿಸಿಕೊಳ್ಳುವ ಗುರಿ ಇನ್ಫೋಸಿಸ್'ನದ್ದು.

ಇಂಥ ಮೊದಲ ಕೇಂದ್ರವನ್ನು ಇದೇ ಆಗಸ್ಟ್'ನಲ್ಲಿ ಇಂಡಿಯಾನಾ ರಾಜ್ಯದಲ್ಲಿ ಸ್ಥಾಪಿಸಲಿದೆ. ಇಲ್ಲಿ 2021ರಷ್ಟರಲ್ಲಿ 2 ಸಾವಿರ ಅಮೆರಿಕನ್ನರನ್ನು ನೇಮಕ ಮಾಡಿಕೊಳ್ಳುವ ಗುರಿ ಇದೆ. ಇತರ ಮೂರು ಕೇಂದ್ರಗಳು ಎಲ್ಲೆಲ್ಲಿ ಸ್ಥಾಪಿಸಲಾಗುವುದು ಎಂಬುದು ಇನ್ನೂ ನಿರ್ಧಾರವಾಗಬೇಕಿದೆ.

ಇನ್ಫೋಸಿಸ್ ಸಂಸ್ಥೆ 2016-17ರ ವರ್ಷದಲ್ಲಿ 10.2 ಬಿಲಿಯನ್ ಡಾಲರ್(ಸುಮಾರು 65 ಸಾವಿರ ಕೋಟಿ ರೂ.) ಇದೆ. ಇದರಲ್ಲಿ ಶೇ.60 ಆದಾಯವು ಉತ್ತರ ಅಮೆರಿಕದ ಮಾರುಕಟ್ಟೆಯಿಂದಲೇ ಸಿಗುತ್ತದೆ. ಈ ಹಿನ್ನೆಲೆಯಲ್ಲಿ ತನ್ನ ಸಂಸ್ಥೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಅಮೆರಿಕನ್ನರನ್ನ ನೇಮಿಸಿಕೊಳ್ಳಲು ಇನ್ಫೋಸಿಸ್ ನಿರ್ಧರಿಸಿದೆ ಎನ್ನಲಾಗಿದೆ.

ಏನಿದು ಹೆಚ್-1ಬಿ ವೀಸಾ?
ಅಮೆರಿಕಕ್ಕೆ ಹೋಗಲು ಅನುಮತಿ ಸಿಗುವ ಒಂದು ಬಗೆಯ ವರ್ಕ್ ವೀಸಾ. ಅಂದರೆ ಕೆಲಸದ ಮೇಲೆ ಅಮೆರಿಕಕ್ಕೆ ಹೋಗುವ ಅವಕಾಶ ಈ ವೀಸಾದಿಂದ ಸಿಗುತ್ತದೆ. ಆದರೆ, ಹೆಚ್-1ಬಿ ವೀಸಾವನ್ನು ಇನ್ಫೋಸಿಸ್, ಟಿಸಿಎಸ್ ಸೇರಿದಂತೆ ಕೆಲವು ಭಾರತೀಯ ಕಂಪನಿಗಳು ದುರುಪಯೋಗಪಡಿಸಿಕೊಳ್ಳುತ್ತಿವೆ. ಅಮೆರಿಕನ್ನರಿಗೆ ಸಿಗಬೇಕಾದ ಕೆಲಸಗಳು ಬೇರೆಯವರ ಪಾಲಾಗುತ್ತಿದೆ. ಇದು ಆಗಕೂಡದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕಟ್ಟಪ್ಪಣೆ ಹೊರಡಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಹೆಚ್-1ಬಿ ವೀಸಾದ ಗೊಡವೆಯೇ ಬೇಡವೆಂದು ಇನ್ಫೋಸಿಸ್, ಅಮೆರಿಕದಲ್ಲಿರುವ ತನ್ನ ಘಟಕಗಳಲ್ಲಿ ಸ್ಥಳೀಯರನ್ನೇ ನೇಮಿಸಿಕೊಳ್ಳಲು ನಿರ್ಧರಿಸಿರುವ ಸಾಧ್ಯತೆ ಇದೆ.