ಪರ್ಯಾಯ ಸೇನಾಪಡೆ ಕಟ್ಟಿದ ಉಗ್ರ ಹಫೀಜ್!

ಸಯೀದ್‌ಗೆ ದಿನದ 24 ತಾಸೂ ಶಸ್ತ್ರಧಾರಿಗಳ ಭದ್ರತೆ ಈ ಸೇನೆ ದಿನದ 24 ಗಂಟೆಯೂ ಉಗ್ರ ಹಫೀಜ್‌ಗೆ ಪೂರ್ಣ ಪ್ರಮಾಣದಲ್ಲಿ ಭದ್ರತೆ ನೀಡಲಿದೆ.

ಇಸ್ಲಾಮಾಬಾದ್: ಮುಂಬೈ ಸರಣಿ ದಾಳಿಯ ಸಂಚುಕೋರ, ಜಮಾತ್-ಉದ್-ದಾವಾ ಮುಖ್ಯಸ್ಥ ಹಫೀಜ್ ಸಯೀದ್ ಪಾಕಿಸ್ತಾನದಲ್ಲಿ ಪರ್ಯಾಯ ಸೈನ್ಯ ಕಟ್ಟಿರುವ ಆತಂಕಕಾರಿ ವಿಷಯ ಬೆಳಕಿಗೆ ಬಂದಿದೆ.

ಹಫೀಜ್‌ನ ಈ ಸೇನೆಗೆ ಸೇರಿ, ತರಬೇತಿ ಪೂರ್ಣಗೊಂಡವರಿಗೆ ಇತ್ತೀಚೆಗೆ ಗುಜ್ರನ್‌ವಾಲಾದಲ್ಲಿ ಕಾರ್ಯಕ್ರಮವೊಂದನ್ನು ಆಯೋಜಿಸಲಾಗಿತ್ತು. ಅದರಲ್ಲಿ ಸ್ವತಃ ಉಗ್ರ ಹಫೀಜ್ ಸಯೀದ್ ಭಾಗಿಯಾಗಿದ್ದ ಎನ್ನಲಾಗಿದೆ.

ಈ ಸೇನೆಯನ್ನು ಉಗ್ರ ಹಫೀಜ್ ಸಯೀದ್‌ನ ರಕ್ಷಣೆಗಾಗಿ ರಚಿಸಲಾಗಿದ್ದು, ತರಬೇತಿಯ ಕಡೆಯ ದಿನ ಸೇನೆಗೆ ನಿಯೋಜನೆಗೊಂಡವರೆಲ್ಲಾ ತಮ್ಮ ನಾಯಕನ್ನು ಪ್ರಾಣ ಒತ್ತೆ ಇಟ್ಟಾದರೂ ರಕ್ಷಿಸುವ ಪ್ರತಿಜ್ಞೆ ಸ್ವೀಕರಿಸಿದ್ದಾರೆ

ಈ ಸೇನೆ ದಿನದ 24 ಗಂಟೆಯೂ ಉಗ್ರ ಹಫೀಜ್‌ಗೆ ಪೂರ್ಣ ಪ್ರಮಾಣದಲ್ಲಿ ಭದ್ರತೆ ನೀಡಲಿದೆ. ಸೇನಾ ಸಿಬ್ಬಂದಿಗೆ ಶಸ್ತ್ರಾಸ್ತ್ರಗಳನ್ನು ಒದಗಿಸಲಾಗಿದ್ದು, ಹಫೀಜ್ ಪಾಕಿಸ್ತಾನದಲ್ಲಿ ಎಲ್ಲೆಲ್ಲಿ ಸಂಚರಿಸುತ್ತಾನೋ ಆ ಎಲ್ಲಾ ಪ್ರದೇಶಗಳಿಗೆ ಈ ಸೇನೆ ತೆರಳಿ ಭದ್ರತೆಯ ಉಸ್ತುವಾರಿ ವಹಿಸಿಕೊಳ್ಳಲಿದೆ.

ಹಾಗೆಂದು ಪಾಕ್‌ನಲ್ಲಿ ಉಗ್ರರು ತಮ್ಮದೇ ಪ್ರತ್ಯೇಕ ಸೇನೆ ರಚಿಸುವುದು ಇದೇ ಮೊದಲಲ್ಲ. ಜೈಷ್ ಎ ಮೊಹಮ್ಮದ್, ಹಿಜ್ಬುಲ್ ಮುಜಾಹಿದೀನ್, ಹುಜಿ ಸೇರಿದಂತೆ 10ಕ್ಕೂ ಹೆಚ್ಚು ಉಗ್ರ ಸಂಘಟನೆಗಳು ತಮ್ಮ ನಾಯಕರ ರಕ್ಷಣೆಗಾಗಿ ಹೀಗೆ ಸೇನೆ ರಚಿಸಿಕೊಂಡಿವೆ.

ಈ ಎಲ್ಲಾ ಸೇನೆಗಳು ಯುನೈಟೆಡ್ ಜಿಹಾದಿ ಕೌನ್ಸಿಲ್ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿವೆ. ಭಾರತ ವಿರೋಧಿ ಉಗ್ರ ಬಣಗಳನ್ನು ಒಗ್ಗೂಡಿಸುವ ಸಲುವಾಗಿ ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಈ ಕೌನ್ಸಿಲ್ ಅನ್ನು ರಚಿಸಿದೆ ಎನ್ನಲಾಗಿದೆ.