ಪುಲ್ವಾಮಾ ದಾಳಿಯ 1 ನಿಮಿಷ ಮೊದಲು ಪತ್ನಿಗೆ ವಿಡಿಯೋ ಕಳುಹಿಸಿದ್ದ ಯೋಧ

ಜಮ್ಮು ಕಾಶ್ಮೀರದ ಪುಲ್ವಾಮಾದಲ್ಲಿ ಭೀಕರ ಉಗ್ರ ದಾಳಿ ನಡೆದಿದ್ದು ಈ ವೇಳೆ 44 ಯೋಧರು ಹುತಾತ್ಮರಾದರು. ಇದರಲ್ಲಿ ಓರ್ವರಾದ ಸುಕ್ ಜಿಂದರ್ ಸಿಂಗ್ ದಾಳಿಯಾಗುವ ಒಂದು ನಿಮಿಷಕ್ಕೂ ಮೊದಲು ತಮ್ಮ ಪತ್ನಿಗೆ ವಿಡಿಯೋ ಕಳುಹಿಸಿದ್ದ ವಿಚಾರ ಇದೀಗ ಬಹಿರಂಗವಾಗಿದೆ. 

ನವದೆಹಲಿ : ಜಮ್ಮು  ಕಾಶ್ಮೀರದ ಪುಲ್ವಾಮಾದಲ್ಲಿ ಫೆ.14 ರಂದು ಉಗ್ರರ ದಾಳಿ ನಡೆದಿದ್ದು, ಅಂದು 44 ಭಾರತೀಯ ಯೋಧರು ಹುತಾತ್ಮರಾಗಿದ್ದರು. ಜೈಶ್ ಎ ಮೊಹಮ್ಮದ್ ಉಗ್ರ ಸಂಘಟನೆ ಉಗ್ರ ಸ್ಫೋಟಕ ತುಂಬಿದ್ದ ಕಾರನ್ನು ಯೋಧರು ತೆರಳುತ್ತಿದ್ದ ಬಸ್ ಗೆ ಡಿಕ್ಕಿಯಾಗಿಸಿ ಈ ದುರಂತ ಸಂಭವಿಸಿತ್ತು. 

ಈ ಘಟನೆಗೂ ಒಂದು ನಿಮಿಷ ಮೊದಲು CRPF ಯೋಧ ಸುಕ್ ಜಿಂದರ್ ಸಿಂಗ್ ಅವರ ಪತ್ನಿಗೆ ವಿಡಿಯೋ ಒಂದನ್ನು ಕಳುಹಿಸಿದ್ದರು. 

CRPF ಯೋಧರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ತೆರಳುತ್ತಿದ್ದ ವೇಳೆ ವಿಡಿಯೋ ಮಾಡಿ ತಮ್ಮ ಪತ್ನಿಗೆ ಕಳುಹಿಸಿದ್ದರು.  ಆದರೆ ಸಿಂಗ್ ಅವರು ಈ ವಿಡಿಯೋ ಕಳುಹಿಸಿದ ದಿನ ಅದನ್ನು ನೋಡಿರಲಿಲ್ಲ. ಆದರೆ ದಾಳಿ ನಡೆದ ಮರುದಿನ ಅವರ ಪತ್ನಿ ಈ ವಿಡಿಯೋ ವೀಕ್ಷಿಸಿದ್ದರು. 

ಸಿಂಗ್ ಅವರಿಂದ ಬಂದ ಕೊನೆಯ ವಿಡಿಯೋ ಇದಾಗಿದ್ದು, ಈ ದಾಳಿಯ ಬಳಿಕ ಮಾಧ್ಯಮಗಳೊಂದಿಗೆ ಅವರ ಪತ್ನಿ ವಿಡಿಯೋ ಹಂಚಿಕೊಂಡಿದ್ದಾರೆ. ಈ ವಿಡಿಯೋದಲ್ಲಿ ಸಂಪೂರ್ಣ ಮಂಜುಕವಿದ ಹೆದ್ದಾರಿ ಹಾಗೂ ತಮ್ಮ ಮುಖವನ್ನು ಚಿತ್ರಿಸಿ  ಕಳುಹಿಸಿದ್ದಾರೆ. 

ತಮ್ಮ 19ನೇ ವಯಸ್ಸಿನಲ್ಲೇ 2003ರಲ್ಲಿ ಸೇನಾಪಡೆಗೆ ಸೇರಿದ್ದ  ಸಿಂಗ್ ಇದೀಗ ಹೆಡ್ ಕಾನ್ಸ್ ಟೇಬಲ್ ಆಗಿ ಬಡ್ತಿ ಹೊಂದಿದ್ದರು.  

ಕಳೆದ 2 ದಶಕಗಳಲ್ಲೇ ಸೇನಾ ಪಡೆಯ ಮೇಲೆ ನಡೆದ ಅತ್ಯಂತ ಭಯಾನಕ ದಾಳಿಯಲ್ಲಿ ಸಿಂಗ್ ಹುತಾತ್ಮರಾಗಿದ್ದು, 7 ತಿಂಗಳ ಪುಟ್ಟ ಮಗು, ತಂದೆ ತಾಯಿ ಹಾಗೂ ಪತ್ನಿಯನ್ನು ಅಗಲಿದ್ದಾರೆ.