ರನ್ ವೇ ಮೇಲಿಂದ ನದಿಗುರುಳಿದ 136 ಪ್ರಯಾಣಿಕರಿದ್ದ ವಿಮಾನ

ನೋಡ ನೋಡುತ್ತಿದ್ದಂತೆಯೇ ರನ್ ವೇ ಮೇಲಿನಿಂದ ನದಿಗುರುಳಿದ ವಿಮಾನ| 143 ಪ್ರಯಾಣಿಕರು ಸೇಫ್| ಮುಂದುವರೆದ ರಕ್ಷಣಾ ಕಾರ್ಯ

ವಾಷಿಂಗ್ಟನ್[ಮೇ.04]: ಅಮೆರಿಕಾದ ಫ್ಲೋರಿಡಾದಲ್ಲಿ 136 ಮಂದಿ ಪ್ರಯಾಣಿಕರನ್ನು ಹೊತ್ತೊಯ್ಯುತ್ತಿದ್ದ ಬೋಯಿಂಗ್ 737 ವಿಮಾನವೊಂದು ಆಯ ತಪ್ಪಿ ಸೇಂಟ್ ಜಾನ್ ನದಿಗೆ ಬಿದ್ದಿದೆ. ನೌಕಾ ಸೇನೆಯ ವಕ್ತಾರರು ಈ ಮಾಹಿತಿಯನ್ನು ಖಚಿತಪಡಿಸಿದ್ದಾರೆ. ಅದೃಷ್ಟವಶಾತ್ ಈ ದುರ್ಘಟನೆಯಲ್ಲಿ ಯವುದೇ ಸಾವು ನೋವು ಸಂಭವಿಸಿಲ್ಲ.

ಲಭ್ಯವಾದ ಮಾಹಿತಿ ಅನ್ವಯ ಈ ಘಟನೆ ರಾತ್ರಿ 09.40ಕ್ಕೆ ನಡೆದಿದ್ದು, ರನ್ ವೇ ಮೇಲೆ ಇಳಿಯಲು ಯತ್ನಿಸುತ್ತಿದ್ದ ವಿಮಾನ ಇದ್ದಕ್ಕಿದ್ದಂತೆ ನಿಯಂತ್ರಣ ತಪ್ಪಿ ನದಿಗುರುಳಿದೆ. ಜ್ಯಾಕ್ಸ್ ನವಿಲೆ ಮೇಯರ್ ಈ ಕುರಿತಾಗಿ ಟ್ವೀಟ್ ಮಾಡುತ್ತಾ 'ವಿಮಾನದಲ್ಲಿದ್ದ ಎಲ್ಲಾ ಪ್ರಯಾಣಿಕೆರೂ ಸುರಕ್ಷಿತವಾಗಿದ್ದಾರೆ. ಸಿಬ್ಬಂದಿಗಳು ನೀರಿನಲ್ಲಿರುವ ವಿಮಾನವನ್ನು ನಿಯಂತ್ರಿಸಿ ಮೇಲೆ ತರುವ ಎಲ್ಲಾ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ' ಎಂದಿದ್ದಾರೆ.

ನದಿಗುರುಳಿದ ಈ ವಿಮಾನದಲ್ಲಿ ಮಿಯಾಮಿ ಏರ್ ಇಂಟರ್ ನ್ಯಾಷನಲ್ ಲೋಗೋ ಇತ್ತು ಎನ್ನಲಾಗಿದೆ. ಹೀಗಿದ್ದರೂ ಈ ಘಟನೆ ಕುರಿತಾಗಿ ವಿಮಾನ ಸಂಸ್ಥೆ ಈವರೆಗೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.