ಅಡುಗೆ ಮನೆಯಲ್ಲಿ ಬಿದ್ದಿದ್ದ ಪೇಂಟಿಂಗ್'ಗೆ ಸಿಕ್ತು ಕೋಟಿ ಕೋಟಿ ದುಡ್ಡು!

ಕೋಟಿ ಕೋಟಿ ಹಣ ತಂದು ಕೊಟ್ಟ ಅಡುಗೆ ಮನೆ ಗೋಡೆ ಮೇಲೆ ನೇತು ಹಾಕಿದ್ದ ಪೇಂಟಿಂಗ್| ಕೇವಲ ಒಂದು ಪೇಂಟಿಂಗ್'ನಿಂದ ಕೋಟ್ಯಧಿಪತಿಯಾದ ವೃದ್ಧ ಮಹಿಳೆ| ಫ್ರಾನ್ಸ್‌ನ ಕಂಪಿಗ್ನೇ ಎಂಬ ಪಟ್ಟಣದಲ್ಲಿರುವ ವೃದ್ಧೆಯ ಮನೆಯಲ್ಲಿ ಅಪರೂಪದ ಪೇಂಟಿಂಗ್| 13 ನೇ ಶತಮಾನದ ಇಟಲಿಯ ಖ್ಯಾತ ಚಿತ್ರಕಾರ ಸಿಮಾಬ್ಯೂ ರಚಿಸಿದ್ದ ಅಪರೂಪದ ಪೇಂಟಿಂಗ್| ಪೇಂಟಿಂಗ್ ಹರಾಜು ಹಾಕಿದ ಆಕ್ಟಿಯಾನ್ ಹರಾಜು ಸಂಸ್ಥೆ| 24 ಮಿಲಿಯನ್ ಯೂರೋ (188 ಕೋಟಿ ರೂ.)ಗೆ ಹರಾಜಾದ ಅಪರೂಪದ ಪೇಂಟಿಂಗ್|

ಪ್ಯಾರಿಸ್(ಅ.30): ಕಲೆ ಮನುಷ್ಯನ ಜೀವನದ ಅವಿಭಾಜ್ಯ ಅಂಗ. ಕಲೆ ವ್ಯಾಪಾರಕ್ಕಿಂತಲೂ ಹೆಚ್ಚಾಗಿ ಮನಸ್ಸಿನ ನೆಮ್ಮದಿಗಾಗಿ, ಮನುಷ್ಯನ ಅಭಿರುಚಿಯ ಫಲವಾಗಿ ಮೂಡಿ ಬರುತ್ತದೆ. ಆದರೆ ಕೆಲವೊಮ್ಮೆ ಇದೇ ಕಲೆ ಮನುಷ್ಯನ ವಿಧಿ ಬದಲಾಯಿಸುವ ಸಾಧನವಾಗಿಯೂ ಮಾರ್ಪಡುತ್ತದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿ.

ಉತ್ತರ ಫ್ರಾನ್ಸ್ ಮನೆಯೊಂದರ ಅಡುಗೆ ಮನೆಯಲ್ಲಿ ನೇತು ಹಾಕಿದ್ದ ಸಣ್ಣ ಪೇಂಟಿಂಗ್'ವೊಂದು ಇದೀಗ ಮನೆಯೊಡತಿಯ ಭಾಗ್ಯದ ಬಾಗಿಲು ತೆರೆಯವಂತೆ ಮಾಡಿದೆ. ಆ ಒಂದು ಸಣ್ಣ ಪೇಂಟಿಂಗ್ ಈಗ ಮನೆಯೊಡತಿಯನ್ನು ಕೋಟ್ಯಧಿಪತಿಯನ್ನಾಗಿ ಮಾಡಿದೆ.

ಆಕ್ಟಿಯಾನ್ ಹರಾಜು ಸಂಸ್ಥೆಯ ಡೊಮಿನಿಕ್ ಲೆ ಕೋಂಟ್ ಕಳೆದ ಜೂನ್‌ನಲ್ಲಿ ಉತ್ತರ ಫ್ರಾನ್ಸ್‌ನ ಕಂಪಿಗ್ನೇ ಎಂಬ ಪಟ್ಟಣದಲ್ಲಿರುವ ವೃದ್ಧೆಯ ಮನೆಯಲ್ಲಿ ಅಮೂಲ್ಯ ಪೇಂಟಿಂಗ್ ಇರುವುದನ್ನು ಗುರುತಿಸಿದ್ದರು. ಈ ಪೇಂಟಿಂಗ್ 13 ನೇ ಶತಮಾನದ ಇಟಲಿಯ ಖ್ಯಾತ ಚಿತ್ರಕಾರ ಸಿಮಾಬ್ಯೂ ರಚಿಸಿದ್ದೆಂದು ಡೊಮೆನಿಕ್ ವಾದ.

ಈ ಕಲಾಕೃತಿ ಮಹಿಳೆ ಬಳಿ ಹೇಗೆ ಬಂದಿತು ಎಂಬುದು ತಿಳಿದಿಲ್ಲವಾದರೂ, ಹಿರಿಯರಿಂದ ಬಳುವಳಿಯಾಗಿ ಬಂದ ಅಮೂಲ್ಯ ವಸ್ತು ಎಂಬುದು ಖಾತ್ರಿಯಾಗಿದೆ. ನವೋದಯ ಚಿತ್ರಕಲೆಯ ಪ್ರಾರಂಭದ ಕಾಲದ ಕಲಾಕೃತಿ ಇದಾಗಿದ್ದು, 10×8 ಇಂಚು ಅಳತೆ ಹೊಂದಿದೆ.

ಈ ಕಲಾಕೃತಿಯನ್ನು ಸಿಮಾಬ್ಯೂ ಸುಮಾರು ಕ್ರಿ.ಶ 1280ರಲ್ಲಿ ಚಿತ್ರಿಸಿದ್ದು, ಈ ಪೇಂಟಿಂಗ್'ನ್ನು 24 ಮಿಲಿಯನ್ ಯೂರೋ (2.66 ಕೋಟಿ ರೂ.) ನೀಡಿ ಕಲಾಪ್ರೇಮಿಯೊಬ್ಬರು ಖರೀದಿಸಿದ್ದಾರೆ. ಈ ಮೊತ್ತದ ದೊಡ್ಡ ಪಾಲು ವೃದ್ಧ ಮಹಿಳೆಗೆ ಸೇರಲಿದೆ ಎಂದು ಲೆ ಕೋಂಟ್ ಸ್ಪಷ್ಟಪಡಿಸಿದ್ದಾರೆ.