43 ದಿನಗಳಲ್ಲಿ 60 ಮಿಸ್ಟೇಕ್ಸ್: ವಿಶ್ವಾಸ ಉಳಿಸಿಕೊಳ್ಳಲು ಸೋತ ಆರ್'ಬಿಐ

ಹಳೆ ನೋಟು ನಿಷೇಧ ಮಾಡುವ ಮೂಲಕ, ಪ್ರಧಾನಿ ಮೋದಿ ಒಂದು ದಿಟ್ಟ ಹೆಜ್ಜೆಯಿಟ್ಟರೆ, ಪ್ರಾಮಾಣಿಕತೆಗೆ ಹೆಸರಾಗಿದ್ದ ಆರ್'​ಬಿಐ ಒಂದು ಮಹಾಯುದ್ಧದಲ್ಲಿ ಸೋತು ಹೋಯಿತು. ಈವರೆಗೆ ದೇಶದ ಯಾರೊಬ್ಬರೂ ಆರ್'​ಬಿಐನ ಕಾರ್ಯದಕ್ಷತೆಯನ್ನು ಪ್ರಶ್ನಿಸಿರಲಿಲ್ಲ. ಆದರೆ, ಇದೇ ಮೊದಲ ಬಾರಿಗೆ ಜನ ಆರ್​'ಬಿಐ ಕಾರ್ಯದಕ್ಷತೆಯನ್ನ ಪ್ರಶ್ನೆ ಮಾಡುತ್ತಿದ್ದಾರೆ. ಆರ್​ಬಿಐನ ಈ ಒಂದು ಸೋಲು, ದೇಶದ ಜನರನ್ನೂ ಸೋಲಿಸಿದ್ದು ಸುಳ್ಳಲ್ಲ. ಒಂದೊಂದು ಹೆಜ್ಜೆಯಲ್ಲೂ ಆರ್​ಬಿಐ ಇಡುತ್ತಾ ಹೋದ ಎಡವಟ್ಟಿನ ಹೆಜ್ಜೆಗಳು, ಕಾಳಧನಿಕರನ್ನು ಗೆಲ್ಲಿಸುತ್ತಾ ಹೋದವು. ಇಷ್ಟಕ್ಕೂ ಈ ನೆಟ್​ವರ್ಕ್​  ಹೇಗೆ ಕೆಲಸ ಮಾಡಿತು? ಇಲ್ಲಿದೆ ವಿವರ

ನವದೆಹಲಿ(ಡಿ.22): ಹಳೆ ನೋಟು ನಿಷೇಧ ಮಾಡುವ ಮೂಲಕ, ಪ್ರಧಾನಿ ಮೋದಿ ಒಂದು ದಿಟ್ಟ ಹೆಜ್ಜೆಯಿಟ್ಟರೆ, ಪ್ರಾಮಾಣಿಕತೆಗೆ ಹೆಸರಾಗಿದ್ದ ಆರ್'​ಬಿಐ ಒಂದು ಮಹಾಯುದ್ಧದಲ್ಲಿ ಸೋತು ಹೋಯಿತು. ಈವರೆಗೆ ದೇಶದ ಯಾರೊಬ್ಬರೂ ಆರ್'​ಬಿಐನ ಕಾರ್ಯದಕ್ಷತೆಯನ್ನು ಪ್ರಶ್ನಿಸಿರಲಿಲ್ಲ. ಆದರೆ, ಇದೇ ಮೊದಲ ಬಾರಿಗೆ ಜನ ಆರ್​'ಬಿಐ ಕಾರ್ಯದಕ್ಷತೆಯನ್ನ ಪ್ರಶ್ನೆ ಮಾಡುತ್ತಿದ್ದಾರೆ. ಆರ್​ಬಿಐನ ಈ ಒಂದು ಸೋಲು, ದೇಶದ ಜನರನ್ನೂ ಸೋಲಿಸಿದ್ದು ಸುಳ್ಳಲ್ಲ. ಒಂದೊಂದು ಹೆಜ್ಜೆಯಲ್ಲೂ ಆರ್​ಬಿಐ ಇಡುತ್ತಾ ಹೋದ ಎಡವಟ್ಟಿನ ಹೆಜ್ಜೆಗಳು, ಕಾಳಧನಿಕರನ್ನು ಗೆಲ್ಲಿಸುತ್ತಾ ಹೋದವು. ಇಷ್ಟಕ್ಕೂ ಈ ನೆಟ್​ವರ್ಕ್​  ಹೇಗೆ ಕೆಲಸ ಮಾಡಿತು? ಇಲ್ಲಿದೆ ವಿವರ

ಆರ್'​ಬಿಐನಲ್ಲಿ ಒಂದು ನೆಟ್​ವರ್ಕ್ ಇರುತ್ತದೆ. ಅದರಲ್ಲೂ ನಗದು ಹಣ ರವಾನೆಗೆ, ಹಲವಾರು ಹೆಜ್ಜೆಗಳಿವೆ. ಆರ್'​ಬಿಐನ ಮುದ್ರಣಾಲಯದಿಂದ ಹಿಡಿದು, ಗ್ರಾಹಕರನ್ನು ತಲುಪುವವರೆಗೆ ಅದು ಹಲವು ಹಂತಗಳನ್ನ ದಾಟಿ ಬರಬೇಕು.

ಮೊದಲು ನೋಟುಗಳು ಮೊದಲು ಬರುವುದು ಆರ್​ಬಿಐ ಕೇಂದ್ರ ಮತ್ತು ಪ್ರಾದೇಶಿಕ ಕಚೇರಿಗಳಿಗೆ. ಯಾವ ಯಾವ ಪ್ರಾದೇಶಿಕ ಕಚೇರಿಗಳಿಗೆ ಎಷ್ಟೆಷ್ಟು ಎನ್ನುವುದನ್ನು ಕೇಂದ್ರದ ಆರ್​ಬಿಐ ನಿರ್ಧರಿಸುತ್ತದೆ. ಅಲ್ಲಿಂದ ಪ್ರಾದೇಶಿಕ ಕಚೇರಿಗಳ ಹಣ ರವಾನೆ ಕೇಂದ್ರಕ್ಕೆ ಹೋಗುತ್ತದೆ. ಪ್ರತಿ ಜಿಲ್ಲೆಗಳಲ್ಲೂ ಆರ್​ಬಿಐನ ಒಂದು ಕಚೇರಿ ಕೆಲಸ ಮಾಡುತ್ತದೆ. ಆರ್​ಬಿಐ ಕಚೇರಿ ಇಲ್ಲದ ಕಡೆಗಳಲ್ಲಿ ಆ ಜಿಲ್ಲೆಯ ಪ್ರಮುಖ ಬ್ಯಾಂಕ್, ಆರ್​ಬಿಐನ ಕಚೇರಿಯಂತೆ ಕೆಲಸ ಮಾಡುತ್ತದೆ. ಯಾವ್ಯಾವ ಬ್ಯಾಂಕುಗಳಿಗೆ ಎಷ್ಟೆಷ್ಟು ಹಣ ಹೋಗಬೇಕು ಎನ್ನುವುದನ್ನು ಈ ಕೇಂದ್ರ ನಿರ್ಧರಿಸುತ್ತದೆ. ಅಲ್ಲಿಂದ ಈ ಹಣ ತಲುಪುವುದು ಬ್ಯಾಂಕ್ ಕೇಂದ್ರ ಕಚೇರಿಗಳಿಗೆ. ಬ್ಯಾಂಕ್ ಕೇಂದ್ರ ಕಚೇರಿಗಳು ತಮ್ಮ ತಮ್ಮ ಬ್ಯಾಂಕುಗಳ ಯಾವ್ಯಾವ ಶಾಖೆಗೆ ಎಷ್ಟು ಹಣ, ಯಾವ ಎಟಿಎಂಗೆ ಎಷ್ಟು ಹಣ ಹೋಗಬೇಕು ಎನ್ನುವುದನ್ನು ನಿರ್ಧರಿಸುತ್ತವೆ.

ಅಲ್ಲಿಂದ ಈ ಹಣ ವಿಂಗಡಣೆಯಾಗಿ, ಎಟಿಎಂ ಏಜೆನ್ಸಿಗಳಿಗೆ ಮತ್ತು ಬ್ಯಾಂಕ್ ಶಾಖೆಗಳಿಗೆ ವಿತರಣೆಯಾಗುತ್ತದೆ. ಎಟಿಎಂ ಕೇಂದ್ರಗಳಿಗೆ ಮತ್ತು ಶಾಖೆಗಳಿಗೆ ಏಜೆನ್ಸಿಗಳು ಹಣ ಪೂರೈಸುತ್ತವೆ. ಆದರೆ, ಇಲ್ಲಿಯೇ ಕಾಳಧನಿಕರ ನೆಟ್​ವರ್ಕ್ ಸೃಷ್ಟಿಯಾಗಿದ್ದು. ಎಟಿಎಂ ಏಜೆನ್ಸಿಗಳನ್ನು ತಲುಪಿದ ಹಣ, ಅರ್ಧ ಎಟಿಎಂಗಳಿಗೆ ಹೋದರೆ, ಇನ್ನರ್ಧ ಕಾಳಧನಿಕರ ಕೈ ಸೇರಿತು.

ಮತ್ತೊಂದು ನೆಟ್​ವರ್ಕ್ ಬ್ಯಾಂಕ್ ಶಾಖೆಗಳಿಂದ. ಅಲ್ಲಿ ನಡೆದದ್ದು ಮಹಾ ಮೋಸ. ಬ್ಯಾಂಕ್'​ಗಳ ಸಿಬ್ಬಂದಿಯೇ ಶಾಮೀಲಾಗಿ ಜನರಿಗೆ ಸಿಗಬೇಕಾದ ಹಣವನ್ನು ಕಾಳಧನಿಕರಿಗೆ ತಲುಪಿಸಿಬಿಟ್ಟರು. ಗ್ರಾಹಕರಿಗೆ ಸಿಕ್ಕಿದ್ದು ಅಷ್ಟೋ ಇಷ್ಟೋ ಹಣ ಮಾತ್ರ.

ಅಲ್ಲಿಗೆ ಕಾಳಧನಿಕರ ವಿರುದ್ಧ ಮಹಾಯುದ್ಧವನ್ನೇ ಘೋಷಿಸಿದ್ದ ಪ್ರಧಾನಿ ನರೇಂದ್ರ ಮೋದಿ, ಹಿನ್ನಡೆ ಅನುಭವಿಸಬೇಕಾಯಿತು. ವಿಶೇಷವೆಂದರೆ, ಇದುವರೆಗೆ ಆರ್​ಬಿಐನ ಕಾರ್ಯದಕ್ಷತೆಯನ್ನು ಯಾರೊಬ್ಬರೂ ಪ್ರಶ್ನಿಸಿರಲಿಲ್ಲ. ಆದರೆ, ಕೆಲವೇ ಕೆಲವರು ನಡೆಸಿದ ಈ ಕಾಳದಂಧೆಯಿಂದಾಗಿ, ಆರ್​ಬಿಐ ಈಗ ಕೆಟ್ಟ ಹೆಸರು ಹೊತ್ತುಕೊಳ್ಳುತ್ತಿದೆ. ಅದಕ್ಕೆ ತಕ್ಕಂತೆ, 44 ದಿನಗಳಲ್ಲಿ 60ಕ್ಕೂ ಹೆಚ್ಚು ನಿರ್ಧಾರ ಹೊರಡಿಸಿದೆ. ದಿನಕ್ಕೊಂದು ನೀತಿ, ದಿನಕ್ಕೊಂದು ನಿಯಮಗಳ ಮೂಲಕ ಕಾಳಧನದ ಬಗ್ಗೆ ತನಗಿದ್ದ ಅಜ್ಞಾನವನ್ನು ಹೊರಹಾಕುತ್ತಿದೆ.