ಬನ್ನೇರುಘಟ್ಟ ಉದ್ಯಾನವನದಲ್ಲಿ ಹೆಣ್ಣು ಮರಿಗೆ ಜನ್ಮ ಕೊಟ್ಟ ಝೀಬ್ರಾ

ಕಾಮವೇರಿ ಹಾಗೂ ಭರತ್‌ ಎಂಬ ಜೋಡಿಗೆ ಹೆಣ್ಣು ಮರಿ ಜನಿಸಿದೆ| ಪಾರ್ಕ್‌ನಲ್ಲಿ ಝೀಬ್ರಾಗಳ ಸಂಖ್ಯೆ 4ಕ್ಕೆ ಏರಿಕೆ ಆಗಿದ್ದು, ತಾಯಿ ಮತ್ತು ಮರಿ ಆರೋಗ್ಯವಾಗಿದೆ| ಪ್ರಸವ ಸಮಯದಲ್ಲಿ ಯಾರೂ ಸಮೀಪ ಸುಳಿಯದಂತೆ ಗಂಡು ಝೀಬ್ರಾ ಕಾವಲು ಕಾಯುತ್ತದೆ| 

ಆನೇಕಲ್‌(ಅ.02): ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನದಲ್ಲಿ ಕಾವೇರಿ ಎಂಬ ಹೆಸರಿನ ಝೀಬ್ರಾ ಹೆಣ್ಣು ಮರಿಯೊಂದಕ್ಕೆ ಜನ್ಮ ನೀಡಿದೆ ಎಂದು ಉದ್ಯಾನವನದ ಆಡಳಿತಾಧಿಕಾರಿ ವನಶ್ರೀ ವಿಪಿನ್‌ ಸಿಂಗ್‌ ತಿಳಿಸಿದರು.

ತಾಯಿ ಹಾಗೂ ಮರಿಯ ಚಿತ್ರ ಬಿಡುಗಡೆ ಮಾಡಿದ ಅವರು, 6 ವರ್ಷದ ಕಾಮವೇರಿ ಹಾಗೂ ಭರತ್‌ ಎಂಬ ಜೋಡಿಗೆ ಈ ಹೆಣ್ಣು ಮರಿ ಜನಿಸಿದೆ. ಇದರೊಂದಿಗೆ ಪಾರ್ಕ್‌ನಲ್ಲಿ ಝೀಬ್ರಾಗಳ ಸಂಖ್ಯೆ 4ಕ್ಕೆ ಏರಿಕೆ ಆಗಿದ್ದು, ತಾಯಿ ಮತ್ತು ಮರಿ ಆರೋಗ್ಯವಾಗಿದೆ. ಪಾರ್ಕ್‌ನಲ್ಲಿ ಇದು ಮೂರನೆಯ ಝೀಬ್ರಾ ಪ್ರಸವವಾಗಿದ್ದು ಸಿಬ್ಬಂದಿಯು ತುಂಬಾ ಜತನವಾಗಿ ನೋಡಿಕೊಂಡಿದ್ದಾರೆ ಎಂದರು.

ವೈದ್ಯ ಉಮಾಶಂಕರ್‌ ಮಾತನಾಡಿ, ಪ್ರಾಣಿ ವಿನಿಮಯ ಯೋಜನೆಯಡಿ ಇಸ್ರೆಲ್‌ ದೇಶದ ಟೆಲ್‌ಅವಿವ್‌ನ ರಮಾತ್‌ ಗನ್‌ ಸಫಾರಿಯ ಜೂವಾಲಾಜಿಕಲ್‌ ಸೆಂಟರ್‌ನಿಂದ ಈ ಝೀಬ್ರಾಗಳನ್ನು ತರಿಸಲಾಗಿತ್ತು. ಗರ್ಭಧಾರಣ ಅವಧಿ 12 ತಿಂಗಳುಗಳಾಗಿದ್ದು, ಪ್ರಸವ ಸಮಯದಲ್ಲಿ ಯಾರೂ ಸಮೀಪ ಸುಳಿಯದಂತೆ ಗಂಡು ಝೀಬ್ರಾ ಕಾವಲು ಕಾಯುತ್ತದೆ ಎಂದು ತಿಳಿಸಿದರು.