ಯಾದಗಿರಿ: 7 ದಿನ ನಡುಗಡ್ಡೆಯಲ್ಲಿ ಸಿಲುಕಿದ್ದ ಕುರಿಗಾಹಿ ರಕ್ಷಣೆ
Published : Aug 10, 2020, 02:12 PM IST
ಸಾರಾಂಶ
16 ಜನರ ಎನ್ಡಿಆರ್ಎಫ್ ತಂಡ ಕಾರ್ಯಾಚರಣೆ| ಕುರಿಗಾಹಿಯನ್ನ ಸುರಕ್ಷಿತವಾಗಿ ಕರೆತಂದ ಎನ್ಡಿಆರ್ಎಫ್ ತಂಡ| ಕುರಿಗಳನ್ನ ಅಲ್ಲಿಯೇ ಬಿಡಲಾಗಿದ್ದು, ಪ್ರವಾಹ ತಗ್ಗಿದ ನಂತರ ಕರೆತರುವ ವ್ಯವಸ್ಥೆ|
ಯಾದಗಿರಿ(ಆ.10): ಕುರಿ ಮೇಯಿಸಲೆಂದು ಯಾದಗಿರಿ ತಾಲೂಕಿನ ಎಡದನಮಾಳ ತಪ್ಪಲು ಪ್ರದೇಶಕ್ಕೆ ತೆರಳಿದ್ದಾಗ ಕೃಷ್ಣಾ ಪ್ರವಾಹದಿಂದಾಗಿ 7 ದಿನಗಳಿಂದ ನಡುಗಡ್ಡೆಯಲ್ಲೇ ಸಿಲುಕಿದ್ದ ಐ.ಬಿ.ತಾಂಡಾದ ನಿವಾಸಿ, ಕುರಿಗಾಹಿ ಕುಮಾರ್ (ಟೋಪಣ್ಣ) ಅವರನ್ನು ಎನ್ಡಿಆರ್ಎಫ್ ತಂಡ ರಕ್ಷಣೆ ಮಾಡಿದೆ.
ಶನಿವಾರ ರಾತ್ರಿ ಹೈದರಾಬಾದಿನಿಂದ ಆಗಮಿಸಿದ್ದ 16 ಜನರ ಎನ್ಡಿಆರ್ಎಫ್ ತಂಡ ಕಾರ್ಯಾಚರಣೆ ನಡೆಸಿ ಭಾನುವಾರ ಬೆಳಗ್ಗೆ ಸುರಕ್ಷಿತವಾಗಿ ಕರೆತಂದಿದೆ.
ಯಾದಗಿರಿ: ಭಾರೀ ಪ್ರವಾಹ, 5 ದಿನದಿಂದ ನಡುಗಡ್ಡೆಯಲ್ಲಿ ಸಿಲುಕಿದ ಕುರಿಗಾಹಿ..!
ಸುಮಾರು 3 ಗಂಟೆಗಳಿಗೂ ಹೆಚ್ಚು ಕಾಲ ನಡೆದ ರಕ್ಷಣಾ ಕಾರ್ಯಾಚರಣೆಯಲ್ಲಿ ಕುರಿಗಾಹಿ ಜೊತೆಗೆ ಆತನ ಸಾಕುನಾಯಿಯನ್ನು ಸುರಕ್ಷಿತವಾಗಿ ಬೋಟ್ ಮೂಲಕ ಕರೆತರಲಾಗಿದೆ. ಸದ್ಯ ಕುರಿಗಳನ್ನ ಅಲ್ಲಿಯೇ ಬಿಡಲಾಗಿದ್ದು, ಪ್ರವಾಹ ತಗ್ಗಿದ ನಂತರ ಕರೆತರುವ ವ್ಯವಸ್ಥೆ ಮಾಡಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.