ಪತ್ನಿಯ ಮದ್ಯಪಾನ, ವಿಚ್ಛೇದನಕ್ಕೆ ಕಾರಣವಲ್ಲ: ಹೈಕೋರ್ಟ್

ಪತ್ನಿಯಿಂದ ಅನುಚಿತ ಮತ್ತು ಅಸಭ್ಯ ವರ್ತನೆ ಇಲ್ಲದಿದ್ದರೆ, ಮದ್ಯಪಾನವನ್ನು ಕ್ರೌರ್ಯ ಎಂದು ಪರಿಗಣಿಸಲಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಅಲಹಾಬಾದ್: ಪತ್ನಿಯ ಮದ್ಯಪಾನವು ವಿಚ್ಛೇದನಕ್ಕೆ ಸಾಕಷ್ಟು ಕ್ರೌರ್ಯ ಎಂದು ಪರಿಗಣಿಸಲಾಗುವುದಿಲ್ಲ ಎಂದು ಅಲಹಾಬಾದ್ ಹೈಕೋರ್ಟ್‌ನ ಲಕ್ನೋ ಪೀಠ ಹೇಳಿದೆ. ಪತ್ನಿಯ ಮದ್ಯಪಾನ ಮತ್ತು ಮನೆ ಬಿಟ್ಟು ಹೋಗುವುದಕ್ಕೆ ಸಂಬಂಧಿಸಿದಂತೆ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದ ವ್ಯಕ್ತಿಯ ಅರ್ಜಿಯನ್ನು ಕೌಟುಂಬಿಕ ನ್ಯಾಯಾಲಯ ತಿರಸ್ಕರಿಸಿದ್ದನ್ನು ಪ್ರಶ್ನಿಸಿ ಆತ ಹೈಕೋರ್ಟ್ ಮೆಟ್ಟಿಲೇರಿದ್ದ.

ತನ್ನ ಪತ್ನಿ ಮದ್ಯಪಾನ ಮಾಡುತ್ತಿದ್ದಳು ಮತ್ತು ಇದು ಮಧ್ಯಮ ವರ್ಗದ ಕುಟುಂಬದ ಸಂಸ್ಕೃತಿಗೆ ಅವಮಾನಕರ ಎಂದು ಪತಿ ಹೇಳಿದ್ದ. ಇದರಿಂದ ತನಗೆ ಮಾನಸಿಕವಾಗಿ ನೋವಾಗಿದೆ ಎಂದೂ ಆತ ದೂರಿದ್ದ. ಆದರೆ ನ್ಯಾಯಮೂರ್ತಿಗಳಾದ ವಿವೇಕ್ ಚೌಧರಿ ಮತ್ತು ಓಂ ಪ್ರಕಾಶ್ ಶುಕ್ಲಾ ಅವರ ಪೀಠವು ಈ ವಾದವನ್ನು ತಿರಸ್ಕರಿಸಿತು. ಪತ್ನಿಯಿಂದ ಅನುಚಿತ ಮತ್ತು ಅಸಭ್ಯ ವರ್ತನೆ ಇಲ್ಲದಿದ್ದರೆ, ಮದ್ಯಪಾನವನ್ನು ಕ್ರೌರ್ಯ ಎಂದು ಪರಿಗಣಿಸಲಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಮದ್ಯಪಾನವು ನಿಷಿದ್ಧ ಎಂಬ ಸಾಮಾಜಿಕ ದೃಷ್ಟಿಕೋನ ಮಧ್ಯಮ ವರ್ಗದ ಕುಟುಂಬಗಳಲ್ಲಿ ಇದ್ದರೂ, ಕ್ರೌರ್ಯದ ಪುರಾವೆಗಳ ಕೊರತೆಯನ್ನು ಇದು ಮರೆಮಾಚಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಪತ್ನಿಯ ಮದ್ಯಪಾನವು ಪತಿ ಅಥವಾ ಮೇಲ್ಮನವಿ ಸಲ್ಲಿಸಿದ ವ್ಯಕ್ತಿಗೆ ಹೇಗೆ ಕ್ರೌರ್ಯ ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ ಎಂದು ನ್ಯಾಯಾಲಯ ಗಮನಸೆಳೆದಿದೆ. ಸಾಕಷ್ಟು ಪುರಾವೆಗಳಿಲ್ಲದ ಆರೋಪಗಳನ್ನು ವಿಚ್ಛೇದನಕ್ಕೆ ಕಾರಣವೆಂದು ಪರಿಗಣಿಸಲಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಆದರೆ, ವರ್ಷಗಳಿಂದ ಪತ್ನಿ ತನ್ನ ತವರು ಮನೆಯಲ್ಲಿ ವಾಸಿಸುತ್ತಿದ್ದಾಳೆ ಮತ್ತು ಪತಿಯ ಮನೆಯಲ್ಲಿ ವಾಸಿಸುತ್ತಿಲ್ಲ ಎಂಬ ಅಂಶವನ್ನು ಹೈಕೋರ್ಟ್ ಗಂಭೀರವಾಗಿ ಪರಿಗಣಿಸಿದೆ. ದಂಪತಿಗಳು ದೀರ್ಘಕಾಲದಿಂದ ಬೇರೆ ಬೇರೆಯಾಗಿ ವಾಸಿಸುತ್ತಿರುವುದು ಅವರ ದಾಂಪತ್ಯ ಜೀವನವು ನಿರ್ಜೀವವಾಗಿದೆ ಎಂದು ತೋರಿಸುತ್ತದೆ ಎಂದು ನ್ಯಾಯಾಲಯ ಹೇಳಿದೆ.

ಇದನ್ನೂ ಓದಿ: ಡಿವೋರ್ಸ್ ನಂತ್ರ ಹುಡುಗ್ರ ಲಕ್, ಲುಕ್ ಬದಲಾಗುತ್ತೆ, ಚಂದನ್ ಶೆಟ್ಟಿ ನೋಡಿ ಹೀಗೆಕಂದ್ರು ಫ್ಯಾನ್ಸ್?