Viral Video: ಮದುವೆ ಮನೆಯಲ್ಲಿ ಅತಿಯಾದ ಸಂಭ್ರಮ, ಸಂಬಂಧಿಗಳ ಮೇಲೆ ಹೂವಿದ್ದ ಪ್ಲೇಟ್‌ ಎಸೆದ ಪುರೋಹಿತ!

ವಧು-ವರರು ಅಗ್ನಿಗೆ ಸಪ್ತಪದಿ ತುಳಿಯುವಾಗ ಅತಿಥಿಗಳ ಮೇಲೆ ಪುರೋಹಿತರು ಪೂಜಾ ಪಾತ್ರೆಯನ್ನು ಎಸೆದಿದ್ದಾರೆ.

ನವದೆಹಲಿ (ಡಿ.27): ವಿವಾಹದಲ್ಲಿ ನಡೆಯುವ ವಿಚಿತ್ರ ಘಟನೆಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ನೋಡಿರುತ್ತೀರಿ. ಆದರೆ, ವಿವಾಹ ನೆರವೇರಿಸುತ್ತಿದ್ದ ಪುರೋಹಿತರೊಬ್ಬರು ವಧು-ವರರ ಸಂಬಂಧಿಗಳ ಮೇಲೆ ಹೂವುಗಳಿದ್ದ ಪೂಜಾ ಪಾತ್ರೆಯನ್ನು ಎಸೆದ ಘಟನೆ ವೈರಲ್ ಆಗಿದೆ. ಸಂಸ್ಕಾರ್ ಸೋಜಿತ್ರ ಎಂಬ ಎಕ್ಸ್ ಬಳಕೆದಾರರು ಹಂಚಿಕೊಂಡಿರುವ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಗುಜರಾತಿನಲ್ಲಿ ನಡೆದ ಹಿಂದೂ ವಿವಾಹವೊಂದರಲ್ಲಿ ಈ ಘಟನೆ ನಡೆದಿದೆ. ವಧು-ವರರು ಅಗ್ನಿ ಕುಂಡದ ಸುತ್ತ ಸಪ್ತಪದಿ ತುಳಿಯುವಾಗ ಅವರ ಮೇಲೆ ಹೂವು ಎಸೆಯುವ ಸಂಪ್ರದಾಯವಿದೆ. ಆದರೆ, ಈ ವಿಡಿಯೋದಲ್ಲಿ ಕೆಲವರು ಕಲ್ಲೆಸೆಯುವಂತೆ ಹೂವುಗಳನ್ನು ಎಸೆಯುತ್ತಿರುವುದನ್ನು ಕಾಣಬಹುದು. ಪಕ್ಕದಲ್ಲಿದ್ದ ಪುರೋಹಿತರ ಮುಖಕ್ಕೂ ಹೂವುಗಳು ಬಡಿಯುತ್ತವೆ. ಇದರಿಂದ ಕೋಪಗೊಂಡ ಪುರೋಹಿತರು ತಮ್ಮ ಕೈಯಲ್ಲಿದ್ದ ಪೂಜಾ ಪಾತ್ರೆಯನ್ನು ಅತಿಥಿಗಳತ್ತ ಎಸೆಯುತ್ತಾರೆ. ಪುರೋಹಿತರು ಎಷ್ಟು ಕೋಪಗೊಂಡಿದ್ದರು ಎಂಬುದು ಅವರು ಪೂಜಾ ಪಾತ್ರೆಯನ್ನು ಎಸೆದ ವೇಗದಿಂದಲೇ ಗೊತ್ತಾಗುತ್ತಿದೆ.

ಈ ವಿಡಿಯೋ ವೈರಲ್ ಆದ ಬಳಿಕ ಅತಿಥಿಗಳ ವರ್ತನೆಯನ್ನು ಖಂಡಿಸಿ, ಪುರೋಹಿತರನ್ನು ಬೆಂಬಲಿಸಿ ಅನೇಕರು ಕಾಮೆಂಟ್‌ ಮಾಡಿದ್ದಾರೆ. ವಿವಾಹದ ಪಾವಿತ್ರ್ಯವನ್ನು ಅತಿಥಿಗಳು ಅಪಮಾನಿಸಿದ್ದಾರೆ ಎಂದು ಹಲವರು ಬರೆದಿದ್ದಾರೆ. ಅತಿಥಿಗಳ ಕೃತ್ಯದಿಂದ ಕೋಪಗೊಂಡ ಪುರೋಹಿತರು ಹೀಗೆ ಮಾಡಿದ್ದಾರೆ ಎಂದೂ ಹಲವರು ಅಭಿಪ್ರಾಯಪಟ್ಟಿದ್ದಾರೆ.