ಪ್ರಯಾಣಿಕನ ರಕ್ಷಣೆಗಾಗಿ 1 ಕಿ.ಮೀ ಹಿಂದಕ್ಕೆ ಚಲಿಸಿದ ರೈಲು

ಮಹಾರಾಷ್ಟ್ರದ ಜಲ್ಗಾಂವ್‌ ಜಿಲ್ಲೆಯಲ್ಲಿ  ಪ್ರಯಾಣಿಕನೊಬ್ಬನ್ನು ರಕ್ಷಿಸಲು ರೈಲೊಂದು 1 ಕಿ.ಮೀ. ಹಿಮ್ಮುಖವಾಗಿ ಚಲಿಸಿದೆ. 

ಮುಂಬೈ [ಫೆ.08]:  ಬಸ್ಸು, ಕಾರಿನಂತೆ ಮುಂದೆ ಹೋದ ರೈಲು ಎಂದಾದರೂ ವಾಪಸ್‌ ಬಂದಿದ್ದು ಉಂಟೇ? ಆದರೆ, ಪ್ರಯಾಣಿಕನೊಬ್ಬನ್ನು ರಕ್ಷಿಸಲು ರೈಲೊಂದು 1 ಕಿ.ಮೀ. ಹಿಮ್ಮುಖವಾಗಿ ಚಲಿಸಿದ ಘಟನೆ ಮಹಾರಾಷ್ಟ್ರದ ಜಲ್ಗಾಂವ್‌ ಜಿಲ್ಲೆಯಲ್ಲಿ ನಡೆದಿದೆ. 

ದೇವಲಾಲಿನಿಂದ ಭೂಸಾವಲ್‌ಗೆ ತರಳುತ್ತಿದ್ದ ರೈಲು ಪರ್ಧಂಡೆ ಮತ್ತು ಮಹೆಜಿ ರೈಲ್ವೆ ನಿಲ್ದಾಣಗಳ ಮಧ್ಯೆ ಮುಂಜಾನೆ 9.30ರ ವೇಳೆಗೆ ಸಂಚರಿಸುತ್ತಿದ್ದ ವೇಳೆ ರಾಹುಲ್‌ ಪಾಟೀಲ್‌ ಎಂಬ ವ್ಯಕ್ತಿ ಕೆಳಕ್ಕೆ ಬಿದ್ದಿದ್ದ. 

ತಕ್ಷಣವೇ ಸ್ನೇಹಿತರು ಅಲರಾಂ ಚೈನ್‌ ಅನ್ನು ಎಳೆದು ರೈಲನ್ನು ನಿಲ್ಲಿಸಿದ್ದರು. ಬಳಿಕ ಚಾಲಕ ಹಿಮ್ಮುಖವಾಗಿ ರೈಲು ಓಡಿಸಿ ಗಾಯಾಳುವನ್ನು ರಕ್ಷಣೆ ಮಾಡಿದ್ದಾರೆ. ಆತನಿಗೆ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.