
ಜೈಪುರ : ಸಾಮಾನ್ಯವಾಗಿ ಪಾಕಿಸ್ತಾನವು ತನ್ನ ಮಹಿಳೆಯರನ್ನು ಬಳಸಿಕೊಂಡು ಭಾರತದಲ್ಲಿನ ರಹಸ್ಯ ಮಾಹಿತಿಯನ್ನು ಪಡೆಯಲು ಪುರುಷರನ್ನು ಹನಿಟ್ರ್ಯಾಪ್ಗೆ ಕೆಡವುದುಂಟು. ಆದರೆ ಇದೀಗ ಪಾಕಿಸ್ತಾನದ ಪುರುಷ ಹ್ಯಾಂಡ್ಲರ್ ಒಬ್ಬ, ಭಾರತದ ಮಹಿಳೆಯನ್ನು ಪ್ರೀತಿಯ ಆಮಿಷಕ್ಕೆ ಕೆಡವಿ ಆಕೆಯ ಮೂಲಕ ರಾಜಸ್ಥಾನದ ಶ್ರೀಗಂಗಾನಗರ ರೈಲ್ವೆ ಹಳಿ ಸ್ಫೋಟಿಸಿದ ವಿಚಾರ ಬೆಳಕಿಗೆ ಬಂದಿದೆ. ಈ ಸಂಬಂಧ ಪಾಕಿಸ್ತಾನ ಮೂಲದ ಹ್ಯಾಂಡ್ಲರ್ಗಳ ಪ್ರೀತಿಯ ಆಮಿಷಕ್ಕೆ ಸಿಲುಕಿದ್ದ ಯುವತಿ ಸೇರಿದಂತೆ ಇಬ್ಬರನ್ನು ಪಂಜಾಬ್ನಲ್ಲಿ ಬಂಧಿಸಲಾಗಿದೆ.
ನ.3ರಂದು ರಾಜಸ್ಥಾನದ ಶ್ರೀಗಂಗಾನಗರ ಜಿಲ್ಲೆಯ ಅನೂಪ್ಗಢ್-ಸೂರತ್ಗಢ್ ನಡುವಿನ ರೈಲ್ವೆ ಹಳಿಯನ್ನು ಸ್ಫೋಟಿಸಲಾಗಿತ್ತು. ಇದರ ಪ್ರಮುಖ ರೂವಾರಿ ಪಾಕ್ನ ಐಎಸ್ಐ ಹ್ಯಾಂಡ್ಲರ್ ಶಾಹ್ ಎಂಬಾತ ಮಹಕ್ದೀಪ್ ಕೌರ್ (21) ಎಂಬ ಭಾರತೀಯ ಮಹಿಳೆಯ ಜತೆ ಸಂಬಂಧ ಬೆಳೆಸಿ, ಆಕೆಯನ್ನು ಸ್ಫೋಟಕ್ಕೆ ಬಳಸಿಕೊಂಡಿದ್ದ.
ಈ ಕೆಲಸ ಮಾಡಲು ಆರೋಪಿಗಳಿಗೆ ಪಾಕ್ ಗುಪ್ತಚರ ಸಂಸ್ಥೆ ಐಎಸ್ಐ ಕಡೆಯಿಂದ 2.23 ಲಕ್ಷ ರು. ನೀಡಲಾಗಿತ್ತು ಎಂದು ತಿಳಿದುಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿ ಕೌರ್ (21) ಹಾಗೂ ದೇವಿಂದರ್ ಸಿಂಗ್ನನ್ನು (24) ಪಂಜಾಬ್ನ ಗುರುದಾಸಪುರದಲ್ಲಿ ಬಂಧಿಸಲಾಗಿದೆ. ಆರೋಪಿಗಳಿಂದ ವಿದೇಶಿ ನಿರ್ಮಿತ 2 ಪಿಸ್ತೂಲ್ಗಳು, 46 ಜೀವಂತ ಗುಂಡುಗಳು ಮತ್ತು 30,000 ರು. ನಗದನ್ನು ವಶಪಡಿಸಿಕೊಳ್ಳಲಾಗಿದೆ.
ಆರೋಪಿ ಕೌರ್ ಸುಮಾರು 2 ವರ್ಷಗಳ ಹಿಂದೆ ವಿವಾಹವಾಗಿದ್ದಳು. ಆದರೆ ವೈವಾಹಿಕ ಜೀವನ 2024ರ ಡಿಸೆಂಬರ್ನಲ್ಲಿ ಕೊನೆಗೊಂಡಿತು. ನಂತರ ಆಕೆಯ ಪತಿ ಕರಣ್ವೀರ್ ಸಿಂಗ್ ಡ್ರಗ್ಸ್ ಪ್ರಕರಣವೊಂದರಲ್ಲಿ ಜೈಲು ಸೇರಿದ್ದ. ಆದರೆ ಮತ್ತೆ ಕೌರ್ಳನ್ನು ಸಂಪರ್ಕಿಸಿ, ಪಾಕಿಸ್ತಾನ ಮೂಲದ ಲವ್ಲಿ ಎಂಬ ವ್ಯಕ್ತಿಯೊಂದಿಗೆ ಮಾತನಾಡಲು ಸೂಚಿಸಿದ್ದ. ಈ ವ್ಯಕ್ತಿ ಹಣ ನೀಡಲಿದ್ದು, ಅದನ್ನು ಜೈಲಿನಲ್ಲಿರುವ ತನಗೆ ತಲುಪಿಸುವಂತೆ ಕೇಳಿಕೊಂಡಿದ್ದ.
ನಂತರ ಲವ್ಲಿ ಆಕೆಯನ್ನು ಶಾಹ್ ಎಂಬ ವ್ಯಕ್ತಿಗೆ ಪರಿಚಯ ಮಾಡಿಕೊಟ್ಟ. ಕ್ರಮೇಣ, ಕೌರ್ ಮತ್ತು ಶಾಹ್ ನಡುವೆ ಪ್ರೇಮ ಬೆಳೆಯಿತು. ಪಾಕಿಸ್ತಾನಿ ಹ್ಯಾಂಡ್ಲರ್ ಆಗಿದ್ದ ಶಾಹ್ ಈ ಸಂಬಂಧವನ್ನು ಬಳಸಿಕೊಂಡು, ರೈಲು ಹಳಿ ಸ್ಫೋಟಕ್ಕಾಗಿ ಆಕೆಯನ್ನು ನೇಮಿಸಿಕೊಂಡ. ಅ.6ರಂದೇ ಸ್ಫೋಟ ನಡೆಸಲು ಯೋಜಿಸಿದ್ದ ಆರೋಪಿಗಳು ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದರು. ಆದರೆ ಬಾಂಬ್ಗಳು ಲಭ್ಯವಿಲ್ಲದ ಕಾರಣ ಮುಂದೂಡಿದ್ದರು. ಅ.12-13ಕ್ಕೆ ಸ್ಫೋಟ ಯತ್ನ ನಡೆಸಿದರೂ ತಾಂತ್ರಿಕ ಕಾರಣದಿಂದ ಸಾಧ್ಯ ಆಗಲಿಲ್ಲ. ಕೊನೆಗೆ ನ.3ರಂದು ಟೈಮರ್ ಬಳಸಿ ಹಳಿ ಸ್ಫೋಟಿಸಿದ್ದರು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ