ರಾಹುಲ್‌ ಇಂದಿನ ಭಾರತದ ಮೀರ್‌ ಜಾಫರ್‌: ಬಿಜೆಪಿ

ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರನ್ನು ಭಾರತೀಯ ರಾಜಕೀಯದ ಇಂದಿನ ‘ಮೀರ್‌ ಜಾಫರ್‌’ ಎಂದು ಬಿಜೆಪಿ ಮಂಗಳವಾರ ಕರೆದಿದೆ ಹಾಗೂ ಇವರು ‘ಭಾರತದ ನವಾಬ್‌’ ಆಗಲು ವಿದೇಶಿ ಶಕ್ತಿಗಳ ಸಹಾಯ ಕೋರಿ ವಿದೇಶಕ್ಕೆ ತೆರಳಿದ್ದರು ಎಂದು ಕಿಡಿಕಾರಿದೆ.

ನವದೆಹಲಿ: ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರನ್ನು ಭಾರತೀಯ ರಾಜಕೀಯದ ಇಂದಿನ ‘ಮೀರ್‌ ಜಾಫರ್‌’ ಎಂದು ಬಿಜೆಪಿ ಮಂಗಳವಾರ ಕರೆದಿದೆ ಹಾಗೂ ಇವರು ‘ಭಾರತದ ನವಾಬ್‌’ ಆಗಲು ವಿದೇಶಿ ಶಕ್ತಿಗಳ ಸಹಾಯ ಕೋರಿ ವಿದೇಶಕ್ಕೆ ತೆರಳಿದ್ದರು ಎಂದು ಕಿಡಿಕಾರಿದೆ. ಅವರು ಕ್ಷಮೆ ಕೇಳುವವರಗೆ ಬಿಜೆಪಿ ಸುಮ್ಮನಿರಲ್ಲ ಎಂದಿದೆ.
ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರ (BJP spokesperson Sambit Patra) ಮಾತನಾಡಿ, ‘ರಾಹುಲ್‌ ಗಾಂಧಿ ಅವರನ್ನು ಭಾರತೀಯ ರಾಜಕೀಯದ ಮೀರ್‌ ಜಾಫರ್‌ ಎಂದರೆ ಅಪಭ್ರಂಶವಾಗುವುದಿಲ್ಲ. ಲಂಡನ್‌ನಲ್ಲಿ ಅವರು ಮಾಡಿರುವುದು ಮೀರ್‌ ಜಾಫರ್‌ ಕೆಲಸವನ್ನೇ’ ಎಂದು ಆರೋಪಿಸಿದರು.

‘ರಾಹುಲ್‌ ಗಾಂಧಿ ಕೂಡ ತಮ್ಮ ಲಂಡನ್‌ ಭೇಟಿಯ (London Visit) ಸಂದರ್ಭದಲ್ಲೂ ಅದೇ ಕೆಲಸ ಮಾಡಿದರು. ಅವರು ವಿದೇಶಿ ಪಡೆಗಳನ್ನು ಭಾರತಕ್ಕೆ ಬರುವಂತೆ ಆಹ್ವಾನಿಸಿದರು. ಶೆಹಜಾದಾ ನವಾಬ್‌ ಆಗಲು ಈಸ್ವ್‌ ಇಂಡಿಯಾ ಕಂಪನಿಯ ಸಹಾಯ ಕೇಳಿದ್ದಾರೆ’ ಎಂದು ದೂರಿದರು. ‘ಗಾಂಧಿ ವಿದೇಶದಲ್ಲಿ ಭಾರತದ ವಿರುದ್ಧ ಮಾತನಾಡುತ್ತಿರುವುದು ಇದೇ ಮೊದಲಲ್ಲ. ಇದು ಕಾಂಗ್ರೆಸ್‌ ಪಕ್ಷ (Congress Party) ಮತ್ತು ಗಾಂಧಿ ಕುಟುಂಬದ (Gandhi Family) ಸ್ಥಿರವಾದ ಪಿತೂರಿ’ ಎಂದರು.

ಯಾರು ಮೀರ್‌ ಜಾಫರ್‌?

ಸಿರಾಜ್‌ ಉದ್‌-ದೌಲಾ (siraj ud doul) ಅವರ ನೇತೃತ್ವದಲ್ಲಿ ಬಂಗಾಳದ ಸೈನ್ಯದಲ್ಲಿ ಕಮಾಂಡರ್‌ ಆಗಿ ಸೇವೆ ಸಲ್ಲಿಸಿದ ಮೀರ್‌ ಜಾಫರ್‌ ಈಸ್ಟ್‌ ಇಂಡಿಯಾ ಕಂಪನಿಯ ಬಂಗಾಳದ ಮೊದಲ ನವಾಬನಾಗಿದ್ದ. ಆತ ಪ್ಲಾಸಿ ಕದನದಲ್ಲಿ ಸಿರಾಜ್‌ ಉದ್‌-ದೌಲಾಗೆ ದ್ರೋಹ ಬಗೆದಿದ್ದ. ಇದು ಭಾರತದಲ್ಲಿ ಬ್ರಿಟಿಷ್‌ ಆಳ್ವಿಕೆಗೆ ದಾರಿ ಮಾಡಿಕೊಟ್ಟಿತ್ತು.

ಸಂಸತ್‌ ಬಿಕ್ಕಟ್ಟು 7ನೇ ದಿನವೂ ಮುಂದುವರಿಕೆ

ಭಾರತದ ಜನತಂತ್ರ ಅಪಾಯದಲ್ಲಿದೆ ಎಂದು ಲಂಡನ್‌ನಲ್ಲಿ ಹೇಳಿಕೆ ನೀಡಿದ್ದ ರಾಹುಲ್‌ ಗಾಂಧಿ ಕ್ಷಮೆಯಾಚಿಸಬೇಕು ಎಂದು ಆಡಳಿತಾರೂಢ ಬಿಜೆಪಿ ಮಂಗಳವಾರವೂ ಪಟ್ಟು ಹಿಡಿಯಿತು. ಇನ್ನೊಂದೆಡೆ ಅದಾನಿ ಸಮೂಹದ ಅಕ್ರಮಗಳ ಜಂಟಿ ಸದನ ಸಮಿತಿ ತನಿಖೆ ನಡೆಸಬೇಕು ಎಂದು ವಿಪಕ್ಷಗಳು ಕೋಲಾಹಲ ಸೃಷ್ಟಿಸಿದವು. ಇದರ ಪರಿಣಾಮ ಸತತ 7ನೇ ದಿನವೂ ಲೋಕಸಭೆ ಹಾಗೂ ರಾಜ್ಯಸಭೆ ಕಲಾಪಗಳಿಗೆ ಅಡ್ಡಿ ಆಗಿದ್ದು, ಕಲಾಪವನ್ನು ಗುರುವಾರಕ್ಕೆ ಮುಂದೂಡಲಾಯಿತು.

ಬಿಕ್ಕಟ್ಟು ಮುಗಿಯುವ ಲಕ್ಷಣ ಕಾಣದ ಕಾರಣ ಸಭಾಧ್ಯಕ್ಷ ಓಂ ಬಿರ್ಲಾ (Om Birla) ಅವರು ಸರ್ವಪಕ್ಷ ಸಭೆ ಕರೆದಿದ್ದರು. ಈ ಸಭೆಯಲ್ಲಿ ಕೂಡ ಕಾಂಗ್ರೆಸ್‌ ಹಾಗೂ ಇತರ ಪ್ರತಿಪಕ್ಷಗಳು, ಅದಾನಿ (Govtam adani) ವಿರುದ್ಧ ತನಿಖೆಗೆ ಜೆಪಿಸಿ ರಚನೆ ಆಗಲೇಬೇಕು ಎಂಬ ಪಟ್ಟು ಸಡಿಲಿಸಲಿಲ್ಲ. ಇದನ್ನು ಬಿಜೆಪಿ ಸಂಸದರು ತೀವ್ರವಾಗಿ ವಿರೋಧಿಸಿದರು. ಇದೇ ವೇಳೆ, ರಾಹುಲ್‌ ಅವರಿಗೆ ಮಾತನಾಡಲು ಸಂಸತ್ತಲ್ಲಿ ಅವಕಾಶ ನೀಡಬೇಕು ಎಂದು ಕಾಂಗ್ರೆಸ್‌ನ ಅಧೀರ್‌ ರಂಜನ್‌ ಚೌಧರಿ (Adhir choudhari) ಕೋರಿದರು.