ಸೆ.26ರ ಮನ್‌ ಕಿ ಬಾತ್‌ಗೆ ನಿಮ್ಮ ಸಲಹೆ, ಸೂಚನೆ ಆಹ್ವಾನಿಸಿದ ಪಿಎಂ ಮೋದಿ!

* 'ಮನ್ ಕಿ ಬಾತ್' 81ನೇ ಸಂಚಿಕೆಗೆ ಜನಸಾಮಾನ್ಯರ ಸಲಹೆ ಸೂಚನೆ ಆಹ್ವಾನಿಸಿದ ಪ್ರಧಾನಿ * ನಮೋ ಆಪ್ ಮತ್ತು Mygov ಆಪ್ ನಲ್ಲಿ ನೋಂದಾಯಿಸಬಹುದು ನಿಮ್ಮ ಐಡಿಯಾ * ರೇಡಿಯೋ ಕಾರ್ಯಕ್ರಮದಲ್ಲಿ ಉಲ್ಲೇಖವಾಗಬಹುದು ನೀವು ಕೊಟ್ಟ ಪ್ಲಾನ್

ನವದೆಹಲಿ(ಸೆ.16): ಭಾನುವಾರ, 26 ಸೆಪ್ಟೆಂಬರ್ 2021 ರಂದು ಪ್ರಸಾರವಾಗಲಿರುವ 'ಮನ್ ಕಿ ಬಾತ್' 81ನೇ ಸಂಚಿಕೆಗೆ ಸಲಹೆ ಸೂಚನೆಗೆ ಪ್ರಧಾನಿ ನರೇಂದ್ರ ಮೋದಿ ದೇಶದ ಜನರಿಗೆ ಕರೆ ನೀಡಿದ್ದಾರೆ. 'ಮನ್ ಕಿ ಬಾತ್'ಗೆ ನೀವು ನೀಡಲು ಬಯಸುವ ಈ ಸಲಹೆಗಳನ್ನು ನಮೋ ಆಪ್ ಮತ್ತು Mygov ಆಪ್ ನಲ್ಲಿ ನೋಂದಾಯಿಸಬಹುದು. ಅಲ್ಲದೇ, 1800-11-7800 ಸಂಖ್ಯೆಗೆ ಕರೆ ಮಾಡಿಯೂ ಸಂದೇಶ ಕೊಡಬಹುದು.

ಟ್ವೀಟ್ ನಲ್ಲಿ ಪಿಎಂ ಮೋದಿ ಹೇಳಿದ್ದಿಷ್ಟು 

ಸೆ. 26 ರಂದು ಪ್ರಸಾರವಾಗುವ ಈ ತಿಂಗಳ #MannKiBaat ಗಾಗಿ ಹಲವು ಆಸಕ್ತಿದಾಯಕ ಸಲಹೆಗಳು ಬರುತ್ತಿವೆ. ನಮೋ ಆಪ್ ಮತ್ತು Mygov ಆಪ್‌ನಲ್ಲಿ ನಿಮ್ಮ ಐಡಿಯಾಗಳನ್ನು ಹಂಚಿಕೊಳ್ಳಿ ಅಥವಾ 1800-11-7800 ನಲ್ಲಿ ನಿಮ್ಮ ಸಂದೇಶ ತಲುಪಿಸಿ ಎಂದಿದ್ದಾರೆ.

ಏನಿದು ಮನ್‌ ಕೀ ಬಾತ್?

ಮನ್ ಕಿ ಬಾತ್ ಆಲ್ ಇಂಡಿಯಾ ರೇಡಿಯೋ ಮೂಲಕ ಪ್ರಸಾರವಾಗುವ ಕಾರ್ಯಕ್ರಮವಾಗಿದೆ. ಇದರಲ್ಲಿ, ಭಾರತದ ಪ್ರಧಾನಿ ನರೇಂದ್ರ ಮೋದಿ ದೇಶದ ಜನರನ್ನುದ್ದೇಶಿಸಿ ಮಾತನಾಡುತ್ತಾರೆ. 3 ಅಕ್ಟೋಬರ್ 2014 ರಂದು ಈ ಸರಣಿ ರೇಡಿಯೋ ಕಾರ್ಯಕ್ರಮ ಮೊದಲ ಬಾರಿ ಪ್ರಸಾರ ಮಾಡಲಾಯಿತು. 2015 ರ ಜನವರಿಯಲ್ಲಿ, ಅಂದಿನ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ ಕೂಡ ಮೋದಿಯೊಂದಿಗೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ, ಮಾತನಾಡಿದ್ದರು.