ಸಿಂದೂರ್‌ನಿಂದ ಸಿಂಧುವರೆಗೆ, ಲೋಕಸಭೆಯಲ್ಲಿ ಪ್ರಧಾನಿ ಮಾತಿನ ಟಾಪ್‌ ಸಾಲುಗಳು!

ಪ್ರಧಾನಿ ಮೋದಿಯವರು ಆಪರೇಷನ್ ಸಿಂದೂರ್ ಸಮಯದಲ್ಲಿ ಸಶಸ್ತ್ರ ಪಡೆಗಳಿಗೆ ಸಂಪೂರ್ಣ ಸ್ವಾತಂತ್ರ್ಯ ನೀಡಲಾಗಿತ್ತು ಎಂದು ಒತ್ತಿ ಹೇಳಿದರು. ಈ ಕಾರ್ಯಾಚರಣೆಯಲ್ಲಿ ಪಾಕಿಸ್ತಾನದ ಭಯೋತ್ಪಾದಕ ಕೇಂದ್ರಗಳನ್ನು ನಾಶಮಾಡಲಾಗಿದೆ ಮತ್ತು ಪಾಕಿಸ್ತಾನಕ್ಕೆ ಪ್ರತೀಕಾರ ತೀರಿಸಿಕೊಳ್ಳಲಾಗಿದೆ ಎಂದು ಅವರು ಹೇಳಿದ್ದಾರೆ.

ನವದೆಹಲಿ  (ಜು.29): ಆಪರೇಷನ್ ಸಿಂದೂರ್ ಸಮಯದಲ್ಲಿ "ಸಶಸ್ತ್ರ ಪಡೆಗಳಿಗೆ ಕಾರ್ಯಾಚರಣೆ ಮತ್ತು ಕುಶಲತೆಯ ಸ್ವಾತಂತ್ರ್ಯ" ಇರಲಿಲ್ಲ ಎಂಬ ರಾಹುಲ್ ಗಾಂಧಿಯವರ ಟೀಕೆಗೆ ತಿರುಗೇಟು ನೀಡಿದ ಪ್ರಧಾನಿ ನರೇಂದ್ರ ಮೋದಿ, ಸರ್ಕಾರ ಸಶಸ್ತ್ರ ಪಡೆಗಳಿಗೆ ಮುಕ್ತ ಹಸ್ತ ನೀಡಿತು. ಇದರಿಂದಲೇ ಪಾಕಿಸ್ತಾನಕ್ಕೆ ಏನೂ ಮಾಡಲು ಸಾಧ್ಯವಾಗಲಿಲ್ಲ ಎಂದು ಒತ್ತಿ ಹೇಳಿದರು.

ಪ್ರಧಾನಿಯವರ ಭಾಷಣದ ಪ್ರಮುಖ ಸಾಲುಗಳು ಇಲ್ಲಿವೆ:

• ನಾನು ಏಪ್ರಿಲ್ 22 ರಂದು ವಿದೇಶದಲ್ಲಿದ್ದೆ. ಹಿಂದಿರುಗಿದ ನಂತರ, ನಾನು ಸಭೆ ಕರೆದಿದ್ದೆ ಮತ್ತು ಆ ಸಭೆಯಲ್ಲಿ ನಾವು ಸ್ಪಷ್ಟ ಸೂಚನೆಗಳನ್ನು ನೀಡಿದ್ದೆವು. ಭಯೋತ್ಪಾದನೆಗೆ ಬಲವಾದ ಪ್ರತಿಕ್ರಿಯೆ ಬೇಕು, ಮತ್ತು ಅದು ನಮ್ಮ ರಾಷ್ಟ್ರೀಯ ನಿರ್ಣಯವಾಗಿದೆ.
• ನಮ್ಮ ಸೇನಾಪಡೆಯ ಬಗ್ಗೆ ನನಗೆ ಹೆಮ್ಮೆ ಇದೆ. ಅವರಿಗೆ ಪೂರ್ಣ ಸ್ವಾತಂತ್ರ್ಯ ನೀಡಲಾಗಿತ್ತು. ಯಾವಾಗ, ಎಲ್ಲಿ ಮತ್ತು ಹೇಗೆ ಕಾರ್ಯಾಚರಣೆ ಮಾಡಬೇಕು ಎನ್ನುವ ಬಗ್ಗೆ ಅವರಿಗೆ ನಿರ್ಧಾರ ಮಾಡಲು ತಿಳಿಸಲಾಗಿತ್ತು. ಅವರಿಗೆ ನಾವು ಕಠಿಣ ಪಾಠ ಕಲಿಸಿದ್ದೇವೆ. ಇಂದಿಗೂ ಕೂಡ ಅವರು ನಿದ್ರೆಯಿಲ್ಲದ ರಾತ್ರಿಗಳನ್ನು ಕಳೆಯುತ್ತಿದ್ದಾರೆ.
• ಪಹಲ್ಗಾಮ್‌ನಲ್ಲಿ ದಾಳಿ ಆದ ದಿನವೇ ಪಾಕಿಸ್ತಾನದ ಸೇನಾಪಡೆಗಳು ಭಾರತದಿಂದ ದೊಡ್ಡ ಪ್ರತ್ಯುತ್ತರ ಬರಲಿದೆ ಎಂದು ನಿರೀಕ್ಷೆ ಮಾಡಿದ್ದರು. ಇದರಿಂದಾಗಿಯೇ ನ್ಯೂಕ್ಲಿಯರ್‌ ಬ್ಲ್ಯಾಕ್‌ಮೇಲ್‌ ಮಾಡಲು ಅರಂಭಿಸಿದ್ದರು. ಮೇ 6-7ರ ರಾತ್ರಿ, ನಾವು ಬಯಸಿದ ರೀತಿಯಲ್ಲಿ ಕಾರ್ಯಾಚರಣೆ ನಡೆಸಿದೆವು, ಆದರೆ ಪಾಕಿಸ್ತಾನಕ್ಕೆ ಏನೂ ಮಾಡಲು ಸಾಧ್ಯವಾಗಲಿಲ್ಲ. 22 ನಿಮಿಷಗಳಲ್ಲಿ, ಏಪ್ರಿಲ್ 22ರ ದಾಳಿಗೆ ನಾವು ಪ್ರತೀಕಾರ ತೀರಿಸಿಕೊಂಡೆವು.
• ನಾವು ಪಾಕಿಸ್ತಾನದೊಂದಿಗೆ ಹಲವಾರು ಬಾರಿ ಹೋರಾಡಿದ್ದೇವೆ, ಆದರೆ ಭಾರತದ ಕಾರ್ಯಾಚರಣೆಯಲ್ಲಿ ಪಾಕಿಸ್ತಾನದ ಪ್ರತಿಯೊಂದು ಮೂಲೆಯಲ್ಲಿಯೂ ಭಯೋತ್ಪಾದಕ ಕೇಂದ್ರಗಳನ್ನು ನಾಶಮಾಡಿದ್ದು ಇದೇ ಮೊದಲು. ಅಲ್ಲಿ ಕೂಡ ಭಾರತ ದಾಳಿ ಮಾಡಬಹುದು ಎಂದು ಯಾರೂ ಭಾವಿಸಿರಲಿಲ್ಲ.ನಮ್ಮ ಪಡೆಗಳು ಭಯೋತ್ಪಾದಕ ಕೇಂದ್ರಗಳನ್ನು ನಿರ್ಮೂಲ ಮಾಡಿವೆ.
• ಪರಮಾಣು ಬ್ಲ್ಯಾಕ್‌ಮೇಲಿಂಗ್ ಕೆಲಸ ಮಾಡುವುದಿಲ್ಲ ಮತ್ತು ನಾವು ಅದಕ್ಕೆ ಹೆದರುವುದಿಲ್ಲ ಎಂದು ಸಾಬೀತುಪಡಿಸಿದ್ದೇವೆ. ಪಾಕಿಸ್ತಾನದ ಹೃದಯಭಾಗದಲ್ಲಿ ದಾಳಿ ಮಾಡುವ ಮೂಲಕ, ಅವರ ವಾಯುನೆಲೆಗಳು ಮತ್ತು ಆಸ್ತಿಗಳನ್ನು ಹೊಡೆಯುವ ಮೂಲಕ ಭಾರತ ತನ್ನ ತಾಂತ್ರಿಕ ಪರಾಕ್ರಮವನ್ನು ತೋರಿಸಿದೆ. ಈ ವಾಯುನೆಲೆಗಳಲ್ಲಿ ಕೆಲವು ಇನ್ನೂ ಐಸಿಯುನಲ್ಲಿವೆ.
• ಭಾರತ ತನ್ನ ಕಾರ್ಯಾಚರಣೆ ನಡೆಸುವುದನ್ನು ಯಾವುದೇ ದೇಶ ತಡೆಯಲಿಲ್ಲ. ಕೇವಲ 3 ರಾಷ್ಟ್ರಗಳು ಮಾತ್ರ ಪಾಕಿಸ್ತಾನದ ಪರವಾಗಿ ಹೇಳಿಕೆ ನೀಡಿವೆ. ನಮಗೆ ವಿಶ್ವದ ಬೆಂಬಲ ಸಿಕ್ಕಿತು ಆದರೆ ಕಾಂಗ್ರೆಸ್ ನಮಗೆ ಬೆಂಬಲ ನೀಡದಿರುವುದು ತುಂಬಾ ದುರದೃಷ್ಟಕರ.
• ದಾಳಿಯ ನಂತರ, ಮಾಸ್ಟರ್ ಮೈಂಡ್ ನಿದ್ರೆ ಮಾಡಲು ಸಾಧ್ಯವಿಲ್ಲ. ಭಾರತ ಬಂದು ಪ್ರತಿದಾಳಿ ಮಾಡುತ್ತದೆ ಎಂದು ಅವರಿಗೆ ತಿಳಿದಿದೆ. ಭಾರತ ಹೊಸ ನಾರ್ಮಲ್‌ಅನ್ನು ಈಗ ಸ್ಥಾಪಿಸಿದೆ.
• ಭಾರತವು ಯಾವ ಪ್ರಮಾಣದಲ್ಲಿ ದಾಳಿ ಮಾಡಬಹುದು ಎಂಬುದನ್ನು ಜಗತ್ತು ನೋಡಿದೆ. ಸಿಂದೂರ್‌ನಿಂದ ಸಿಂಧೂವರೆಗೆ, ನಾವು ಪಾಕಿಸ್ತಾನದ ಮೇಲೆ ದಾಳಿ ಮಾಡಿದೆವು. ಇಂತಹ ದಾಳಿಗಳಿಗೆ ಪಾಕಿಸ್ತಾನ ಮತ್ತು ಅದರ ಭಯೋತ್ಪಾದಕ ನಾಯಕರು ಭಾರಿ ಬೆಲೆ ತೆರಬೇಕಾಗುತ್ತದೆ ಎನ್ನುವುದನ್ನು ಆಪರೇಷನ್‌ ಸಿಂದೂರ್ ತಿಳಿಸಿದೆ.
• ಏಪ್ರಿಲ್ 22ರ ಘಟನೆಯ ನಂತರದ3-4 ದಿನಗಳಲ್ಲಿ, ವಿಪಕ್ಷದವರು "ಕಹಾಂ ಗಯಿ 56-ಇಂಚಿನ ಸೀನಾ", "ಮೋದಿ ವಿಫಲರಾದರು. ಮೋದಿ ಎಲ್ಲಿದ್ದಾರೆ?" ಎಂದು ಹೇಳುತ್ತಿದ್ದರು. ತಮ್ಮ ಸ್ವಾರ್ಥ ರಾಜಕೀಯಕ್ಕಾಗಿ, ಅವರು ನನ್ನ ಮೇಲೆ ದಾಳಿ ಮಾಡುತ್ತಿದ್ದರು. ಅವರ ಹೇಳಿಕೆಗಳು ಪಡೆಗಳ ಮನೋಬಲವನ್ನು ಕುಗ್ಗಿಸುತ್ತಿದ್ದವು. ಅವರು ಪಡೆಗಳನ್ನು ನಂಬುವುದಿಲ್ಲ ಮತ್ತು ಅದಕ್ಕಾಗಿಯೇ ಅವರು ಆಪರೇಷನ್‌ ಸಿಂದೂರ್‌ಅನ್ನು ಪ್ರಶ್ನಿಸುತ್ತಿದ್ದಾರೆ. ನೀವು ಮಾಧ್ಯಮಗಳಲ್ಲಿ ಸುದ್ದಿಯಾಗಬಹುದು, ಆದರೆ ಜನರ ಹೃದಯದಲ್ಲಿ ಜಾಗ ಪಡೆಯಲು ಸಾಧ್ಯವಿಲ್ಲ.
• ಮೇ 10 ರಂದು ಭಾರತ ಕದನ ವಿರಾಮ ಘೋಷಿಸಿತು. ಇದರ ಬಗ್ಗೆ ಸದನದಲ್ಲಿ ಬಹಳಷ್ಟು ಚರ್ಚಿಸಲಾಗಿದೆ. ಪಾಕಿಸ್ತಾನದಿಂದ ಹರಡಿರುವ ಪ್ರಚಾರವೂ ಇದೇ ಆಗಿದೆ. ಕೆಲವು ಜನರು ಪಡೆಗಳು ಏನು ಹೇಳುತ್ತಿವೆ ಎಂಬುದರ ಬದಲು ಪಾಕಿಸ್ತಾನದ ನಿರೂಪಣೆಯನ್ನು ಮುಂದಕ್ಕೆ ಕೊಂಡೊಯ್ಯುತ್ತಿದ್ದಾರೆ.
• ಈ ಬಾರಿ ನಾವು ಭಯೋತ್ಪಾದನೆಯ ಕೇಂದ್ರಬಿಂದುವಿನ ಮೇಲೆ ದಾಳಿ ಮಾಡಿದ್ದೇವೆ. ಪಹಲ್ಗಾಮ್ ಭಯೋತ್ಪಾದಕರಿಗೆ ತರಬೇತಿ ನೀಡಲಾಗುತ್ತಿದ್ದ ತರಬೇತಿ ಕೇಂದ್ರಗಳ ಮೇಲೆ ದಾಳಿಯಾಗಿದೆ. ಈ ಬಾರಿ, ನಮ್ಮ ಪಡೆಗಳು 100% ಯಶಸ್ಸಿನ ಪ್ರಮಾಣವನ್ನು ಹೊಂದಿದ್ದವು.
• ಭಾರತ ಈ ರೀತಿ ಪ್ರತಿಕ್ರಿಯಿಸುತ್ತದೆ ಎಂದು ಪಾಕಿಸ್ತಾನ ಊಹಿಸಲೂ ಸಾಧ್ಯವಿರಲಿಲ್ಲ. ಪಾಕಿಸ್ತಾನ ಡಿಜಿಎಂಒ "ಬಸ್ ಕರೋ, ಬೋಹೋತ್ ಮಾರಾ, ಅಬ್ ಜ್ಯಾದಾ ಮಾರ್ ಜೆಲ್ನೇ ಕಿ ತಾಕತ್‌ ನಹಿ ಹೈ" ಎಂದು ಹೇಳಿದ್ದರು. ನಾವು ನಮ್ಮ ಗುರಿಯನ್ನು ಸಾಧಿಸಿದ್ದೇವೆ ಮತ್ತು ನೀವು (ಪಾಕ್) ಪ್ರತಿದಾಳಿ ಮಾಡಿದರೆ ಪರಿಣಾಮ ನೆಟ್ಟಗೆ ಇರೋದಿಲ್ಲ ಎಂದು ಮೇ 7ರಂದೇ ತಿಳಿಸಿದ್ದೆವು. ನಾನು ಇದನ್ನು ಮತ್ತೆ ಹೇಳುತ್ತಿದ್ದೇನೆ. ಇದು ಭಾರತದ ಸ್ಪಷ್ಟ ರಾಜಕೀಯ ಮತ್ತು ಮಿಲಿಟರಿ ಉದ್ದೇಶದ ಭಾಗವಾಗಿತ್ತು. ನಮ್ಮ ಕ್ರಮವು ಉಲ್ಬಣಗೊಳ್ಳುವುದಾಗಿರಲಿಲ್ಲ.
• ಜಗತ್ತಿನ ಯಾವುದೇ ನಾಯಕರು ಭಾರತಕ್ಕೆ ಕಾರ್ಯಾಚರಣೆಯನ್ನು ನಿಲ್ಲಿಸುವಂತೆ ಹೇಳಿಲ್ಲ. ಮೇ 9 ರ ರಾತ್ರಿ, ಯುಎಸ್ ಉಪಾಧ್ಯಕ್ಷ ನನಗೆ ಕರೆ ಮಾಡಲು ಪ್ರಯತ್ನಿಸಿದರು. ಅವರು ಪ್ರಯತ್ನಿಸುತ್ತಿದ್ದರು, ಆದರೆ ನಾನು ಪಡೆಗಳೊಂದಿಗಿನ ಸಭೆಯಲ್ಲಿ ನಿರತನಾಗಿದ್ದೆ. ನಾನು ಅವರಿಗೆ ಮತ್ತೆ ಕರೆ ಮಾಡಿದೆ. ಪಾಕಿಸ್ತಾನ ದೊಡ್ಡ ದಾಳಿಯನ್ನು ಯೋಜಿಸುತ್ತಿದೆ ಎಂದು ಯುಎಸ್ ಉಪಾಧ್ಯಕ್ಷ ಹೇಳಿದರು. ನನ್ನ ಪ್ರತಿಕ್ರಿಯೆ, "ಇದು ಪಾಕಿಸ್ತಾನದ ಉದ್ದೇಶವಾಗಿದ್ದರೆ, ಅದು ಅವರಿಗೆ ಭಾರಿ ವೆಚ್ಚವನ್ನುಂಟು ಮಾಡುತ್ತದೆ."
• ಇಂದಿನ ಭಾರತವು ಆತ್ಮವಿಶ್ವಾಸ, ಸ್ವಾವಲಂಬನೆಯಿಂದ ತುಂಬಿದೆ. ಅದು ಪೂರ್ಣ ಆತ್ಮವಿಶ್ವಾಸದಿಂದ ಮುನ್ನಡೆಯುತ್ತಿದೆ. ಭಾರತವು ಸ್ವಾವಲಂಬನೆಯೊಂದಿಗೆ ಮುಂದುವರಿಯುವುದನ್ನು ಜಗತ್ತು ನೋಡುತ್ತಿದೆ, ಆದರೆ ಕಾಂಗ್ರೆಸ್ ಸಮಸ್ಯೆಗಳಿಗೆ ಪಾಕಿಸ್ತಾನವನ್ನು ಅವಲಂಬಿಸಿದೆ.
• ನಾನು ಇಡೀ ದಿನ ನೋಡುತ್ತಿದ್ದೆ. ದುರದೃಷ್ಟವಶಾತ್, ಕಾಂಗ್ರೆಸ್ ಪಾಕಿಸ್ತಾನದಿಂದ ವಿಷಯಗಳನ್ನು ಆಮದು ಮಾಡಿಕೊಳ್ಳುತ್ತಿದೆ. ಇಂದಿನ ಜಗತ್ತಿನಲ್ಲಿ, ಮಾಹಿತಿ ಮತ್ತು ನಿರೂಪಣೆಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಪಡೆಗಳ ನೈತಿಕತೆಯನ್ನು ಕುಗ್ಗಿಸಲು ಕೃತಕ ಬುದ್ಧಿಮತ್ತೆ ಮತ್ತು ನಿರೂಪಣೆಗಳನ್ನು ಬಳಸಲಾಗುತ್ತದೆ; ದುರದೃಷ್ಟವಶಾತ್, ಕಾಂಗ್ರೆಸ್ ಪಾಕಿಸ್ತಾನದ ನಿರೂಪಣೆಗಳ ವಕ್ತಾರನಾಗಿ ಕೆಲಸ ಮಾಡುತ್ತಿತ್ತು.