ಟೂರಿಸ್ಟ್ ವಾಹನ ಪರ್ಮಿಟ್ ಇನ್ನು ಆನ್ಲೈನಲ್ಲೇ ಪಡೆಯಿರಿ!
ಸಾರಾಂಶ
ಟೂರಿಸ್ಟ್ ವಾಹನ ಪರ್ಮಿಟ್ ಇನ್ನು ಆನ್ಲೈನಲ್ಲೇ ಪಡೆಯಿರಿ| ಅರ್ಜಿ ಸಲ್ಲಿಸಿದ 30 ದಿನದೊಳಗೆ ಸಿಗುತ್ತೆ ಪರ್ಮಿಟ್
ನವದೆಹಲಿ(ಮಾ.15): ದೇಶದಲ್ಲಿ ಪ್ರವಾಸೋದ್ಯಮವನ್ನು ಉತ್ತೇಜಿಸಲು ಹಾಗೂ ಪ್ರವಾಸಿ ವಾಹನಗಳ ಆಪರೇಟರ್ಗಳಿಗೆ ಅನುಕೂಲ ಮಾಡಿಕೊಡಲು ಆನ್ಲೈನ್ನಲ್ಲೇ ಆಲ್ ಇಂಡಿಯಾ ಟೂರಿಸ್ಟ್ ಪರ್ಮಿಟ್ ನೀಡುವ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ಏ.1, 2021ರಿಂದ ಈ ವ್ಯವಸ್ಥೆ ಆರಂಭವಾಗಲಿದೆ. ಟೂರಿಸ್ಟ್ ಪರ್ಮಿಟ್ಗಾಗಿ ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವ ವಾಹನದ ಮಾಲಿಕರಿಗೆ 30 ದಿನದೊಳಗೆ ಪರ್ಮಿಟ್ ಸಿಗಲಿದೆ.
ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯ ‘ಆಲ್ ಇಂಡಿಯಾ ಟೂರಿಸ್ಟ್ ವೆಹಿಕಲ್ಸ್ ಅಥರೈಸೇಶನ್ ಅಂಡ್ ಪರ್ಮಿಟ್ ರೂಲ್ಸ್-2021’ ಜಾರಿಗೆ ತಂದಿದೆ. ಅದು ಏ.1ರಿಂದ ಅನ್ವಯಿಸಲಿದ್ದು, ಈಗಾಗಲೇ ಹಳೆಯ ವ್ಯವಸ್ಥೆಯಡಿ ಪಡೆದಿರುವ ಟೂರಿಸ್ಟ್ ಪರ್ಮಿಟ್ಗಳು ಕೂಡ ಅವುಗಳ ಅವಧಿ ಮುಗಿಯುವವರೆಗೆ ಚಾಲ್ತಿಯಲ್ಲಿರುತ್ತವೆ. ಹೊಸ ವ್ಯವಸ್ಥೆಯಲ್ಲಿ ಪ್ರವಾಸಿ ವಾಹನಗಳ ಮಾಲಿಕರು ಅಗತ್ಯ ದಾಖಲೆ ಹಾಗೂ ಶುಲ್ಕದೊಂದಿಗೆ ಕನಿಷ್ಠ 3 ತಿಂಗಳಿನಿಂದ ಗರಿಷ್ಠ 3 ವರ್ಷದವರೆಗೆ ಪರ್ಮಿಟ್ಗೆ ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸಿ ಆನ್ಲೈನ್ನಲ್ಲೇ ಪರ್ಮಿಟ್ ಪಡೆಯಬಹುದು. ಇದರಿಂದ ಟೂರಿಸ್ಟ್ ಪರ್ಮಿಟ್ ಪಡೆಯುವ ಪ್ರಕ್ರಿಯೆ ಸರಳವಾಗುವುದರ ಜೊತೆಗೆ ರಾಜ್ಯ ಸರ್ಕಾರಗಳಿಗೆ ಬರುವ ಆದಾಯವೂ ಹೆಚ್ಚಲಿದೆ ಎಂದು ಕೇಂದ್ರ ಸರ್ಕಾರ ಹೇಳಿಕೊಂಡಿದೆ.
ಈಗಾಗಲೇ ಸರಕು ಸಾಗಣೆ ವಾಹನಗಳಿಗೆ ನ್ಯಾಷನಲ್ ಪರ್ಮಿಟ್ ನೀಡುವ ವ್ಯವಸ್ಥೆಯನ್ನು ಸಾರಿಗೆ ಸಚಿವಾಲಯ ಆನ್ಲೈನ್ಗೊಳಿಸಿದೆ. ಅದರ ಯಶಸ್ಸಿನಿಂದ ಪ್ರೇರಿತವಾಗಿ ಟೂರಿಸ್ಟ್ ವಾಹನಗಳಿಗೂ ಈ ವ್ಯವಸ್ಥೆ ತರುತ್ತಿದೆ. ಕೆಲ ಪ್ರದೇಶಗಳಲ್ಲಿ ವರ್ಷದ ಸೀಮಿತ ಅವಧಿಯಲ್ಲಿ ಮಾತ್ರ ಪ್ರವಾಸೋದ್ಯಮ ಚಟುವಟಿಕೆಗಳು ನಡೆಯುವುದರಿಂದ ಟ್ಯಾಕ್ಸಿ ಚಾಲಕರು ಸೀಮಿತ ಅವಧಿಯ ಪರ್ಮಿಟ್ ಪಡೆಯುವ ವ್ಯವಸ್ಥೆಯೂ ಇದರಡಿ ಇದೆ.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ