ಅಮ್ಮನಿಗೆ ತಕ್ಕ ಮಗ : ಒಟ್ಟೊಟ್ಟಿಗೆ ರಾಷ್ಟ್ರಪತಿ ಪುರಸ್ಕಾರ ಪಡೆದ ಅಮ್ಮ ಸಾಧನಾ ಮಗ ತರುಣ್

ಭಾರತೀಯ ಸಶಸ್ತ್ರ ಪಡೆಯ ಇತಿಹಾಸದಲ್ಲೇ ಇದೇ ಮೊದಲ ಬಾರಿ ತಾಯಿ ಮಗ ಇಬ್ಬರು ಒಂದೇ ದಿನ ಒಂದೇ ವರ್ಷ ಪ್ರತಿಷ್ಠಿತ ರಾಷ್ಟ್ರಪತಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ತಾಯಿ ಮಗನ ಈ ಸಾಧನೆ  ದೇಶ ಸೇವೆ ಹಾಗೂ ದೇಶಕ್ಕಾಗಿ ಅವರ ಕುಟುಂಬದ ಸಮರ್ಪಣೆ ನಿಷ್ಠೆಯನ್ನು ತೋರಿಸುತ್ತಿದೆ. ತಾಯಿ ಲೆಫ್ಟಿನೆಂಟ್ ಜನರಲ್ ಸಾಧನಾ ಎಸ್. ನಾಯರ್ ಅವರು ಈಗಾಗಲೇ ವಿಎಸ್ಎಂ (ವಿಶಿಷ್ಠ ಸೇವಾ ಪದಕ)ಗೆ ಭಾಜನರಾಗಿದ್ದು, ಅವರಿಗೆ ಈ ಬಾರಿ ಅವರ ಅತ್ಯುತ್ತಮ ನಾಯಕತ್ವ ಮತ್ತು ಸೈನ್ಯಕ್ಕೆ ನೀಡಿದ ಕೊಡುಗೆಗಳಿಗಾಗಿ ಅತಿ ವಿಶಿಷ್ಟ ಸೇವಾ ಪದಕ (ಎವಿಎಸ್ಎಂ) ನೀಡಿ ಗೌರವಿಸಲಾಯಿತು. ಜೊತೆಗೆ ಇದೇ ವೇಳೆ ಅವರ ಮಗ, ಸ್ಕ್ವಾಡ್ರನ್ ಲೀಡರ್ ತರುಣ್ ನಾಯರ್ ಅವರಿಗೆ ಭಾರತೀಯ ವಾಯುಪಡೆಯಲ್ಲಿನ ಅಸಾಧಾರಣ ಶೌರ್ಯಕ್ಕಾಗಿ ವಾಯು ಸೇನಾ ಪದಕ (ಶೌರ್ಯ) ನೀಡಿ ಗೌರವಿಸಲಾಯಿತು. 

ಲೆಫ್ಟಿನೆಂಟ್ ಜನರಲ್ ಸಾಧನಾ ನಾಯರ್ ಯಾರು?

ಲೆಫ್ಟಿನೆಂಟ್ ಜನರಲ್ ಸಾಧನಾ ಸಕ್ಸೇನಾ ನಾಯರ್  ಅವರು ಆಗಸ್ಟ್ 1, 2024 ರಂದು ಡೈರೆಕ್ಟರ್ ಜನರಲ್ ಮೆಡಿಕಲ್ ಸರ್ವೀಸಸ್ (ಸೈನ್ಯ) ಆಗಿ ಸೇವೆ ಸಲ್ಲಿಸಿದ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗುವ ಮೂಲಕ ಐತಿಹಾಸಿಕ ಮೈಲಿಗಲ್ಲು ಸಾಧಿಸಿದವರು. ಪುಣೆಯ ಪ್ರತಿಷ್ಠಿತ ಸಶಸ್ತ್ರ ಪಡೆಗಳ ವೈದ್ಯಕೀಯ ಕಾಲೇಜಿನಿಂದ ಪದವೀಧರೆಯಾಗಿರುವ ಅವರು, ಕುಟುಂಬ ಔಷಧದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ, ತಾಯಿ ಮತ್ತು ಮಕ್ಕಳ ಆರೋಗ್ಯ ಮತ್ತು ಆರೋಗ್ಯ ಆರೈಕೆ ನಿರ್ವಹಣೆಯಲ್ಲಿ ಡಿಪ್ಲೊಮಾ ಮತ್ತು ನವದೆಹಲಿಯ ಏಮ್ಸ್‌ನಿಂದ ವೈದ್ಯಕೀಯ ಮಾಹಿತಿಶಾಸ್ತ್ರದಲ್ಲಿ ಸುಧಾರಿತ ತರಬೇತಿಯನ್ನು ಪಡೆದಿದ್ದಾರೆ. ಅವರು ಇಸ್ರೇಲ್ ರಕ್ಷಣಾ ಪಡೆಗಳೊಂದಿಗೆ ರಾಸಾಯನಿಕ, ಜೈವಿಕ, ವಿಕಿರಣಶಾಸ್ತ್ರ ಮತ್ತು ಪರಮಾಣು (CBRN) ಯುದ್ಧ ಮತ್ತು ಸ್ವಿಸ್ ಸಶಸ್ತ್ರ ಪಡೆಗಳೊಂದಿಗೆ ಮಿಲಿಟರಿ ವೈದ್ಯಕೀಯ ನೀತಿಶಾಸ್ತ್ರದಲ್ಲಿ ವಿಶೇಷ ತರಬೇತಿಯನ್ನು ಪಡೆದಿದ್ದಾರೆ. 

ಇದಕ್ಕೂ ಮೊದಲು, ಅವರು ಭಾರತೀಯ ವಾಯುಪಡೆಯಲ್ಲಿ ಮೊದಲ ಮಹಿಳಾ ಮಹಾನಿರ್ದೇಶಕ ಆಸ್ಪತ್ರೆ ಸೇವೆಗಳು (ಸಶಸ್ತ್ರ ಪಡೆಗಳು) ಮತ್ತು ಪಶ್ಚಿಮ ವಾಯು ಕಮಾಂಡ್ ಮತ್ತು ತರಬೇತಿ ಕಮಾಂಡ್‌ನ ಮೊದಲ ಮಹಿಳಾ ಪ್ರಧಾನ ವೈದ್ಯಕೀಯ ಅಧಿಕಾರಿ ಎಂಬ ಹೆಗ್ಗಳಿಕೆ ಗಳಿಸಿದ್ದಾರೆ. ಇದರ ಜೊತೆಗೆ ಸಾಧನಾ ನಾಯರ್ ಅವರು ಶಿಕ್ಷಣ ಕ್ಷೇತ್ರಕ್ಕೂ ಕೊಡುಗೆ ನೀಡಿದ್ದು, ರಾಷ್ಟ್ರೀಯ ಶಿಕ್ಷಣ ನೀತಿಯ ವೈದ್ಯಕೀಯ ಶಿಕ್ಷಣ ಘಟಕವನ್ನು ರೂಪಿಸಲು ಡಾ. ಕಸ್ತೂರಿರಂಗನ್ ಸಮಿತಿಯ ಪರಿಣಿತ ಸದಸ್ಯರಾಗಿದ್ದರು. , ಮಿಲಿಟರಿ ವೈದ್ಯಕೀಯ ಕ್ಷೇತ್ರದಲ್ಲಿ ವೃತ್ತಿ ಆಯ್ಕೆ ಮಾಡಿಕೊಳ್ಳಲು ಬಯಸುವ ಹಾಗೂ ಸಶಸ್ತ್ರ ಪಡೆಗಳಲ್ಲಿ ಕೆಲಸ ನಿರ್ವಹಿಸಲು ಬಯಸುವ ಅನೇಕ ಮಹಿಳೆಯರಿಗೆ ಸ್ಫೂರ್ತಿಯಾಗಿದ್ದು, ಇದೇ ಕಾರಣಕ್ಕೆ ಅವರಿಗೆ  ವಿಶಿಷ್ಟ ಸೇವಾ ಪದಕವನ್ನು ನೀಡಲಾಗುತ್ತಿದೆ. 

ಸ್ಕ್ವಾಡ್ರನ್ ಲೀಡರ್ ತರುಣ್ ನಾಯರ್ ಯಾರು?

ಲೆಫ್ಟಿನೆಂಟ್ ಜನರಲ್ ಸಾಧನಾ ಸಕ್ಸೇನಾ ನಾಯರ್ ಅವರ ಪುತ್ರನೂ ಆಗಿರುವ ಸ್ಕ್ವಾಡ್ರನ್ ಲೀಡರ್ ತರುಣ್ ನಾಯರ್ ಅವರು ವಾಯುಪಡೆಯ ಪೈಲಟ್ ಆಗಿ ಆಯ್ಕೆಯಾಗಿದ್ದಾರೆ. BharatRakshak.com ಪ್ರಕಾರ, ಅವರು ಜೂನ್ 16, 2018 ರಂದು ವಾಯುಪಡೆಗೆ ನಿಯೋಜನೆಗೊಂಡಿದ್ದಾರೆ.  

ಈ ಅಮ್ಮ ಮಗನ ಅಪರೂಪದ ಮತ್ತು ಸ್ಪೂರ್ತಿದಾಯಕ ಸಾಧನೆಯು ರಾಷ್ಟ್ರದ ಬಗೆಗಿನ ಅವರ ಪ್ರೀತಿ ಬದ್ಧತೆ ಮತ್ತು ಅವರ ಕ್ಷೇತ್ರಗಳಲ್ಲಿನ ತ್ಯಾಗ ಮತ್ತು ಶ್ರೇಷ್ಠತೆಯ ಮೌಲ್ಯಗಳನ್ನು ಒತ್ತಿ ಹೇಳುತ್ತದೆ. ಲೆಫ್ಟಿನೆಂಟ್ ಜನರಲ್ ಸಾಧನಾ ನಾಯರ್ ಅವರ ವೃತ್ತಿಜೀವನವು ಸೇನಾ ಕಾರ್ಯಾಚರಣೆಯ ಸಿದ್ಧತೆ ಮತ್ತು ಕಲ್ಯಾಣ ಉಪಕ್ರಮಗಳ ಮೇಲಿನ ಅವರ ಅಚಲ ಗಮನವನ್ನು ಪ್ರತಿಬಿಂಬಿಸಿದರೆ, ಸ್ಕ್ವಾಡ್ರನ್ ಲೀಡರ್ ತರುಣ್ ನಾಯರ್ ಅವರ ಶೌರ್ಯವು ಭಾರತೀಯ ವಾಯುಪಡೆಯ ಧೈರ್ಯ ಮತ್ತು ಕೌಶಲ್ಯವನ್ನು ಸಾಕಾರಗೊಳಿಸುತ್ತದೆ.