IIT ಕಾನ್ಪುರಕ್ಕೆ 100 ಕೋಟಿ ದೇಣಿಗೆ, ಇಷ್ಟು ದೊಡ್ಡ ಮೊತ್ತ ನೀಡಿದ ರಾಕೇಶ್ ಗಂಗ್ವಾಲ್ ಯಾರು?

* ಇಂಡಿಗೋ ಏರ್‌ಲೈನ್ಸ್ ಸಹ ಸಂಸ್ಥಾಪಕ ರಾಕೇಶ್ ಗಂಗ್ವಾಲ್  * ಐಐಟಿ ಕಾನ್ಪುರಕ್ಕೆ 100 ಕೋಟಿ ದೇಣಿಗೆ ನೀಡಲು ಮುಂದಾದ ರಾಕೇಶ್ ಗಂಗ್ವಾಲ್ * ಮೊದಲ ಬಾರಿಗೆ ಹಳೆಯ ವಿದ್ಯಾರ್ಥಿಯೊಬ್ಬರು ಇಷ್ಟು ದೊಡ್ಡ ಆರ್ಥಿಕ ಸಹಾಯವನ್ನು ನೀಡಿದ್ದಾರೆ

ಕಾನ್ಪುರ(ಮಾ.05) ಇಂಡಿಗೋ ಏರ್‌ಲೈನ್ಸ್ ಸಹ ಸಂಸ್ಥಾಪಕ ರಾಕೇಶ್ ಗಂಗ್ವಾಲ್ ಐಐಟಿ ಕಾನ್ಪುರಕ್ಕೆ 100 ಕೋಟಿ ದೇಣಿಗೆ ನೀಡಲಿದ್ದಾರೆ. ಅವರು ಸೋಮವಾರ ಈ ಘೋಷಣೆ ಮಾಡಿದ್ದಾರೆ. ಮೊದಲ ಬಾರಿಗೆ ಹಳೆಯ ವಿದ್ಯಾರ್ಥಿಯೊಬ್ಬರು ಇಷ್ಟು ದೊಡ್ಡ ಆರ್ಥಿಕ ಸಹಾಯವನ್ನು ನೀಡಿದ್ದಾರೆ. ಈ ನಿಧಿಯನ್ನು ಸ್ಕೂಲ್ ಆಫ್ ಮೆಡಿಕಲ್ ಸೈನ್ಸ್ ಅಂಡ್ ಟೆಕ್ನಾಲಜಿಗೆ ಬಳಸಲಾಗುತ್ತದೆ. ಇದರ ಕಟ್ಟಡವನ್ನು ಈಗಾಗಲೇ ಐಐಟಿ ಕಾನ್ಪುರದಲ್ಲಿ ಸಿದ್ಧಪಡಿಸಲಾಗುತ್ತಿದೆ. ಈ ಹೊಸ ಸಂಸ್ಥೆಯ ಸಲಹಾ ಮಂಡಳಿಯಲ್ಲಿ ಗಂಗ್ವಾಲ್ ಕೂಡ ಇರುತ್ತಾರೆ.

ಐಐಟಿ ಕಾನ್ಪುರದ ನಿರ್ದೇಶಕ ಅಭಯ್ ಕರಂಡಿಕರ್ ಅವರು ಸೋಮವಾರ ಮುಂಬೈನಲ್ಲಿ ಗಂಗ್ವಾಲ್ ಅವರನ್ನು ಭೇಟಿಯಾದರು, ಅಲ್ಲಿ ಗಂಗ್ವಾಲ್ ಅವರು ತಮ್ಮ ಹಿಂದಿನ ಕಾಲೇಜಿಗೆ ದೇಣಿಗೆ ನೀಡುವುದಾಗಿ ಘೋಷಿಸಿದರು. 600 ಕೋಟಿ ವೆಚ್ಚದ ಈ ಯೋಜನೆಗೆ ಐಐಟಿ ಕಾನ್ಪುರ ದೇಣಿಗೆ ಸಂಗ್ರಹಿಸುತ್ತಿದೆ. ಯೋಜನೆಯ ಪ್ರಕಾರ, ಈ ಹೊಸ ಸಂಸ್ಥೆಯಲ್ಲಿ ಒಟ್ಟು 9 ಸುಧಾರಿತ ಸಂಶೋಧನಾ ಕೇಂದ್ರಗಳನ್ನು ನಿರ್ಮಿಸಲಾಗುವುದು.

5 ವರ್ಷಗಳಲ್ಲಿ ಕಾಮಗಾರಿ ಪೂರ್ಣಗೊಳ್ಳಲಿದೆ

IIT-ಕಾನ್ಪುರ್ ವೈದ್ಯಕೀಯವನ್ನು ಎಂಜಿನಿಯರಿಂಗ್‌ನೊಂದಿಗೆ ಸಂಯೋಜಿಸಲು ಮತ್ತು ಈ ಕ್ರಮದ ಮೂಲಕ ಕಲಿಕೆಯನ್ನು ಪ್ರೋತ್ಸಾಹಿಸಲು ಪ್ರಯತ್ನಿಸುತ್ತದೆ. ಶಾಲೆ ಮತ್ತು ವೈದ್ಯಕೀಯ ಕಾಲೇಜುಗಳ ನಿರ್ಮಾಣ ಪ್ರದೇಶವು ಸುಮಾರು ಒಂದು ಮಿಲಿಯನ್ ಚದರ ಅಡಿಗಳಷ್ಟು ಇರುತ್ತದೆ. ಈ ಯೋಜನೆಯ ಮೊದಲ ಹಂತ ಮೂರರಿಂದ ಐದು ವರ್ಷಗಳಲ್ಲಿ ಪೂರ್ಣಗೊಳ್ಳಲಿದೆ.

ಗಂಗ್ವಾಲ್ ಹೇಳಿದ್ದೇನು?

ಈ ವೈದ್ಯಕೀಯ ಸಂಸ್ಥೆಯನ್ನು ಗಂಗ್ವಾಲ್ ಸ್ಕೂಲ್ ಆಫ್ ಮೆಡಿಕಲ್ ಸೈನ್ಸಸ್ ಅಂಡ್ ಟೆಕ್ನಾಲಜಿ ಎಂದು ಹೆಸರಿಸಲಾಗುವುದು. ಮುಂಬೈನಲ್ಲಿ ಈ ಸಂದರ್ಭದಲ್ಲಿ ಗಂಗ್ವಾಲ್ ತಮ್ಮ ಇಡೀ ಕುಟುಂಬದೊಂದಿಗೆ ತಲುಪಿದರು. ವಿವಿಧ ಕ್ಷೇತ್ರಗಳಲ್ಲಿ ಸಾವಿರಾರು ನಾಯಕರನ್ನು ರೂಪಿಸಿರುವ ಸಂಸ್ಥೆ ಈಗ ಆರೋಗ್ಯ ಕ್ಷೇತ್ರದಲ್ಲಿ ಮುನ್ನಡೆಯಲು ಶ್ರಮಿಸುತ್ತಿರುವುದನ್ನು ಕಂಡು ಹೆಮ್ಮೆಪಡುತ್ತೇನೆ ಎಂದು ಗಂಗ್ವಾಲ್ ಹೇಳಿದರು. ಈ ಸಂಸ್ಥೆಯು ಆರೋಗ್ಯ ರಕ್ಷಣೆಯಲ್ಲಿ ಹೊಸ ಎತ್ತರವನ್ನು ಸಾಧಿಸಲಿದೆ.

ಗಂಗ್ವಾಲ್ ಅವರ ವೃತ್ತಿಜೀವನ

1953 ರಲ್ಲಿ ಜನಿಸಿದ ರಾಕೇಶ್ ಗಂಗ್ವಾಲ್ ಕೋಲ್ಕತ್ತಾದ ಡಾನ್ ಬಾಸ್ಕೋದಲ್ಲಿ ತಮ್ಮ ಶಾಲಾ ಶಿಕ್ಷಣವನ್ನು ಪಡೆದರು. ಇದಾದ ನಂತರ ಅವರು 1975 ರಲ್ಲಿ ಐಐಟಿ ಕಾನ್ಪುರದಿಂದ ಮೆಕ್ಯಾನಿಕಲ್ ಎಂಜಿನಿಯರಿಂಗ್‌ನಲ್ಲಿ ಪದವಿ ಪಡೆದರು. ಅವರು ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾನಿಲಯದ ವಾರ್ಟನ್ ಸ್ಕೂಲ್‌ನಿಂದ ಎಂಬಿಎ ಪದವಿಯನ್ನು ಸಹ ಹೊಂದಿದ್ದಾರೆ. ಅವರು ಇಂಡಿಗೋದಲ್ಲಿ 37 ರಷ್ಟು ಪಾಲನ್ನು ಹೊಂದಿದ್ದಾರೆ. ಈಗ ಅವರು ಅಮೇರಿಕಾದಲ್ಲಿ ವಾಸಿಸುತ್ತಿದ್ದಾರೆ. 2020 ರಲ್ಲಿ, ಅವರು ಅಮೆರಿಕದ ಶ್ರೀಮಂತ ವ್ಯಕ್ತಿಗಳ ಫೋರ್ಬ್ಸ್ 400 ಪಟ್ಟಿಯಲ್ಲಿ 359 ನೇ ಸ್ಥಾನದಲ್ಲಿದ್ದರು.