ಭಾರತ: 6.8 ಕೋಟಿ ಟನ್ ಆಹಾರ ವ್ಯರ್ಥ!| ವ್ಯಕ್ತಿಯೊಬ್ಬನಿಂದ ವರ್ಷಕ್ಕೆ 50 ಕೇಜಿ ಆಹಾರ ನಿರುಪಯುಕ್ತ
ವಿಶ್ವಸಂಸ್ಥೆ(ಮಾ.06): 2019ರಲ್ಲಿ ವಿಶ್ವಾದ್ಯಂತ ಒಟ್ಟಾರೆ 93 ಕೋಟಿ ಟನ್ನಷ್ಟುಪ್ರಮಾಣದ ಆಹಾರ ವ್ಯರ್ಥವಾಗಿದೆ ಎಂದು ವಿಶ್ವಸಂಸ್ಥೆ ವರದಿಯೊಂದು ಹೇಳಿದೆ. ವಿಶ್ವಸಂಸ್ಥೆಯ ಪರಿಸರ ಕಾರ್ಯಕ್ರಮದ ಆಹಾರ ಪೋಲು ಸೂಚ್ಯಂಕ ವರದಿ-2021ರ ಅನ್ವಯ ಭಾರತದಲ್ಲೂ 1 ವರ್ಷದಲ್ಲಿ 6.8 ಕೋಟಿ ಟನ್ನಷ್ಟುಪ್ರಮಾಣದ ಆಹಾರ ಉಪಯೋಗಕ್ಕೆ ಬಾರದೆ ಹಾಳಾಗಿದೆ ಎಂದು ಉಲ್ಲೇಖಿಸಲಾಗಿದೆ.
ಇದರಲ್ಲಿ ಶೇ.69ರಷ್ಟುಪ್ರಮಾಣದ ಆಹಾರವು ಮನೆಗಳಿಂದ ಆದರೆ, ಶೇ.26ರಷ್ಟುಆಹಾರ ಸೇವೆ ಕಲ್ಪಿಸುವ ಹೋಟೆಲ್ ಸೇರಿ ಇನ್ನಿತರ ಸಂಸ್ಥೆಗಳಿಂದ ಮತ್ತು ಶೇ.13ರಷ್ಟುಆಹಾರ ನಿರುಪಯೋಗವು ಚಿಲ್ಲರೆ ಮಳಿಗಳಿಂದ ಪೋಲಾಗುತ್ತಿದೆ. ತನ್ಮೂಲಕ ಜಾಗತಿಕ ಆಹಾರ ಉತ್ಪಾದನೆಯ ಶೇ.17ರಷ್ಟು ಪ್ರಮಾಣದ ಆಹಾರವು ವ್ಯರ್ಥವಾಗುತ್ತಿದೆ ಎಂದು ತಿಳಿಸಲಾಗಿದೆ.
ವರ್ಷಕ್ಕೆ 6,87,60,163 ಟನ್ನಷ್ಟುಆಹಾರ ವ್ಯರ್ಥವಾಗಿರುವ ಭಾರತದಲ್ಲಿ ಪ್ರತಿಯೊಬ್ಬ ಭಾರತೀಯನಿಂದ ವರ್ಷಕ್ಕೆ ಸರಾಸರಿ 50 ಕೇಜಿಯಷ್ಟುಆಹಾರ ನಿರುಪಯುಕ್ತವಾಗುತ್ತಿದೆ. ಆದರೆ ಅಮೆರಿಕದ ಪ್ರಜೆಯೊಬ್ಬ ವರ್ಷಕ್ಕೆ 59 ಕೇಜಿ ಮತ್ತು ಚೀನಾದಲ್ಲಿ 64 ಕೇಜಿಯಷ್ಟುಆಹಾರವನ್ನು ವ್ಯರ್ಥ ಮಾಡುತ್ತಾನೆ. ಹೀಗಾಗಿ ಹವಾಮಾನ ವೈಪರಿತ್ಯದ ವಿರುದ್ಧ ನಾವು ಗಂಭೀರ ಕ್ರಮ ವಹಿಸಬೇಕಾದರೆ ಮೊದಲು ಆಹಾರದ ವ್ಯರ್ಥ ತಡೆಯಬೇಕು ಎಂದು ವಿಶ್ವಸಂಸ್ಥೆಯ ಪರಿಸರ ವಿಭಾಗದ ಕಾರ್ಯಕಾರಿ ನಿರ್ದೇಶಕ ಪ್ರತಿಪಾದಿಸಿದ್ದಾರೆ.