ಮೋದಿ ಅವಹೇಳನ: ರಾಹುಲ್‌ ಅರ್ಜಿ ತಿರಸ್ಕಾರಕ್ಕೆ ಸುಪ್ರೀಂಗೆ ಪೂರ್ಣೇಶ್‌ ಮನವಿ

ಮೋದಿ ಉಪನಾಮ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಸುಪ್ರೀಂಕೋರ್ಟ್‌ಗೆ ಸಲ್ಲಿಸಿರುವ ಮೇಲ್ಮನವಿ ಅರ್ಜಿಯನ್ನು ತಿರಸ್ಕರಿಸಬೇಕು ಎಂದು ಬಿಜೆಪಿ ನಾಯಕ, ಸಚಿವ ಪೂರ್ಣೇಶ್‌ ಮೋದಿ ಮನವಿ ಸಲ್ಲಿಸಿದ್ದಾರೆ.

ನವದೆಹಲಿ: ಮೋದಿ ಉಪನಾಮ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಸುಪ್ರೀಂಕೋರ್ಟ್‌ಗೆ ಸಲ್ಲಿಸಿರುವ ಮೇಲ್ಮನವಿ ಅರ್ಜಿಯನ್ನು ತಿರಸ್ಕರಿಸಬೇಕು ಎಂದು ಬಿಜೆಪಿ ನಾಯಕ, ಸಚಿವ ಪೂರ್ಣೇಶ್‌ ಮೋದಿ ಮನವಿ ಸಲ್ಲಿಸಿದ್ದಾರೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಪ್ರೀಂಕೋರ್ಟ್ ನೀಡಿದ್ದ ನೋಟಿಸ್‌ಗೆ ಉತ್ತರಿಸಿದ ಪೂರ್ಣೇಶ್‌, ತಮ್ಮ ವಕೀಲರ ಮೂಲಕ 21 ಪುಟಗಳ ಲಿಖಿತ ಉತ್ತರವನ್ನು ಸಲ್ಲಿಸಿದ್ದಾರೆ. 

ರಾಹುಲ್‌ ಗಾಂಧಿ ಅವರ ಹೇಳಿಕೆಯಿಂದ ಗುಜರಾತ್‌ನಲ್ಲಿರುವ ‘ಮೋದಿ ವಾನಿಕ್‌’ ಸಮುದಾಯದವರಿಗೆಲ್ಲಾ ಅವಮಾನವಾಗಿದೆ. ಹಾಗಾಗಿ ಈ ಪ್ರಕರಣದಲ್ಲಿ ರಾಹುಲ್‌ ಗಾಂಧಿಗೆ ಶಿಕ್ಷೆಯಾಗಬೇಕಿರುವುದು ಸರಿಯಿದೆ. ರಾಹುಲ್‌ ಮೇಲ್ಮನವಿಯನ್ನು ಕೋರ್ಟ್ ವಜಾ ಮಾಡಬೇಕು ಎಂದು ಕೋರಿದ್ದಾರೆ. ಹಲವು ಅಪರೂಪದ ಪ್ರಕರಣಗಳಲ್ಲಿ ಶಿಕ್ಷೆಗೆ ತಡೆ ನೀಡಲಾಗುತ್ತದೆ. ಆದರೆ ರಾಹುಲ್‌ ಗಾಂಧಿ ಪ್ರಕರಣ ಈ ಗುಂಪಿಗೆ ಸೇರುವುದಿಲ್ಲ. ಈ ಪ್ರಕರಣದಲ್ಲಿ ನ್ಯಾಯಾಲಯ ನೀಡಿರುವ ತೀರ್ಪು ದೋಷಾತೀತವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಮೇಲಿನ ವೈಯಕ್ತಿಕ ದ್ವೇಷದಿಂದ ಈ ಮಾತನ್ನು ರಾಹುಲ್‌ ಆಡಿದ್ದಾರೆ. ಆದರೆ ಇದಕ್ಕಾಗಿ ಮೋದಿ ಹೆಸರಿನ ಉಪನಾಮ ಹೊಂದಿರುವ ಎಲ್ಲರನ್ನು ಅವಮಾನಿಸುವುದು ತಪ್ಪು. ಹಾಗಾಗಿ ರಾಹುಲ್‌ಗಾಂಧಿಗೆ ನೀಡಿರುವ ಶಿಕ್ಷೆಗೆ ಯಾವುದೇ ಅನುಕಂಪ ತೋರಿಸಬಾರದು’ ಎಂದು ಅವರು ಹೇಳಿದ್ದಾರೆ.

ಸೂರತ್‌ ಕೋರ್ಟ್ ನೀಡಿದ್ದ ಶಿಕ್ಷೆಯನ್ನು ಗುಜರಾತ್‌ ಹೈಕೋರ್ಟ್‌ ಎತ್ತಿಹಿಡಿದಿದ್ದ ಕಾರಣ ರಾಹುಲ್‌ ಸುಪ್ರೀಂಕೋರ್ಟ್ ಮೊರೆ ಹೋಗಿದ್ದರು. ಆ.4ರಂದು ಈ ಅರ್ಜಿಯ ವಿಚಾರಣೆ ನಡೆಯಲಿದೆ.