200 ಕೋಟಿ ರೂಪಾಯಿ ಸುಲಿಗೆ ಪ್ರಕರಣ, ಸುಕೇಶ್ ಚಂದ್ರಶೇಕರ್ ಪತ್ನಿ ಜಾಮೀನು ಅರ್ಜಿ ವಜಾ!

200 ಕೋಟಿ ಸುಲಿಗೆ ಪ್ರಕರಣದಲ್ಲಿ ಬಂಧನದಲ್ಲಿರುವ ಸುಕೇಶ್ ಚಂದ್ರಶೇಖರ್ ಹಾಗೂ ಪತ್ನಿ ಲೀನಾ ಮರಿಯಾ ಪೌಲೋಸ್‌ಗೆ ಮತ್ತೆ ಹಿನ್ನಡೆಯಾಗಿದೆ. ಜಾಮೀನಿಗಾಗಿ ಅರ್ಜಿ ಸಲ್ಲಿಸಿದ್ದ ಲೀನಾ ಮರಿಯಾಗೆ ಕೋರ್ಟ್ ಬೇಲ್ ನೀಡಲು ನಿರಾಕರಿಸಿದೆ.

ನವದೆಹಲಿ(ಜು.11) ಅಕ್ರಮ ಹಣ ವರ್ಗಾವಣೆ, ಸುಲಿಗೆ ಪ್ರಕರಣದಡಿ ಜೈಲು ಪಾಲಾಗಿರುವ ಬೆಂಗಳೂರು ಮೂಲದ ಸುಕೇಶ್ ಚಂದ್ರಶೇಕರ್ ಹಾಗೂ ಆತನ ಪತ್ನಿ ಲೀನಾ ಮರಿಯಾ ಪೌಲೋಸ್ ಸಂಕಷ್ಟ ಹೆಚ್ಚಾಗಿದೆ. ಜೈಲಿನಿಂದ ಬಿಡುಗಡೆ ಮಾಡಲು ಹೈಕೋರ್ಟ್ ಮೊರೆ ಹೋಗಿದ್ದ ಪತ್ನಿ ಲೀನಾ ಮರಿಯಾ ಪೌಲೋಸ್ ಅರ್ಜಿ ತಿರಸ್ಕೃತಗೊಂಡಿದೆ. ಆರೋಪಿ ಲೀನಾ ಮರಿಯಾ ಪೌಲೋಸ್‌ಗೆ ಜಾಮೀನು ನೀಡಲು ಸಾಧ್ಯವಿಲ್ಲ ಎಂದು ಕೋರ್ಟ್ ಹೇಳಿದೆ. ಇದೇ ಪ್ರಕರಣದಲ್ಲಿ ಬಂಧನದಲ್ಲಿರುವ ಆರೋಪಿಗಳಾದ ಕಮಲೇಶ್ ಕೊಠಾರಿ, ಬಿ ಮೋಹನ್ ರಾಜ್ ಅವರ ಜಾಮೀನು ಅರ್ಜಿ ಕೂಡ ವಜಾಗೊಂಡಿದೆ.

ಜಸ್ಟೀಸ್ ದಿನೇಶ್ ಕುಮಾರ್ ಶರ್ಮಾ ಅವರಿದ್ದ ಪೀಠ  ಲೀನಾ ಮರಿಯಾ ಸೇರಿ ಮೂವರ ಜಾಮೀನು ಅರ್ಜಿಯನ್ನು ವಜಾಗೊಳಿಸಿದ್ದಾರೆ. ಚೆನ್ನೈನಲ್ಲಿ ಬಂಗಲೆ ಖರೀದಿಸಿರುವ ಚಂದ್ರಶೇಖರ್ ಹಾಗೂ ಪತ್ನಿ ಮರಿಯಾ ಭಾರಿ ವಂಚನೆ ಮಾಡಿದ್ದಾರೆ ಅನ್ನೋ ಆರೋಪ ಕೇಳಿಬಂದಿತ್ತು. ಈ ಪ್ರಕರಣ ವಿಚಾರಣೆ ನಡೆಸಿದ ದೆಹಲಿ ಪೊಲೀಸರ ಆರ್ಥಿಕ ಅಪರಾಧ ವಿಭಾಗ ಲೀನಾ ಮರಿಯಾರನ್ನು ಬಂಧಿಸಿತ್ತು. ವಿಚಾರಣೆ ವೇಳೆ 200 ಕೋಟಿ ಸುಲಿಗೆ ಪ್ರಕರಣದಲ್ಲೂ ಲೀನಾ ಆರೋಪಿಯಾಗಿರುವುದು ಪತ್ತೆಯಾಗಿತ್ತು.

ವಂಚನೆ ಆರೋಪದಡಿ ಜೈಲು ಸೇರಿದ ಸುಕೇಶ್ ಚಂದ್ರಶೇಖರ್ ಜೈಲಿನಿಂದಲೇ ತನ್ನ ವಂಚನೆ ಮುಂದುವರಿಸಿದ್ದ. ಸುಕೇಶ್ ಸುಲಿಗೆಯಲ್ಲಿ ಈತ ಪತ್ನಿ ಲೀನಾ ಮರಿಯಾ ಪೌಲೋಸ್ ಕೂಡ ಭಾಗಿಯಾಗಿದ್ದರು. ಸುಕೇಶ್ ಚಂದ್ರಶೇಕರ್ ಪ್ರಭಾವಿಯೊಬ್ಬರನ್ನು ಜೈಲಿನಿಂದ ಬಿಡುಗಡೆ ಮಾಡಿಸಲು ಬರೋಬ್ಬರಿ 200 ಕೋಟಿ ರೂಪಾಯಿ ಸುಲಿಗೆ ಮಾಡಿದ ಪ್ರಕರಣ ಇದಾಗಿದೆ. 

ಶಿವಿಂದರ್ ಸಿಂಗ್ ಅನ್ನೋ ವ್ಯಕ್ತಿ ಗಂಭೀರ ಪ್ರಕರಣ ಸಂಬಂಧ ಜೈಲು ಪಾಲಾಗಿದ್ದರು. ಶಿವಿಂದರ್ ಸಿಂಗ್ ಅನ್ನೋ ವ್ಯಕ್ತಿಯನ್ನು ಬಿಡುಗಡೆ ಮಾಡಲು ಆದಿತಿ ಸಿಂಗ್ ಹಾಗೂ ಆತನ ಸಹೋದರಿ ಪ್ರಯತ್ನಿಸಿರುವು ಮಾಹಿತಿ ಪಡೆದ ಸುಕೇಶ್ ಚಂದ್ರಶೇಕರ್ ಅತೀ ದೊಡ್ಡ ಪ್ಲಾನ್ ಮಾಡಿದ್ದ. ತಾನು ಪ್ರಧಾನಿ ಕಾರ್ಯಾಲದ ವಿಶೇಷ ಅಧಿಕಾರಿ ಎಂದು ಪರಿಚಯ ಮಾಡಿಕೊಂಡಿದ್ದ. ಆದಾಯ ತೆರೆಗಿ, ಗುಪ್ತಚರ ಇಲಾಖೆ ಸೇರಿದಂತೆ ಕೆಲ ಇಲಾಖೆಗಳ ತನ್ನ ಅಧೀನಕ್ಕೆ ಬರುತ್ತದೆ. ಕೆಲ ಕುಟುಂಬಗಳ ಜೊತೆ ಮಾತನಾಡಲು ತನ್ನನು ನಿಯೋಜಿಸಲಾಗಿದೆ ಎಂದು ಪರಿಚಯ ಮಾಡಿಕೊಂಡು ಸುಲಿಗೆ ಆರಂಭಿಸಿದ್ದಾನೆ.

ಸುಕೇಶ್ ಚಂದ್ರಶೇಖರ್‌ಗೆ ಈತನ ಪತ್ನಿ ಲೀನಾ ಮರಿಯಾ ಪೌಲೋಸ್ ಕೂಡ ಸಾಥ್ ನೀಡಿದ್ದಾಳೆ. ಈ ಪ್ರಕರಣದಡಿ ಬರೋಬ್ಬರಿ 200 ಕೋಟಿ ರೂಪಾಯಿ ಸುಲಿಗೆ ಮಾಡಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.   ಜೈಲಿನಲ್ಲಿದ್ದ ಸುಕೇಶ್ ಚಂದ್ರಶೇಕರ್ ಜೈಲು ಸಿಬ್ಬಂದಿಗಳಿಗೆ ಕೋಟಿ ಕೋಟಿ ರೂಪಾಯಿ ಲಂಚ ನೀಡಿರವುದು ಪತ್ತೆಯಾಗಿತ್ತು. ಈ ಮೂಲಕ ತನಗೆ ಯಾರನ್ನು ಬೇಕಾದರು ಭೇಟಿಯಾಗಲು ಮಾತುಕತೆ ನಡೆಸುವ ಅವಕಾಶವನ್ನು ಸೃಷ್ಟಿಕೊಂಡಿದ್ದ.