ಇತ್ತೀಚೆಗೆ ಗ್ಯಾನವಾಪಿ ಮಸೀದಿಯಲ್ಲಿ ಪತ್ತೆಯಾಗಿರುವ ಶಿವಲಿಂಗದ ಕುರಿತು ಮಾತನಾಡಿರುವ ಆಲ್ ಇಂಡಿಯಾ ಇಮಾಮ್ ಅಸೋಸಿಯೇಷನ್ ಅಧ್ಯಕ್ಷ ಮೌಲಾನಾ ಸಾಜಿದ್ ರಶೀದಿ, ಇದು ಹಳೆಯ ಕಾರಂಜಿಯ ಭಾಗವಾಗಿದೆಯೇ ಹೊರತು ಶಿವಲಿಂಗವಲ್ಲ ಎಂದಿದ್ದಾರೆ.
ನವದೆಹಲಿ (ಮೇ.19): ಗ್ಯಾನವಾಪಿ ಮಸೀದಿಯಲ್ಲಿ(Gyanvapi Masjid ) ಪತ್ತೆಯಾಗಿರುವ ಶಿವಲಿಂಗದ ಕುರಿತಾಗಿ ರಾಷ್ಟ್ರಮಟ್ಟದಲ್ಲಿ ದೊಡ್ಡ ಪ್ರಮಾಣದ ಚರ್ಚೆ ನಡೆಯುತ್ತಿರುವ ಹೊತ್ತಿನಲ್ಲಿಯೇ, ಆಲ್ ಇಂಡಿಯಾ ಇಮಾಮ್ ಅಸೋಸಿಯೇಷನ್ ಅಧ್ಯಕ್ಷ ಮೌಲಾನಾ ಸಾಜಿದ್ ರಶೀದಿ (All India Imam Association President Maulana Sajid Rashidi) ವಿವಾದಿತ ಹೇಳಿಕೆಯನ್ನು ನೀಡಿದ್ದಾರೆ.
ಮೊಟ್ಟಮೊದಲಿಗೆ ಹೇಳುವುದಾದರೆ, ಹಿಂದೂ ಎನ್ನುವುದು ಧರ್ಮವೇ ಅಲ್ಲ. ಗ್ಯಾನವಾಪಿ ಮಸೀದಿಯಲ್ಲಿ ಪತ್ತೆಯಾಗಿರುವ ಶಿವಲಿಂಗ ಎಂದು ಹೇಳಲಾಗುತ್ತಿರುವ ಆಕೃತಿಯ ಬಗ್ಗೆ ಅನಗತ್ಯವಾಗಿ ಸಂಭ್ರಮ ಪಡುತ್ತಿದ್ದಾರೆ ಎಂದು ಹೇಳಿದ್ದಾರೆ. ಅದು ಶಿವಲಿಂಗವಲ್ಲ, ಕಾರಂಜಿ (fountain) ಎಂದು ಕರೆದ ಸಾಜೀದ್ ರಶೀದಿ ಹಿಂದೂ ಸಂಸ್ಕೃತಿ ಮತ್ತು ನಂಬಿಕೆಯನ್ನು ಅವಮಾನಿಸಲು ಹಲವಾರು ಪ್ರಯತ್ನಗಳನ್ನು ಮಾಡಿದರು.
ಅಂಬರ್ ಜೈದಿ ಅವರೊಂದಿಗಿನ ವಿಶೇಷ ಸಂದರ್ಶನದಲ್ಲಿ, ಮೌಲಾನಾ ನ್ಯಾಯಾಂಗವು ಹಿಂದೂಗಳ ಪರವಾಗಿ ಪಕ್ಷಪಾತದ ಆದೇಶವನ್ನು ಹೊರಡಿಸಿದೆ ಎಂದು ಆರೋಪಿಸಿದರು. “ಭಾರತದ ಯಾವುದೇ ನ್ಯಾಯಾಲಯವು 1947 ರಿಂದ ಅಸ್ತಿತ್ವದಲ್ಲಿರುವ ಧಾರ್ಮಿಕ ಸ್ಥಳಗಳಲ್ಲಿ ಹಸ್ತಕ್ಷೇಪ ಮಾಡುವ ಹಕ್ಕನ್ನು ಹೊಂದಿಲ್ಲ ಮತ್ತು ಪೂಜಾ ಸ್ಥಳಗಳ ಕಾಯಿದೆಯನ್ನು ಧಿಕ್ಕರಿಸುವ ಅರ್ಜಿಗಳನ್ನು ಯಾವುದೇ ನ್ಯಾಯಾಲಯವು ಅನುಮತಿಸುವುದಿಲ್ಲ. ಈ ಪ್ರಕರಣದಲ್ಲಿ, ನ್ಯಾಯಾಲಯವು ಅರ್ಜಿಯನ್ನು ಅಂಗೀಕರಿಸಿತು, ವೀಡಿಯೊಗ್ರಫಿ ಸಮೀಕ್ಷೆಗೆ ಅವಕಾಶ ಮಾಡಿಕೊಟ್ಟಿತು ಮತ್ತು ಈಗ ವುಜುಖಾನಾದಲ್ಲಿ ಮುಸ್ಲಿಮರ ಪ್ರವೇಶವನ್ನು ನಿರ್ಬಂಧಿಸುವ ಮೂಲಕ ಮಸೀದಿಗಳ ಧಾರ್ಮಿಕ ಆಚರಣೆಗಳಲ್ಲಿ ಹಸ್ತಕ್ಷೇಪ ಮಾಡಿದೆ. ವುಝು ನಮಾಜ್‌ನ ಪ್ರಮುಖ ಭಾಗವಾಗಿದೆ ಮತ್ತು ಇಲ್ಲಿನ ಇಸ್ಲಾಮಿಕ್ ಧಾರ್ಮಿಕ ಆಚರಣೆಯನ್ನು ಹಾಳುಮಾಡಲು ನ್ಯಾಯಾಲಯ ಕಾರಣವಾಗಿದೆ” ಎಂದು ಅವರು ಆರೋಪಿಸಿದರು.
ಮೌಲಾನಾ ಸಾಜಿದ್ ರಶೀದಿ ಅವರು ಅಯೋಧ್ಯೆ ತೀರ್ಪು ಹಿಂದೂಗಳ (Hindu) ಪರವಾಗಿ ನೀಡಿದ್ದಕ್ಕಾಗಿ ಸುಪ್ರೀಂ ಕೋರ್ಟ್ (Supreme Court) ಮತ್ತು ನ್ಯಾಯಮೂರ್ತಿ ರಂಜನ್ ಗೊಗೋಯ್ ( Justice Ranjan Gogoi) ಅವರನ್ನು ಟೀಕಿಸಿದರು. ನ್ಯಾಯಾಲಯವು ವಾಸ್ತವಾಂಶದ ಮೇಲೆ ತೀರ್ಪು ನೀಡಲಿಲ್ಲ, ಅದು ವಿಶೇಷ ಅಧಿಕಾರವನ್ನು ಬಳಸಿ ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರಕ್ಕೆ ಭೂಮಿಯನ್ನು (Shri Ram Janmabhoomi Teerth Kshetra) ಬಿಟ್ಟುಕೊಟ್ಟಿತು ಎಂದು ಅವರು ಹೇಳಿದರು. “ನಿರ್ಧಾರವು ಪಕ್ಷಪಾತಿಯಾಗಿತ್ತು. ಆಗ ಗೊಗೊಯ್ ರಾಜ್ಯಸಭೆಯ ಮೇಲೆ ಕಣ್ಣಿಟ್ಟಿದ್ದರು. ಈ ನಿರ್ಧಾರವು ಎಎಸ್‌ಐ ಸಮೀಕ್ಷೆ ಅಥವಾ ಇತರ ಸಂಬಂಧಿತ ಸಂಗತಿಗಳನ್ನು ಆಧರಿಸಿಲ್ಲ ಎಂದು ಅವರು ಆರೋಪಿಸಿದ್ದಾರೆ.
ಮೊಘಲ್ ಚಕ್ರವರ್ತಿ ಅಕ್ಬರ್ ಆಳ್ವಿಕೆಯಿಂದಲೂ ಗ್ಯಾನವಾಪಿ ಮಸೀದಿ ಅಸ್ತಿತ್ವದಲ್ಲಿದೆ ಮತ್ತು ದೇವಾಲಯವನ್ನು ಕೆಡವಿ ಔರಂಗಜೇಬನಿಂದ ನಿರ್ಮಿಸಲಾಗಿಲ್ಲ ಎಂದು ಅವರು ಹೇಳಿದರು. “ಯಾವುದೇ ದೇವಾಲಯವನ್ನು ಕೆಡವಲಿಲ್ಲ. ಅಲ್ಲಿ ಶಿವಲಿಂಗವಿಲ್ಲ. ಇತ್ತೀಚೆಗೆ ಪತ್ತೆಯಾದ ರಚನೆಯು ಹಳೆಯ ಕಾರಂಜಿಯ ಭಾಗವಾಗಿದೆ ಮತ್ತು ಶಿವಲಿಂಗವಲ್ಲ ಎಂದು ಅವರು ಹೇಳಿದ್ದಾರೆ. ಅವರ ನಂಬಿಕೆಯನ್ನು ಬೆಂಬಲಿಸುತ್ತಾ ಅವರು ಮತ್ತಷ್ಟು ಹೇಳಿದರು, “ಹಳೆಯ ಇಸ್ಲಾಮಿಕ್ ಆಡಳಿತಗಾರರು 100 ವರ್ಷಕ್ಕೂ ಅಧಿಕ ಕಾಲ ದೇವಾಲಯವನ್ನು ನಾಶ ಮಾಡಿ ಶಿವಲಿಂಗವನ್ನು ಮಾತ್ರ ಜೋಪಾನವಾಗಿ ಇಡುವ ಮೂರ್ಖರಾಗಿದ್ದರೇ? ದೇವಾಲಯಗಳನ್ನು ನಾಶ ಮಾಡುವ ಯೋಜನೆ ಇದ್ದಿದ್ದರೆ, ಶಿವಲಿಂಗವನ್ನು ಏಕೆ ಬಿಡುತ್ತಿದ್ದರು' ಎಂದು ಹೇಳಿದ್ದಾರೆ.
ಮುಸ್ಲಿಂ ಸಮುದಾಯದ ಜನರು ಶಿವಲಿಂಗವನ್ನು ಏಕೆ ಅಪಹಾಸ್ಯ ಮಾಡುತ್ತಿದ್ದಾರೆ ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ಹಿಂದೂಗಳ ಧಾರ್ಮಿಕ ಭಾವನೆಗಳಿಗೆ ಯಾಕೆ ಧಕ್ಕೆ ತರುತ್ತಿದ್ದಾರೆ ಎನ್ನುವ ಪ್ರಶ್ನೆಗೆ, ಹಿಂದೂಗಳು ತಮ್ಮನ್ನು ತಾವೇ ಅಪಹಾಸ್ಯಕ್ಕೆ ಒಳಪಡಿಸಿಕೊಂಡಿದ್ದಾರೆ ಎಂದು ಹೇಳಿದ್ದಾರೆ. ಕಾರಂಜಿಯನ್ನು ಶಿವಲಿಂಗ ಎಂದು ಕರೆಯುವುದು ಒಂದು ದೊಡ್ಡ ತಮಾಷೆ. ಜನರು ಅದನ್ನು ಏಕೆ ಗೇಲಿ ಮಾಡುವುದಿಲ್ಲ?ಪ್ರತಿ ಗುಮ್ಮಟದ ಆಕಾರದ ರಚನೆಯು ಶಿವಲಿಂಗವಾಗಲು ಸಾಧ್ಯವಿಲ್ಲ ಎಂದು ಅವರು (ಹಿಂದೂಗಳು) ಅರ್ಥಮಾಡಿಕೊಳ್ಳಬೇಕು. ಹಿಂದೂ ಧರ್ಮ ಎಂದಿಗೂ ಧರ್ಮವಾಗಿರಲಿಲ್ಲ ಎಂದು ಹೇಳಿದ್ದಾರೆ.